Akong Kinabuhi Diha sa Tinultolan-sa-Espiritung Organisasyon ni Jehova

Sumala sa gisugid ni Albert D. Schroeder

SA UNANG Dominggo sa Hunyo 1934, si Alex Jones ug ako nagsangyaw sa pultahan sa pultahan sa Jersey City, New Jersey. Sa kalit, ang mga polis mibutho sa apartment nga niadto didto kami, nagdakop, nagtuklod kanamo pasulod sa usa ka sakyanan, ug nagdala kanamo sa bilanggoan!

Tulo ka adlaw sa ulahi, kami gihukman sa usa ka huwes nga sad-an sa pagpamaligyang walay lisensiya ug gisentensiyahag napulo ka adlaw sa bilanggoan. Gidala kami ngadto sa Hudson County Prison, gipahubo, gipakaligo aron maesterilisar, ug gipailis sa sinina sa priso. Dayon gidala kami ngadto sa usa ka atob.

Didto ako nakahigayon sa pagpamalandong. Ako 23 anyos pa lang niadto ug nagkalipay sa akong kinabuhi ingong bug-os-panahong ministro sa Brooklyn Bethel. Itugot nga ipaambit ko ang pila nianang napamalandong.

Mapasalamaton Kang Lola

Ako mahimuot nga mahinumdom sa akong lola sa bahin sa akong inahan, si Elizabeth Darger. Gidala sa iyang mga ginikanan ang pamilya ngadto sa Michigan gikan sa Alemanya sa wala pa ang 1870. Nagtudlo siyag Aleman ug Ingles sa mga publikong tunghaan ug nagpuyo ipon namo sa balay sa akong Luteranong mga ginikanan sa Saginaw, Michigan, ang siyudad nga akong natawhan. Panahon sa Gubat sa Kalibotan I, siya ug ang mga igsoon niyang babaye nga mga maestra nakig-uban sa International Bible Students, nga karon nailhang mga Saksi ni Jehova.

Bisan pag ang akong mga ginikanan nagbaod kanako sa pagtambong sa Sunday school sa Luterano, gitugotan si Lola nga makigsulti kanako mahitungod sa iyang makapahinam nga mga pagtuo sa Bibliya. Siya makabasa sa Bibliya sa Latin ug sa Grego, ug siya nagsilsil diha kanako sa tinguha nga magtuon sa Bibliya diha sa orihinal nga mga pinulongan niini. Nga may kahamuot, akong nahinumdoman ang makapatandog nga mga pakighisgot sa Bibliya uban sa mga igsoong babaye sa akong apohan nga nasentro sa kagamhanang Gingharian sa Diyos nga duol nang mopuli sa pagmando sa yuta sumala sa Daniel 2:44.

Sa 1923 gisugdan ni Lola ang pagtuon kanako, nga gigamit ang libro sa Watch Tower Society nga The Harp of God, ug mitambong usab ako sa mga tigom sa Saginaw nga Kongregasyon uban kaniya. Karon, samtang didto sa akong atob, gipalandong ko ang maong mga tigom, ang pagpamati sa mga programa sa radyo sa Watchtower nga gisibya sa WBBR gikan pa sa Brooklyn, New York, ug ang ubang kasinatiang naghulma sa akong kinabuhi.

Pananglitan, nakahinumdom akong namati sa radyo kang Huwes Joseph F. Rutherford, presidente sa Watch Tower Society, nga midiskurso sa kombensiyon sa mga Estudyante sa Bibliya sa Toronto, Canada, sa 1927. Sa Detroit, Michigan, sa 1928, mitambong ako sa una kong kombensiyon. Didto ako nakadungog kang Igsoong Rutherford nga midiskurso sa personal. Niadtong kombensiyona, ako nalipay sa pagsinggit ug “Oo” sa resolusyong “Deklarasyon Batok Kang Satanas ug Dapig Kang Jehova.” Ang bag-ong librong Government giluwatan nga nagpakitang ang Gingharian sa Diyos usa ka teokratikanhong kagamhanan, dili demokratikanhon.

Mga Pamalandong sa mga Adlaw sa Pag-eskuyla

Gipalandong ko usab ang mga adlaw sa akong pag-eskuyla. Kay gidasig sa akong mga ginikanan, nga dili gusto nga mahimo akong bug-os-panahong ministro, gidawat ko ang eskolarsip sa kolehiyo. Busa, sa Septiyembre 1929, mitungha ako sa Unibersidad sa Michigan sa Ann Arbor aron sa pagtuon sa pinulongan, ekonomiya, ug inhenyeriya.

