Ang Maayong Balita Nakaabot sa mga Banika sa Habagatang Aprika
NASUKONG panon, kapolisan alang sa kagubot, tear gas. Sa mga tuig nga dili pa dugay, ang mga lungsod ug mga siyudad sa Aprika gigusbat sa maong panag-away. Bisan ang matahom nga mga dapit sa banika—diin gipuy-an kapin sa 40 porsiento sa populasyon—wala makalingkawas sa mga kadaot sa kabangisan sa politika. Apan, sa tanan niini, ang mga Saksi ni Jehova nagpadayon sa pagmantala “sa maayong balita sa kalinaw.”—Efeso 6:15.
Sa daghang katuigan ang mga Saksi nagadumalag tuig-tuig tagutlo-ka-bulang kampaniya sa pagsangyaw nga gituyo alang sa populasyon sa banika. Pananglitan, sa 1990 kapin sa 12,000 ka magmamantala sa Gingharian gikan sa 334 ka kongregasyon nakigbahin sa kampaniya. Siyempre, daghang babag ang kinahanglang buntogon aron maabot kining nagkatag nga mga molupyo sa banika sa habagatang Aprika.
Apil sa ubang mga butang, kinahanglang atubangon sa mga Saksi ang nagkalainlaing mga kultura ug mga pinulongan. Ug pagkadaghang panagkadaiya kini! Pananglitan, adunay mga mag-uuma nga Ingles ug Aprikaans ang sinultihan, ug mga Pedi, Sotho, Tsonga, Tswana, Venda, Xhosa, ug Zulu. Ang matag grupo dunay iyang kaugalingon lahing kultura ug pinulongan. Lagyo kaayo ang mga distansiya niini ug libaongon ang mga dalan. Kining tanan nagkinahanglag espiritu sa pagsakripisyo-sa-kaugalingon ug paggugol ug igoigong panahon ug salapi. Apan, si Jehova dagayang nagpanalangin sa nahimong mga paningkamot. Suginlan namo kamo ug diyutay bahin sa mga kalisod ug mga kalamposan niining talagsaong bahin sa buluhatong pagsangyaw.—Itandi ang Malaquias 3:10.
Ang “Sunday School” sa Zululand
Sa kinapusoran sa semi-tropikong Zululand nahimutang ang lalom nga walog sa Umvoti River. Gikan sa mga pangpang, makita mo ang mga nagpundok pawod-ug-atop nga mga payag (homesteads) sa Zulu nga sangkad kaayo. Usa ka Dominggo sa 1984, duha ka magmamantala sa Gingharian miabot diha sa walog agi sa naglikoliko, abogong dalan. Init kaayo ug alinsuub didto nga ang dapit gianggaan ug Kwa-Sathane (Dapit ni Satanas)—usa ka dayag nga paghisgot sa bakak nga doktrina nga gipasiugda sa Yawa!
Nahumod sa singot, ang igsoong mga lalaki miduol sa usa ka babaye nga ginganlag Doris, nga nagdumala sa usa ka klase sa Sunday school. Human makadungog sa mensahe sa Gingharian, dihadiha gidapit ni Doris ang mga Saksi sa paghatag pakigpulong sa iyang grupo sa mga 40 ka batan-on. Ang resulta? Ang mga igsoon mibalik sa misunod nga semana nga nagdalag 70 kopya sa Akong Basahon sa mga Estorya sa Bibliya aron magamit sa lokal nga tunghaan. Sulod sa pila ka semana, ang Sunday school nga atmospera nausab ngadto sa usa ka grupo sa pagtuon sa Bibliya. Imbes nga mga alawiton sa simbahan, ang mga awit sa Gingharian ang giawit sa paaging Aprikano, uban ang matahom kinaiyanhong harmoniya. Sa wala magdugay ang grupo midako ngadto sa kapig 60. Usa ka igsoong lalaki miingon: “Pagkamaanindot nga kasinatian nga makaambit sa pag-usab sa Sunday school ngadto sa usa ka dapit sa matuod nga pagsimba!”
