Pagbantay sa mga Mini nga Propeta!
USA ka Brazilianong magtiayon nanghigda na aron matulog sa dihang nakadungog silag mga kawatan nga nanglungkab sa ilang balay. Ang nalisang nga magtiayon nakaikyas agi sa bentana sa lawak-higdaan ug nakatawag sa mga polis. Apan human niadto ang asawa ginerbiyos pag-ayo tungod sa kasinatian nga siya dili makatulog sa balay ug kinahanglang moadto sa balay sa iyang inahan.
Si bisan kinsang nalungkaban sa iyang balay o nakawatan sa ubang paagi makasimpatiya kaniya. Ang maong kasinatian makapanerbiyos, ug, ikasubo, mas daghan ug mas daghang tawo samang nag-antos. Bisan pa niana, adunay usa ka matang sa pangawat nga may mas seryoso pang sangpotanan.
Unsa ba ang maong mas seryosong matang sa pangawat, ug kinsa ang mga kawatan? Gihatagan kita ni Kristo ug pila ka kasayoran mahitungod niini sa dihang, sa paghisgot mahitungod sa atong adlaw, siya miingon: “Motungha ang daghang mini nga propeta ug magapahisalaag sa daghan.” (Mateo 24:11) Ang mga mini nga propeta mga kawatan. Sa unsang paagi? Unsa ang ilang gipangawat? Ang ilang pagpangawat nalangkit sa ilang pagpanagna. Busa aron bug-os hisabtan ang ulohan, kinahanglang hisayran una nato kon unsa ang pagpanagna sumala sa Bibliya.
Kon Unsa ang Kahulogan sa Pagtagna
Inighunahuna nimo sa pagtagna, tingali ang unang butang mosantop sa imong hunahuna mao ang pagpanagna bahin sa ugma. Tinuod nga usa kini ka bahin sa buluhaton sa mga propeta sa Diyos sa kakaraanan, apan dili lang kadto ang ilang pangunang buluhaton. Pananglitan, sa dihang diha sa panan-awon ang propetang si Ezekiel gisugo sa “pagtagna ngadto sa hangin,” siya yano nga nagpahayag ug usa ka sugo gikan sa Diyos. (Ezekiel 37:9, 10) Sa diha nga gihusay si Jesus atubangan sa mga saserdote, siya gilud-an ug gisagpa, ug ang iyang mga maglulutos mabiaybiayong miingon: “Panagna alang kanamo, ikaw nga Kristo. Kinsa ba ang misagpa kanimo?” Wala sila maghangyo kang Jesus sa pagtagna sa ugma. Ila siyang gihagit sa pag-ila pinaagi sa gahom sa Diyos niadtong nagsagpa kaniya.—Mateo 26:67, 68.
Sa pagkamatuod, ang pangunang ideya nga gipasa sa orihinal nga mga pulong sa Bibliya nga gihubad “pagtagna” o “tagna” sa lintunganay mao ang pagpahayag sa hunahuna sa Diyos mahitungod sa usa ka butang, o sumala sa pagpahayag niini sa basahong Mga Buhat, sa pagsugilon “sa kahibulongang mga butang sa Diyos.” (Buhat 2:11) Maoy niining diwaa nga daghang tawo gikawatan sa mga mini nga propeta.
Apan, kinsa ang mga mini nga propeta, ug unsa ang ilang gipangawat? Sa pagtubag niining pangutanaha, balikon nato pagtan-aw ang kasaysayan sa nasod sa Israel hangtod sa panahon ni Jeremias.