Maayong Pag-abot sa 1985 “Mga Maghuhupot sa Integridad” nga Kombensiyon!
ANG mga Saksi ni Jehova ilado dili lamang sa ilang madasigong balay-balay nga pagsangyaw kondili sa ilang dagkong Kristohanong mga kombensiyon usab. Kini sila gihimo na sulod sa kapin sa usa ka gatos ka tuig karon, nga mobalik pa sa 1879. Adunay maayong Kasulatanhong pasikaranan niining mga kombensiyona.
Tulo ka beses sa kada tuig ang mga Israelinhon gisugo nga magkatigom alang sa ilang mga piyesta. Giisip kadto ni Jehova nga hinungdanon kaayo nga gipapasiugda niya kana silang balikbalik ni Moises diha sa Pentateuko. Tan-awa ang Exodo 23:14-17; 34:22-24; Levitico 23:4-22; Numeros 28:16–29:12; Deuteronomio 16:1-16. Atong mabasa usab nga ang mga ginikanan ni Jesus regular motungas sa Jerusalem alang sa piyesta sa Paskuwa.—Lucas 2:41, 42.
Sulod na karon sa 38 ka tuig, ang mga asembliya sa mga Saksi ni Jehova nagasunod sa sumbanang susama sa iya sa karaang Israel. Kaduha sa matag tuig kita nagakalipay sa pagtigom alang sa atong sirkitong mga asembliya, nga naglangkit gikan sa 8 ngadto sa 20 ka kongregasyon. Unya kita nagapanglantawng maikagon sa pagtigom kas-a kada tuig alang sa atong distrito, nasyonal, o internasyonal nga mga kombensiyon. Gipabilhan ba natog dako kining mga tigoma sumala sa angay? Dili tanan natong igsoon sa tibuok yuta ang nagbaton niining panalangina. Busa ang usa ka bag-ong taho gikan sa usa ka Balkan nga nasod diin ang buluhaton dugay nang gipiotan nagasugid nga “sa unang panahon kami makahimog usa ka distritong kombensiyon sa usa ka publikong tigomanan . . . Nalipay kaayo ang mga igsoon niini.”
Sila may hinungdan nga malipay, kay mopatim-aw nga kon mas daghang Saksi ang magkatigom, mas dako ang kalipay. Ang usa ka nasod mitaho sa 1983 nga “ang ‘Panaghiusa sa Gingharian’ nga kombensiyon sa Disyembre tinuod nga dakong hitabo sa tuig,” ug ang lain nagbatbat niana ingong “ang hataas nga punto sa tuig.” Dili katingalahang ang kadaghanang Saksi ni Jehova nagahimog mga plano, nga kadaghanan sa dakong pagsakripisyo-sa-kaugalingon, sa pagtambong sa distritong mga kombensiyon sa tanang tulo ug tunga ka adlaw.
Sa miaging tuig kita napribilehiyo sa pagtambong sa “Pag-uswag sa Gingharian” nga mga kombensiyon. Ang programa naghisgot unsa ka haom ang maong tema tungod sa dagkong mga pag-uswag sa mga magmamantala sa Gingharian sa tibuok kalibotan. Dugang pa, kini nagpasiugda sa mga obligasyon sa matag usa ka Saksi maylabot sa maong pag-uswag. Ug pagkamaayong mga instrumento ang atong nadawat alang sa atong pagsangyaw—ang Reperensiyang Edisyon sa New World Translation of the Holy Scriptures, ang tabang sa pagtuon sa Bibliya nga Survival Into a New Earth, ug ang pulyetong The Divine Name That Will Endure Forever! Karong tuiga ang laing espesyal nga butang anaa sa unahan! Kita magkalipay sa pagtigom sa “Mga Maghuhupot sa Integridad” nga kombensiyon. Kining temaha nagaawhag sa pagtagad sa bili sa atong pagpakig-ambit sa pagbayaw sa ngalan ni Jehova pinaagi sa paghupot sa integridad hangtod sa kalaglagan sa sistema ni Satanas.
Pagkahinungdanon ang maong tema! Kini nalambiggit sa labing hinungdanong isyu nga giatubang sa tanang intelihenteng linalang, nga mao, ang pagkamay-katungod sa soberinidad ni Jehova, ingong gilabanan sa mga linalang nga nagahupot sa ilang integridad bisan pa sa tanang mahimo ni Satanas nga Yawa. Dili sayon nga mahimong maghuhupot sa integridad niining “mga panahong lisod sagubangon.” (2 Timoteo 3:1-5) Kini ang kaatbang gayod sa pagsubay sa dalang dili hago. Kini nagkahulogan sa ‘pagsulod sa sigpit nga ganghaan ug paglakaw sa masigpit nga dalang padulong sa kinabuhi.’—Mateo 7:13, 14.
Ang paghupot sa integridad ingong mga ministro ni Jehova nga Diyos naglangkit sa duha ka pasukaranang kinahanglanon. Sa usa ka bahin anaa ang panginahanglan sa pagpatungha sa mga bunga sa espiritu aron kita “makadayandayan sa pagtulon-an sa atong Manluluwas, ang Diyos, diha sa tanang butang.” (Tito 2:10) Sa laing bahin kita dunay sugo sa pagwali ug paghimog mga tinun-an, samtang kita nagapakig-ambit sa pagtuman sa tagna sa Bibliya.—Mateo 24:14; 28:19, 20.
