Pagkalipay Diha sa Atong Halangdong Maglalalang

“Papaglipaya ang Israel diha sa iyang halangdong Magbubuhat, ang mga anak lalaki sa Sion​—papagmayaa sila diha sa ilang Hari.”​—SALMO 149:2.

1. Bisan pa sa mga pagsinggit sa “kagawasan sa kataposan,” unsay tinuod nga kahimtang sa katawhan?

ANG kalibotan karong adlawa gihampak sa “mga kasakit.” Mao kanay ekspresyon nga gigamit ni Jesus sa iyang tagna mahitungod sa “konklusyon sa sistema sa mga butang,” ang malaglagong panahon nga nagsugod sa unang gubat sa kalibotan niadtong 1914. (Mateo 24:3-8) Walay laing makita ang daghang politiko sa umaabot kondili kangitngit. Bisan pa sa mga pagsinggit sa “kagawasan sa kataposan” sa Sidlakang Uropa, ang kanhi presidente sa maong dapit nagsumada sa kahimtang sa iyang pag-ingon: “Ang pagbuto sa populasyon ug ang greenhouse effect, mga buslot sa ozone ug AIDS, ang hulga sa nukleyar nga terorismo ug ang tagsaong pagdako sa kal-ang tali sa adunahang amihanan ug kabos nga habagatan, ang kapeligrohan sa gutom, ang nagakahurot nga biosphere ug mga minerales sa planeta, ang pagkaylap sa katilingban nga naimpluwensiyahan sa telebisyon ug ang nagatubong hulga sa mga gubat sa rehiyon​—kining tanan, uban sa linibo pang mga hinungdan, nagahawas sa usa ka dakong hulga sa katawhan.” Walay tawhanong gahom ang makakuha niining hulga sa malaglagon nga katalagman.​—Jeremias 10:23.

2. Kinsa ang may permanenteng sulbad sa mga suliran sa katawhan, ug unsang lakang ang iya nang nahimo?

² Hinuon, magmalipayon kita nga ang atong Halangdong Maglalalang may permanenteng sulbad. Sa tagna ni Jesus “ang konklusyon sa sistema sa mga butang” nalangkit sa iyang dili-makitang “presensiya.” (Mateo 24:3, 37-39) Sa paglalang sa “bag-ong mga langit,” gientrono ni Jehova si Jesus ingong Mesiyanikong Hari, ang matagnaong ebidensiya nagpakita nga kining makasaysayanhong okasyon nahitabo sa mga langit sa tuig 1914.a (2 Pedro 3:13) Ingong luyoluyong magmamando uban sa Soberano Ginoong Jehova, si Jesus karon gisugo sa paghukom sa mga nasod ug sa pagbahinbahin sa maaghop, karnerohong mga tawo sa yuta gikan sa gahig-ulong mga kandingon. Ang dili-diyosnong “mga kanding” gipatikan alang sa “walay kataposang kalaglagan” ug “ang mga karnero” alang sa walay kataposang kinabuhi sa yutan-ong dapit sa Gingharian.​—Mateo 25:31-34, 46.

3. Unsang katarongan sa matuod nga mga Kristohanon sa pagkalipay?

³ Ang nanghibilin sa yuta sa espirituwal nga Israel, nga gikuyogan karon sa usa ka dakong panon niining masinugtanon nga mga karnero, may katarongan gayod sa pagkalipay kang Jehova, ang Hari sa walay kataposan, samtang iyang ginadala ang iyang halangdong mga katuyoan sa kinapungkayan pinaagi sa Gingharian sa iyang Anak. Sila makaingon: “Sa walay pakyas ako magakalipay kang Jehova. Ang akong kalag magamalipayon diha sa akong Diyos. Kay ako gibistihan niya sa mga bisti sa kaluwasan . . . Ingon nga ang yuta nagapatubo sa iyang saha, ug ingon nga ang tanaman nagapatubo sa mga butang nga gipugas niana, sa samang paagi ang Soberano Ginoong Jehova magapaturok sa pagkamatarong ug sa pagdayeg sa atubangan sa tanan nga mga nasod.” (Isaias 61:10, 11) Kining “pagtubo” gipamatud-an sa minilyon nga karon ginatigom gikan sa tanang mga nasod aron moawit ug modayeg kang Jehova.

‘Pagpadali Niini’

4, 5. (a) Sa unsang paagi gitagna ang pagpanigom sa katawhan sa Diyos? (b) Unsang talagsaong pag-uswag ang nakita sulod sa 1992 nga tuig sa pag-alagad?

