Tibuok-Kalibotang Kalipay

“TAN-AWA! Ang akong mga alagad manag-awit sa kalipay tungod sa maayong kahimtang sa kasingkasing.” (Isaias 65:14) Kanay giingon ni Jehova pinaagi sa iyang propetang si Isaias, ug nindot kaayo ang katumanan sa iyang mga pulong taliwala sa mga Saksi ni Jehova! Diin ba magagikan ang ilang kalipay sa kasingkasing? Gikan sa ilang nahiusang pagsimba kang Jehova nga Diyos. Siya mao “ang Diyos nga malipayon,” ug kadtong nagasimba kaniya “malipayon diha kang Jehova.” (1 Timoteo 1:11; Zacarias 10:7) Kining malipayong debosyon maghiusa kanila ngadto sa usa ka nasod samtang sila magkahiusa sa pagwali sa maayong balita sa Gingharian ug magpatugbaw sa tibuok-kalibotang singgit sa pagdayeg ngadto sa ilang Diyos.​—Pinadayag 7:9, 10.

“Kalipay nga Walay Makakuha”

Sa pagkamatuod, ang pagmantala sa ngalan ug Gingharian sa Diyos maoy tuboran sa mapinadayonong kalipay sa mga Saksi ni Jehova. (Marcos 13:10) Sila nagasanong sa mga pulong sa salmista: “Magpasigarbo kamo sa iyang balaang ngalan. Papaglipaya ang kasingkasing niadtong nagapangita kang Jehova.”​—Salmo 105:3.

Kasagaran, sila magbuntog sa mga babag sa pagbuhat niini. Sa Espanya, gipahinungod ni Isidro ang iyang kaugalingon kang Jehova, ug buot niyang makigsulti sa uban mahitungod Kaniya. Apan siya usa ka drayber sa trak nga diyutay rag libreng panahon, kay mobiyaheg tagdugay sa gabii ug matulog sa adlaw. Buot ni Isidro nga makasangyaw ngadto sa ubang mga drayber sa trak, apan unsaon niya pagbuhat kini?

Gitaoran niya ang iyang trak ug CB (citizens band) nga radyo nga magamit niya sa pagpakigsulti sa ubang mga drayber. Sa wala madugay iyang nadiskobrehan ang dili-kaayo-gigamit nga channel, ang 13, ug mihukom nga pahimuslan kadto. Hinuon, sa una niyang gisugyot ngadto sa ubang mga drayber sa trak nga maghisgot sila bahin sa Bibliya pinaagi sa CB radyo, ang sanong may pagkanegatibo. Apan nagpatalinghog ang pipila. Mikaylap ang balita, ug dugang ug dugang Katsilang mga drayber sa trak ang nag-abli sa channel 13. Dili pa dugay, nasayran ni Isidro nga labing menos usa nagahimog mga lakang sa pagpadayon sa iyang pagtuon sa Bibliya.

Sa Italya ang usa ka lalaki nakadungog bahin sa mga Saksi ni Jehova pinaagi sa usa ka pakig-estorya niya diha sa usa ka bus. Nahibalag sila sa iyang asawa pinaagi sa usa ka higala. Silang duha nagtuon sa Bibliya ug naikag nga ipaambit ang ilang natun-an sa uban. Ikag kaayo sila nga ang lalaki mibalibad sa usa ka promosyon diha sa iyang kompaniya ug gibiyaan sa asawa ang dakog-suweldong trabaho aron sila makagugol ug mas daghang oras sa pagsulti sa uban sa maayong balita sa Gingharian. Takos ba kadto? Oo. Ang lalaki miingon: “Sukad nga among nasayran ang kamatuoran, ang akong asawa ug ako nakabatog kalipay sa pagtabang sa 20 ka tawo sa pagkadangat sa tukmang kahibalo sa katuyoan sa Diyos. Inig-abot sa gabii, ug ako mopauli sa balay tapos sa usa ka adlaw diha sa pag-alagad kang Jehova, ako kapoyon, tinuod. Apan ako malipayon, ug nagpasalamat ako kang Jehova tungod sa paghatag kanakog kalipay nga walay makakuha.”

“Hangtod sa Kinalay-ang Bahin sa Yuta”

Kadtong bahin sa malipayong nasod sa Diyos nagapakitag susamang kadasig bisan kon diin sila, bisan diha sa “kinalay-ang bahin sa yuta.” (Buhat 1:8) Diyutay rang mga dapit ang mas layo kay sa amihanang Greenland. Bisan pa niana, bisan didto, 320 kilometros amihanan sa Arctic Circle, adunay gamayng kongregasyon sa Ilulissat, nga gilangkoban sa 19 ka tawo. Sila nagawali sa maayong balita sama niadtong Italyanong magtiayon, ug sila nalipay sa miaging tuig sa pagkakita sa pito ka taga-Greenland nga nagpabawtismo ingong simbolo sa ilang dedikasyon kang Jehova.

