Kon sa Unsang Paagi Makabaton Kag Tinuod nga mga Higala

“ANG paagi lamang aron makabaton ug higala mao ang pagkahimong higala,” misulat si Emerson, ang Amerikanong magbabalak. Ang panaghigala maoy pag-ambitay nga nalangkit ang espiritu sa paghatag. Ang mga hilomon ug hakogan malisdan sa pagpangitag tinuod nga mga higala. Bisan pa niana, mahimong molampos sila, sumala sa ato unyang makita.

Ang tinuod nga panaghigala motubo gikan sa gugma tungod kay ang gugma makadani sa mga tawo. Bisan pa ang uban naglisod sa pagbaton ug mga higala. Sa unsang paagi mabuntog sa tawo kini?

“Himoa ang imong kaugalingon nga maayong mamiminaw. Dasiga ang uban sa pagsulti bahin sa ilang kaugalingon,” mitambag si Dale Carnegie. Dihang magkita ang mga dili-kaila, tingali diha sa salo-salo, kinsa ang makakitag mga higala? Dili ang mga sabaan kondili kadtong may mainit nga kaikag sa uban, nga nagapasulti ug nagapamati kanila. Ang paghinumdom sa mga ngalan ug sa makaikag nga mga kamatuoran bahin sa bag-ong mga kaila makatabang usab sa pag-ugmad ug tinuod nga mga panaghigala.

Diha sa Fundamentals of Interpersonal Communication, si Kim Giffin ug Bobby R. Patton mirekomendar ug pagpaila sa kaugalingon ug sa kamatinuoron. “Aron mahimong importante ang tawo alang kanimo,” miingon siya, “kinahanglang may masayran ka bahin kaniya nga nahimong bililhon kanimo . . . . Magmadayganon ug prangka sa tanang panahon . . . Ang imong pagsanong sa ubang tawo kinahanglang tim-os.”

Ang tinuod nga mga higala dili lang kay matinud-anon kondili mahunahunaon, dili gayod magpabug-at sa usa ug usa o dili sobra ka mapanag-iyahon. Sila magkasinabtanay sa usag usa, makamatikod sa iyang hunahuna sa mga butang, busa makapakitag pagkamabination. Dihang motubo ang relasyon, ilang buksan ang ilang mga kasingkasing sa usag usa, mahimo dili lamang tinuod nga mga higala kondili suod nga mga higala. Dili tanan sa tinuod nga mga higala suod nga mga higala. Si Jesu-Kristo, ang labing mahigalaong tawo sa yuta, nakabaton ug daghang mga higala, apan diyutay lamang ang tinuod suod nga mga higala.​—Marcos 9:1-10; Lucas 8:51.

Ang Libro sa Tinuod nga Panaghigalaay

Ang Bibliya, nga mao ang labing maayong libro bahin sa ulohan sa panaghigala, nag-ingon: “Ang usa ka tinuod nga higala mahagugma sa tanang panahon, ug usa ka igsoon nga matawo sa panahon sa kalisdanan.” (Proverbio 17:17) Ang tinuod nga mga higala maluloy-on ug andam sa paghatag ug tabang kon may motunghang mga problema. Aniay maayo kaayong pananglitan niini​—usa ka sugilanon gikan sa mga adlaw sa karaang Israel.

Tungod sa gutom, ang usa ka tawo sa Juda mibalhin sa Moab uban sa iyang asawa, si Noemi. Sa ulahi namatay siya. Unya, gipakaslan sa iyang duha ka anak nga lalaki ang mga babayeng Moabita si Ruth ug Orpa. Dayon namatay ang duha ka anak nga lalaki, gibilin ang tulo ka biyuda. Si Noemi, ang inahan, midesisyon sa pagpauli sa Juda, ug mipanaw ang iyang duha ka umagad nga babaye uban kaniya. Apan, diha sa dalan giawhag ni Noemi ang duha ka batan-ong mga babaye sa pagbalik ug sa pagpangitag bag-ong mga bana taliwala sa ilang kaugalingong katawhan. Gihimo kini ni Orpa, apan miinsister si Ruth sa pag-uban kang Noemi. Ngano? Tungod kay sobra pa siya kay sa usa lamang ka umagad nga babaye; usa usab siya ka tinuod nga higala. Alang sa usa ka butang, ang iyang maluloy-ong kinaiyahan dili makatugot kaniya nga pasagdang mag-inusara ang tigulang nga biyuda, nga nawad-an sa iyang pamilya.​—Ruth 1:1-17.

