“Kining Balaya Imoha”

“KINING balaya imoha—kini among gidugangan.” Pagkahaom ang pagsuma niining mga pulonga sa mga gibati niadtong bag-o pang nakatapos sa duha ka tuig nga pagbudlay diha sa sangang-buhatan sa Watch Tower Society sa Australia! Ang mga pulong gipunting kang Jehova nga Diyos, ug sila bahin sa usa ka awit nga gikomposo alang sa linaing okasyon. Unsang okasyona? Ang dedikasyon sa bag-ong mga sumpay sa Bethel nga balay ug pabrika.

Pagpadako sa Wala Madugay?

Katingad-an, walay pito ka tuig kanhi, ang susamang dedikasyon nahitabo alang sa niadto bag-ong natukod nga kahugpongan sa balayng Bethel sa Ingleburn, sa habagatan-kasadpang bahin sa gawas sa Sydney, Australia. Nganong gikinahanglan ang dugang pagpadako sa wala madugay?

Sa usa ka butang, ang gidaghanon sa mga Saksi sa Australia miuswag gikan sa hapit 32,000 sa 1981 ngadto sa kinatas-ang ihap nga 51,152 sa Oktubre 1989, ug tungod niadto gikinahanglan ang pagdugang sa mga trabahante sa Bethel. Dugang pa, may dakong pag-uswag sa gidaghanon sa mga basahon nga gipadala sa Australia ngadto sa ubang mga sangang-buhatan. Sa pagkakaron, ang Australia nagagamag mga basahon diha sa 37 ka lainlaing pinulongan sa pagtagana sa panginahanglan sa Fiji, Indonesia, Papua New Guinea, New Caledonia, New Zealand, Solomon Islands, Tahiti, Vanuatu, Niue, Western Samoa, Tonga, Tuvalu, ug Wallis Islands, ingon man sa Australia. Busa, ang pamilyang Bethel kusog miuswag ngadto sa 164 ka membro.

Aron makapuyo kining nagkadakong pamilya, sa sinugdan sa 1987 gikompleto ang bag-o tres-andanas nga sumpay sa opisina, nga naghatag sa gikinahanglan kaayong dugang lugar sa opisina. Sunod, giaprobahan sa Nagamandong Lawas ang pagtukod sa usa ka tres-andanas nga dugang sa pabrika ug lima-ka-andanang dugang puy-anan. Sa Enero 1988 ang trabaho nagsugod sa bag-ong dugang sa pabrika, nga makataganag dugang 3,600 metro kuwadradong hawanan. Pila ka bulan sa ulahi, ang trabaho nagsugod sa dugang nga puy-anan, nga makataganag 51 pa ka lawak-higdaan.

Mga Sakripisyo ug Madagayaong Paghatag

Gipadala ang mga imbitasyon ngadto sa mga kongregasyon sa tibuok nga nasod nga nanawag ug mga boluntaryo nga mahimong bahin sa usa ka “pamilya sa konstruksiyon” sulod sa abot ug duha ka tuig. Ang tubag sobra kaayo, ug ang mga boluntaryo gikan sa tanang hanas nga panarbaho mitubag dayon. Kapin sa 700 ka separadong porma sa aplikasyon ang nadawat, ug latas sa yugto sa konstruksiyon, ang total nga 270 ka boluntaryo nangabot ug nagtrabaho sa proyekto sulod sa mga yugto nga gikan sa duha ka semana ngadto sa halos duha ka tuig.

Usa ka Saksi may negosyo nga nagahakot ug yuta sa amihanang estado sa Queensland. Gibaligya niya ang bahin sa iyang negosyo, ug siya ug ang iyang asawa nahimong bahin sa pamilya sa konstruksiyon sukad sa sinugdanan niini. Siya mipalit ug dakong tigkalot ug naghimo sa kadaghanan sa kinahanglanong pangalot nga walay gasto ang Sosyedad. Sa dihang nakompleto ang kinadak-ang trabaho sa pagkalot, gibaligya niya ang makina ug dayon nagpabilin sa pagtrabaho sa ubang mga bahin sa konstruksiyon. Kini usa ra ka pananglitan sa maayo, dili-hakog nga espiritu nga gipakita sa tanan sa tibuok nga Gidonar

proyekto.sa mga Saksi ang paggamit sa mga trak sa semento aron ibubo ang 3,300 metro kubiko nga sementong gikinahanglan alang sa walo ka andana diha sa duha ka tinukod. Ang uban nagdonar sa materyales nga gikinahanglan alang sa 22,000 litrong tangke sa tubig alang sa semento, ug ang mga Saksing nagtrabaho sa pabrika nagdonar sa ilang kahago sa paggama sa mga tangke.