Libolibong milya gikan sa Greenland, sa subtropikanhong pulo sa Mauritius sa Indian nga Dagat, si Anjinee nakabaton sa samang kalipay. Ang kahimtang sa sinugdan lisod alang kang Anjinee. Sa Mauritius ang pagtambong ug Kristohanong mga tigom ug pagwali sa dayag bahin sa Diyos dili isipon nga angayng kalihokan alang sa usa ka dalaga nga may kagikang Hindu Indian. Apan si Anjinee mipadayon. Karon, siyam ka tuig tapos sa iyang pagsugod sa Kristohanong dalan, ang pipila sa iyang mga paryente nagatuon usab sa Bibliya.

May kalabotan kang Anjinee mahisgotan si Emilio, sa laing bahin sa kalibotan, sa Honduras. Nadunggan ni Emilio ang mga kauban sa trabaho nga naghisgot sa Bibliya sa trabahoan ug mihangyo nga iapil siya. Dili siya makabasa apan namating nahimuot sa dihang gibasa ang mga teksto sa Bibliya. Samtang mituhop ang Kristohanong kamatuoran sa iyang kasingkasing, gibiyaan ni Emilio ang imoral niyang pagkinabuhi ug mihunong sa hinobrang pag-inom. Gitudloan siya sa mga Saksi ni Jehova sa pagbasa ug pagsulat, ug karon siya usa ka ministro diha sa malipayong nasod sa Diyos.

Libolibong milya amihanan-kasadpan sa Honduras, ang usa ka Eskimo nga inahan sa Alaska nakakat-on sa samang Kristohanong kamatuoran. Kining bayhana nagpuyo sa hilit kaayong balangay, ug ang iyang bugtong pakigkontak sa mga Saksi ni Jehova maoy pinaagi sa sulat. Busa siya nagtuon pinaagi sa sulat, nga misuknag mga pangutana pinaagi sa sulat, ug karon madasigong nagapakig-ambit sa iyang nahibaloan sa iyang mga silingan. Ang mga panig-ingnan nga sama niini mapilopilo sa halos walay kataposan. Sa tibuok nga kalibotan, ang mga maaghop ug kasingkasing nakadangat sa “pag-alagad kang Jehova uban ang kalipay.”​—Salmo 100:2.

“Maghigugmaay Kamo sa Usag Usa”

Usa ka butang nga magadani niining tanan mao ang gugma nga nagalungtad diha sa malipayong nasod sa Diyos. Matud ni Jesus: “Pinaagi niini ang tanan mahibalo nga kamo akong mga tinun-an, kon maghigugmaay kamo sa usag usa.” (Juan 13:35) Ang Kristohanong gugma makita diha sa adlaw-adlaw nga mga kinabuhi niining tinuod nga mga Kristohanon, ug ilabina sa mga panahon sa katalagman.

Sa usa ka Aprikanhong nasod diin ang buluhaton sa mga Saksi ni Jehova, sa kaalaot, gidili, dihay grabe nga hulaw. Napulo ka libong tawo ang namatay, ug ang mga toril sa mga baka nangamatay. Giunsa pagkabuhi sa mga Saksi? Pinaagi sa pagkaon sa mga gamot sa mga tanom ug paglung-ag sa mga liso sa abokado. Apan ang ilang kahimtang sa maukyabong paagi nahupayan sa dihang, sa tabang sa Diyos, ang mga Saksi sa ubang kayutaan wala dahomang nakakuhag permiso sa pagpasulod sa 25 ka toneladang hinabang nga pagkaon. Sa pagkamatuod, bisan pa sa pagdili, ang maong mga pagkaon gikuyogan sa militaryo aron maseguro ang luwas nga paghatod niana!

Sa pagkamatuod, ang maong Aprikanong mga Saksi nalipay sa labihan sa pagkadawat sa maong pamatuod sa gugma sa ilang mga igsoon alang kanila samtang ilang nasinati ang pagkatuman sa mga pulong ni Isaias: “Tan-awa! Ang kamot ni Jehova wala mahimong mubo kaayo nga kini dili makaluwas, ni ang iyang dalunggan nahimong bug-at kaayo nga kini dili makadungog.”​—Isaias 59:1.

Usa ka Makigdaitong Katawhan

Ang mga maaghop madani usab sa malipayong nasod sa Diyos kay ang mga membro niini nagbiya na sa magubatong mga dalan niining kalibotana ug ‘nagsalsal sa ilang mga espada ngadto sa mga punta sa daro.’ (Isaias 2:4) Sa El Salvador, ang balay sa usa ka tawong kanhi militar napuno sa mga handumanan sa iyang militaryong karera. Apan sa misugod siya sa pagtuon sa Bibliya uban sa mga Saksi ni Jehova, naugmad niya ang makigdaitong intereses. Sa kadugayan, iyang gilimpiyohan ang iyang balay sa tanang butang maylabot sa gubat ug madasigong nakig-ambit sa buluhatong pagwali.

