“Panahon sa Pagsulti”—Kanus-a?

SI Mary nagtrabaho nga luyoluyo sa doktor. Ang usa ka kinahanglanon nga sundon niya sa iyang trabaho mao ang pagkakompedensiyal o pagsekreto. Kinahanglang dili niya ipadayag ngadto sa mga tawong dili awtorisado ang mga dokumento ug impormasyong maylabot sa iyang trabaho. Ang kalagdaan sa iyang estado nagakontrolar sa pagpadayag sa sekretong impormasyon bahin sa mga pasyente.

Usa ka adlaw giatubang ni Mary ang usa ka suliran. Sa pag-areglo sa mga rekord medikal, nakabasa siyag impormasyong nagpaila nga ang usa ka pasyente, usa ka kaubang Kristohanon, nagpatagak sa gimabdos. Siya ba may Kasulatanhong responsabilidad sa pagyagyag sa maong impormasyon ngadto sa mga ansiano sa kongregasyon, bisan pag kana mosangpot tingali nga mawad-an siyag trabaho, ikiha siya, o ang iyang gitrabahoan makabatog legal nga mga suliran? O ang Proverbio 11:13 magpakamatarong nga tagoan ang butang? Kini mabasa: “Kadtong nagasuroysuroy ingon sa usa ka tabian nagabutyag sa tinago, apan ang may matinumanon nga espiritu nagatago sa usa ka butang.”​—Itandi ang Proverbio 25:9, 10.

Ang mga situwasyong sama niini giatubang sa mga Saksi ni Jehova matag karon ug unya. Sama kang Mary, sila nahibalo gayod kon unsay giingon ni Haring Solomon: “Alang sa tanang butang adunay tinudlong panahon, bisan panahon alang sa tanang kahikayan sa silong sa mga langit: . . . panahon sa paghilom ug panahon sa pagsulti.” (Ecclesiastes 3:1, 7) Panahon ba niadto nga si Mary maghilom, o panahon ba kadto sa pagsulti kon unsay iyang nahibaloan?a

Ang mga kahimtang magkalain kaayo. Busa, imposible ang pagpahayag ug sumbanang paagi nga pagasundon sa matag kaso, nga daw angay atubangon sa matag usa ang kaso sama sa gihimo ni Mary. Sa pagkamatuod, ang matag Kristohanon, kon atubangon man sa kahimtang nga susama niini, kinahanglang maandam sa pagtimbang sa tanang butang nalangkit ug kab-oton ang usa ka desisyon nga magtagad sa mga prinsipyo sa Bibliya ingon man sa legal nga mga kalangkitan ug nga maghatag kaniyag hinlong konsensiya atubangan ni Jehova. (1 Timoteo 1:5, 19) Kon ang mga sala ginagmay ra ug tungod sa tawhanong pagkadili-hingpit, ang prinsipyo mapadapat: “Ang gugma nagatabon sa kapid-an nga mga sala.” (1 Pedro 4:8) Apan kon daw adunay seryosong buhat nga daotan, ang maunongong Kristohanon angay bang magbutyag kon unsay iyang nahibaloan aron ang dayag nga makasasala makadawat ug tabang ug matipigan ang kahinlo sa kongregasyon?

Pagpadapat sa mga Prinsipyo sa Bibliya

Unsa ang pipila ka paninugdang mga prinsipyo sa Bibliya nga mapadapat? Nahauna, si bisan kinsang nagabuhat ug daotan angay dili mosulay sa pagtago niini. “Siya nga nagatabon sa iyang mga kalapasan dili molampos, apan siya nga nagasugid ug nagabiya kanila pakitaan ug kaluoy.” (Proverbio 28:13) Walay butang nga dili makita ni Jehova. Ang tinagong mga kalapasan sa kataposan kinahanglang sudyaan. (Proverbio 15:3; 1 Timoteo 5:24, 25) Usahay dad-on ni Jehova ang buhat nga daotan sa pagtagad sa usa ka membro sa kongregasyon aron kini kahatagag tukmang pagtagad.​—Josue 7:1-26.

