NEAPOLIS

[Bag-ong Siyudad].

Usa ka siyudad sa Gresya sa amihanang tumoy sa Dagat Aegean nga nagsilbing usa ka dunggoanan alang sa Filipos. Sagad kining giisip nga mao ang modernong Kavalla. Kini nga siyudad nahimutang sa usa ka nagbuntaog nga bato nga milawis diha sa ulohan sa Gulpo sa Kavalla. Ang dunggoanan niini nahimutang sa kasadpang kiliran, ug ang Kavalla mismo nahimutang nga mga 15 km (9.5 mi) sa HS sa mga kagun-oban sa Filipos. Ang Latin nga mga inskripsiyon nagpaila nga ang siyudad sa Neapolis nagdepende sa Filipos sa kapanahonan sa Roma, ug mopatim-aw nga ang nahibiling mga bahin sa aqueduct o agianan sa tubig didto gitukod sa mga Romano. Ang gitukod sa mga Romano nga Dalan sa Egnatia nagkonektar sa Neapolis ug Filipos ug mitadlas pakasadpan hangtod sa Durazzo (Durrës) sa Dagat Adriatiko.

Didto sa Neapolis nga si apostol Pablo unang mitaak sa Uropa agig sanong sa panawagan nga “dali ngari sa Macedonia.” Gikan didto siya miadto sa Filipos, lagmit migugol siyag tulo o upat ka oras sa pagtadlas sa kabukiran tali niining duha ka siyudad. (Buh 16:9-11) Sa walay duhaduha, mga unom ka tuig sa ulahi si Pablo miagi pag-usab sa Neapolis.​—Buh 20:6.