Si Gng. Judson, ang tag-iya sa balay nga akong gipuy-an, may kontak sa Ann Arbor nga Kongregasyon sa mga Estudyante sa Bibliya. Sa pagbalik ko sa eskuylahan sa tinghunlak sa 1930, giingnan niya ako nga ang usa ka buotang ulitawo nga taga Alabama bag-o pang nakabalhin sa kuwartong atbang sa akoa ug nagtuo siyang interesado siya sa “among mensahe sa Bibliya.” Tinuod nga siya interesado! Si William Addison Elrod ug ako daling nagkahigala samtang gidawat niya ang mga kamatuoran sa Bibliya; ug kami nagpadayong managhigala hangtod ning adlawa.

Si Bill Elrod ug ako mikuha sa kurso sa surveying sa ting-init sa 1931, maong wala kami makatambong sa personal sa 1931 nga kombensiyon sa Columbus, Ohio. Hinuon, sa pagka Dominggo, Hulyo 26, namati kami sa pakigpulong publiko sa radyo ug nahiapil sa madasigon dili-makitang mamiminaw nga nagdawat sa nindot bag-ong ngalang “mga Saksi ni Jehova.”

Niadtong mga adlawa ang Sosyalista, Pasista, ug Komunistang mga matang sa gobyerno gihisgotag maayo sa kampus. Sa Oktubre 1931 si Winston Churchill nagpahayag kanamong 3,000 ka estudyante, nga nagpaluyo sa demokrasya ingong labing maayo gihapong matang sa gobyerno. Sa ulahi, sa Disyembre 1931, si Lord Bertrand Russell, ang iladong Britanikong matematisyan ug pilosopo, namulong bahin sa pasipismo. Sa ulahi pa gayod, si Dr. Hjalmar Schacht, presidente sa Reichsbank sa Berlin, Alemanya, naghisgot sa panginahanglan sa nasyonalistikanhong pagkontrolar sa mga ekonomiya; sa laing mga pulong, iyang gilabanan ang nasodnong sosyalismo, o Nasismo. Duha ka tuig sa ulahi siya diha sa gobyerno ni Hitler ingong ministro sa kahikayang ekonomikanhon.

Kay nakadungog sa mga hangyo niining mga estadista sa kalibotan, ako labi pang nakombinsir nga ang pagkahari lamang sa Mesiyas ang makapatagbawng gobyerno sa kalibotan. Busa si Bill Elrod ug ako nagplano nga mohunong sa pag-eskuyla sa pagka Hunyo 15, 1932, ug unya nagsugod nga magkauban sa bug-os-panahong buluhaton sa pagsangyaw, nga karon nailhang payuniring.

Gisugdan namo ang among payunir nga pag-alagad sa wala pa kami mabawtismohi kay niadto wala pa hisabting tin-aw kon kadtong may yutan-ong paglaom kinahanglang bawtismohan o dili ba. Bisan pa niana, tapos sa akong bawtismo sa Vandercook Lake, Michigan, Hulyo 24, 1932, nadayag nga ang akong paglaom nausab ngadto sa iya sa usa nga dinihogan, nga gilig-on sa ‘pamatuod sa espiritu.’—Roma 8:16.

Pag-alagad sa Brooklyn Bethel

Sa Septiyembre 9, samtang nagpayunir kami sa Howell, Michigan, si Bill nagdagan gikan sa opisina sa koreyo nga nagpakayabkayab ug telegrama. Sa pagbukas niadto, nabasa namo ang imbitasyon ni Igsoong Rutherford sa pagreport dayon alang sa pag-alagad sa Bethel. Gidangtag 72 oras lamang ang paghikay sa among kalihokan ingong payunir ug dayon gidrayb namo ang 1,100 kilometros paingon sa Brooklyn sa among Model T Ford. Sa kataposan nakatabok kami sa Taytayan sa Brooklyn ug nakaabot sa Bethel, sa Septiyembre 13, 1932. Niadtong panahona, may mga 200 ka membro sa pamilyang Bethel, nga kadaghanan kanila maoy dinihogang mga igsoon sa Hari.

Tapos mag-alagad sa usa ka asaynment sa pabrika sa pila ka semana, gibalhin ang akong trabaho ngadto sa Departamento sa Pag-alagad. Ang usa ka maayohon Irlandes nga igsoon, si Thomas J. Sullivan, mao ang magtatan-aw. Siya kanunayng magpahinumdom kanamong mga batan-on, ‘Sa dihang ipresentar ang mga problema, tinoang mabatonan ang tanang kasayoran una mosugyot ug solusyon.’ (Proverbio 18:13) Uban ang pangidhat sa iyang mga mata, siya modugang: “Unsay inyong dalian? Hatagig higayon si Jehova. Tan-awa kon unsay buhaton sa iyang espiritu bahin niana.”

