Usa ka Sentenyal nga Mahinumdoman
ANG katawhan sa Diyos nakapribilehiyong makakitag daghang modernong-adlawng mga milagro. Talagsaon taliwala niini mao ang pag-uswag sa tibuok-yutang organisasyon nga gigamit karon ni Jehova sa pagpahayag sa iyang ngalan sa tibuok yuta. Ang tanan nagsugod sa Pittsburgh sa sinugdanan sa 1870 uban sa usa ka gamayng pundok sa maikagong mga estudyante sa Bibliya. Kadto sila kusog midaghan, mao nga sa wala madugay gikinahanglang pormahon ang legal nga korporasyon sa pag-atiman sa nag-uswag nga organisasyon. Busa, ang Zion’s Watch Tower Tract Society giinkorporar niadtong Disyembre 13, 1884, ilalom sa mga balaod sa Commonwealth of Pennsylvania.
Dili pa dugay, sa Sabado, Oktubre 6, 1984, ang ika-100 tinuig nga miting sa mga membro sa korporasyon—nga karon nailhang Watch Bible and Tract Society of Pennsylvania—gihimo sa Pittsburgh. Usa gayod ka espesyal nga okasyon! Maingon nga ang hinungdanong mga okasyon sa karaang panahon gihinumdoman, busa nahiangay nga ang mga Saksi ni Jehova magtimaan niining sentenyal sa Watch Tower Society pinaagig espesyal nga tigom. Sa ingon sila makahatag sa mga pasalamat ug pagdayeg sa Soberanong Ginoong Jehova, kinsa nagapanalipod ug nagabantay niining nagauswag nga organisasyon latas sa masamokong katuigan sa miaging siglo.—Josue 4:4-8, 20-24; Ester 9:20-22; Salmo 23:1-6.
Miting sa Korporasyon
Tukma nga alas 10 sa buntag sa Oktubre 6, ang tinuig nga miting sa korporasyon sa Sosyedad gibuksan didto sa Coraopolis Assembly Hall of Jehovah’s Witnesses, Pittsburgh. Taliwala sa kalibotanong mga organisasyon, ang mga miting sa korporasyon kasagaran maoy rutina, pamatigayon-lamang nga kahikayan. Apan ang maong miting lahi.
Sa 429 ka membro sa korporasyon, 259 ang presente, kauban sa ilang mga bisita—usa ka asembliya nga mikabat ug 1,615 ka tawo. Sila mibiyahe paingon sa miting gikan sa 53 ka lainlaing nasod—gikan sa nagkalagyong mga dapit sama sa Alaska, Antigua, Argentina, Australia, Austria, ug latas sa alpabeto hangtod sa Zimbabwe. Ang pormal nga pagpili sa upat ka direktor sa Sosyedad gisundan sa makapalig-on-sa-espirituwal nga programa sa mga pakigpulong. Usa kanila, nga gibase sa tinuig nga tekstong gipili sa mga Saksi ni Jehova alang sa 1985, ang 2 Timoteo 4:5, miawhag sa tanan: “Bug-os tumana ang imong ministeryo.”
Unya misunod ang makapapukaw nga pakigpulong sa 91-anyos nga presidente sa Sosyedad, si F. W. Franz. Siya miingon nga siya wala pa sukad mahinam sama sa dihang, mga 65 ka tuig nga miagi, uban kang J. F. Rutherford, iyang unang nabatian ang mga pulong “organisasyon sa Diyos.” Tapos sa paghinubay sa kaugmaran sa organisasyon sa yuta, iyang gipahayag ang pagkamapasalamaton nga kini mao ang ika-100 ka tuig nga ang organisasyon ni Jehova nagagamit sa nainkorporar nga Sosyedad aron sa paghatag kanato sa moluwas-kinabuhing Kasulatanhong impormasyon. Ang tingog ni Igsoong Franz misaka ngadto sa madaogong paglanog samtang iyang gikutlo ang kataposang bersikulo sa Mga Salmo, nga nag-ingon, ‘Tanang buhing butang—ipadayeg si Jah—ALELUYA!’
‘Si Jehova Nagauban sa Iyang Katawhan’
Ang talagsaong inigsoong gugma ug pagkamaabiabihon gipasundayag sa mga kongregasyon sa mga Saksi ni Jehova sa Pittsburgh. (Hebreohanon 13:1, 2) Ang nagsakripisyo-sa-kaugalingon nga pagtagad gihatag sa pagtagana sa maayong mga pagkaon, puy-anan ug transportasyon, ug ang matag organisasyonal nga detalye giatiman sa pag-andam sa bantog nga Three Rivers Stadium sa Pittsburgh alang sa tulo ka oras nga miting sa gabii nga misunod.