Siyempre, dili tanang boluntaryo ang hanas nga mga trabahante. Sa pagkamatuod, daghang batan-on ang nakakat-on sa bag-ong mga kahanas didto mismo sa dapit sa konstruksiyon. Ang ubay-ubay nahimong hanas nga mga magbubuhat ug tisa samtang mitabang sila sa pagbuhat sa tunga sa milyong tisa nga gikinahanglan alang sa proyekto. Ang uban nakakat-on sa pagbutang sa baldosa sa bungbong ug salog, ug sa pila ra ka semana, ang usa ka sister nahimong hanas kaayo sa pagtaod ug wallpaper.

Adlaw sa Dedikasyon

Ang adlaw sa dedikasyon, Sabado, Nobyembre 25, 1989, namanagbanag nga hayag ug sanag—usa ka matahom nga adlaw sa hinapos sa tingpamulak. Ang ikaduhang hut-ong sa bag-ong dugang sa pabrika gihawanan aron mahimong dakong awditoryum alang sa programa sa dedikasyon. Ang closed-circuit nga telebisyon gikonektar sa mga seksiyon sa laing duha ka andana sa pabrika ug sa shipping, sa awditoryum sa Bethel, ug sa kan-anang lawak sa Bethel. Kadto nagtugot sa hamugaway nga lingkoranan alang sa kapin sa 3,000.

Tungod kay gamay ang lugar, kadto lamang bawtismado sulod sa mga 40 anyos ang giimbitar sa pagtambong, uban sa personal nga mga bisita sa mga pamilyang Bethel ug sa konstruksiyon. Ang merienda gipanghatag sa buntag, ug ang lamiang paniudto sulod sa kahon gitagana sa udto. Sa alas 9:00 s.b., ang tinuig nga tigom sa Watchtower Society sa Australia gihimo, ug ang tanang 21 ka membro sa korporasyon sa Australia mitambong. Tapos maatiman ang mga kinahanglanon sa balaod, ang uban gidapit sa tigom, ug ang tanan nalipay sa pagkabati sa diskurso ni Theodore Jaracz sa Nagamandong Lawas.

Sa ala 1:45 s.g., ang 15 minutos nga musika sa Gingharian nagpailaila sa programa sa dedikasyon. Ang mamiminaw nalipay sa pagkabatig mga taho, makaiikag nga mga lakbit-sugilanon, mga kasinatian, ug mga komento sa tulo ka membro sa Nagamandong Lawas nga presente. Sa maong mga membro, si Carey Barber ug si Daniel Sydlik unang nakaduaw sa yuta sa ubos. Si Brader Barber namulong bahin sa ulohan “Ang Pag-ani Mao ang Kataposan sa Panahon,” samtang si Brader Sydlik nagpahayag sa temang “Malipayon ang Katawhan Kansang Diyos Mao si Jehova.” Si Brader Jaracz, kinsa nag-alagad sa sangang-buhatan sa Australia ingong magtatan-aw sa sona, nagpahayag sa diskurso sa dedikasyon.

Ang makalingaw nga bahin sa programa mao ang pag-awit sa upat-ug-tudling nga awit sa dayon na sa diskurso sa dedikasyon. Nga gibase sa mga pulong ni Isaias sa Isaias 60:22, ang ulohan sa awit mao “Ang Diyutay Nahimong Usa ka Libo.” Sa mga pulong sa awit ang pasalamat gipahayag kang Jehova nga daghang kinabubut-ong mga boluntaryo ang nakapribilehiyo sa pagdugang sa ‘iyang balay’ niining bahina sa tibuok-kalibotang kanataran.

[Mga hulagway sa panid 15]

Bag-ong gidugang sa imprentahan sa Watch Tower sa Ingleburn, N.S.W., Australia

C. Barber

T. Jaracz

D. Sydlik