‘Nagapahimulos sa Panahon’ sa Italya

PAHIMUSLI ang angay nga panahon,’ miingon si apostol Pablo makaduha sa kaubang mga Kristohanon samtang didto siya sa Roma, Italya. (Efeso 5:15, 16; Colosas 4:5) Maayo ang pagsanong sa iyang mga magbabasa sa unang siglo. Nangita silag maayong higayon sa pagpakaylap sa “maayong balita” ug mitabang sa uban nga mahimong mga magsisimba sa matuod nga Diyos.​—Mateo 24:14.

Ang modernong-adlawng mga alagad ni Jehova sa Italya, diin dinhi gisulat ni Pablo kadtong sulata, maayo gihapon ug pagsanong sa iyang tambag. Sama sa unang mga Kristohanon, nangita silag mga paagi sa pagpauswag sa ilang bahin sa buluhatong pasangyaw sa Gingharian. Sa unsang paagi ilang nakita “ang angay nga panahon”?

Mga Kaayohan sa Pagpaila sa Kaugalingon

Si Giuseppe, usa ka tigulang nga bug-os-panahong ministro sa mga Saksi ni Jehova sa Roma, nakahinumdom sa panahon nga siya may sekular nga trabaho. Iyang gipaneguro gayod nga mahibalo ang iyang mga kauban nga usa siya sa mga Saksi ni Jehova. Ang maong pagpaila sa kaugalingon mitultol ug usa ka “angay” nga panahon sa pagpaambit sa mga kamatuoran sa Bibliya. Usa ka adlaw niana giasayn siya sa pagbansay sa tawong ginganlag Gianni. Dihadiha gisultihan si Gianni sa kaubang mga trabahante nga ang iyang magtutudlo maoy usa sa mga Saksi ni Jehova. Dihang nag-inusara ang trabahante uban sa kang Giuseppe, iyang gisultihan si Giuseppe: “Karon maghisgot kita bahin sa atong trabaho, apan sa panahon sa paniudto buot kong masayod mahitungod kang Jehova.”

Sa tingpaniudto daghan silang nahimong mga panaghisgot. Gitudloan ni Giuseppe si Gianni nga ang Diyos may ngalan, si Jehova. Iyang gipatin-aw usab ang katuyoan sa Diyos sa yuta. Apan, unsay nahitabo, dihang natapos na ang pagbansay? “Akong gihatagan siya sa numero sa akong telepono ug pipila ka literatura sa Bibliya,” miingon si Giuseppe. “Iyang gidawat ang literatura apan miingon ako: ‘Kon may makita ako niining basahona nga dili uyon sa kamatuoran sa Bibliya, mobalik ako dinhi ug ipamatuod kong sayop ka atubangan sa tanan nimong mga kauban.’”

Milabay ang mga bulan. Walay pulong gikan kang Gianni. “Apan dayon,” mipadayon si Giuseppe, “usa ka adlaw niana iyang akong gitawag ug miingon nga buot siyang makigkita kanako. Nagkita kami, ug may listahan siya sa mga pangutana. Nag-estorya kami sa napulo ka oras! Iyang gidawat ang akong tanyag sa pagtuon sa Bibliya sa regular.” Unsay resulta? Si Giuseppe miingon: “Nakadayeg kaayo ang iyang asawa ug ang iyang inahan sa gihimo niyang mga kausaban nga sila, usab, misugod sa pagpakitag interes sa pagtuon sa Bibliya. Karon si Gianni, ang iyang asawa, ug ang iyang inahan tanan maoy matinumanong mga alagad ni Jehova.”

Gipugos sa Pagsunog sa Iyang Bibliya

Ang maayong batasan sa Kristohanon motultol usab sa ‘angay nga panahon’ sa pakigbahin sa mga kamatuoran sa Bibliya ngadto sa uban. Sumala sa gipamulong ni apostol Pablo, ang maayong batasan “makapasidungog sa pagtulon-an sa atong Diyos, nga Manluluwas, sa tanang butang.”​—Tito 2:10.

Si Pietro, nga karon usa na ka Saksi sa iyang ulahing panuigong 20, nadani sa maong “pagtulon-an” tungod sa Kristohanong batasan sa usa ka kauban sa klase. “Kinto grado ako niadto,” nanumdom si Pietro, “apan makahinumdom pa ako sa batasan niadtong bataa. Siya lamang ang midumili sa pagpabilin sa klase sa panahon sa relihiyosong pagtudlo.”