Nahisamag pahiyom sa pag-uyon ni Jehova nga ang kahimtang sa panahon niadtong adlawa sa tinghunlak maayo kaayo. Busa, ang panon nga 37,733 nga diha sa estadyum nakapamati nga hayahay ug uban ang apresasyon. Ang telephone tie lines nagdala sa programa ngadto sa 34 ka Assembly Halls sa mga Saksi ni Jehova sa Tinipong Bansa ug sa Canada, diin ang laing 59,715 namati—nga naghimo sa katibuk-ang gidaghanon nga 97,448 nga tumatambong. Silang tanan gihatagag mga kopya sa buloknon 32-panid estilo-pulyetong programa ingong handumanan sa malipayong okasyon.
Ang sesyon sa gabii nagsugod pinaagi sa malipayong awit ug pag-ampo. Unya napulo ka membro sa Nagamandong Lawas sa mga Saksi ni Jehova nakig-ambit uban sa daghan pang karaang alagad ni Jehova sa paghisgot sa tema: “Si Jehova Kanunay nga Nagauban sa Iyang Katawhan.” Sumala sa gipahayag sa pulyetong programa: “Sa pagkamatuod, dako ang ebidensiya nga siya nagauban sa iyang katawhan ug nagapanalangin ug nagatukod sa buluhaton sa ilang mga kamot—nga nahimo pinaagi sa paggamit sa Watch Tower Society. Busa, nahiuyon sa mga hunahuna sa Salmo 78:2-7, nahiangay nga atong gamiton kining okasyona sa pagsugid ngadto sa bag-ong kaliwatan ‘sa mga pagdayeg kang Jehova . . . ug sa iyang kahibulongang mga butang iyang gihimo.’”
Kana gayod ang gihimo sa programa! Si Hitler ug ang apostatang mga relihiyonista misulay sa pagpuo sa mga Saksi ni Jehova “sama sa mga pulgas,” apan ang maong mga magsusupak nangahanaw, sa kanunay “samag niyebe sa dihang mainitan.” Ang maghuhubad sa Bibliya si Goodspeed nagbatbat sa unang-siglong mga Kristohanon ingong “nagahubad ug nagamantala nga katawhan.” Ug pagkatinuod usab niini sa ika-20ng-siglong mga Saksi! Sulod sa 105 ka tuig nga natapos sa 1984, ang maong mga Kristohanon nagpatik, diha sa 200 ug kapin pang pinulongan, sa 8.8 bilyong Bibliya, libro, pulyeto, magasin, ug tract. Ang New World Translation sa tibuok Bibliya, o labing menos sa Gregong Kasulatan, gipatik diha sa 14 ka pinulongan ngadto sa tibuok gidaghanon nga 51,034,000 kopya. Sa dili madugay ang debulsang edisyon niining Bibliyaha, ug usab ang dagkog-letrang edisyon diha sa upat ka tomo, mabatonan na. Busa ang Watch Tower Society magpadayon sa pagpanguna sa pagpatik ug Bibliya.
Ang pulyeto miingon: “Ang usa ka pamatuod sa kalibre sa matinumanong mga lalaki nga nag-alagad uban sa Watch Tower Society makita sa kamatuorang sulod sa 100 ka tuig upat ra ka lainlaing lalaki ang nag-alagad sa responsable nga katungdanang presidente sa Sosyedad.” Ang organisasyon ni Jehova nagapadayong halangdon ngadto sa kataposang kadaogan. Sumala sa giingon ni Martin Poetzinger, kinsa nagmatinumanon latas sa siyam ka tuig diha sa Nazi nga mga kampo konsentrasyon: “Unong kang Jehova ug kang Kristo Jesus ug sa organisasyon sa Diyos, ug imong makita ang iyang kadaogan ibabaw sa tanang magsusupak.”
Ang kataposang mamumulong sa gabii, ang presidenteng si F. W. Franz, nagbatbat sa maong sentenyal nga adlaw ingong “usa ka okasyong dili na gayod masubli.” Pagkatinuod! Sa pagsubli sa makapaukyab nga kasaysayan sa Sosyedad, si Igsoong Franz naghinumdom sa mga pulong ni J. F. Rutherford, ang ikaduhang presidente, kinsa namatay niadtong 1942. Sa dayon na siyang mamatay, siya miingon: “Aw, Fred, alang kanako mopatim-awng ang dakong [panon] dili diay dako kaayo.” Mikomento si Igsoong Franz, “Sayo ra kaayo siyang namatay.” Niadtong panahona ang mga Saksi ni Jehova walay 100,000 sa gidaghanon sa tibuok yuta. Karong adlawa, sa literal ‘minilyon niadtong dili na gayod mamatay’ nahidugang sa ranggo niining maunongong mga alagad.
Mitapos si Igsoong Franz niining mga pulonga: “Kita matandog sa pagpahayag nga nagkahiusa: ‘Sa kadayegan ni Jehova nga Diyos ang Unibersohanong Soberano.’” Pinaagi sa masipa nga pagpakpak ang tanang presente nagpahayag sa ilang tibuok-kasingkasing nga pag-uyon. Tapos sa kataposang awit ug pag-ampo sila nanlakaw aron mopauli sa ilang kaugalingong mga nasod ug mga kongregasyon uban ang malipayong determinasyon sa pagpadayon sa buluhaton ni Jehova hangtod sa kataposan.