Ang Kataposang Paghukom

“SA DIHA nga ikaw mamatay ang imong kalag lamang ang pagasakiton; kana unya maoy impiyerno alang niana: apan sa adlaw sa paghukom ang imong lawas moduyog sa imong kalag, ug unya makabaton kag duha ka impiyerno, ang imong kalag panington ug mga tinulo sa dugo, ug ang imong lawas mahupong sa kasakitan.”

KINI ang pagbatbat sa ika-19ng-siglong magwawali nga si C. H. Spurgeon sa pagtuo sa klero bahin sa adlaw sa paghukom ug sa mga pag-antos sa tinunglo. Ang Italyanong pintor nga si Michelangelo may samang makalilisang nga pagtuo, sumala sa makita diha sa iyang dibuho nga “Ang Kataposang Paghukom” (nga ang usa ka seksiyon niana gihulagway sa ibabaw) sa bungbong sa kapelyang Sistine sa Roma. Ang The New Encyclopædia Britannica nag-ingon bahin sa maong dibuho: “Ang Kristo diha sa Paghukom maoy babaon ug mabaharon nga diyos inay kay Kristohanong manluluwas, nga labi pang nabalaka sa pagtunglo sa tawhanong rasa kay sa pagdawat sa binulahan sa langit.”

Doktrina sa Kakristiyanohan

Sa nangaging mga siglo, ang adlaw sa paghukom ug impiyernong-kalayo maoy paboritong mga ulohan sa mga wali. Gikan sa ilang mga pulpito, ang mga magwawali nga sama ni C. H. Spurgeon nagpahayag nga makusog uban ang tin-awng mga kabatbatan sa makalilisang nga mga pagsakit nga nagpaabot sa mga makasasala. Karong mga adlawa, kanang matanga sa pagwali talagsa rang hidunggan. Apan ang impiyernong-kalayo ug ang kataposang paghukom sa gihapon maoy opisyal nga mga pagtulon-an sa kadaghanang mga iglesya.

Ang kadaghanan sa mga relihiyon sa Kakristiyanohan nagauyon sa Romano Katolikong pagtulon-an nga ang mga paghukom sa Diyos maoy sa duha ka ang-ang. Nahauna, anaa ang “linaing paghukom.” Inigkamatay sa usa ka tawo, ang gituohang iyang dili-mamatay nga kalag pagahukman dihadiha ug itudlo ngadto sa walay-kataposang impiyerno o langit.a Dayon moabot ang kataposan, o katibuk-ang paghukom sa kataposan sa panahon sa dihang ang mga lawas sa mga patay banhawon ug mahiusa pag-usab sa ilang dili-mamatay nga mga kalag.

Sa maong adlaw sa paghukom, ang mga kalag sa langit magpabilin didto ug mahiusa na usab sa mga lawas nga gihimong dili madunoton. Kadtong nagaantos sa impiyerno magpabilin didto usab, ug ang ilang mga kalag mahiusa usab sa nabanhaw, dili-madunoton nga mga lawas. Sumala sa pipila ipahinabo niini nga mahimong labi pang grabe ang ilang mga pag-antos. Kadtong mga buhi pa ingong mga tawo dili mamatay. Sila pagahukman samtang buhi pa ug moadto, “lawas ug kalag” ingnon ta, nga deretso sa langit o impiyerno.

Ang posibilidad nga magaantos sa dili-ikabatbat nga mga pagsakit sa impiyernong-kalayo naghimo sa tibuok ulohan sa kataposang paghukom diha sa mga kamot ni Jesu-Kristo nga butang makahadlok nga palandongon. Tungod niini, matingala ka ba sa pagkahibalo nga, sa pagkamatuod, ang mga paghukom sa Diyos kasagaran maoy hinungdan sa pagkalipay ug nga ang Adlaw sa Paghukom mao unyay usa sa labing malipayong mga panahon sa tibuok kasaysayan sa tawo? Sa unsang paagi kini maingon?

[Footnote]

[Picture Credit Line sa panid 3]

Random/Sipa Icono