Kon Nganong ang Réunion Daghan Kaayog mga Kingdom Hall

MGA 640 ka kilometro sa sidlakan sa Madagascar, ang gamayng isla sa Réunion kalit nga nagtuybo gikan sa halapad nga Indian Ocean. Bisag mga 60 ka kilometros lang ang gitas-on por 50 ka kilometros ang gilapdon, ang isla ilado sa mga bolkanikong mga bukid niini ug panalagsang mga pasundayag sa kalayo. Ang labing taas nga taluktok, sa 3,069 ka metros ibabaw sa lebel sa dagat, mao ang dili-aktibong bolkano nga Piton des Neiges (Taluktok sa mga Niyebe). Sa habagatan-sidlakang bahin sa isla mao ang 2,625 ka metros nga aktibong bolkan nga tukmang ginganlag Piton de la Fournaise (Taluktok sa Kalayo). Pagkatahom nga talan-awon inig-ulbo niini magabii! Ang kadaghanang mga dalan nag-ikis-ikis nga tungason ug dulhogon diha sa titip kaayong mga pangpang, nga nakahatag ug matahom nga mga talan-awon nianang gitawag nga makalilisang nga katahom sa Réunion.

Nganong Daghan Kaayong mga Kingdom Hall?

Ang tinuod nga katahom sa Réunion, hinunoa, mao ang paagi sa pagsanong sa kadaghanan sa mga islahanon sa “maayong balita sa gingharian” nga gimantala sa mga Saksi ni Jehova. (Mateo 24:14) Ang ilang buluhaton sa pagwali nagsugod sa 1960, sa dihang duha ka bug-os panahong mga ministro miabot gikan sa Pransiya. Karon, 30 ka tuig nang milabay, 1,665 ka Saksi ang puliki sa pagpakaylap sa balita sa Gingharian taliwala sa 582,000 ka molupyo—ang proporsiyon maoy 1 ka Saksi matag 350 ka tawo sa isla.

Ang maong pagtubo nagkinahanglag pagtukod ug maayong mga dapit nga katigoman aron ang mga Saksi makapadayon sa ilang pagsimba ug sa espirituwal nga edukasyon. (Hebreohanon 10:24, 25) Tanan-tanan, ang 13 sa 19 ka kongregasyon sa Réunion nakatukod ug ilang kaugalingong mga Kingdom Hall. Tungod kay bagyohon man kanunay kining dapita, kini maoy konkretong mga tinukod nga nagkinahanglag igong panahon—ug gasto—sa pagtukod. Busa sa unsang paagi nahimong posible ang pagtukod sa maong mga tigomanan, sanglit ang kadaghanang mga Saksi niining islaha igoigo ra man ug mga suweldo ug dunay dagkong pamilya nga suportahan? Diha sa mga pulong sa Bibliya, ang tubag mao nga ‘ang kamot ni Jehova dili mubo.’—Isaias 59:1.

Mga Kababagan Gibuntog

Pananglitan, palandonga kon giunsa ni Jehova sa pagpalihok sa mga kasingkasing sa mga tawo sa pagtabang sa pagtukod ug Kingdom Hall sa gamayng lungsod sa Saint-Louis, nga nahimutang sa habagatan-kasadpang bahin sa Réunion. Sa dihang giaprobahan ang mga plano, gisultihan sa usa ka batan-ong Saksi ang iyang magtutudlo sa masoneriya nga usa ka Kingdom Hall ang pagatukoron pinaagi sa boluntaryong trabaho. Ang magtutudlo wala lamang moboluntaryo sa iyang kaugalingong mga serbisyo kondili gidala usab niya ang tibuok klase sa lugar aron sa pagtabang sa pagkalot sa pundasyon. Sa ulahi, midonar siya ug puthaw nga gikinahanglan alang sa pundasyon.

Sa dihang miabot ang kapin sa usa ka gatos ka boluntaryo sa pista opisyal aron sa pagbubo sa semento sa luna nga duolan sa 190 ka metro kuwadrado, nakurat sila sa pagkakita nga gisira sa lungsod ang abiyo sa tubig. Unsaon nila sa pagmasa sa semento kon walay tubig? Ang usa sa mga trabahante nga may kailang hepe sa departamento sa sunog midesider nga iyang isaysay ang kahimtang ngadto niining tawhana. Wala magdugay, usa ka trak alang sa sunog miabot sa maong lugar. Ang trak adunay tubig nga igo alang sa proyekto, ug gitugotan sa departamento sa sunog nga magpabilin kini didto sa tibuok adlaw! Hisabtan, ang tanang mga boluntaryo napukaw sa pagbutang sa ilang bug-os kasingkasing diha sa buluhaton.