Sa paghinumdom niining nangaging mga kasinatian samtang didto sa prisohan, ako nagkalipay sa pribilehiyo nga magaantos tungod sa pagkamatarong, sama kang Jesu-Kristo ug sa mga apostol. (Juan 15:20; 1 Pedro 4:16) Samtang ako namalandong, nakaamgo ako nga ang maong mga kasinatian nag-andam kanako alang sa umaabot nga mga pribilehiyo.

Makalipay nga Bag-ong Kahayag

Sa sinugdan sa 1935, mga unom ka bulan tapos ako makagawas sa prisohan ug mahibalik sa Bethel, nahinumdoman ko ang ubay-ubayng mga panaghisgot sa lamesa sa Bethel bahin sa ilhanan sa “dakong panon.” (Pinadayag 7:9, 13, King James Version) Gipahayag sa pipila ang pagpaluyo sa pagtuo nga kadto maoy segundaryong langitnong klase, sumala sa gitudlo sa unang presidente sa Watch Tower Society, si Igsoong Russell. Ang uban, hinunoa, nangatarongan nga ang “dakong panon” gilangkoban niadtong may yutan-ong paglaom. Sa maong mga panaghisgot, si Igsoong Rutherford wala mokomitir sa iyang kaugalingon.

Kaming tanan sa Bethel nahinam samtang misakay kamig espesyal nga tren paingon sa Washington, D.C., alang sa kombensiyon nga himoon gikan sa Mayo 30 hangtod Hunyo 3, 1935. Sa ikaduhang adlaw sa kombensiyon, gipahayag ni Igsoong Rutherford ang makalipayng balita nga ang “dakong panon” mao gayoy yutan-ong matang. Sa tayuktok nga gutlo, siya mihangyo: “Mahimo bang motindog ang tanang may paglaom nga mabuhing walay kataposan sa yuta?” Mga katunga sa 20,000 nga tumatambong mitindog. Dayon si Igsoong Rutherford mipahayag: “Tan-awa! Ang dakong panon!” Dihay makadiyut nga hungihong. Dayon kaming tanan miapil sa masadyaong hugyaw, ug ang paghugyaw kusog ug dugay. Sa sunod adlaw 840 ang nabawtismohan, nga kadaghanan iya sa yutan-ong matang.

Kining 1935 nga bag-ong kahayag bahin sa “dakong panon” misangpot sa mga lakang sa pag-organisar pag-usab sa 1936 aron mangandam sa gidahom nga paghugop sa mga membro niining matanga. Pananglitan, hangtod niadto, may usa lang ka dakong Ingles nga kongregasyon sa tibuok New York City, apan sa maong panahon ang bag-ong mga kongregasyon giporma uban kanamong mga batabata nga gitudlong mga magtatan-aw. Karong adlawa, dunay 336 ka kongregasyon sa New York City!

Usa ka Bag-ong Asaynment

Ang Huwebes, Nobyembre 11, 1937, nahimong usa ka halandumong adlaw alang kanako. Nadawat ko ang pahibalo sa pag-adto sa opisina ni Igsoong Rutherford niadtong hapona sa alas 3:00 s.h. Sa pag-abot sa eksaktong panahon, ako nabalakang tingali ako may nahimo nga angay badlongon. Apan tapos sa pila ka mahigalaong pagbayloay, si Igsoong Rutherford nangutana kon andam ba akong modawat ug laing asaynment.

“Andam akong moalagad sa bisan diin nga ako kinahanglanon,” mitubag ako.

Dayon, nga bug-os nakapakurat kanako, si Igsoong Rutherford nangutana: “Gusto ba nimong moalagad sa London Bethel isip alagad sa sangang buhatan?”

“Ay, pagkadako nianang asaynmenta!” mikomento ako.

“Dugang pa, kini nagkahulogan sa tiket nga paingon lang didto, nga mosugot kang mopabilin didto hangtod tapos sa Armageddon. Busa hatagan ko ikaw ug tulo ka adlaw sa paghukom,” mipadayon siya.

“Aw, Igsoong Rutherford, dili ko kinahanglan ang tulo ka adlaw. Kon kabubut-on ni Jehova nga moadto ako, ang akong tubag maoy oo!”

“Nagtuo ako nga kana ang imong itubag,” mitubag siya. “Naa na ni Igsoong Knorr ang imong tiket sa barkong Queen Mary nga molarga paingon sa Inglaterra sa sunod Miyerkoles.”

Nagsugod sa pagtuyok ang akong ulo. “Bansayon ka sa sunod pila ka adlaw,” mihinapos si Igsoong Rutherford.

