Ang mga Taga Venezuela Nakakat-on sa Pagsalig Kang Jehova

“MGA Tuig sa Kadagaya”—mao kanay paghinumdom sa kadaghanang mga taga Venezuela sa panahon human sa 1976. Niadtong tuiga, gipanag-iya sa nasod ang tanang langyawng mga kompaniya sa asiete sa Venezuela, ug misulbong ang ekonomiya sa nasod. Ingong ebidensiya sa bag-ong-napalgang materyal nga kadagaya, daghang proyekto sa pagtukod nanungha sa tibuok nasod. Ang labing taas nga mga tinukod sa nasod, ang Parque Central Towers, gitukod sa Caracas, ang kaulohan sa siyudad. Ang mga tawo daw dunay katarongan sa pagsalig sa malamboong kauswagan.

Karong adlawa, hinunoa, ang palaabuton daw dili na masanagon. Bisan pag mausbawon gihapon nga nasod, ang Venezuela dunay iya usab nga bahin sa mga suliran sa ekonomiya. Ang tanan dinhi mahinumdom sa ‘Itom nga Biyernes,’ nga maoy pagtawag sa kadaghanan, sa Pebrero 28, 1983, sa dihang ang salapi, ang bolivar, gipaubsan ang bili sa pagbaylo. Ingong resulta, nawad-ag gahom ang salapi, ug ang utang sa gawas sa nasod misugod sa pagtumpi. Sa kalit, ang “Mga Tuig sa Kadagaya” nahimong “Mga Tuig sa Kalisod.” Daghan ang nangapalo sa ilang nasayop nga kompiyansa ug pagsalig. Sa kasukwahi, ang mga Saksi ni Jehova sa Venezuela nakakat-on sa pagbutang sa ilang pagsalig sa matuod nga Diyos, si Jehova. Ilang gitagamtam ang padayong pagtubo ug pagdako latas sa katuigan.

Pagtubo sa Unang mga Binhi sa Gingharian

Sa miaging 1936 nga ang mga binhi sa maayong balita sa Gingharian unang gidala ngadto sa Venezuela pinaagi sa duha ka payunir, o bug-os panahong mga ministro, gikan sa Texas, T.B.A. (Mateo 24:14) Sa milabay ang napulo ka tuig sa ulahi, duha ka misyonero​—mga graduwado sa ikalimang klase sa Watchtower Bible School of Gilead—miabot. Ug sa Septiyembre niadtong tuiga, ang sangang buhatan sa Watch Tower Society gibuksan sa Venezuela. Ang report nianang tuiga nagpakitag total nga 19 ka magmamantala sa Gingharian sa Venezuela.

Niadtong Nobyembre 1953, si N. H. Knorr, nga maoy presidente niadto sa Sosyedad, ug ang iyang kalihim, si M. G. Henschel, mihapit sa Venezuela sa ilang paglibot sa Habagatang Amerika. Nuybe-siyentos-kuwarentay-dos miabot sa asembliya nga gihimo sa Caracas. Sa pagka 1977 ang gidaghanon sa mga magmamantala sa Gingharian sa Venezuela mitubo sa labing taas nga gidaghanong kapin sa 13,800. Kana ang nagpahimo sa panginahanglan sa pagtukod ug bag-ong sangang buhatan sa La Victoria, 85 kilometros gawas sa kaulohan. Gidugang ang usa ka bag-ong bahin ug gipahinungod niadtong 1985. Karong adlawa, dunay kapin sa 42,900 ka magmamantala diha sa duolan sa 500 ka kongregasyon ug mga grupo sa Venezuela. Ug daghan pang tawo sa Venezuela ang nagtuon sa pagbutang sa ilang pagsalig kang Jehova, sumala sa gipadayag sa maayong tumatambong nga 154,881 diha sa 1988 nga Memoryal sa kamatayon ni Kristo.

Usa ka Nagkadaiya Apan Tabunok nga Kanataran

Ang Venezuela maoy yuta sa panagkadaiya, ug kini gipakita niadtong nakatuon sa pagbutang sa ilang pagsalig diha kang Jehova. Una, kining nasora ilado sa daghang langyawng mga molupyo. Busa, bisan taliwala sa mga Saksi ni Jehova, dunay daghan gikan sa Italya, Portugal, Alemanya, Espanya, Pransiya, Haiti, Trinidad, Cuba, sa Dominican Republic, Ecuador, ug ubang mga dapit. Apan sila nagkahiusa uban sa ilang kaubang mga taga Venezuela sa pagsalig ug sa pag-alagad sa matuod nga Diyos, si Jehova.

Dunay daghan usab nga rehiyonal nga kalainan. Usa ka Silanganong mangingisda nga gikan sa sidlakang mga dapit lahi kaayo gikan sa magbabaka nga llanero gikan sa habagatang kapatagan. Ang kusog ug pasong Caraqueño gikan sa kaulohan, maoy mahigalaong mga trabahante sa kompaniya sa asiete gikan sa Maracaibo, ang ikaduhang labing-dakong siyudad sa nasod, nga usa ka kalibotang gilay-on gikan sa hinay-ug-pasong mag-uumang Andino nga gikan sa habagatang-kasadpan, nga maoy gisugdan sa Andes Mountains. Ang matag usa dunay iyang kaugalingong mga kustombre ug linitokan. Busa, uban sa langyawng kalainan nga nahatag sa mga langyawng molupyo, dunay mabulokong panagkadaiya taliwala sa mga tawo.

