Padayong Paghupot sa Atong Kristohanong Pagkausa

“TIAW na nga ikaw tawgon nga igsoon,” misulat ang Katolikong manunulat si Domenico Mosso, “dili sa pari, kondili sa edarang lalaking tapad nimo o sa maanyag nga dalaga nga bag-o pang miabot sa imong tuo. ‘Unsa to?’ ‘Miingon ako, maayong buntag igsoon.’ ‘Nganong nangahas ka man uroy . . . Wala ko makaila nimo, busa naunsa man nga nag-inato ka? Kon buot sabton, kita ania sa simbahan.’”

Ang tinuod nga pagbati sa pagkamagsoon wala gayod taliwala sa mga iglesya sa Kakristiyanohan. Kini nagapabanaag sa ilang kakulang sa Kristohanong panaghiusa. Hinuon, kana dili matuod sa mga Saksi ni Jehova. Sama sa unang mga sumusunod ni Jesus, kami sa walay pagpanuko nagatawag sa usag usa nga igsoon. (2 Pedro 3:15) Bisan kon diin kami moadto sa kalibotan, ang mainiton, inigsoong pagdawat sama ka duol sa labing duol nga Kingdom Hall. Ang panaghiusa gipaila usab sa kamatuorang ang tanang kongregasyon nagasunod sa samang sumbanan sa pagtulon-an ug ang tanang Saksi nagapakig-ambit sa pagwali sa “maayong balita sa gingharian.”—Mateo 24:14.

Sa gabii una siya mamatay, si Jesu-Kristo miampo: “Ako nagahangyo . . . mahitungod niadtong nagbutang ug pagtuo kanako pinaagi sa ilang pulong; aron silang tanan mausa, maingon nga ikaw, Amahan, nahiusa kanako ug ako nahiusa kanimo.” (Juan 17:20, 21) Ang talaan sa Bibliya nagapakita nga gitubag ni Jehova nga Diyos ang pag-ampo ni Jesus. Taliwala sa unang mga Kristohanon, ang dugay-nang pagkontrahanay tali sa mga Hudiyo ug mga Hentil nahanaw tungod sa makapahiusang gahom sa mga pagtulon-an ni Kristo.—Galacia 3:28.

Hinuon, kinahanglan ang paningkamot sa pagpadayon sa maong panaghiusa. Gihangyo ni apostol Pablo ang iyang isigkamagbubuhat “sa paglakaw nga takos sa [langitnong] pagtawag . . . nga tim-os maningkamot sa pagbantay sa pagkausa sa espiritu diha sa makapahiusang bugkos sa pakigdait.” Kinahanglan sila dili mabungkag ngadto sa nagkalainlaing mga sekta. Dili, “adunay usa ra ka lawas, ug usa ka espiritu, maingon nga kamo gitawag sa usa ka paglaom nga alang niana kamo gitawag; usa ka Ginoo, usa ka pagtuo, usa ka bawtismo; usa ka Diyos ug Amahan sa tanan.” Ang mga apostol, mga magbalantay, ug mga magtutudlo sa kongregasyon gitagana sa pagtabang “sa tanan nga makadangat sa pagkausa sa pagtuo.”—Efeso 4:1-6, 11-14.

Ang mga Saksi ni Jehova sa modernong panahon malamposong nakahupot nga padayon sa maong ”pagkausa.” Bisan pa niana, ang nagkalainlaing mga butang—ang espiritu sa independensiya, kultural ug rasanhong mga kalainan, nagkalainlaing mga depekto ug mga pagkadili-hingpit taliwala sa kaubang mga Kristohanon—makadaot sa atong “pagkausa sa pagtuo.” Sa unsang paagi kini mahuptan nga padayon?

Pagkaon Diha sa Usa Ra ka Lamesa

Si Jehova dili maglamdag sa matag Kristohanon sa tagsatagsa. Hinunoa, gitudlo ni Kristo ang “matinumanon ug maalamong ulipon” nga matang sa pagtaganag Kasulatanhong materyal nga tun-anan ug tukma-sa-panahong tambag alang sa mga Kristohanon sa tibuok kalibotan. (Mateo 24:45-47) Ang The Watchtower sa ingon gipatik sa 103 ka pinulongan sa pagtabang sa pagtagana nianang tibuok-kalibotan nga panginahanglan.