Ang laing lagda sa Bibliya makita sa Levitico 5:1: “Karon kon ang usa ka kalag makasala sa pagkaaging siya nakadungog sa dayag nga pagpanghimaraot ug siya usa ka saksi o nakakita niana o nahibalo niana, kon dili niya kana itaho, nan kinahanglang manubag siya alang sa iyang kalapasan.” Kining “dayag nga pagpanghimaraot” dili pagpasipala. Hinunoa, kini kadaghanan nahitabo dihang ang usang gibuhatag daotan nangayong buligan siya sa posibleng mga saksi sa pagbatog hustisya, samtang nanghimaraot​—lagmit gikan kang Jehova​—diha sa usa, tingali wala pa hiilhi, si kinsa maoy nagbuhat kaniyag daotan. Kadto usa ka matang sa pagpailalom sa uban sa panumpa. Si bisan kinsang mga saksi sa daotang buhat mahibalo kon kinsay nakaagom sa inhustisya ug may kaakohan nga mopahayag aron maestablisar ang sala. Kay kon dili, kinahanglang sila ‘manubag alang sa ilang kalapasan’ atubangan ni Jehova.b

Kining sugoa gikan sa Kinatas-ang awtoridad sa uniberso nagbutang diha sa matag Israelinhon sa kaakohan o responsabilidad sa pagtaho ngadto sa mga maghuhukom sa bisan unsang seryosong buhat nga daotan nga iyang nakita aron mahusay kana. Bisan pag ang mga Kristohanon dili ilalom sa Moisesnong Kasugoan, ang mga prinsipyo niini mapadapat gihapon sa Kristohanong kongregasyon. Busa, tingali may panahong ang Kristohanon obligado sa pagdala sa butang ngadto sa pagtagad sa mga ansiano. Tinuod, supak sa balaod sa daghang nasod ang pagbutyag ngadto sa mga dili awtorisado kon unsay masayran diha sa pribadong mga rekord. Apan kon mobati ang Kristohanon, tapos sa mainampoong pagpalandong, nga iyang giatubang ang usa ka kahimtang diin ang balaod sa Diyos nagbaod kaniya sa pagtaho sa iyang nasayran bisan pa sa mga kinahanglanon sa ubos nga mga awtoridad, nan kana kaakohan nga iyang gidawat atubangan ni Jehova. Adunay mga panahon nga ang Kristohanon “kinahanglang mosugot sa Diyos ingong magmamando inay sa mga tawo.”​—Buhat 5:29.

Samtang ang mga panumpa o ugdang nga mga panaad dili gayod isipong diyutayg bili, may panahong ang mga panaad nga gipangayo sa mga tawo nahasupak sa kinahanglanon nga atong igahatag ang linaing debosyon ngadto sa atong Diyos. Kon adunay makahimog seryosong sala, siya, sa pagkamatuod, mailalom sa ‘dayag nga panghimaraot’ gikan sa Usang nasal-an, si Jehova nga Diyos. (Deuteronomio 27:26; Proverbio 3:33) Ang tanang nahimong bahin sa Kristohanong kongregasyon nagabutang sa ilang kaugalingon ilalom sa “panumpa” nga huptang mahinlo ang kongregasyon, pinaagi sa ilang ginabuhat sa personal ug sa paagi sa ilang pagtabang sa uban nga magpabiling hinlo.

Personal nga Kaakohan

Kini maoy pipila sa mga prinsipyo sa Bibliya nga lagmit gihunahuna ni Mary sa paghimo sa iyang personal nga desisyon. Ang kaalam nagdiktar nga siya dili angay magdalidali sa paglihok, nga dili timbangon pag-ayo ang mga butang. Ang Bibliya nagatambag: “Dili ka magsaksi batok sa imong isigkatawo nga walay pasikaranan. Niana dili ka mahimong buangbuang pinaagi sa imong mga ngabil.” (Proverbio 24:28) Aron bug-os matino ang usa ka butang, gikinahanglan ang pamatuod sa labing menos duha ka saksing nakakita. (Deuteronomio 19:15) Kon nakita ni Mary ang daklit nga paghisgot sa aborsiyon, basin siya nakahukom sumala sa tanlag nga ang ebidensiya sa sala dili gayod tino mao nga siya dili angay mopadayon. Mahimong may sayop sa pagkuwenta sa bayranan, o sa laing paagi ang rekord tingali wala mohatag ug hustong larawan sa situwasyon.