Bisan pa sa nagkalainlaing mga gigikanan, ang mga tawo gikan sa tanang matang sa kinabuhi nakadangat sa pagkat-on bahin kang Jehova. Si María Luisa maoy usa kanila. Bisan sa siyete anyos pa siya, nalangkit siya sa espiritismo. Sa dihang midako siya, nahimo siyang giyanon sa alkohol ug mga droga, nga miagak sa imoral nga kinabuhi, ug debotado sa pagsimba sa diyosa sa Venezuela si María Lionza.a Nangil-aran sa paagi sa iyang kinabuhi, mitrabaho siya sa misyong Katoliko diha sa mga Indian sa kasadpang bahin sa nasod. Wala magdugay iyang nakita nga ang iyang trabaho wala makatabang kaniya ug sa mga Indian. Unya misugod siya sa pakiglangkit sa metapisiko ug reinkarnasyon apan walay kapuslanan. Niining puntoha, naduaw si María Luisa sa mga Saksi ni Jehova. Ang kahibalo sa Bibliya nga iyang nakat-onan nakahatag kaniyag kusog nga iyang gikinahanglan sa pakig-away batok sa daotang mga espiritu. Karon siya nagasalig na kang Jehova ug usa ka aktibong magmamantala sa maayong balita.

Bisan ang mga tawong baldado nagpakakat-on sa pagbutang sa ilang pagsalig kang Jehova, sama sa kaso ni Juan ug Carlos, duha ka igsoon sa unod. Sa nuybe anyos pa siya, gitakboyan ug meningitis si Carlos ug nawala ang iyang panan-aw. Sa ulahi, bisan pa nga nalangkit sa kalihokang karismatiko sa Katoliko, siya misugod sa pagtuon sa Bibliya uban sa mga Saksi ni Jehova. Siya gibawtismohan sa 1982, ug sukad sa Disyembre 1983 siya nahimong bug-os panahong ministro. Ingong buta nga payunir, siya molakaw sa tanang eskina sa iyang teritoryo, mag-inusara kon gikinahanglan. Ang iyang igsoong si Juan, hinunoa, lahi ug sugilanon.

Si Juan maoy 1.8 ka metros ang gitas-on ug kanunayng makakitag away sa dalan. Usa ka adlaw naposilan siya sa likod makaduha. Bisan pa nga siya nabuhi, naparalisar siya gikan sa dughan hangtod sa tiil ug naghigda na lamang kanunay. Sa dihang giduaw siya sa mga Saksi, nagpanuko siyang midawat sa ilang tanyag sa pagtuon sa Bibliya kaniya. Ang pagtuon nakapukaw pag-usab sa iyang pagtahod sa Bibliya. Ang paglaom sa hingpit nga kinabuhi sa Paraiso nakatandog kaniya. Human nga mihunong siya sa pagtabako, pag-inom, ug sa pagpamalikas, ang iyang tanang mga higala kanhi mibiya kaniya tungod kay, sumala pa nila, si Juan nahimong usa na ka “santo.” Apan, siya nagpadayon sa pagsalig kang Jehova, ug sa ulahi siya gibawtismohan.

“Ang pagkanailaid sa banig wala makapahunong kaniya sa pagbuhat sa kabubut-on ni Jehova,” miingon si Juan, “tungod kay sa labing menos ang akong mga kamot ug utok nagaobra pa man ug maayo.” Sa unsang paagi nagaalagad siya kang Jehova sa iyang kahimtang? “Gigamit ko ang akong teyp rekorder aron sa pagtuman sa akong mga responsabilidad, sama sa mga pakigpulong diha sa Teokratikong Tunghaan sa Ministeryo, mga bahin sa Tigom sa Pag-alagad, ug sa pagbasa sa senemanang Pagtuon sa Bantayanang Torre. Ako nakapribilehiyo sa pagdumalag usa ka lokal nga mga Pagtuon sa Libro sa Kongregasyon, nga gihimo sa akong balay. Nakahimo usab ako sa pag-alagad ingong regular payunir.” Unsay iyang gibati niining tanan? “Ako mapasalamaton kaayo sa akong mga paryenti ug sa espirituwal nga mga igsoong lalaki ug babaye, kinsa matinabangon kaayo kanako. Ako naglaom ug nagaampo nga kitang tanan molahutay sa pagbutang sa atong pagsalig kang Jehova aron atong makita ang adlaw sa dihang ‘ang mga bakol molukso sama sa lagsaw.’”​—Isaias 35:6.