Sa pagkab-ot niining duha ka kinahanglanon, kinahanglang magpadayon kita sa pagpangita pag-una sa Gingharian ug sa pagkamatarong sa Diyos. Kinahanglang makigbugno kita batok sa tanang laang ni Satanas nga Yawa, sa tanang tentasyong ginabutang niining daang kalibotan sa atong dalan sa dagway sa materyalismo ug pagtinguha sa kalingawan, ug kinahanglang buhaton nato ang gibuhat ni Pablo, ‘pantonon ang atong mga lawas ug himoon kining ulipon.’ (1 Corinto 9:27; 1 Pedro 5:8; 1 Juan 2:15-17) Ang malamposong pagbuntog sa mga hulga sa atong integridad dili sayon nga butang.
Kon bug-os natong gipabilhan ang hagit sa paghupot sa atong integridad, kita motambong sa kombensiyon nga ‘mahunahunaon sa atong espirituwal nga panginahanglan.’ (Mateo 5:3) Kita mamati pag-ayo sa ipamulong gikan sa entablado, magkuhag mga nota, moduyog nga kinasingkasing sa pag-awit, ug moduyog sa espiritu sa mga pag-ampo nga itanyag. Usab, kita mamati pag-ayo sa tambag nga ihatag mahitungod sa paghupot sa atong integridad kang Jehova nga Diyos ngadto sa atong mga kapikas sa kaminyoon, ug ngadto sa atong isigka-Kristohanon. Pinaagi sa mga pakigpulong, interbiyo, demonstrasyon, ug drama kita madasig ug masangkapan nga mahimong labi pang determinado kay sukad masukad sa paghupot sa integridad hangtod sa kataposan niining daan, daotang sistema sa mga butang.
Ni buot natong hikalimtan ang kamatuorang ang atong dagkong mga panagkatigom nagasilbing pamatuod sa kalibotan. Sa miaging Enero ang “Pag-uswag sa Gingharian” nga kombensiyon gihimo sa River Plate Stadium, Buenos Aires, Argentina, sulod sa upat ka adlaw. Kadto nahimong dakong balita! Ang lokal nga mantalaang Ahora mipresentar sa nindot dekolor-ug-ilustrasyong taho bahin sa kombensiyon, nga may dakong ulohan, “Pagtuo Mipuno sa mga Estadyum.”
Sa ubos sa dakong ulohan, “Usa ka Gingharian nga Nagauswag—Ang Iya sa mga Saksi ni Jehova,” ang duhag-panid nga artikulo miingon sa bahin: “Tinong dili katuohan. Ang pagkakita maoy pagtuo. Ang pagtuo magbalhin sa mga bukid. Ang pagtuo mao ang nagdasig sa aberids nga 42,000 ka tawo nga sa mahilomon ug uban ang dalayegong kahusay mipuno sa mga lingkoranan sa River Plate Stadium sulod sa upat ka adlaw niining naglagiting ang kainit nga ting-adlaw. Ang pagtuo usab ang nakapatigom sa dili momenos 46,000 ka matinuohon nga walay kalainan sa sekso, edad, kultura, rasa, o nasyonalidad alang sa kataposang adlaw sa distritong kombensiyon sa mga Saksi ni Jehova. . . . Kon kaha kita mouyon o dili sa ilang mga doktrina, ang maong katibuk-ang panon takos sa atong kinadak-ang pagtahod. Ilang gipadayag nga sila mapaubsanon, nga bulag kaayo sa walay-kapuslanang mga butang sa matag-adlawng kinabuhi ug sa modernong kalibotan nga maoy atong bahin; ilang ginahimo nga doktrina ang pakigdait ug gugma taliwala sa mga igsoon.”
Ang artikulo nagpadayon sa pag-ingon: “Komosta ang ilang organisasyon? Hingpit ang tanan. Ang kapolisan nga giasayn didto gilaayan kay sila walay trabaho . . . Wala gani bisan gamay nga kasamok, paghagit, o kagubot ang nahitabo sa upat ka adlaw. . . . Kita gibiyaan uban ang dili-masukod nga pakigdait nga daw naangkon sa mga Saksi . . . Sayop o dili, ilang naangkon ang atong pagtahod. Unsay nagadasig kanila? Kanang pagtuo. Kanang pagtuo nga magbalhin sa mga bukid.”
Walay pagduhaduha nga, pinaagi sa paggawi nato ingong Kristohanong mga ministro ni Jehova nga Diyos, kita makahatag ug maayong pamatuod sa mga tagagawas. Matuod, ang pagka Kristohanon dili gayod sayon. Si Jesus miingong kana nagkahulogan sa pagpas-an sa kahoy sa pagsakit. Ang pagpabili sa atong “Mga Maghuhupot sa Integridad” nga kombensiyon motabang kanato nga mahimong maayong mga sumusunod ni Jesu-Kristo.—Mateo 16:24.