Ugaling, sa maong kaso si Mary may laing bililhong impormasyon. Pananglitan, siya nahibalo nga gibayran sa igsoong babaye ang bayranan, nga dayag nag-ila nga nadawat niya ang serbisyong gipaila. Gawas pa, siya nahibalo sa personal nga dalaga ang igsoong babaye, sa ingon nagpatungha sa posibilidad sa pakighilawas. Gibati ni Mary ang tinguha nga tabangang mahigugmaon ang usang tingali nakasala ug panalipdan ang kahinlo sa organisasyon ni Jehova, nga nahinumdom sa Proverbio 14:25: “Ang matuod nga saksi nagaluwas ug mga kalag, apan ang malimbongon nagapahayag ug mga kabakakan lamang.”

Si Mary may pagduhaduha bahin sa legal nga mga kinaiya apan mibating sa maong kahimtang ang mga prinsipyo sa Bibliya angay mas bug-at kay sa kinahanglanon nga iyang panalipdan ang pribasiya sa medikal nga mga rekord. Tinong ang igsoong babaye dili mayugot ug mosulay sa pagpanimalos pinaagi sa paghatag kaniyag suliran, siya nangatarongan. Busa sa gituki ni Mary ang tanang kasayorang iyang nabatonan, siya mihukom sumala sa konsensiya nga kadto panahon sa “pagsulti,” dili panahon sa “paghilom.”

Sa maong panahon giatubang ni Mary ang dugang pangutana: Kinsa ang iyang sultihan, ug sa unsang paagi iyang mahimo kanang maalamon kaayo? Siya makaadtong direkta sa mga ansiano, apan siya mihukom sa pag-adto una sa pribado sa igsoong babaye. Kadto mahigugmaong pagduol. Si Mary nangatarongan nga siya nga gikatahapan basin modawat sa higayon sa pagpatin-aw sa mga butang o, kon sad-an, magpamatuod sa katahap. Kon ang igsoong babaye nakasulti na niana ngadto sa mga ansiano, siya lagmit mosulti niana, ug dili na kinahanglang isulti pa kana ni Mary kanila. Si Mary nangatarongan nga kon ang igsoong babaye nagpatagak sa iyang gimabdos ug wala mosugid sa maong seryosong kalapasan sa balaod sa Diyos, iyang dasigon siya sa pagbuhat niana. Unya ang mga ansiano makatabang kaniya nga nahiuyon sa Santiago 5:13-20. Ikalipay, kini ang gisangpotan sa mga butang. Nasayran ni Mary nga ang igsoong babaye nagpatagak sa iyang gimabdos tungod sa dakong kapit-osan ug kay huyang sa espirituwal. Tungod sa kaulaw ug kahadlok iyang gitagoan ang iyang sala, apan siya nalipayng gitabangan sa mga ansiano ngadto sa espirituwal nga pagpasig-uli.

Kon si Mary mitaho una ngadto sa lawas sa mga ansiano, atubangon unta nila ang susamang desisyon. Unsaon nila pagkupot sa kompedensiyal nga impormasyon nga ilang nabatonan? Kinahanglang himoon nila ang desisyong gibase sa butang ilang gibati nga gikinahanglan kanila ni Jehova ug sa iyang Pulong isip mga magbalantay sa panon. Kon ang taho naglangkit sa bawtismadong Kristohanon nga aktibong nakig-uban sa kongregasyon kinahanglang ilang timbangon ang ebidensiya sama sa gibuhat ni Mary sa pagtino kon ila bang ipadayon sa unahan ang butang. Kon mihukom silang may dakong posibilidad nga naglungtad ang kahimtang nga may “igpapatubo” diha sa kongregasyon, basin palabihon nila ang pagtudlog usa ka hudisyal nga komite sa pagsusi sa butang. (Galacia 5:9, 10) Sa pagkamatuod, kon ang usang gikatahapan mihunong na sa pagkamembro, kay wala na magtambong sa mga tigom sa taastaas nga panahon ug wala magpailang Saksi ni Jehova, basin ilang palabihong pasagdan una ang butang hangtod sa panahong siya mosugod sa pagpaila na usab nga siya Saksi.

