OPEL

[Bungdo [buot ingnon, nag-ugdo, nagburot, nagtuybo, habog nga dapit]].

Ang Hebreohanong termino nga ʽOʹphel gipadapat sa duha ka paagi. Kasagaran, kini nagtumong sa usa ka habog nga bungtod o habog nga dapit. Ang usa ka porma sa termino gipadapat usab sa nagburot o nag-ugdo nga mga ugat sa lawas nga nailhan ingong mga almoranas.​—Deu 28:27; 1Sa 5:​6, 9, 12; 6:​4, 5.

Adunay usa ka bungtod o habog nga dapit nga nahimutang sa o duol sa Jerusalem nga gitawag ug ha·ʽOʹphel, o Opel. Ang giingon sa Kasulatan ug ang mga komento ni Josephus nagpunting nga ang Opel nahimutang sa HS nga bahin sa Moria. (2Cr 27:3; 33:14; Neh 3:​26, 27; 11:21) Sa unang siglo K.P., si Josephus nag-ingon nga ang Opel nahimutang sa dapit diin nag-abot ang sidlakang paril ug “ang sidlakang portiko sa templo.” (The Jewish War, V, 145 [iv, 2]) Dayag nga ang Opel mao ang nag-ugdo nga yuta nga miabot pasidlakan gikan sa HS nga bahin sa bungtod nga gitukoran sa templo sa Jerusalem.

Ang paril ug ang habog nga nahimutangan sa Opel ibabaw sa Walog sa Kidron nahimong lig-ong depensa niini. Bisan pa niana, gitagna ni Isaias nga ang “Opel,” lagmit kanang anaa sa Jerusalem, mahimong usa ka “upaw nga kapatagan.”​—Isa 32:14; itandi ang paghisgot sa torre ug “bungdo” (ʽOʹphel) sa Miq 4:8.

Ang mga eskolar nagtuo nga ang terminong ʽOʹphel sa 2 Hari 5:24 nagtumong sa usa ka habog nga bungtod o kinutaang dapit nga kasikbit sa Samaria diin didto gidala sa alagad ni Eliseo nga si Gehazi ang bahandi nga iyang nakuha gikan kang Naaman. Kini nagpakita nga ang termino gipadapat usab sa ubang mga bungdo gawas pa nianang anaa sa Jerusalem.