Sa dihang ang kontra-gobyernong mga puwersa nakagahom sa iyang balangay, siya gipriso​—lagmit may usang mitudlo nga siya kanhi usa ka tawong militar. Hinuon, iyang gipatin-aw nga siya dili na sundalo kondili usa sa mga Saksi ni Jehova. Ang mga subersibo nagbutangbutang nga siya may armas sa sulod sa iyang balay, apan ang usa ka pagsusi nagpadayag nga wala. Unya ang usang tagdumala sa mga subersibo nangutana sa mga silingan bahin kaniya. Usa ka tipikal nga komento mao: “Siya nagalagbaslagbas sa kalye nga nagasangyaw bahin sa Bibliya sa adlaw-adlaw.” Ang tawo gibuhian. Sa walay duhaduha, ang iyang kadasig nakaluwas sa iyang kinabuhi.

Usa ka taho gikan sa usa ka Aprikanhong nasod nag-asoy bahin sa duha ka sundalo nga nagtuon sa Bibliya uban sa mga Saksi ni Jehova. Ang usa nag-alagad sa kasundalohan sa gobyerno, ang lain nakig-away pabor sa mga rebelde. Sa kadugayan, ang duruha mihukom sa “pagsalsal sa ilang mga espada nga mga punta sa daro” ug miluwat gikan sa militaryo. Sa mitambong sila sa Kristohanong mga tigom sa unang panahon, ang kontra-gobyernong sundalo nangutana sa lain: “Unsay imong tuyo dinhi?” Siya mitubag: “Ug ikaw, unsay imong tuyo dinhi?” “Dayon,” ang taho mihinapos, “nga naghalog sa usag usa, silang duruha nanghilak sa kalipay tungod kay sila magkauban na sa pakigdait.” Kining duha ka kanhi mga tawong militar pihong miampo sa Diyos: “Luwasa ako gikan sa pagkasad-an sa dugo, Oh Diyos ang Diyos sa akong kaluwasan, aron ang akong dila makasugilon nga malipayon mahitungod sa imong pagkamatarong.”​—Salmo 51:14.

“Imong Nakita ang Akong Kasakitan”

“Ako magmalipayon ug magsadya tungod sa imong mahigugmaong-kalulot, sa pagkaagi nga imong nakita ang akong kasakitan; imong nahibaloan ang mga kagul-anan sa akong kalag.” (Salmo 31:7) Kana ang giampo sa salmista, ug daghan karong adlawa nagakalipay kay ang Pulong sa Diyos nagatabang nila sa pagsagubang sa ilang mga kasakitan. Sa Pransiya usa sa mga Saksi ni Jehova nagdumala sa usa ka pagtuon uban sa usa ka babaye nga nag-antos sa schizophrenia. Kining bayhana gitambalan sa usa ka sikyatrista sa taudtaod, apan kadto wala makatabang. Sa semana tapos sa iyang pagsugod sa iyang pagtuon, ang sikyatrista nangutana: “Imo ba gayong nasabtan kon unsay ginasaysay kanimo niining bayhana gikan sa Bibliya?” Busa sa sunod semana, ang Saksi miadto sa iyang opisina ug nagtuon sa Bibliya uban sa babaye diha sa iyang presensiya.

Human sa pagtuon, giingnan sa sikyatrista ang Saksi: “Latas sa katuigan ako nagmaikagon sa mga relihiyon sa akong mga pasyente, pero akong namatikdang walay tinuod nga pagpaluyo ang gihatag sa bisan unsang relihiyon. Sa inyong kaso, hinuon, lahi ang kahimtang. Si Gng. P​——​ nagaanhi kaduha sa usa ka semana aron magpakonsulta, ug siya nagabayad kanako alang niana. Ugaling, tungod sa inyong pagtudlo sa Bibliya ug sa maayong panambag, kamo nagahimog mas maayong buluhaton nga walay bayad. Siya maayog pag-uswag. Ipadayon kana, ug ipasalig ko kanimo ang bug-os kong kooperasyon kon ugaling gikinahanglan ninyo kini.”

Ang Bibliya nagaingon: “Malipayon ang katawhan nga nahibalo sa malipayong paghugyaw. Oh Jehova, sa kahayag sa imong nawong sila magpadayon sa paglakaw. Sa imong ngalan sila malipayon sa tibuok nga adlaw.” (Salmo 89:15, 16) Ang matag usa sa mga Saksi ni Jehova nahibalo nga matuod kining salmoha. Gikan sa ilang mga baba ang tibuok-kalibotan nga singgit sa kalipay nagapataas alang sa kadayegan ni Jehova. Dugang ug dugang nagagawas gikan sa kanasoran aron sa pagdayeg sa Diyos kauban nila. Nganong dili makig-uban kanila ug maagoman ang maong kalipay alang sa imong kaugalingon?

[Hulagway sa panid 7]

Ang mga Saksi ni Jehova sa Silangang Uropa karon nagkalipay tungod sa ilang bag-ong kagawasan sa pagdawat ug pagtuon sa “Ang Bantayanang Torre” diha sa ilang kaugalingong mga pinulongan