Usa ka adlaw gipangutana ni Pietro ang batan-ong lalaki kon nganong kanunay man siyang mogawas. Gisaysay sa batan-on nga gihatagan siyag eksemsiyon sa klase tungod kay usa siya sa mga Saksi ni Jehova. Napukaw ang interes ni Pietro. Iyang gihangyo ang batan-on sa pagdala kaniya ug Bibliya. Tapos nabasa ang pipila ka bahin sa Bibliya, “Akong nasabtan nga nasudlan kadto sa kamatuoran,” miingon si Pietro. “Mihukom ako nga subayon ko kana sukad niadto. Akong gidala ang Bibliya sa eskuylahan ug gisultihan ang tanan nga usa ako sa mga Saksi ni Jehova. Diyes anyos lang ako niadtong panahona.” Misugod ang mga problema. Si Pietro mipadayon: “Gisultihan sa pari nga nagdumala sa relihiyosong mga klase sa eskuylahan ang akong mga ginikanan nga gigamit nako ang Bibliya sa eskuylahan, ug iyang gitambagan sila sa pagsunog niadto. Dihang miabot ako sa balay, giagaw sa akong inahan ang akong Bibliya, apan gikuptan ko kanag maayo. Dayon gibunalan ako sa akong Mama ug gilabni kini gikan sa akong kamot. Human niadto iyang gipugos ako sa pagsunog sa akong kaugalingong Bibliya.” Nawad-an si Pietro ug Bibliya apan dili ang iyang pagtuo. Siya nagpalandong: ‘Inigdako nako, mopalit ako ug bag-ong Bibliya ug duawon ko ang uban aron ipaambit ang balita niini.’

Milabay ang duha ka tuig. Nahibaloan ni Pietro nga may pagtuon sa Bibliya nga gidumala sa balay sa usa sa iyang mga higala. Sa tago mitambong siya sa pagtuon. “Usa ka adlaw,” miingon si Pietro, “akong gisultihan ang akong mga ginikanan, ‘nakahukom ako nga mahimong usa sa mga Saksi ni Jehova. Karong panahona wala nay makausab sa akong hunahuna!’” Nakakita sa determinasyon sa ilang 12-anyos nga anak, misugot ang mga ginikanan. Si Pietro misugod dihadiha sa pagtambong sa mga tigom sa Kingdom Hall. Sa milabay ang upat ka tuig gibawtismohan siya ingong usa sa mga Saksi ni Jehova. Karon, 18 ka tuig human nga iyang unang nakat-onan ang kamatuoran gikan sa Bibliya tungod sa matinumanong batasan sa iyang kauban si klase, si Pietro ‘nakapahimulos sa angay nga panahon’ pinaagi sa pag-alagad ingong bug-os panahong ministro sa Italya.

Madasigon sa Panuigong 70

Si Mafalda, usa ka Kristohanong babaye nga gikan sa Livorno, maoy usa sa kapin sa 22,000 ka madasigong mga payunir, o bug-os panahong mga ministro, sa Italya. Siya misugod sa buluhaton ingong payunir sa panuigong 56. “Ang buluhatong payunir,” siya miingon, “nagkinahanglan labing menos 1,000 ka oras sa usa ka tuig nga ipahinungod sa buluhatong pagsangyaw. Sanglit bililhon man kaayo kining balitaa, nakagugol akog 2,000 ka oras sa usa ka tuig ingong mamumuo nga payunir.” Si Mafalda karon 70 anyos na. Unsay iyang mga plano? “Taliwala sa unang-siglong mga Kristohanon, dihay kugihang mga ginang sa panimalay nga miambit sa ministeryo,” siya miingon. “Sama kanila, buot kong mopadayon sa pagpahayag sa Gingharian sa Diyos. Mao kana ang tumong sa akong kinabuhi.”

Sa pagkatinuod, gikan sa may niyebe nga mga tumoy sa bukid sa amihanan sa alpine ngadto sa isla sa Mediteraneo sa Sicily sa habagatan, ang modernong-adlawng mga saksi ni Jehova sa Italya nagapakita sa kasibot sa ilang unang-siglong mga katugbang. Kada adlaw sa tuig sila nagagugol, sa aberids, ug kapin sa 100,000 ka oras sa buluhaton sa pagsangyaw sa Gingharian. Ang resulta? Sa miaging tuig lamang, hapit 12,000 ka tawo ang nabawtismohan ug nahimong ordinadong mga ministro ni Jehova. Karon sila, uban sa 131,000 ka mga Saksi ni Jehova, “nagapahimulos sa angay nga panahon” sa Italya.