Sa akong pagbalik ngadto sa Departamento sa Pag-alagad, nga nahimutang sa pabrika, si Igsoong Knorr misugod sa pagkatawa sa akong dakong kakurat. Nasayod siya kon unsay bag-o pang nahitabo. Si Nathan Knorr mao ang magtatan-aw sa pabrika ug sa dili pa dugay nakaadto sa Inglaterra kauban ni Igsoong Rutherford. Dihadiha gisugdan niya ako sa pagbansay kon unsaon sa pag-atiman ang kalihokan sa sangang buhatan. Pila ka adlaw sa ulahi, mibalik ako kang Igsoong Rutherford alang sa dugang pagpangandam.

Ang tambag ni Igsoong Rutherford, nga gibase sa Miqueas 6:8, mao nga ‘buhata ang minatarong, bumarog nga lig-on dapig sa mga polisa sa organisasyon, ituboy ang mga sukdanan sa Bibliya, ipakita ang dihadihang pagkamasinugtanon, ug ayaw pag-ugmaugma. Magmaluluton sa pagpakiglabot sa mga igsoon, makig-ambit nga regular sa pagsangyaw sa kanataran, ug magmapaubsanon sa paglakaw uban sa Diyos.’ Miingon siyang ang Britanikong kanataran walay pag-uswag kay ang nangaging mga magtatan-aw sa sanga wala bug-os mosuportar sa pagsangyaw sa kanataran. Busa siya mihinapos nga mapasiugdahon: “Idasig ang labaw nga pagsangyaw sa kanataran. Ang Britanya karon nagkinahanglag 1,000 ka payunir, dili lang 200 nga mao ang ilang nabatonan pagkakaron.”

Pagdawat sa Inglaterra

Sa pagdunggo sa Queen Mary sa Southampton, misakay akog tren paingon sa London ug dayon nagtaksi paingon sa opisina sa sangang-buhatan sa Sosyedad, nga sa 26 anyos nahimutang sa 34 Craven Terrace, Lancaster Gate. Ang bise-presidente sa International Bible Students Association nagdawat kanakong matinahoron. Gihatag ko kaniya ang sulat ni Igsoong Rutherford nga nag-awtorisar kaniya sa pagpapahawa sa alagad sa sangang buhatan ug sa pagpahibalo sa pamilyang Bethel nga ako ang mopuli kaniya. Kadto gibuhat sa paniudto, ug ang 30 ka membro sa Bethel mainitong nagdawat kanako.

Sa igong panahon nailaila ko ang daghan sa mga alagad sa sanga ug mga hawas sa Uropa. Sila maoy mga dinihogan nga nangunang walay-pagkompromiso sa buluhaton sa pagsangyaw bisan pa sa kababagan sa panahon ni Hitler, ang mga lalaking sama kang Martin Harbeck sa Switzerland, Charles Knecht sa Pransiya, Fritz Hartstang sa Netherlands, Johan Eneroth sa Sweden, William Dey sa Denmark, ug ang maisogong si Robert Winkler sa patago nga organisasyon sa Sosyedad sa Alemanya. Pinaagi sa tanang Kasulatanhong paagi, kining dili-hadlokang mga tawo sa pagtuo misagubang sa mabangis nga mga paglutos sa Nazi.

Miduaw si Igsoong Rutherford

Niadtong 1938, ang tuig una mosilaob ang Gubat sa Kalibotan II, naugmad sa mga Britaniko ang tabok-dagat radio-teleponong transmisyon. Ang ilang mga inhenyero misugot nga makonektar ang upat ka kontinente alang sa usa ka espesyal nga kombensiyon nga nasentro sa London, Septiyembre 9 hangtod 11. Ang Royal Albert Hall, ang kinadak-ang angayang dapit sa London, maoy nakuha alang sa kombensiyon. Ang grupo ni Igsoong Rutherford, apil si Nathan Knorr, miabot tulo ka semana nga sayo sa pagtabang sa mga preparasyon.

Sa pagmantala sa pakigpulong publiko, giorganisar ang mga parada uban ang sandwich nga mga karatula. Una pa himoon ang unang martsa sa pagpahibalo, gipakigkitaan ako ni Igsoong Rutherford. Samtang naghisgot kami sa mga butang bahin sa kombensiyon, siya nagsulatsulat pinaagi sa iyang pluma, nga mao usahay ang buhaton niya kon makigsultig laing tawo. Gilasnit niya gikan sa usa ka pad ang iyang nasulat ug gihatag kadto kanako. “Unsay imong hunahuna niana?” siya nangutana.

“ANG RELIHIYON USA KA LIT-AG UG LIMBONG,” kana ang mabasa.

“Daw init kaayo kini,” mitubag ako.