Nagpakita si Ruth ug tinuod nga pagkamabination, kalulot, pagkamaunongon, ug gugma. Kadtong mga hiyasa mao ang nagaporma sa tinuod nga basehanan sa panaghigalaay. Hinuon, adunay laing butang nalangkit sa relasyon ni Ruth kang Noemi.

Panaghigala sa Diha Hataas nga Kahimtang

Dihang giawhag siya ni Noemi sa pagbalik, si Ruth miingon: “Ayaw ako paghangyoa aron sa pagbiya kanimo, . . . kay bisan asa ikaw moadto, ako moadto . . . Ang imong katawhan mahimo nga akong katawhan, ug ang imong Diyos akong Diyos.” (Ruth 1:16) Gitabangan ni Noemi si Ruth, nga pagano niadto, sa pagkahibalo ug sa paghigugma sa tinuod nga Diyos, si Jehova. Ang ilang managsamang pagtuo nahimong gamhanang espirituwal nga bugkos nga nagpasuod sa duha ka babaye ingong tinuod nga mga higala. Ug gipanalanginan sila ni Jehova ug bag-ong pamilya. Sa ulahi, naminyo si Ruth kang Boaz, usa ka mauswagong tag-iyag yuta sa Juda, ug nanganak ug lalaki nga ginganlag Obed, kinsa nahimong apohan ni Haring David.​—Ruth 4:13-22; Mateo 1:5, 6.

Kining espirituwal nga pasikaranan nakabutang sa panaghigalaay sa hataas nga kahimtang. Sa unsang paagi? Sa kaso ni Ruth ug Noemi, nagsimba ang duha kang Jehova, nga “Diyos nga maluloy-on ug mapuanguron, mahinay sa kasuko ug dagaya sa mahigugmaong-kalulot ug kamatuoran.” (Exodo 34:6) “Ang Diyos gugma,” ug kon kita tim-os nga mosimba kaniya sa espiritu ug sa kamatuoran, kita makatino nga motubo diha sa gugma alang kaniya ug sa isigkalinalang. (1 Juan 4:8; Juan 4:24) Busa, kita mausab. Maugmad nato ang mahigalaong interes sa uban, ilabina sa maaghop, sa nag-antos nga mga tawo sa tanang rasa. Busa ang mga maulawon dili na kaayo makikaugalingon. Ang hakog nga mga tawo makaugmad ug kabalaka alang sa uban. Kita makasugod sa pagpasundayag sa bunga sa espiritu sa Diyos​—“gugma, kalipay, kalinaw, pailob, kalulot, pagkamaayo, pagtuo, kaaghop, pagpugong sa kaugalingon.”​—Galacia 5:22, 23.

Kining mga hiyasa makatabang kanato sa pag-ugmad sa hinungdanong katakos sa pagpasaylo sa kahuyangon sa uban​—“dili, Hangtod sa makapito, kondili, Hangtod sa kapitoan ka pito,” miingon si Jesus. (Mateo 18:21, 22) Daghang panaghigalaay ang nangadaot ning bahina. Apan giwali ug gibuhat ni Jesu-Kristo kini. Pagkadaghan nang higayon nga iyang gipasaylo ang iyang dili-hingpit, masayop nga mga tinun-an tungod sa ilang mga kasaypanan, lakip bisan ang makauulawng paglimod ni Pedro sa Ginoo!​—Mateo 26:69-75.

Ingong sangpotanan niining tanang espirituwal nga kaugmaran, modaghan ang atong mga higala. Sa ulahi, atong makita nga kita sakop sa dako, globonhong pamilya sa mga higala! Atong makita usab nga ang sukdanan sa katibuk-an sa atong mga higala mas taas. Pananglitan, si Brian, nga bag-o pang magsisimba kang Jehova, nakahinumdom nga gipaapil siya sa iyang mga higala niadto sa pag-inom-inom ug napasagdan ang iyang asawa ug mga anak. Apan karon debotado na kaayo siya sa iyang pamilya. Mahitungod sa daghang mga higala nga may samang pagtuo diha kang Jehova, siya miingon: “Kon may suliran ako, nahibalo akong makapunit ako sa telepono ug makatawag kang bisan kinsa kanila, ug malipay silang motabang.”

Ang kolokabildo ni Alan ug sa iyang mga higala nasentro diha sa mga kotse ug mga babaye. Apan iyang nakita kadtong mga temaha nga “makalaay ug walay hinungdan” dihang nakakita siyag daghang bag-ong mga higala, nga kaubang nahigugma kang Jehova. Nadani si Alan sa ilang “kinabubut-on, tinuod, mahigugmaong kaikag” kaniya.