Ang pagkaon diha sa usa ra ka espirituwal nga lamesa dakog nahimo sa pagpatungha ug paghupot nga padayon sa pagkausa sa pagtuo. Hinuon, ang pila sa tambag daw dili mapadapat sa pila ka nasod. Angay bang mobati kita nga wala nato kinahanglana ang maong impormasyon? Dili gayod. Ang pila sa mga pasidaan ni Pablo ngadto sa mga Kristohanong nagpuyo sa imoral, nagsimbag-diyosdiyos nga siyudad sa Corinto daw sa bug-os dili mapadapat sa mga Kristohanon nga nagpuyo sa kabanikanhan. (1 Corinto 6:15, 16; 10:14) Bisan pa niana, ang mga Kristohanon sa bisan diin nag-isip sa mga sinulat ni Pablo ingong bahin sa “ang Kasulatan.”—2 Pedro 3:16.

Susama karong adlawa, ang pila ka artikulo daw dili mapadapat nganha sa lokal nga mga kahimtang kay sa uban. Apan angay nga ato gihapong dawaton ang abanteng pasidaan, kay nasayod nga sa atong panahon sa tulin nga komunikasyon, ang dili-maayong mga uso nga nagsugod sa usa ka bahin sa kalibotan daling mokaylap!

Mga Pagkadili-hingpit ug Hingaping mga Punto de Vista

Matud sa disipulong Santiago: “Kitang tanan mapandol sa makadaghan.” (Santiago 3:2) Tungod sa pagkadili-hingpit, ang mga tawo makiling usab sa mga hingapin. Kini tingali dili suliran kon ang mga tawo may samang punto de vista. Pananglitan, ang duha ka kutihan kaayong mga tawo tingali magkasinabot nga maayo. Apan kon ang usa danghag ug ang lain kutihan, dili matapos ang panag-away!

Ang mga Saksi ni Jehova “nanggula gikan sa tanang nasod ug mga tribo ug mga katawhan ug mga pinulongan.” (Pinadayag 7:9) Ingong resulta, ang tagsatagsa kanato tingali dunay nagkalain kaayong mga ideya bahin sa mga butang sama sa pagkaon, sinina, pag-atiman sa panglawas, ug bisan sa sosyal nga pamatasan. Ang maong magkaatbang nga mga punto de vista dili kinahanglang magpabahin kanato. Ang Bibliya nagapasidaan batok sa mga hingapin ug nagadasig kanato sa pagbuhat padulong sa katimbang ug pagkamakataronganon. “Ang kaalam sa itaas . . . madaiton, makataronganon,” nagaingon ang Bibliya.—Santiago 3:17.

Matuod, ang Bibliya sa espisipiko kaayo nagatunglo sa pila ka batasan. Apan kadaghanan kini yanong nagadasig kanato nga magpatunga tali sa duha ka hingapin. Palandonga kon unsay ginaingon sa Bibliya bahin sa mosunod nga mga ulohan:

Sekular nga Trabaho: “Ang pagkatapolan makapahinanok sa katulog, ug ang kalag nga tapolan gutomon.” (Proverbio 19:15) “Dili ka makapaulipon sa Diyos ug sa Bahandi.”—Mateo 6:24.

Pagsulti: “Ang usang nagapugong sa iyang mga ngabil nagalihok nga maalamon.” (Proverbio 10:19) “Adunay tinudlo nga panahon alang sa tanang butang . . . panahon sa paghilom ug panahon sa pagsulti.”—Ecclesiastes 3:1, 7.

Pakigpundok: “Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.” (Juan 13:35) “Ayaw pagkanunaya ang imong tiil sa balay sa imong isigkatawo, aron siya dili pul-an kanimo.”—Proverbio 25:17.

Pagmatutog Anak: “Ang nagapugong sa iyang bunal nagadumot sa iyang anak, apan ang nahigugma kaniya mao siya nga nagaatiman kaniya uban ang pagpanton.” (Proverbio 13:24) “Ayaw pagpasuk-a ang inyong mga anak, aron sila dili mahiubos.”—Colosas 3:21.

Sa dugang nga ang atong mga punto de vista timbang inay hingapin, atong masinati ang menos nga kabingkilan batok sa ubang mga Kristohanon. Apan unsa man kon motungha gihapon ang dipagsinabtanay tungod sa pagkadili-hingpit? Hinumdomi ang mga pulong ni Pablo sa Colosas 3:13: “Magpadayon sa pag-antosay sa usag usa ug magpasayloay sa usag usa nga madagayaon kon ang usa may hinungdan sa pagmulo.”