“Akong tuyo nga kini masakit,” matud niya. Dayon siya nagsugo nga gam-on ang mga plakard uban ang maong mga pulong nga magamit alang sa una namong martsa sa pagmantala sa kombensiyon sa gabii sa Miyerkoles. Sa sunod gabii si Nathan Knorr ug ako ang nanguna sa martsa sa mga usa ka libong igsoon sa 10 kilometros agi sa sentro sa London.

Gipatawag ako ni Igsoong Rutherford sa pagkabuntag ug nangayog report. “Daghan ang naghingalan kanamog mga komunista ug mga ateyista ug nagpahayag ug masakit nga mga komento,” matud ko. Busa siya naghunahuna sa pila ka minutos ug sa kataposan naglasnit sa usa ka pliego uban ang gisugyot nga panultihong “ALAGARA ANG DIYOS UG SI KRISTO ANG HARI.” Gihunahuna niyang ang pagsal-ot niining mga pulonga sa maong mga karatula makapaneyutral sa ngil-ad nga reaksiyon, nga mao gayoy nahitabo. Maayo ang dagan sa maong 1938 nga kombensiyon. Ang prinsipal nga mga sesyon sa Sabado ug Dominggo, uban ang pangunang pakigpulong, “Atubanga ang mga Kamatuoran,” nga nahipasang malamposon ngadto sa 49 dungan-gihimong mga kombensiyon sa tibuok Ingles-ug-sinultihang kalibotan.

Tapos sa kombensiyon, ang usa ka sesyon sa pagbansay gihimo uban sa mga alagad sa sanga sa kanasoran sa Uropa. Panahon sa sesyon, grabe akong gibadlong ni Igsoong Rutherford tungod sa kakulang sa pagbansay sa mga attendant. Nakahilak ako sa kasaba. Sa ulahi, si William Dey naghupay kanako sa pribado, nga nag-ingong gigamit ako ni Igsoong Rutherford sa pagtudlo kanilang tanan sa dili-direktang paagi. Ug mao gayod kadto! Sa sunod adlaw si Igsoong Rutherford, kinsa gustong mosul-ob ug apron ug moluto, nagdapit kanamong tanan sa espesyal nga pagkaon nga iyang giluto. Ang tanan nagpahimulos sa makalipayng panag-ubanay.

Ang Katuigan sa Gubat sa Kalibotan II

Niadtong Septiyembre 1, 1939, gisulong ni Hitler ang Polandiya. Sa Dominggo, Septiyembre 3, gideklarar sa Britanya ang gubat batok sa Alemanya. Libolibo kanamo sa Britanya ang nagsangyaw sa kanataran niadtong buntaga, nga tukmang nagpahimutang sa bag-ong librong Salvation. Sa matag pultahan ang mga tawo nangahadlok; ang pila ka babaye nanghilak. Kaming tanan nahutdag basahon sa Bibliya samtang gihatagan namog Kasulatanhong paghupay ang mga tawo.

Sa sunod bulan, nadawat namo ang abanteng kopya sa artikulo sa Nobyembre 1, 1939, nga Watchtower nga nag-ulohang “Neyutralidad.” Sa eksaktong panahon kadto naglaraw sa Kasulatanhong baroganan sa matuod nga mga Kristohanon panahon sa kalibotanong mga away. (Juan 17:16) Sa wala madugay nagsugod pagkahitabo ang mga pagdakop ug pagpriso sa ginatos sa atong Britanikong mga igsoong lalaki ug mga babaye.

Ang bugnoay sa kahanginan sa Britanya, gitawag ang Bugno sa Britanya, misamot sa hinapos sa 1940 ug nagpadayon sa 1941. Kaming didto sa London nakaantos sa 57 sunodsunod nga gabii sa 14-oras-gidugayong mga pagbomba. Nahupong ang kahanginan sa mga siyaok. Nahadiindiin ang dilaab sa mga sunog. Kawhaag-siyam nga bomba nahulog sulod sa 460 metros sa Bethel. Ang among dakong Kingdom Hall tapad sa Bethel nasunog sa mga bombang makasunog, pero dali kadtong napalong sa bansay namong mga igsoon sa Bethel.

May daghang matang sa panahon-gubat nga mga restriksiyon, apil ang pagrasyon sa pagkaon ug mga paglimite sa pagbiyahe. Bisan pa niana, gipadayon namo ug gipauswag pa ang among balay-balay nga pagsangyaw. Sa 1937 ang Britanya may 4,375 magmamantala, sa pagka 1942 ang gidaghanon miuswag ngadto sa 12,436. Ang mga payunir miuswag gikan sa 201 sa akong pag-abot sa Inglaterra sa 1937 ngadto sa 1,488 sa 1942! Tino, si Jehova tugob nagpanalangin niining sayong pagpugas pinaagi sa mga magsasangyaw sa kanataran. Karon, kapin sa 50 ka tuig sa ulahi, may kapin sa 109,000 magmamantala sa Gingharian sa Britanya, apil ang kapin sa 6,000 ka regular payunir.

