BUN-I

Usa ka makatakod nga sakit sa panit nga ang hitsura maoy linginong mga pat-akpat-ak. Kini nga pulong makita diha sa Bag-ong Kalibotang Hubad sa Levitico 21:20 ug 22:​22, ingong hubad sa Hebreohanong pulong nga yal·leʹpheth. Ang bun-i naggikan sa fungus, ug kini motapot diha sa mga hayop ug sa tawo. Sa mga tawo, ang bun-i mahimong motapot dili lamang sa mga bahin sa lawas nga may buhok, ilabina sa ulo sa mga bata ug sa bungot sa mga hamtong, kondili sa walay buhok usab nga bahin sa lawas. Kining bun-i diha sa walay buhok nga bahin sa lawas motubo ingong lingin, pulahon ug kolor nga pat-ak nga sagad may gagmay kaayong mga butoybutoy palibot sa kilid niini. Samtang modako ang pat-ak, ang tunga niini mahawan ug ang apektadong bahin sagad lingin tan-awon.

Bisan tuod ang yal·leʹpheth gihubad usab alang sa uban pang mga sakit sa panit, ang Hudiyohanong tradisyon naglangkit niini sa Egyptian herpes o lichen (kagid). Ang yal·leʹpheth gihubad sa mga maghuhubad sa Gregong Septuagint ingong lei·khenʹ, nga mahimong magtumong sa bun-i. Tungod niana gisugyot sa Hebreohanong mga eskolar nga si L. Koehler ug W. Baumgartner ang hubad nga “bun-i, herpes.”​—Lexicon in Veteris Testamenti Libros, Leiden, 1958, p. 383.

Ang usa ka tawo nga kaliwat sa mga saserdote ug may bun-i dili takos sa paghalad ug mga pahinungod kang Jehova. (Lev 21:​20, 21) Ug ang mga hayop nga gitaptan niini dili ikahalad ngadto sa Diyos.​—Lev 22:22.