Mga Magmamantala sa Gingharian Nagtaho
Pagkamatinumanon Ilalom sa Pagdili
SULOD sa 11 anyos ang buluhatong pagsangyaw sa usa ka nasod sa Habagatan-silangang Asia nailalom sa opisyal nga pagdili. Bisan pa niana, sa katuigang bag-o pa ang mga igsoon may katarongan sa pagtuo nga ang pila ka responsableng mga tawo sa gobyerno buot nga mohupay sa kahimtang. Ang pagdili daw gidasig sa kusog nga impluwensiya sa mga relihiyon sa Kakristiyanohan diha sa mga opisina sa gobyerno.
May mga panahong ang mga igsoon gipaniiran, gidakop, ug gisukitsukit pag-ayo. Kadtong nagtrabaho sa mga institusyon sa gobyerno gihulga nga ipaubos sa posisyon o pugson sa pagretiro kon dili sila moanib sa politikanhong partido sa Estado. Ang usa ka grupo sa mga magmamantala grabeng gibukbok.
Ang mga Saksi gikuhaan usab sa legal nga mga katungod, sama sa mga serbisyo sa sibil nga mga korte ug sa katungod sa pagdumalag serbisyo sa paglubong. (Ang mga awtoridad nagatudlo sa usa ka klerigo sa pagbuhat niini.) Sa pila ka dapit, bisan ang pagrehistro sa kasal gihikaw sa mga Saksi!
Bisan pa niana, kadtong nagatan-aw sa buluhaton didto nagtaho: “Sa walay sipyat, sa dapit diin ang mga igsoon maisogong nagaatubang sa isyu, nga matinahorong nagahatag ug matinahorong pamatuod gikan sa Bibliya, ang mga pagsukitsukit sa kadugayan mohunong ug mamenosan ang pagpaniid, nga makapaarang sa mga igsoon sa pagpadayong epektibo sa pagsangyaw ug paghimog mga tinun-an.”—Mateo 28:19, 20.
Pananglitan, usa ka igsoong babaye nga gisukitsukit gisukna kon diin kita magkuha sa ngalang Jehova. Sa maisogon iyang gibuksan ang iyang Bibliya ngadto sa Exodo 15:3, diin makita ang ngalan. Ang tigsukitsukit, usa ka komandante sa militaryo, nagbasa sa Bibliya, nga nag-ingon: “Oo, tuod. Nia man sa Bibliya.” Dayon, sa pagliso ngadto sa usa ka klero nga miapil usab sa pagsukitsukit, siya nangutana: “Nganong wala ninyo ipahibalo sa katawhan ang ngalan?” Ang klerigo maaghopong mitubag: “Oy, oo, ang ngalan anaa sa Daang Testamento. Apan kay kining nasora wala may diplomatikong relasyon uban sa Israel, wala namo gamita ang ngalan.” Ang igsoong babaye gibuhian dayon!
Sa paglihok sumala sa usa ka sugyot gikan sa usa ka tawong “interesado,” ang kapolisan nagkanselar sa una sa tulo ka distritong kombensiyon sa gabii una kana mosugod! Bisan pa niana, ang ubay-ubay pabor nga mga tawo diha sa kuwerpo sa kapolisan mitabang sa pagpahunong sa misangpot nga mga pagsukitsukit. Sa kawalay-kahadlok, gihimo sa mga igsoon ang duha ka laing kombensiyon.
Bisan pa sa dakong relihiyosong pagsupak niining nasora, anaa gihapoy nahigugma sa pagkamatarong. Pananglitan, usa ka amo, kay nakakita sa pagkamaunongon sa mga igsoon ngadto sa ilang mga prinsipyo ug tinuohan, nakaugmad ganig labawng pagsalig sa mga igsoon. Sila gihatagag dugang responsabilidad sa trabaho.
Ang susamang mga butang nahitabo sa among mga anak. Ang mga magtutudlo nga buotag kasingkasing nagadayeg kanila tungod sa lig-on nilang pagbarog sa ilang tinuohan.
Bisan pag ang situwasyon diha sa kanataran nagkaluag alang sa mga igsoon, ang mga iglesya nagapadayon gihapon sa ilang pagpanghasi ug nagasulay sa tanang posibleng paagi sa pagpahunong sa buluhatong pagsangyaw. Usahay ilang sulayan ang pagdaot sa lawasnong paagi niadtong nagatuon sa Bibliya uban sa mga Saksi. Bisan pa niana, ang mga interesado nagaganayan gihapon sa pagsulod sa organisasyon ni Jehova. Ang usa ka kasinatian mao ang kabahin sa usa ka lola nga setenta na sa edad. Tapos maoperahi ang usa sa iyang mga mata, nagpahayag siya sa iyang tinguha nga mag-auxiliary payunir. Tungod sa iyang edad, sa sinugdan iyang gibati nga dako kaayo alang kaniya ang 60-oras nga kinahanglanon, apan, human masulayi kana, iyang nadiskobrehan nga iyang nadiskobrehan nga iyang mahimo kana. Ngani, sa unang napulo ka adlaw, siya nakagugol ug 38 ka oras sa pagsangyaw sa kanataran; nakapahimutang ug duha ka libro, tulo ka pulyeto, ug duha ka magasin sa usa ka lisod nga teritoryo; ug nakasugod sa duha ka pagtuon sa Bibliya. Siya nalipay!
Sa katibuk-an, ang kahimtang sa pagsangyaw sa kanataran sa nasod maayo kaayo. Ilabina human sa katibuk-ang eleksiyon, ang mga igsoon nakahimo sa nagkalainlaing bahin sa pagsangyaw. Kini nakapatulin gayod sa buluhaton. Ang usa ka regular nga magmamantala makaarang sa pagdumalag pito ngadto napulo ka pagtuon. Sa nangagi, ang mga tagbalay masukitsukiton bahin sa kon kinsa kita, diin kita gikan, ug uban pa. Karon ang mga igsoon dili na gani magpailaila sa ilang kaugalingong. Ang mga tawo gigutom sa makapatagbawng espirituwal nga pagkaon. Ang uma andam na gayod nga anihon.—Mateo 9:37, 38.
Sa pagkamatuod, ang mga igsoon niining nasora naghupot sa integridad ilalom sa pagsulay, nga karong bag-o nagpahimulos sa 7-porsientong pag-uswag sa mga magmamantala! Mibarog sila sama sa pagbarog ni salmistang David sa miingon siya: “Alang kanako, ako magalakaw sa akong pagkamatinumanon.”—Salmo 26:11.