Gikan sa Septiyembre 3 hangtod 7, 1941, among nahimo, nga gitabangan sa espiritu ni Jehova, sa butang gitawag sa opisyales sa gobyerno nga “imposible.” Gihimo namo ang kinadak-ang kombensiyon sa mga Saksi ni Jehova sa Britanya hangtod nianang petsaha. Kapin ug 12,000 ang nagtigom sa De Montfort Hall sa Leicester ug sa palibot nga luna sa tunga mismo sa gubat. Kadto ang mismong tigomanan nga gigamit sa 1983 tinuig nga tigom sa korporasyon sa Sosyedad nga gihimo sa Leicester. Kapin sa tulo ka libo kanamo ang naghinumdom niadto sa mga kasinatian sa panahon-sa-gubat nga kombensiyon sa 1941.

Ang opisina sa London nahimong sentro sa mga kagiw panahon sa gubat. Ang telepono niini kanunayng mitililing. Dihay pondong salapi para panghinabang, nga tungod niana ang mga igsoong nabombahan makabatog dihadihang hinabang. Gawas pa, ang mga igsoon nga mga kagiw gikan sa Polandiya, Alemanya, Norway, Pransiya, Belgium, Holland, ug ubang dapit nangabot sa London diin sila gitabangan. Daghan kanila ang nag-alagad nga payunir sa Britanya.

Persona Non Grata

Sa pag-entra dayon sa Tinipong Bansa sa gubat sa Disyembre 8, 1941, nawad-an ako sa akong eksempsiyon isip U.S. nga lungsoranon gikan sa Britanikong pagpanguhag sundalo. Tungod sa akong Kristohanong neyutralidad, ako dili makasunod sa lainlaing mando nga giluwatan sa Britanikong gobyerno alang sa mga katungdanan sa gubat. Sa kataposan, sa Mayo 6, 1942, ang Britanikong gobyerno nagpahibalo kanako nga ako persona non grata ug busa gimandoan sa pag-uli sa Tinipong Bansa. Sa Agosto 1, ang Daily Herald sa London nagdala sa akong letrato sa atubang nga mga panid niini uban sa artikulong “Sila Nag-ingon Kaniya nga ‘Pauli.’”

Sa buntag sa Lunes, Agosto 24, 1942, duha ka tiktik sa Scotland Yard nagdakop kanako aron pagawson sa nasod. Gidala ako nila sakay sa tren ngadto sa Glasgow, Scotland, diin ako gibutang sa tibuok gabii sa edad-media Barlinnie nga Prisohan. Sa sunod adlaw ako giubanan sa pagsakay sa Britanikong barko nga S.S. Hilary, diin ako padayong gibantayan. Gidangtag 13 ka adlaw aron ang among panon sa 52 ka barko makatabok sa Atlantiko sa paikis-ikis nga paagi aron malikayan ang Alemang mga submarino. Kay nakaikyas sa ilang mga torpedo, kami nakaabot nga luwas sa Halifax, Canada! Kay gibuhian na ako niadto, sa sunod adlaw ako mipadayon paingon sa New York nga sakay sa tren, nga miabot sa Septiyembre 10.

Malinawong Yugto Talagsaong Gitagna

Dako ang akong kalipay nga mahibalik sa daghang mainitong mga igsoon sa Brooklyn Bethel. Ako nakaabot nga igo sa panahon sa pagtambong sa makasaysayanhong kombensiyon sa Cleveland, Ohio, Septiyembre 18-20, 1942. Didto, si Igsoong N. H. Knorr, ang bag-ong presidente sa Sosyedad, mihatag sa pakigpulong “Kalinaw—Makalahutay ba Kini?” Kadto naghatag ug bag-ong kahayag sa Pinadayag 17:8. Gipadayag nga ang Alyadong mga gahom magmadaogon ug motungha ang bag-ong internasyonal nga “mananap sa kalinaw.” Kini nahitabo sa dihang, sa pagkatapos sa gubat sa 1945, ang Hiniusang Kanasoran naorganisar!

Watchtower Bible School of Gilead

Tapos sa tinuig nga tigom sa korporasyon sa Watch Tower Society sa Oktubre 1, 1942, si Igsoong Knorr ingong presidente nagpatawag kang Maxwell G. Friend, Eduardo F. Keller, ug kanako sa iyang opisina. Giingnan niya kaming nahimo ang desisyon niadtong buntaga sa pagtukod ug usa ka misyonaryong tunghaan sa Bibliya sa Kingdom Farm, South Lansing, New York. Siya miingon nga ako ang mahimong registrar sa tunghaan ug nag-alagad nga tsirman sa komite aron maorganisar ang tunghaan. Kami nagbuhat uban kang Igsoong F. W. Franz sa pagdesinyo sa nindot nga mga kurso sa Bibliya. Kadto ang sinugdanan sa hataas nga yugto sa malipayong pakigtambayayong kaniya aron mapauswag ang edukasyon sa Bibliya.