‘Napandol Ako Niya’

Hinuon, ang pipila sa kongregasyon tingali makiling nga maghingapin sa pagkasensitibo, nga magsabot sa dili-malulot nga mga motibo nganha sa inosenteng mga pulong ug mga kompas. Tingali kini tungod sa ilang kagikan. Bisan unsa ang kahimtang, makapasubo gayod kon itugot sa maong sobra ka sensitibo nga sila masilo sa mga ginagmayng butang o, grabe pa, magdisturbo sa uban bahin niana pinaagi sa pagpugas sa mga binhi sa pagkawalay-panaghiusa!

Matuod, ang Bibliya nagasaway sa kagawian nga makapandol sa ubang mga tinun-an. (Lucas 17:1, 2) Ug ang mga hamtong angay masensitibo sa mga pagbati sa isigka-Kristohanon. Sa samang panahon, ang Bibliya kusganong nagatambag batok sa paghingapin sa pagkasensitibo ug pagpadako sa mga sala diha sa atong hunahuna. (Ecclesiastes 7:9) Dugang pa, ang pagsabwag sa pagkadiskontento taliwala sa atong mga igsoon pinaagi sa pagyagyag sa mga kakulangan sa usa maoy usa sa mga butang “ginadumtan ni Jehova.”—Proverbio 6:16-19.

Ang espiritu sa Diyos makatabang kanato sa pagbuntog sa pagkasobra ka sensitibo. Inay magpalandong sa mga depekto sa atong mga igsoon, kita, sa tabang sa espiritu, makapalandong sa positibo, makapalig-ong mga hunahuna. (Filipos 4:8) Kini nagapausbaw sa panaghiusa.

Ang Panaghiusa Dili Pagkamanagsama

Hinuon, ang tibuok-kalibotang panaghiusa wala magkahulogan sa pagpukgo sa pagkalinain o pagdun-ok sa inisyatibo. Kon mapadapat ang mga prinsipyo sa Bibliya, kita malipay sa pagsalikway sa independenteng mga kaisipan niining kalibotana ug pagdawat sa pag-agak sa espiritu ni Jehova. Bisan pa niana, sa pagtuman sa atong hinatag nga buluhaton o komisyon ingong mga magwawali, may dakong dapit sa pagkalinain ug, oo, sa handurawan. Sa pagkamatuod, ang atong mga igsoon kadaghanan nagagamit sa dakong pagkamamugnaon sa pagpahiuyon sa ilang mga paagi sa pagsangyaw nganha sa lokal nga mga kahimtang.

Unya anaa ang haluag nga natad sa mga kalihokan diin ang Kasulatanhong mga prinsipyo wala malangkit sa laktud, apil ang pila ka batasan sa dapit. Sa kontinental nga Uropa, ang mga tawo kadaghanan maglamanohay. Sa mga bahin sa Halayong Silangan, sila moyukbo. Ang bisan hain niana dalawaton sa mga Kristohanon. O palandonga ang pananina ug pamostura. Ang Bibliya nagahatag lamang sa paninugdang mga lagda sa pagkakasarangan ug katimbang. Sulod nianang mga lagdaa, kita makasunod sa atong mga gusto mismo, samtang nagagamit sa “maayong hunahuna.”—1 Timoteo 2:9, 10.

Ang mga ansiano sa ingon mainampingon kanunay sa paghatag ug tambag pinasukad sa malig-ong pasukaranan sa mga prinsipyo sa Bibliya inay sa personal nga mga gusto. Hinuon, kon bahin sa espirituwal nga mga butang, sila manguna sa pagpausbaw sa tinuod nga panaghiusa. Kita makahimo usab sa atong bahin. Kita ‘makapadayon sa pagsusi kon kita anaa ba sa pagtuo’ pinaagi sa regular nga pagtuon sa Bibliya ug sa mga basahon sa ‘matinumanong ulipon.’ (2 Corinto 13:5) Makapadayon kita sa paghupot sa pagkausa sa mga buhat pinaagi sa maisogong paghimog “katilingbanong pagpahayag” sa atong pagtuo.—Hebreohanon 13:15.

Niining paagiha atong sundon ang dinasig nga tambag: “Karon ako nagaawhag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magasulti nga nagkahiusa, ug walay mga pagbahinbahin sa inyong taliwala, aron kamo sa tukma magkahiusa sa samang kaisipan ug sa samang panghunahuna.”—1 Corinto 1:10.

[Hulagway sa panid 30]

Ang paghupot sa maayong relasyon, bisan pag ang usa may pasikaranan sa pagkasilo, bililhon sa panaghiusa