Ang Labing Maayong Tabang sa Pagkahibalo sa Umaabot
Pinaagi sa Usang Nakakaplag sa Dalan sa Kinabuhi
ANG relihiyon may dakong bahin sa kinabuhi sa akong pamilya. Hudiyo ang akong amahan, ug bisan pag nakombertir siya sa Katolisismo aron makaminyo sa akong inahan, siya may dako gihapong pagtahod sa Bibliya. Si Mama naggikan sa pamilyang may nakagamot ug lalom nga Katolikong mga tradisyon—duha sa iyang mga igsoong babaye maoy mga madre, usa ka ig-agaw maoy usa ka monsenyor, ug duha ka pag-umangkon maoy mga prayle.
Sulod sa ikaduhang gubat sa kalibotan, ang mga kabalaka, mga kahadlok, ug kanunay-anaang hulga nga ilabay ngadto sa kampong konsentrasyon tungod kay Hudiyo nakahatod sa akong amahan ngadto sa sayong kamatayon. Kay hugot nagtuo sa doktrina sa pagkadili-mamatay sa kalag, ang akong inahan miapil sa espiritistikanhong mga tigom, nga naningkamot nga makakontak sa akong amahan.
Sa paghidangat ko sa pagkahamtong, ang tradisyonal nga relihiyon nagpadayong bahin sa akong kinabuhi. Ako nagpabiling usa ka “maayong Katoliko.” Bisan pa niana, ang Katolisismo dili makapatin-aw kon unsay anaa sa ugma alang kanako. Kinsa bay akong kadangpan alang sa tabang aron masayran kana?
Sama sa gihimo kas-a sa akong inahan, mikonsulta usab akog mga espiritista. Sanglit sila nagsugod sa matag tigom pinaagi sa pagpangurus ug sa mga pangadye, ako kombinsido nga ang katingad-anang mga hitabo nga akong nasaksihan maoy gikan sa Diyos. Maoy sa maong panahon nga ako, kay buot may himoon sa paghupay sa mga giantos sa uban, miduyog sa usa ka Katolikong asosasyon nga nag-organisar sa mga biyahe paingon sa Marian nga sangtuwaryo sa Lourdes, diin ang mga masakiton naglaom sa milagrosong mga pagkaayo.
Wala pa ako sukad makadungog sa mga Saksi ni Jehova hangtod sa adlaw nga midawat ang akong bana ug duha ka magasin nga nakapaikag kaayo nako. Ang labing nakapahingangha kanako mao nga ang Bibliya gikutlo sa pagpaluyo sa mga komento diha sa mga magasin. Dihadiha nakaamgo ako nga kining mga basahona mahimong mapuslanon kaayo sa pagbatog kahibalo sa Pulong sa Diyos. Misulat ako nga buot kong mosuskribir sa duha ka magasin. Giduaw ako sa mga Saksi ni Jehova, ug gisugdan ko ang pagtuon sa Bibliya.
Ako madasigon kaayo mahitungod sa mga kamatuoran sa Bibliya nga akong nakat-onan ug misugod sa pagsulti bahin niana ngadto sa mga kaila. Ako nakurat sa reaksiyon sa usa ka higala, ang usang nag-organisar sa relihiyosong mga balaang pagduaw, sa gisultihan ko siya nga ako nagsusi sa Bibliya uban sa mga Saksi. Siya nasuko kaayo ug misultig daotang mga butang mahitungod kanila mao nga ako milakaw. Dayon giatubang ko ang pagsupak sa akong bana. (Mateo 10:36) Sa sinugdan kadto lisod, apan sa dugang akong gipadapat ang mga butang akong nakat-onan, sa dugang ang akong pamilyahanong kinabuhi nausab sa pagkamaayo. Ako nabawtismohan niadtong 1977.
Nakaamgo ako nga dili gayod unta nako hikaplagan ang dalan sa kinabuhi kon wala pa ipakita sa mga Saksi ni Jehova ang interes pinaagi sa pagsulay sa pagtabang nako nga mahibalo sa kahibulongang mga kamatuoran sa Bibliya. Ako nahibalo nga ako usab obligado sa pagbuhat sa akong maarangan sa pagtabang sa uban nga mahibalo kang Jehova ug sa iyang kahibulongang katuyoan alang sa umaabot. Unsaon nako pagbuhat kini? Ang labing maayong paagi mao ang pagsulod sa bug-os-panahong ministeryo. Sanglit ako nagpuyo sa panimalay nga nabahin sa relihiyon, kadto dili sayon alang kanako. Apan misalig ako sa pagpaluyo ug giya ni Jehova ug midangop kaniya. Karon, ako nagakinabuhi sa labing malipayong mga tuig sa akong kinabuhi ingong regular nga payunir. Ako labi pang kombinsido kay sukad masukad nga “si Jehova maayo” ug si bisan kinsa “nga modangop kaniya” malipayon.—Salmo 34:8.