Ang Katahom Mahimong Kutob ra sa Panit

SI Eva, ang una ug bugtong babaye nga gilalang sa Diyos, lagmit mao ang labing matahom nga babaye nga nabuhi sukad. Apan siya ug ang iyang bana, si Adan, misukol kang Jehova. Busa nawad-an si Eva sa iyang suod nga relasyon uban sa Diyos ug nakaambit sa pagpahinabog teribleng katalagman sa tawhanong banay. Human niadto, pihong siya matahom gihapon, apan ang iyang katahom kutob ra sa panit.

Ang katahom usa gayod ka gasa sa Diyos, ug ang pipila nakapanunod ug labaw niana kay sa uban. Ang uban tingali manghinaot nga mas matahom unta sila​—o mas guwapo​—kay sa ilang hitsura, ug daghan nagagugol sa dakong panahon ug salapi aron pahimuslan sa labing maayo ang maayong hitsura nga ilang naangkon. Apan sumala sa gipakita sa panig-ingnan ni Eva, ang katahom lamang walay bili sa kadugayan gawas kon ubanan kinig uban pang mga hiyas. Unsang ubang mga hiyas? Ang usa ka kasinatian sa mga adlaw ni Haring Solomon motabang nato sa pagtubag niana.

Butang nga Labaw kay sa Katahom

Ang basahon sa Bibliya nga Awit ni Solomon nagasugilon mahitungod sa usa ka matahom nga dalagang taga banika, usa ka Sulamita, nga nahigugma sa usa ka magbalantay nga taga ila. Ang iyang katahom nakadani sa pagtagad sa hari, ug iyang gipadala siya sa Jerusalem sa paglaom nga himoon siyang iyang asawa. Talagsaong higayon alang sa usa ka dalaga! Didto, siya makapahimulos sa iyang katahom ug makabatog bahandi, gahom, ug impluwensiya diha sa gingharian. Apan ang dalaga malig-ong misalikway sa mga pangamoral sa hari. Gitalikdan niya ang kasilaw ug bahandi sa Jerusalem ug nagpabiling maunongon sa iyang magbalantay nga hinigugma. Sa iyang kahimtang, ang katahom dili ra kutob sa panit. Siya dili kulang ug kahibalo, mapahimuslon, o dalo. Hinunoa, siya may sulodnong katahom nga wala sa iyang katigulangang si Eva.​—Awit ni Solomon 1:15; 4:1; 8:4, 6, 10.

Ang mga Lit-ag sa Lawasnong Katahom

Ang lawasnong katahom, bisan tuod tilinguhaon, mahimong motultol sa mga suliran nga dili gayod mapukaw sa sulod nga katahom. Pananglitan, halos 4,000 ka tuig kanhi ang patriarkang si Jacob may usa ka anak babaye nga ginganlag si Dina nga pihong maanyag kaayo. Sa dihang sa pagkadili-maalamon migugol siyag panahon sa pagpakig-uban sa “mga anak babaye sa yuta,” ang usa ka batan-ong lalaki nga ginganlag si Shechem naibog kaayo niya nga iyang gilugos siya.​—Genesis 34:1, 2.

Dugang pa, ang maayong hitsura sa gawas, kon dili tugbangan sa sulod nga katahom, makapaburot sa pagtan-aw sa kaugalingon sa nakaangkon niana. Si Haring David may usa ka anak lalaki nga ginganlag si Absalom, nga bahin kaniya atong mabasa: “Kon itandi kang Absalom walay lalaki ang ambongan kaayo sa tibuok Israel nga dinayeg kaayo.” (2 Samuel 14:25) Apan ang lawasnong katahom ni Absalom nagtabon sa sulod nga kangil-ad: Siya garboso, ambisyoso, ug mapintason. Ang batan-ong lalaki inantigong migamit sa iyang personal nga kaambong aron makabatog sumusunod sa Israel ug dayon naglaraw ug daotan batok sa iyang haring amahan. Sa kataposan siya gipatay apan tapos lamang ibalhog nianang ambongan kaayong lalaki ang gingharian sa sibil nga gubat.

Lalakin-ong Kaambong

Sama sa gipakita sa kaso ni Absalom, ang Bibliya nagahisgot sa mga lalaki ug babayeng matahom. Ang usa ka pananglitan sa usa ka lalaki nga wala malit-agi sa iyang lalakin-ong kaambong mao si Jose, ang manghod nga igsoong lalaki ni Dina sa amahan. (Genesis 30:20-24) Sa batan-on pa siya, tungod sa kasina ang mga igsoong lalaki ni Jose nagbaligya kaniya ingong ulipon aron dad-on sa Ehipto. Didto, gipalit siya sa usa ka opisyal sa kasundalohan nga ginganlag si Potipar, ug kay matinud-anon ug kugihan, siya nahimong usa ka magtatan-aw sa panimalay ni Potipar. Kasamtangan, “si Jose nahimong nindot sa pamarog ug ambongan sa panagway.”​—Genesis 39:6.

Ang asawa ni Potipar naibog kang Jose ug sa walay-kaulaw misulay sa pagtental kaniya. Apan gipakita sa batan-ong lalaki nga siya may sulodnong katahom ug lawasnong pagkamadanihon. Midumili siya sa pagpakasala batok sa iyang agalon, si Potipar, ug midalagan pahilayo sa babaye. Ingong sangpotanan, siya gibalhog sa bilanggoan. Ngano? Ang gibatig-kapakyasan nga asawa ni Potipar bakakong nagsumbong nga siya misulay sa paglugos kaniya! Bisan pa niana, ang maong mapait nga kasinatian wala makadaot sa kinaiya ni Jose ug ang labing maayo niyang sulundan ubos sa grabeng kalisdanan nagdasig sa mga tawong matarong ug kasingkasing sukad niadto.

Sumala sa gipakita niining mga panig-ingnana, ang sulod nga katahom​—ang katahom sa pagkatawo ilabina kon ipasukad kini sa pagtuo sa Diyos​—labi pang hinungdanon kay sa lawasnong maayong hitsura. Ang mga batan-ong nagahunahunang magminyo kinahanglang magbantay niini. Ang mga amo nga nangitag mga trabahante kinahanglang mahinumdom niini. Ug kitang tanan angay magbutang sa hunahuna nga kon kaha kita gibulahan sa lawasnong katahom o wala man, makaugmad kita niining labi pang hinungdanong sulodnong katahom. Apan unsay naglangkob niini? Ug sa unsang paagi kita makaugmad niini? Atong hisgotan kini sa sunod artikulo.