Ang buntag sa Lunes, Pebrero 1, 1943, mao ang opisyal nga dedikasyon pinaagi ni Igsoong Knorr sa karon nailhang Watchtower Bible School of Gilead, nga nahimutang sa Kingdom Farm duol sa South Lansing, New York. Tapos sa programa sa dedikasyon, ang mga sesyon sa tunghaan nagsugod sa upat ka klasehanan, nga ang matag usa may 25 ka estudyante. Ang kurso sa abanteng Kristohanong edukasyon gidangtag 20 ka semana, nga ang Bibliya mao ang pangunang teksbok.

Ang makalipayng mga bulan, dayon makalipayng mga tuig, sa laglom pang pagtuon sa Bibliya mao ang bulahan kong bahin. Kauban sa ubang debotadong mga instruktor, ako mapasalamaton kang Jehova tungod ning pribilehiyo sa pagtudlo ug pagtandog sa mga kasingkasing sa dedikado kaayong mga estudyante nga nahigugma kang Jehova ug sa iyang buluhaton! Hangtod sa 1960, 3,700 ka estudyante naggikan sa 70 ka yuta aron mapatugob ang among mga klase sa tunghaan.

Pag-ambit sa Minyong Kinabuhi

Samtang nagtambong sa “Madaogong Gingharian” nga mga kombensiyon sa Uropa sa 1955, gibag-o ko ang akong pakighimamat sa minahal nga Charlotte Bowin, nga usa sa akong mga estudyante sa unang klase sa Gilead sa 1943. Siya nag-alagad ug 12 anyos ingong matinumanong misyonaryo sa Katsilang teritoryo, apil ang Mexico ug El Salvador. Karon, duyog sa iyang kauban si Julia Clogston, siya nagtambong niining Uropanhong mga kombensiyon. Lain pay ato, ang mga ginikanan ni Charlotte mga membro sa pamilyang Bethel sa Brooklyn sa tagsaanon pa silang duha, sa panahon ni Igsoong Russell. Unya, sa naminyo sila, si Martin Bowin nahimong nagpanawng magtatan-aw hangtod natawo si Charlotte sa 1920.

Sa Enero 1956 si Charlotte misulod sa pag-alagad sa Bethel ug nabalhin ngadto sa Kingdom Farm. Sa Agosto 1956 kami naminyo. Sa namabdos si Charlotte, kami naguol, kay nagtuo nga kadto magtapos na sa among tibuok-panahong pag-alagad. Bisan pa niana, si Igsoong Franz nagdasig kanamo, nga miingon: “Kamo wala makasala sa paghimo sa tagoangkan nga mabungahon. Magmaisogon! Mahimong sa usa ka paagi hikayon ni Jehova nga kamo makapadayon sa bug-os-panahong pag-alagad.”

Kana mao ang misangpot. Ako nakapadayon sa pagkamagtutudlo sa Tunghaang Gilead. Sa sinugdan kami nagpuyo sa gamayng giabangang apartment, ug dayon sa 1962 kami mibalhin ngadto sa bag-ong-tinukod nga balay nga nahimutang sa mga 1.6 kilometros gikan sa tunghaan. Didto sa South Lansing, New York, ang among anak, si Judah Ben, nga natawo sa Pebrero 1958, migugol sa iyang unang katuigan.

Daghan ang mga kalipay sa pagpadako kang Judah Ben, samtang kanunay namong gipaningkamotan ang pagpadapat sa mga prinsipyo sa Bibliya. (Efeso 6:1-4) Siya gidasig sa pagsunod sa Miqueas 6:8 maingon nga akong gitinguha ang pagpadapat nianang tekstoha sa akong kinabuhi. Sa ulahi, si Judah nahimong ikatulong kaliwatang Bethelite ug nag-alagad sa Bethel sa 12 ka tuig. Siya naminyo sa usa ka maanyag payunir nga igsoong babaye, si Amber Baker, sa Hunyo 1986. Sila nagapayunir karon sa Michigan.

