1986—Tuig “sa Pagpanalipod sa Kalinaw”?

ANG HK nagproklamar sa 1986 ingong ang Internasyonal nga Tuig sa Kalinaw. Unsang pag-uswag ang anaa padulong sa kalinaw sa kalibotan? Ang mosunod nga mga komento naggikan sa tibuok yuta.

Gikan sa Abril 7 hangtod 12, 1986, ang mga magbabalaod gikan sa 103 ka nasod miapil sa ika-75ng IPU (Inter-Parliamentary Union) nga miting, sa Mexico City.

Ang Sekretaryo-Heneral sa HK nga si Javier Pérez de Cuéllar nagpasa niining mensahea ngadto sa Unyon: “Samtang mosugod ang Internasyonal nga Tuig sa Kalinaw, ipabutang sa tanan sa hunahuna ang tema niini​—‘Sa Pagpanalipod sa Kalinaw ug sa Umaabot sa Katawhan’—​nagataganag hinungdanong dugokan dili lamang alang sa 1986 kondili alang sa katuigan sa unahan. Atong pahimuslan ang kahigayonan sa 1986 uban ang determinasyon.”

Ang presidente sa IPU miingong iyang giduaw ang ubay-ubayng kanasoran “sa paghangyo kon kaha ang mga magbabalaod didto dili ba mahimong mga magbabalaod sa kalinaw.” Iyang konklusyon: “Akong nadiskobreng lisod kaayo kini, sa pagkamatuod sa pila ka kaso walay paglaom.”

Ang Mexicanong Grupo mismo nagpahayag ug “grabeng kahiubos nga bisan pa sa mausbawong kabalaka sa publiko sa mga kapeligrohan sa lumba sa armas ug sa paningkamot sa Hiniusang Kanasoran, walay nahimong dakong pag-uswag sa katuigang dili pa dugay diha sa natad sa disarmamento.”

Ang Argentinianhong Grupo naghisgot “nga ang kan-uman ka milyong patay sa ikaduhang gubat sa kalibotan, o ang nukleyar nga panapos niini sa Hiroshima, o ang usa ka gatos ug katloan ka armadong away sukad niadto dili pa igo sa pagtudlo sa tawo nga siya anaa sa ngilit sa paglaglag sa kaugalingon.” Dulot gikabalak-ang “lima ka nukleyar nga Gahom nakatigom ug kapin sa 50,000 ka armas nukleyar, gidaghanong katumbas sa tulo ka toneladang naandang pabuto alang sa matag molupyo sa atong planeta.”

Ang permanenteng mga membro sa Konseho Seguridad sa HK gihawasan, ug ang pipila sa ilang mga komento mao ang mosunod:

Ang Britanikong Grupo mipahayag: “Ang usa ka pasukaranang polisa nga pinakatumong mao ang pagpugong sa lumba sa armas sa kawanangan. Bisan pa niana, kinahanglang kita magmatinud-anon . . . Ang kawanangan militarisado na.” Ang Pranses nga Grupo mipasiugdang “ang pagkawalay-katakos sa Hiniusang Kanasoran sa paghupot nga padayon sa katibuk-ang kasegurohan ug kalinaw nagagikan ilabina sa paglapas sa pila ka Estado sa paninugdang mga prinsipyo sa balaod pang-internasyonal ug sa moralidad.” Ang U.S.S.R. nga Grupo mipahayag “ug seryosong kabalaka mahitungod sa kapeligrohan sa nukleyar nga katalagmang nagapaibabaw sa katawhan, nga mahimong motultol sa kalaglagan sa sibilisasyon sa yuta.” Ang U.S. nga delegasyon gitahong nag-ingong kini “maninguha sa pagpahibalo sa panginahanglan sa internasyonal nga kooperasyon sa pagbugno sa terorismo.”

Sa pikas nga bahin sa yuta, ang Internasyonal nga Tuig sa Kalinaw gitiman-an sa Marso 21 sa usa ka panagtigom sa Great Hall of the People sa Beijing. Ang Insek nga primier Zhao Ziyang labawng malaomon kay sa uban sa pag-ingon: “Basta ipadayon sa katawhan sa kalibotan ang ilang walay-hunong nga paningkamot, ila gayong maangkon ang kalinaw.”

Maylabot sa HK Internasyonal nga Tuig sa Kalinaw, si Papa Juan Paulo II miingong buot dasigon sa Holy See ang usa ka “tibuok-kalibotang kalihokan sa pag-ampo alang sa kalinaw nga malangkit ang tanang nasod ug tanang relihiyon.”

Idlas ang kalinaw niining kalibotana. Ug ngano man? Ang tinuod nga kalinaw kinahanglang ipasukad sa gugma; ang kalibotan nabahin sa nasyonalistikanhong garbo ug pagdumot. Kinahanglanon ang maalamon ug makataronganong pagmando alang sa tinuod nga kalinaw; dili makab-ot sa dili-hingpit tawhanong mga magmamando kining sukdanana. Ang tinuod nga kalinaw kinahanglang masentro sa nahiusang pagsimba sa usa ka matuod nga Diyos; ang mga relihiyon sa kalibotan nabahin sa kaliboang sekta, nga walay mausa niana nagapasidungog kang Jehova ingong Soberanong Ginoo. Kinahanglang wad-on “ang diyos niining sistema sa mga butang,” si Satanas nga Yawa, ug ang iyang sistema sa pagmando alang sa tinuod nga kalinaw; ang Gingharian ni Jehova lamang diha sa mga kamot sa Iyang Kristo ang makadugmok kang Satanas ug sa iyang mga buhat.​—2 Corinto 4:4.

[Mga Letrato sa panid 15]

Bulawang dolyar sa “kalinaw” sa Australia

10-shilling nga prangkiyo sa “kalinaw” sa Kenya

Gikan sa Australia miabot kining balitaa: “Ang mga sugarol sa NSW [New South Wales] karon makapusta na alang sa kalinaw sa $5 nga ‘Gasang Loteriya sa Kalinaw’ sa Gobyerno sa Estado . . . ingong bahin sa kampanya alang sa Internasyonal nga Tuig sa Kalinaw.”