Diha sa Abogong Kabogangan
Tungod sa pag-apil-apil sa mga simbahan sa kagubot sa politika, daghang puting mga mag-uuma mapanagan-on o gani madudahon sa tanang moduol kanila uban ang mensahe sa Bibliya. Matikdi kining taho gikan sa usa ka grupo sa Johannesburg nga mibiyahe ug duolan sa 640 kilometros sa pagsangyaw sa maayong balita diha sa usa ka bahin sa Transvaal.
“Mibiyahe kami paamihanan tabok sa bukirong kabogangan halos upat na ka oras karon. Dihay mikirawkiraw sa taas nga dalan tungod sa kainit sa Aprikanong adlaw. Sa kalit, miabot kami sa kataposan sa ispaltadong dalan ug libaongon nga dalan ang misunod. Sa kataposan, gisubay namo ang balason nga agianan nga nagpaingon sa usa ka uma.
“‘Maayong buntag, Meneer [Sir],’ among gikomusta ang usa ka bus-ok ug lawas nga mag-uuma.
“‘Maayo sad,’ karat nga tubag niya. ‘Unsay ato?’
“Human nga among gipailaila ang among kaugalingon, among gisaysay ang hinungdan sa among pagduaw. Halos wala pa gani makagawas ang mga pulong sa among baba dihang siya misinggit: ‘Gipasidan-an ako sa akong dominee [ministro] bahin kaninyo! Mga Komunista kamong tanan ug mga Antikristo. Pahawa dayon sa akong lugar sa dili pa ako . . . !’
“Ang barog sa mag-uuma nagpaila nga kadapaton na siya. Kay walay kapilian, midesisyon kami sa paglakaw ug sa ‘pagtaktak sa abog sa among mga tiil.’ (Mateo 10:14) Gihimo namo kini sa literal kay may igong abog man usab.
“Sa sunod nga uma, mao gihapon ang reaksiyon. Unya among naamgohan nga ang lokal nga linya sa telepono okupadong gigamit sa ministro sa Dutch Reformed Church, kinsa nagpasidaan sa ‘iyang panon’ mahitungod sa umaabot nga ‘kapeligrohan’ sa kasilinganan. Sa kataposan nakahibalag kami ug usa ka mag-uuma kinsa, bisag dili interesado, miingon: ‘Oo, pakigsulti lang kamo sa akong mga mamumuo.’
“Kana ang among gihulat. Nagpundok tapad sa pipila ka akasya mao ang mga napulo ka gagmayng tisa nga mga payag. Among napanid-an nga dihay mausisahong mga mata nga naglili kanamo gikan sa mga payag samtang among gitapok ang mga literatura sa atop sa among sakyanan. Usa ka kamada sa mga Bibliya, laing kamada sa librong Ikaw Mabuhing Walay Kataposan sa Paraiso sa Yuta, usa ka tapok sa Akong Basahon sa mga Estorya sa Bibliya, ug ubang nagkalainlaing mga brosyur nagkompleto sa displey. Usa sa lokal nga mga batang lalaki midagan sa pagpahibalo sa mga baryohanon sa among pag-abot. Wala magdugay ang panon sa mga 30 nagtipon na palibot sa among sakyanan sa pagpamati sa mensahe.
“Ang girekord nang daan nga sermon gipatokar ngadto kanila sa Tswana nga pinulongan. Pagkadako sa kalipay niining mga tawhana nga nakadungog sa maayong balita sa Gingharian sa Diyos sa ilang kaugalingong pinulongan ug sa paglaom sa Paraiso! Malipayon kaayo silang nagsultihay sa gitanyag ang mga publikasyon. Wala magdugay, halos dili namo maapas ang pagpahamutang sa mga basahon. Usa ka tigulang nga lalaki mitanyag sa pagpalit sa among teyp rekorder. Kami natandog kaayo sa gipakitang pagpabili sa maayong balita diha sa daghan gagmayng mga paagi—usa ka maulawong pahiyom, usa ka kablit, usa ka malumong ‘salamat.’