Ang Tunghaan Alang sa mga Ansiano

Sa 1958 nga kombensiyon sa Yankee Stadium, gipahibalo ni Igsoong Knorr ang pag-abli sa usa ka bag-ong tunghaan alang sa mga ansiano, nga nailhang Tunghaan sa Ministeryo sa Gingharian. Sa Marso 9, 1959, ang unang klase sa 25 ka estudyante nagsugod sa upat ka semanang kurso niini sa Kingdom Farm, diin naglihok usab ang Tunghaan sa Gilead. Sa gibalhin ang Tunghaan sa Gilead ngadto sa Brooklyn sa Septiyembre 1960, ang Tunghaan sa Ministeryo sa Gingharian nagpabilin sa Kingdom Farm, diin kami nakabansay sa usa ka gatos ka ansiano kada bulan. Akong nadiskobrehang ang pagkaamahan usa ka bentaha sa pagtudlo sa mga ulo sa pamilya nga nagtambong sa bag-ong tunghaan.

Sa 1967 kining tunghaana gibalhin sa Bethel sa Brooklyn. Sa ulahi, sa 1968, kadto gibalhin na usab sa Pittsburgh, diin, hangtod sa 1974, libolibong buotang mga ansiano nakadawat ug pagbansay. Sukad sa 1974 paunahan, ang tunghaan gidumala diha sa lainlaing Kingdom Hall sa tibuok nasod. Ang akong asawa ug anak lalaki nag-uban kanako samtang ako nagbiyahe ngadto niining lainlaing dapit. Sila nag-alagad nga mga payunir samtang ako nagtudlo sa tunghaan.

Dugang Harianong Pag-alagad

Sa Nobyembre 1974, ako nagtudlo sa Tunghaan sa Ministeryo sa Gingharian sa akong lungsod sa Saginaw, Michigan, dihang akong nadawat ang dili-hikalimtang sulat gikan sa Nagamandong Lawas. Kadto nagdapit nako nga mahimong membro sa maong lawas ug nagdapit usab sa akong asawa ug anak lalaki sa pag-alagad ingong mga membro sa pamilyang Bethel sa Brooklyn. Busa sa Disyembre 18, 1974, kami mibalhin sa Bethel, ug akong gidawat ang bag-o kong mga pribilehiyo sa pag-alagad.

Ang Nagamandong Lawas nagakahiusa sa pagbuhat nga maayo aron madumala ang tibuok-kalibotang mga kalihokan sa mga Saksi ni Jehova, mapatik ang espirituwal nga pagkaon alang sa atong mauswagong kalamdagan, ug mahimo ang hudisyal nga mga desisyon. Ang Nagamandong Lawas nagatigom kada Miyerkoles, nga nagabukas sa miting uban sa pag-ampo ug mangayo sa pagtultol sa espiritu ni Jehova. Ang dakong paningkamot gihimo sa pagtinong ang matag butang dumalahon ug matag desisyong himoon mahiuyon sa Pulong sa Diyos ang Bibliya.

Ingong membro sa Nagamandong Lawas, ako gipadala sa pagduaw sa nagkalainlaing sangang buhatan ingong magtatan-aw sa sona. Makapasadya kanako sa pagsinating laktud sa panaghiusa sa katawhan ni Jehova diha sa daghan kaayong kanasoran. Makapalipay usab kanako ang pagkahibalag pag-usab sa daghang misyonaryo sa Gilead nga nagamatinumanon gihapon diha sa ilang langyawng mga asaynment. Sa tinuoray, sa matag nasod, ang katawhan ni Jehova mao ang labing maayo ug labing malipayon!

Si Jehova nagapakaon nga dungan sa tanan niyang katawhan sa espirituwal nga paagi pinaagi sa Bantayanang Torre ug sa ubang Biblikanhong basahon. Kining tanan ebidensiya nga si Kristo Jesus mao ang atong nagamandong Hari sukad 1914 ug siya malamposong motultol kanato latas sa “dakong kasakitan” nga anaa lang sa unahan. Sa kataposan, sa tanan nga bata pa sa edad, sa pagkamaalamon ugmara ang mga karera sa bug-os-panahong sagradong pag-alagad karon! Maangkon usab ninyo ang makalipayng mga pribilehiyo nga nagapaabot kaninyo. (Miqueas 7:7) Gikalipay ko ang pag-atiman ni Jehova latas sa miaging mga dekada. Ang iyang mga panalangin nakapadato gayod kanako. (Proverbio 10:22) Ako mapasalamaton kang Jehova sa matag adlaw tungod sa mga pribilehiyong akong nabatonan sa pag-alagad kaniya ilalom sa iyang tinultolan-sa-espiritung organisasyon.—Pinadayag 7:14.

[Hulagway sa panid 12]

Uban sa akong kauban, si Bill Elrod

[Hulagway sa panid 15]

Gidala sakay sa tren ngadto sa Barlinnie nga Prisohan

[Hulagway sa panid 17]

Uban sa akong asawa, si Charlotte