Paghunahunang Abante

Ang mga amo may katungod sa pagdahom nga ang ilang Kristohanong mga empliyado ‘magpadayag sa pagkamaunongon sa bug-os,’ apil ang pagbantay sa mga lagda sa pagkasekreto o pagkakompedensiyal. (Tito 2:9, 10) Kon himoon ang usa ka panumpa, kana dili angay dili balehon. Ang usa ka panumpa mohimo sa saad nga mas ugdang ug aplikado. (Salmo 24:4) Ug kon ang balaod nagalig-on sa usa ka kinahanglanon sa pagkasekreto, ang butang mahimong labi pang seryoso. Busa, sa dili pa ang Kristohanon mohimog panumpa o magpailalom sa restriksiyon bahin sa pagkasekreto, kon kaha maylabot sa panarbaho o ubang paagi, maalamon ang pagtino kutob sa mahimo kon unsang mga suliran ang basin ipatungha niini tungod sa pagkasupak sa mga kinahanglanon sa Bibliya. Unsaon pagdumala sa usa ang kahimtang kon mahimong kliyente ang igsoong lalaki o babaye? Kasagarang ang mga trabaho sama sa pagtrabaho uban sa mga doktor, mga ospital, mga korte, ug mga abogado mao ang matang sa panarbaho nga niana motungha ang suliran. Kita dili mahimong magpasagad sa balaod ni Cesar o sa kaseryoso sa usa ka panumpa, apan ang kasugoan ni Jehova kinalabwan.

Sa pagdahom sa suliran, ang pila ka igsoon nga mga abogado, mga doktor, mga accountant, ug ubang pa, nag-andam ug mga lagda nga sinulat ug naghangyo sa mga igsoon nga tingali mokonsulta kanila sa pagbasa niini una mobutyag ug butang kompedensiyal. Sa ingon gipangayo daan ang usa ka pagsinabtanay nga kon mapadayag ang seryosong buhat nga daotan, ang mamumuhat ug daotan dasigon sa pag-adto sa mga ansiano sa iyang kongregasyon mahitungod niana. Pagasabton nga kon dili niya himoon kana, ang magtatambag mobating obligado sa pag-adto mismo sa mga ansiano.

Tingali may higayong ang matinumanong alagad sa Diyos palihokon sa iyang personal nga mga pagtuo, nga gibase sa iyang kasayoran sa Pulong sa Diyos, sa pagdaot o pagbungkag sa mga kinahanglanon sa pagkasekreto tungod sa labawng mga panginahanglan sa balaang kasugoan. Kinahanglan ang kaisog ug pagkamaalamon. Ang tumong dili mao ang pagpangespiya sa kagawasan sa lain kondili sa pagtabang sa mga nakasala ug paghupot nga hinlo sa Kristohanong kongregasyon. Ang ginagmayng mga kalapasan tungod sa pagkamakasasala angay hikalimtan. Dinhi, “ang gugma nagatabon sa kapid-an nga sala,” ug angay kita magpasaylo sa “hangtod sa kapitoag-pito ka panahon.” (Mateo 18:21, 22) Kini ang “panahon sa paghilom.” Apan kon adunay paningkamot sa pagtago sa dagkong mga sala, kini mao na ang “panahon sa pagsulti.”

[Mga footnote]

[Hulagway sa panid 15]

Matarong ug mahigugmaong buhat ang pagdasig sa nakasalang Saksi sa pagsulti ngadto sa mga ansiano, kay masaligong ilang dumalahon ang suliran sa maluluton ug masinabtanong paagi