ZENAS

Usa ka kaila ni Pablo, nga labot kaniya giingnan si Tito: “Itagana ang kinahanglanon ni Zenas . . . ug ni Apolos alang sa ilang panaw.” (Tit 3:13) Sa maong panahon dayag nga si Zenas didto sa pulo sa Creta, apan wala hisgoti kon asa siya ug si Apolos moadto, kon sa Nicopolis ba, diin gilaoman ni Pablo nga mahibalag si Tito (Tit 3:12), o ngadto ba sa ubang dapit. Si Pablo miingon nga si Zenas maoy “batid sa [Moisesnong] Balaod,” nga lagmit nagkahulogang siya maoy usa ka Hudiyo o usa ka Hudiyong kinabig nga nahimong Kristohanon. Ang iyang Grego nga ngalan lagmit mopaluyo sa ulahing pagtuo, apan dili gayod kini piho, sanglit sa unang siglo K.P. naandan na sa mga Hudiyo nga magbaton ug Grego o Romanong mga ngalan. Ang uban pang pananglitan niini mao ang ngalang Justo, Dorcas, ug Marcos.​—Buh 1:23; 9:36; 12:25.