VASTI

Ang rayna ni Ahasuero (Jerjes I) nga hari sa Persia. Sa ikatulong tuig sa iyang paghari, gipatawag ni Ahasuero ang tanang hamili, mga prinsipe, ug mga alagad gikan sa sakop nga mga distrito. Sa kataposan sa komperensiya, siya mihimog pito ka adlaw nga bangkete. Sa susama, si Vasti mihimog usa ka bangkete alang sa mga babaye diha sa harianong pinuy-anan. Sa ikapitong adlaw, gisugo ni Ahasuero ang iyang mga opisyal sa palasyo nga dad-on si Vasti nga magsul-ob sa harianong purong, aron ang tanan makakita sa iyang kaanyag. (Mopatim-aw nga ang rayna kasagarang mokaon diha sa lamesa sa hari, apan ang kasaysayan wala maghatag ug pamatuod nga ingon niini ang kahimtang sa dagkong mga bangkete. Gawas pa, sa maong panahon, si Vasti mihimog bangkete uban sa mga babaye.) Tungod sa pipila ka wala ibutyag nga hinungdan, si Vasti hugot nga midumili. Si Ahasuero midangop sa iyang maalamong mga tawo nga nahibalo sa balaod, ug siya gitambagan ni Memucan, usa ka prinsipe, nga dili lamang sa hari nakasala si Vasti kondili usab sa tanang prinsipe ug sa katawhan sa sakop nga mga distrito. Siya miingon nga kon ang mga prinsesa makadungog sa gibuhat sa rayna (usa ka balita nga daling mokaylap sa kastilyo), sila mosundog sa gibuhat ni Vasti ingong sumbanan sa ilang talamayong buhat. (Est 1:1-22) Si Vasti gipalagpot sa pagkarayna, ug mga upat ka tuig sa ulahi, si Ester nga usa ka Hudiyo gipili nga mahimong asawa ni Ahasuero ug mopuli sa pagkarayna ni Vasti.​—Est 2:1-17.