Ang tabang ni Jehova nadayag sa paagi sa pagbuntog sa laing mga kababagan. Pananglitan, sa usa ka yugto sa pagtukod, ang kisame andam na alang sa 22 ka espesyal nga mga gamit sa suga nga giorder nga walo pa ka bulan nga sayo. Apan gipahibalo sa kompaniya ang mga igsoon nga ang modelo nga ilang gusto wala na gamaa. Unsay buhaton? Ang bug-os ba nga desinyo ug ang kisame usbon? Dili, kay nagkaatol, ang mga igsoon nakadungog bahin sa usa ka lokal nga kontraktor nga adunay samang mga suga alang sa proyekto nga wala mahinayon.

“Pila ka buok ang imong nabatonan?” siya gipangutana.

“Mga 25,” siya mitubag.

Sa walay langan, ang mga suga gipalit ug gitaod.

Sa nagkauswag ang proyekto, ang usa ka tawo nga mao pay pagsugod sa pagtuon sa Bibliya uban sa mga Saksi ni Jehova naikag kaayo sa matahom nga tinukod.

“Sultihi ako,” siya nangutana, “duna pa ba kamoy gikinahanglan?”

“Oo,” mitubag ang usa ka igsoon. “Nagkinahanglan kamig galamiton sa sound.”

Niana, kining bag-ohan mikuha dayon sa iyang libreta sa tseke ug midonar ug halos igo alang sa usa ka bag-ong sistema-sa-sound. Ang maong mga kontribusyon, apil sa dako nga hulam gikan sa hedkuwarter sa Watch Tower Society sa Tinipong Bansa, mitabang sa kongregasyon sa pagtapos niining matahom nga Kingdom Hall.

Sa pagtapos niining tanan, ang Kongregasyon sa Saint-Louis nalipay sa pag-abot ni Brader Carey W. Barber, usa ka membro sa Nagamandong Lawas sa mga Saksi ni Jehova, sa pagdedikar sa Kingdom Hall sa Disyembre 1988. Si Brader Barber giiskedyol nga moabot gikan sa hedkuwarter sa Brooklyn, New York, aron sa pagpahinungod sa bag-ong pasilidad sa sanga diha sa kasilinganang mga isla sa Mauritius. Sa dihang ang mga igsoon sa Saint-Louis nakadungog bahin niini, sa tulo lamang ka semana, sila nakatigom ug igong salapi aron sa pagkobre sa plete sa ayroplano aron siya ug ang usa sa membro sa Komite sa Sanga sa Mauritius makabiyahe gikan sa Mauritius ngadto sa Réunion. Tungod sa pagtubo sukad niadto, ang Kongregasyon sa Saint-Louis kinahanglang bahinon. Karon, duha ka kongregasyon na ang nag-ambitay sa bag-ong Kingdom Hall.

Iya ni Jehova ang Pasidungog

Komosta ang bahin sa ubang mga kongregasyon sa Réunion? Tungod sa maayong pagsanong sa buluhaton sa pagsangyaw sa Gingharian, ang tumatambong sa tigom sa mga Kingdom Hall maoy gikan sa 150 ngadto sa 200 porsiento sa gidaghanon sa mga Saksi ni Jehova sa maong isla. Busa matin-aw kon nganong daghang Kingdom Hall ang gikinahanglan sa Réunion. Sa pagkamatuod, nakatukod pa ug tulo sukad sa usa nga natukod sa Saint-Louis, ug kana nakadangat sa total nga gidaghanong 13 alang sa 19 ka kongregasyon diha sa isla.

Alang niining tanan, iya ni Jehova ang pasidungog, kinsa mitagna: “Ang diyutay mahimo nga usa ka libo, ug ang usa nga gamay mahimo nga usa ka kusganon nga nasod. Ako, si Jehova, nagapadali niini sa iyang panahon.” (Isaias 60:22) Sama sa ubang bahin sa yuta, kining tagnaa nahimong tinuod diha niining matahom nga isla.