“Sa kinabubut-on, ang mga bata naglinya ug miawit ug usa ka tradisyonal nga awit sa panamilit. Sa kalit, ang abogon, libaongong mga dalan ug usahay ang dili-maayong mga reaksiyon nabawi. Takos gayod kadto sa tanang paningkamot!”
Usa ka Pangulo Mipasag Sugo!
Usa ka kongregasyon gikan sa Soweto dunay asaynment sa pagsangyaw sa tribonhong dapit duol sa silangang lungsod sa Piet Retief. Ang kustombre didto nagsugo nga isaysay una sa bisita ang iyang tuyo ngadto sa induna (pangulo) sa dapit. Gisunod sa mga igsoon kining kahikayana. Pagkadako sa ilang kahibulong sa dihang mainiton kaayo silang giabiabi sa pangulo ug iya pa ganing gitanyagan sila ug kapuy-an sa iyang kaugalingong balay! Dugang pa, ginamit ang iyang opisyal nga timri, siya mihimo ug nota sa introduksiyon nga dalhon sa mga magmamantala gikan sa balay ug balay. Kini nag-ingon: “Kini sila mao ang mga magwawali sa Gingharian sa Diyos. Padayona sila sa inyong balay, ug paminaw kamo kanila.”
Maayo kaayo ang reaksiyon nga naghikay ang mga Saksi ug pakigpulong publiko nga gihatag diha sa tungkaran sa balay sa pangulo nianang hapon sa Dominggo. Ang bukas nga “tigomanan” puno kaayo, ug ang tigom gibuksan ug gitapos sa awit ug pag-ampo. Ang samang mga kasinatian uban sa mga tawong masanongon ang gitagamtam diha sa ubang mga dapit sa banika.
Ang usa sa maong mga tawo mao si Nathaniel, diha sa gamayng baryo sa Pitsedisulejang diha sa gihampak sa hulaw nga bahin sa Bophuthatswana. Siya maoy tig-ugmad sa komunidad nga nakigbahin sa programa sa pagtudlo sa lokal nga mga tawo sa epektibong pagpananom. Iyang gidamgo ang paghimo niining umaw nga dapit nga usa ka paraiso. Apan sa dihang iyang nakat-onan nga usa ka tibuok yutan-ong paraiso moabot sa dili madugay, mikislap ang iyang mga mata. Sa kamaikagon iyang gisulat ang matag teksto nga gipakita sa magmamantala kaniya. Si Nathaniel gipakigkitaan dayon sa duol nga kongregasyon, mga 30 kilometros ang gilay-on.
Malipayong Nagatabang sa Daghang mga Tigpangita sa Kamatuoran
“Gipakita ni Jehova kanato nga ang kakabos dili makapugong sa gutom sa espirituwal nga tawo gikan sa pagkakat-on sa kamatuoran,” matud pa ni Monika, usa ka payunir, o bug-os panahong magmamantala sa Gingharian. Siya bahin sa usa ka grupo sa mga payunir nga nagasangyaw gikan sa uma ngadto sa laing uma latas sa bukas nga kapatagan sa Orange Free State diha sa sentral nga bahin sa nasod. Unsay gibati sa mga payunir sa ilang pagkugi sa pagdala niining maayong balita ngadto niining mga tawhana? “Kinsay makahatag ug prisyo sa mga butang nga among naeksperyensiyahan?” sila mitubag. Matuod, ang mga payunir gigantihan ug maayo sa espirituwal tungod sa ilang mga paningkamot.
