Kinabuhi ug Ministeryo ni Jesus

Gihanaw ni Jesus ang Kaguol sa Babayeng Balo

HUMAN gilayon sa pag-ayo sa sulogoon sa opisyal sa kasundalohan, migikan si Jesus paingon sa Nain, usa ka siyudad nga kapin sa 20 ka milya (32 km) sa sidlakang-kasadpan sa Capernaum. Miuban kaniya ang iyang mga disipulo ug ang dakong panon sa katawhan. Tingali kilomkilom na dihang miabot sila sa kadaplinan sa Nain, diin nakatagbo silag mga tawo nga mikuyog sa paglubong. Ang patayng lawas sa batan-ong lalaki giyayongan pagawas sa siyudad aron ilubong.

Ang kahimtang sa inahan ilabinang makaguol, sanglit balo siya ug mao lamang kini ang iyang anak. Dihang namatay ang iyang bana, nalipay siya nga may nabilin pa siyang anak. Ang iyang mga paglaom, tinguha, ug tingusbawan nasentro sa kaugmaon sa iyang anak. Apan karon wala nay iyang kalipayan. Dako gayod ang iyang kaguol dihang giubanan siya sa mga katagilungsod sa dapit nga kalubngan.

Dihang nakita ni Jesus ang babaye, natandog ang iyang kasingkasing sa iyang grabeng kaguol. Busa sa kalulot, ug sa kalig-on nga nakahatag pagsalig, siya miingon kaniya: “Ayaw na paghilak.” Ang iyang paagi ug lihok nakakuha sa pagtagad sa mga tawo. Busa dihang iyang giduol siya ug gikuptan ang gihayaan sa lawas nga giyayongan, ang mga nanagyayong mihunong. Tingali natingala ang tanan kon unsay iyang buhaton.

Tinuod nga kadtong miuban kang Jesus nakakita na kaniya nga nakahimog milagrosong pag-ayo sa mga sakit sa daghang mga tawo. Apan wala pa gayod sila sukad nakakita kaniya nga nakabangon ug tawo gikan sa patay. Makahimo kaha siya niini? Gisultihan ang patayng lawas, si Jesus misugo: “Dong, ingnon ko ikaw, Bangon!” Ug ang batan-on milingkod! Ug misugod sa pagsulti, ug gihatag siya ni Jesus sa iyang inahan.

Dihang nakita sa mga tawo nga tinuod nga nabuhi ang batan-on, sila misugod sa pag-ingon: “Usa ka dakong propeta mitungha sa atong kinataliwad-an.” Ang uban miingon: “Ang Diyos mibali sa iyang pagtagad sa iyang katawhan.” Mikaylap dayon ang balita mahitungod niining katingahalang buhat sa tibuok Judea ug sa tanang kanait nga nasod.

Atua pa gihapon si Juan Bawtista sa bilanggoan. Apan gisultihan siya sa iyang mga disipulo mahitungod sa tanang mga butang nga ilang nakita nga gihimo ni Jesus. Unsay tubag ni Juan? Ug unsay tubag sa uban diha sa mga dapit nga gihimoan ni Jesus sa mga milagro? Ang among sunod nga gula magatubag niini. Lucas 7:11-18.

◆ Unsay nahitabo dihang nagsingabot si Jesus sa Nain?

◆ Sa unsang paagi naapektohan si Jesus sa iyang nakita, ug unsay iyang gihimo?

◆ Unsay reaksiyon sa mga tawo sa milagro ni Jesus?