Ang Atong Labing Suod nga mga Higala

Kining tanang mga indibiduwal ug milyonmilyon pa nagapormag tibuok-yuta, dili-politikanhong pamilya sa mga higala nga nakalagbas sa nasodnon, rasanhon, ug sosyal nga mga kababagan​—usa ka tinuod nga panag-igsoonay sa katawhan, sama sa unang mga Kristohanon. (3 Juan 14) Ang samang bugkos nga nagpasuod kang Ruth ug Noemi nagpahiusa usab niining pamilyaha, nga mao, ang putling pagsimba kang Jehova nga Diyos. Silang tanan mapaubsanon ug mapasalamatong miila nga si Jehova ug si Jesu-Kristo mao ang ilang labing suod nga mga higala.

‘Ang Diyos nga Makagagahom sa Tanan ug ang iyang Anak ingong mga higala?’ tingali mahibulong ka. ‘Sa unsang paagi posible kana? Dili ba kana pagpangahas?’ Buweno, ang Bibliya nag-ingon: “Si Abraham mituo kang Jehova, . . . ug siya ginganlan nga ‘higala ni Jehova.’” Kadto sa pagkatinuod maoy dili-takos nga kalulot. Bisan pa ang Pulong ni Jehova nag-ingon: “Gibatok sa Diyos ang mga mapahitas-on, apan siya nagahatag ug dili-takos nga kalulot sa mga mapaubsanon.”​—Santiago 2:23; 4:6.

Tingali bation sa uban nga makasasala ra kaayo alang sa maong pribilehiyo. Apan si Santiago mipadayon sa pag-ingon: “Dumuol kamo sa Diyos, ug siya moduol kaninyo. Panghinaw kamo, kamong mga makasasala, ug putlia ang inyong mga kasingkasing, kamong mga maduhaduhaon. Ipaubos ninyo ang inyong kaugalingon sa mga mata ni Jehova, ug siya magatuboy kaninyo.”​—Santiago 4:8, 10.

Si Jesus miingon: “Kamo akong mga higala kon inyong tumanon ang akong isugo kaninyo.” Iyang gipunting usab nga ang labing dako sa mga sugo mao ang ‘paghigugma kang Jehova sa bug-os mong kasingkasing, kalag, ug hunahuna, ug sa paghigugma sa atong mga silingan sama sa atong kaugalingon.’ (Juan 15:14; Mateo 22:37-40) Kon atong buhaton kana, makabaton kitag daghang tinuod nga mga higala. Dugang pa, kita mahimong takos sa laing dakong pribilehiyo​—kinabuhing dayon diha sa nahinloang yuta ilalom sa Gingharian sa Diyos. (Mateo 6:9, 10) Sumala sa gipamulong ni Jesus: “Ang kahulogan sa iyang [Jehova] sugo mao ang kinabuhing dayon.”​—Juan 12:50.

Tugotan ba nimo ang mga Saksi ni Jehova sa pagtabang kanimo? Ingong tinuod nga mahigalaong mga tawo, sila andam sa pagduaw kanimo ug sa paghisgot ning hinungdanong butang uban kanimo nga walay bayad. Sila makatabang kanimo sa pagbaton ug tinuod nga mga higala.

[Giya sa panid 6]

Mga Giya Alang sa Tinuod nga Panaghigalaay

Magmapilion niadtong buot nimong ikauban.

Pagpakitag mainitong interes sa uban, ug ipakitang maayo kang mamiminaw.

Magtinabangay sa paghimog mga butang​—ang samang mga eksperyensiya makalig-on sa panaghigalaay.

Magmaprangka, magmadayganon, ug sinsero sa tanang panahon.

Pagpakitag empatiya ug kalulot dihang may problema ang uban.

Kon masayop ang mga higala o makapasuko kanimo, andam sa pagpasaylo​—bisan “hangtod sa kapitoan ka pito.”​—Mateo 18:22.

Kon pasipalahan ang mga higala o dili-makataronganong sawayon, magmaunongon ug panalipdi sila.

Ang managsamang pagsimba kang Jehova makalig-on ug dako sa panaghigalaay.

[Hulagway sa panid 7]

Wala biyai ni Ruth si Noemi kay ang ilang panaghigalaay may malig-ong espirituwal nga basehanan. Ikaw ba duna ning matanga sa tinuod nga mga higala?