Mga Tigom Nakahatag Pagdayeg Kang Jehova

Aron mapadayon ang buluhaton nga nakatabang ug daghan kaayo sa pagbutang sa ilang pagsalig kang Jehova, ang mga Saksi sa Venezuela dili pa dugay nagtukod ug duha ka Assembly Hall. Ang usa niini anaa sa Campo Elias, Yaracuy State, sa kasadpang-sentral nga bahin sa nasod. Ang usa, nahimutang nga duolan sa 60 ka kilometros sa habagatan sa Caracas, dunay mga bawtismohanan, air-conditioned, kosena, ug komedor nga mga pasilidad.

Kining maong mga tigomanan nakadayeg pag-ayo sa mga tagagawas ug mga interesado kinsa miadto sa pagtan-aw niini. Ang usa ka drayber sa bus gisuholan sa usa ka grupo sa mga Saksi aron sa pagdala kanila sa ilang sirkitong asembliya. Sa pag-abot ug nakakita sa dakong parkinganan ug matahom nga palibot, naghunahuna ang drayber sa pagsulod ug sa pagtan-aw niining dapita. “Ang akong nakita sa sulod sa Assembly Hall maoy laing kalibotan, laing planeta,” matud pa niya sa ulahi. Nakadayeg kaayo siya sa kahusay ug panaghiusa nga siya namati pag-ayo sa tibuok programa. Sa ulahi siya mihangyog pagtuon sa Bibliya ug karon bawtismado nang igsoon.

Sa usa ka higayon gihimo ang sirkitong asembliya sa El Tigre, usa ka siyudad sa habagatang-sidlakang bahin sa nasod. Sanglit wala may Assembly Hall nianang lugaraha, giabangan ang lokal nga lugar. Apan, wala mahibalo ang mga igsoon, nga dunay karnabal nga himoon nianang siyudara sa mao gihapong mga petsa. Sa dihang miabot ang lokal nga mga awtoridad sa pagtaod ug plataporma sa banda diha sa lugar nga pagahimoan sa asembliya, mihangyo ang mga Saksi sa mga organisador sa karnabal sa pagbutang sa plataporma sa banda sa laing dapit apan sa walay kapuslanan. Ingong kataposang solusyon, gisultihan sa mga Saksi ang mga nagdumala: “Palihog hibaloi nga nangita kamog kasamok kang Jehova.” Sa pagkadungog niini, ang tawo nga nagdumala mitubag: “Oy dili, dili ko gustog kasamok kang Jehova!” Gibalhin ang selebrasyon sa karnabal sa laing lugar nga layo gikan sa gihimoan sa sirkitong asembliya.

Diha sa laing asembliya, ang bana sa igsoon, usa ka tawo nga dunay karera sa politika, miabot sa pagsusi kon siya duna bay laki didto. Siya nakurat sa kalidad sa mga pakigpulong nga gihatag. “Kon makasulti ako ug sama niadtong tawhana, molampos gayod ako sa akong karera sa politika,” gisultihan niya ang iyang asawa. Human sa programa, iyang giduol ang usa sa mga ansiano ug mihangyo nga pakitaan siya kon unsaon niya sa pag-uswag sa iyang pagpahayag sa publiko​—ug mao ra kana. “Ayaw paglaom nga mosangyaw ako sa pultahan ug pultahan nga magdalag bag,” siya mipasidaan. Gisugdan ang pagtuon sa Bibliya, ug sa ulahi gibag-o sa tawo ang iyang hunahuna​—siya gustong moadto gikan sa pultahan ug pultahan nga magdalag bag ug mosangyaw sa maayong balita! Siya mihunong sa politika ug gibawtismohan, ug karon siya ug ang iyang pamilya nagbutang sa ilang pagsalig kang Jehova.

Gibuksan ang Dalan Alang sa Dugang Pagpadako

Sa panahon sa pagduaw ni L. A. Swingle, membro sa Nagamandong Lawas sa mga Saksi ni Jehova, usa ka panon sa 63,580 ang nagtigom sa Plaza Monumental nga awayanan sa torong-baka sa Valencia. Daghan kanila mibiyahe sakay sa bus sa tibuok gabii. Ang tanang mitambong nadasig pag-ayo sa pagpamati kang Igsoong Swingle nga nagsulti kanila: “Kamo dili na gamayng sanga. Kamo kasarangan-nag-gidak-ong sanga. Ug sa pagtan-aw niini, moabot ra ang adlaw nga kamo maapil na diha sa ‘100,000-ka-magmamantala nga klab’!”

Dunay mga planong gihimo sa pagpadako sa sangang buhatan sa La Victoria aron sa pag-atiman sa katingalahang pagtubo. Oo, pinaagi sa linibo, ang mga tawo sa Venezuela nakakat-on sa pagsalig kang Jehova.

[Footnote]

[Mapa/Hulagway sa panid 21]

(Alang sa bug-os nga pagkahan-ay sa teksto, tan-awa ang publikasyon)

CARIBBEAN SEA

VENEZUELA

Maracaibo

ANDES MOUNTAINS

Campo Elias

Valencia

La Victoria

Caracas

El Tigre

COLOMBIA

BRAZIL

GUYANA

600 Km

400 mi

[Mga hulagway sa panid 24]

Gawas ug sulod nga mga talan-awon sa Assembly Hall sa Cúa