Mga Magmamantala sa Gingharian Nagtaho

Si Jehova Nagapanalangin sa mga Nagahupot-sa-Integridad sa Cyprus

SI JESUS miingon ngadto sa iyang mga sumusunod: “Kon ako ilang gilutos, kamo ila usab nga pagalutoson.” (Juan 15:20) Ug si Jehova, pinaagi sa propetang si Isaias miingon: “Ang bisan unsang hinagiban nga ilang hulmahon batok kaninyo dili gayod molampos.” (Isaias 54:17) Kining mga pahayaga natuman sa Cyprus, diin ang naghupot-sa-integridad nga mga Saksi ni Jehova puliki sa pagsangyaw sa maayong balita.

◻ “Ang Grego Ortodoksong Iglesya aktibo kaayo sa pagsingkamot nga daoton ang atong buluhaton,” matud sa usa ka taho gikan nianang nasora. “Ang mga pari nanagtag mga pulyetong nagbutangbutang kanato sa tanang matang sa butang ug gisultihan ang mga tawo nga molikay sa pagpakigsulti sa mga Saksi ni Jehova. Giduaw pa nila ang mga tawong nagtuon sa Bibliya kauban sa mga Saksi ug naningkamot sa pagpahunong kanila. Sa Paphos, ang usa ka pari-teologo misulay sa pagkombinsir sa tulo ka lainlaing tawo sa paghunong sa pagtuon sa Bibliya uban sa mga Saksi ni Jehova. Sa lainlaing higayon ang matag usa sa tulo nagdapit sa usa ka igsoong lalaki nga makighisgot uban sa maong teologo. Ikalipay, silang tulo karon aktibo nang nakig-uban sa organisasyon ni Jehova.” Hinuon, kini nakapikal sa pari, kinsa mikomento: “Dili na gayod ako makighisgot uban sa mga Saksi ni Jehova.” Ang pila ka pari nagpasobra pa nga nanagpa sa pipila sa mga igsoon samtang sila nagsangyaw. Bisan pa niana, ang paningkamot sa klero kasagarang misumbalik, ug mas daghang tawo ang nagabarog karon dapig kang Jehova.

◻ Ang mosunod nga kasinatian gikan sa Cyprus nagapakitang ang paghupot sa integridad ilalom sa pagsupak mopatunghag mga panalangin. Ang bana sa usa ka babaye namatay panahon sa gubat sa 1974, nga nagbilin sa usa ka batang babaye nga matutoon. Naminyo pag-usab ang babaye. Kay nawad-ag kasibot tungod sa pagkasalingkapaw sa klero ug kawalay-piho sa kaugmaon, miuyon siyang magtuon sa Bibliya uban sa mga Saksi ni Jehova. Kusog ang iyang pag-uswag ug misugod siya sa pagsulti sa iyang mga paryente sa maayong mga butang iyang nakat-onan. Misugod ang pagsupak. Ang kinadak-ang pagsulay miabot dihang mikomento ang iyang 15-anyos nga batang babaye: “Nawad-an na ako sa akong amahan, ug kon dili ka moundang sa pagtuon uban sa mga Saksi ni Jehova, isalikway ko ikaw ingong akong inahan. Mahimo na akong ilo.” Bisan pa niana, ang babaye nagpadayon sa pagtuon.

Usa ka adlaw ang batang babaye miduaw sa usa ka higala sa ospital. Sa tapad nga katre sa ospital, ang usa ka Saksi miduaw sa iyang paryente sa dihang ang usa ka pari miabot sa pagpakigkita sa samang pasyente. Nasugdan ang panaghisgot tali sa igsoong lalaki ug sa pari. Kalmado ug mataktikanhon ang igsoon, nga migamit sa Bibliya sa pagsaysay sa iyang baroganan. Ang pari, sa laing bahin, isog. Gipadako niya ang iyang tingog, apan wala siya mobukas sa Bibliya bisan ug kausa. Nagtan-aw ang batang babaye sa talan-awon ug nakadayeg sa kalulot sa igsoong lalaki ug sa kamatuorang gigamit niya ang Bibliya. Niadtong gabhiona mismo, sa miduaw ang igsoong lalaki ug iyang asawa sa iyang inahan alang sa pagtuon sa Bibliya, gisaysay sa batang babaye ang nahitabo sa ospital ug mihangyo kanila: “Mahimo bang tun-an usab ninyo ako?” Karon ang batang babaye nagatuon kaduha sa usa ka semana, ug ang bana usab nagatuon. Ang inahan usa na ka bawtismadong magmamantala.

Sa pagkamatuod, si Jehova nagapanalangin sa iyang naghupot-sa-integridad nga mga alagad sa Cyprus!

[Hulagway sa panid 7]

Si apostol Pablo gisupak usab sa Paphos