Bisan ang pagkadili-makabasa dili makapugong sa tawong gutom sa espirituwal gikan sa pagkakat-on sa kamatuoran sa Kasulatan. Ang maayong pagkailustrar nga brosyur Tagamtama ang Kinabuhi sa Yuta sa Walay Kataposan! ilabinang gidawat pag-ayo sa mga tawong dili-makabasa o makabasag diyutay. Batan-on ug tigulang nawili sa mabulokong mga hulagway sa Paraiso. Ang usa ka bus-os panahong mamumuo nga mitabang sa pagpatik sa maong materyal miingon: “Kini nga brosyur motabang sa mga tawo sa pagtan-aw sa Paraiso nga usa gayod ka kamatuoran ug nagapalambo sa ilang kinaiyanhong pagtahod ug kataha sa Bibliya.”
Alang sa samang katarongan, ang publikasyong Akong Basahon sa mga Estorya sa Bibliya popular kaayo. Diha sa hilit nga tribonhong dapit sa Lebowa, duha sa atong igsoong babaye sa espirituwal nahibulong sa pagkakaplag ug usa ka tigulang nga lalaki, nga buta ang usa ka mata ug iyang asawa dunay kopya niining libroha sa Sepedi nga pinulongan. Gigamit kini sa magtiayon ingong ilang tun-anang-libro sa pagtudlo sa lokal nga kabataan. Ngani, ang libro natun-ag maayo ug minarkahan nga kini nangatangtang na. Pagkamalipayon nila nga nakabatog usa ka bag-ong kopya!
Busa ang mga publikasyon sa matuod nga mga Kristohanon nagatagana sa dakong panginahanglan sa pagtabang sa mga tawong gigutom sa kamatuoran. Makaiikag, ang dakong bahin sa tanang pinatik nga materyal diha sa daghang lokal nga mga pinulongan sa habagatang Aprika gigama sa Watch Tower Society. Sa 1990 lamang, 113,529 ka libro, mga brosyur, ug mga magasin nga gipatik sa Sosyedad ang giapod-apod sa mga dapit sa banika sa Habagatang Aprika.
Mga Bunga sa Kahago
Kining maayong mga kasinatian ug pagpahimutang sa mga literatura ba nakapatunghag dumalayong mga bunga sa mga banika sa Habagatang Aprika? Dayag gayod. Sukad sa 1989 upat ka kongregasyon ug siyam ka nalain nga mga grupo ang naporma ingong direktang resulta sa pagmantala sa maayong balita diha sa mga banika sa Habagatang Aprika. Ang temporaryong espesyal nga mga payunir ug regular nga mga payunir nanguna sa dakong bahin niining buluhatona.
Nakahinumdom ka ba kang Doris ug sa iyang Sunday school diha sa halayong walog sa Zululand? Karon, siya dedikado na, bawtismadong Saksi ni Jehova. Dugang pa, usa ka mauswagong grupo sa siyam ka magmamantala sa Gingharian ang nagpadayon sa paghimog espirituwal nga kauswagan didto. Daghang bag-ohan ang nagatambongan sa mga tigom nga gihimo sa balay ni Doris, ug pito ka tawo pa nga iyang gidumalahan ug pagtuon sa Bibliya ang nabawtismohan sa distritong kombensiyon nga gihimo sa Durban sa Disyembre 1990.
Ang maong mga bunga maoy usa ka makapalipayng pagdasig alang sa mga magmamantala sa Gingharian sa Habagatang Aprika. Sila nadasig sa mga pulong ni apostol Pablo: “Samtang duna pa kitay maayong panahon alang niana, buhaton nato ang maayo ngadto sa tanan.” (Galacia 6:10) Oo, ang mga alagad ni Jehova determinado sa pag-abot sa tanang tim-os ug kasingkasing nga mga tawo, lakip niadtong nagpuyo sa mga banika niining “halayong bahin sa yuta.”—Buhat 1:8.
[Mapa/Mga hulagway sa panid 24]
(Alang sa aktuwal nga pagkahan-ay, tan-awa ang publikasyon)
Lebowa
TRANSVAAL
Soweto
Piet Retief
Bophuthatswana
ORANGE FREE STATE