⁴ Ang pagtigom nagatulin samtang ang kataposan sa sistema ni Satanas nagkahiduol. Ang atong Halangdong Maglalalang nagpahayag: “Kon bahin sa imong katawhan, silang tanan mahimong matarong . . . , ang saha nga akong gitanom, ang buhat sa akong mga kamot, aron ako pagahimayaon. Ang usa nga diyutay mahimo nga usa ka libo, ug ang usa nga gamay mahimo nga usa ka kusganon nga nasod. Ako mismo, si Jehova, nagapadali niini sa iyang panahon.” (Isaias 60:21, 22) Kining pagpadali sa katingalahan gipakita diha sa 1992 Tuig sa Pag-alagad nga Taho sa mga Saksi ni Jehova sa Tibuok Kalibotan, nga gipatik sa mga panid 12 hangtod 15 niining magasina.

⁵ Ang tagsaon niining tahoa mao ang bag-ong kinatas-ang 4,472,787 ka magmamantala sa Gingharian, nga mitubo ug 193,967​—4.5 porsiento nga labaw kay sa miaging tuig. Ang kinatas-ang 301,002 nga nabawtismohan sulod sa 1992 nagapakita usab sa kamatuoran nga panonpanon ang midawat sa kamatuoran sa Bibliya. Pagkadako sa atong kalipay nga niining “adlaw sa kangitngitan ug kangiob, . . . may katawhan nga daghan ug kusganon,” nga, sama sa hugop sa mga dulon, nagapasangkad sa pagpamatuod sa Gingharian “hangtod sa kinatumyan sa yuta”! (Joel 2:2, 25; Buhat 1:8) Gikan sa tugnaw-kaayong Alaska​—diin ang ayroplano sa Watch Tower Society nakahimog kapin sa 50 ka pagduaw sa punog-niyebe nga mga teritoryo​—ngadto sa uga nga mga desyerto sa Mali ug Burkina Faso ug sa nakatag nga mga isla sa Micronesia, ang mga alagad ni Jehova nagadan-ag ingong “suga sa mga nasod, aron [siya] mahimong kaluwasan hangtod sa kinatumyan sa yuta.”​—Isaias 49:6.

6, 7. Unsang wala dahomang mga pagbag-o sa kahimtang ang nasaksihan ning ulahing katuigan, ug unsa ang pagsanong sa mga alagad ni Jehova niana?

⁶ Si Jehova nahimong samag kuta ug usa ka lig-ong torre nga nanalipod ug nagtabang sa iyang katawhan. Sa daghang bahin sa yuta, kinahanglang antoson sa mga Saksi ni Jehova ang mga dekada sa mapintas nga pagdaogdaog ug paglutos. (Salmo 37:39, 40; 61:3, 4) Apan ning bag-o pa, morag milagro nga, ang mga pagdili ug mga babag gikuha diha sa mga 21 ka kayutaan, mao nga karon ang katawhan sa Diyos libreng makapahayag nga ang atong Halangdong Maglalalang nag-entrono kang Kristo ingong Hari sa ibabaw sa yuta.​—Salmo 2:6-12.

⁷ Gigamit ba sa katawhan ni Jehova ang ilang bag-ong nakaplagang kagawasan? Tan-awa sa tsart ang mga pag-uswag sa Bulgaria, Romania, ug sa kanhing Unyon Sobyet sa Sidlakang Uropa ug sa Angola, Benin, ug Mozambique sa Aprika. Sa Zaire usab, ang pag-uswag tagsaon. Uban ang kalipay sa ilang mga kasingkasing, ang atong napahigawas nga mga kaigsoonan mitubag sa tawag: “Paghatag ug mga pasalamat kang Jehova, Oh kamong katawhan, kay siya maayo . . . , sa Tighimo sa kahibulongan, dagkong mga butang: kay ang iyang mahigumaong-kalulot hangtod sa walay kataposan.” (Salmo 136:1, 4) Kining mga pasalamat gipahayag pinaagi sa masibotong pag-alagad diha sa pagpanigom sa ubang karnerohong mga tawo diha sa kiliran sa Gingharian.

8. Sa unsang paagi ang bag-ong mga dumadayeg ni Jehova “nanglupad ingon sa panganod” sa Sidlakang Uropa? sa Aprika?

⁸ Sa milabayng ting-init sa Uropa, ang mga kombensiyon sa katawhan ni Jehova nga gihimo sa kanhi Komunistang kayutaan adunay tagsaong mga tumatambong. Ngani ang mas katingad-an mao ang gidaghanon sa nabawtismohan niadtong mga nasora. Sa susama, sa Togo, Aprika, ang pagdili gikuha niadtong Disyembre 10, 1991. Sa pagkasunod bulan usa ka nasyonal nga kombensiyon ang gihimo. Kon itandi sa binulang aberids nga 6,443 ka magmamantala sa kanataran, ang tumatambong niini nga kombensiyon misulbong sa 25,467, nga may 556 nga nabawtismohan​—8.6 porsiento sa gidaghanon sa mga magmamantala. Ingon sa gihulagway sa Isaias 60:8, ang bag-ong mga dumadayeg ni Jehova “nanglupad ingon sa panganod, ug ingon sa mga salampati ngadto sa ilang mga tamboanan” diha sa mga kongregasyon sa katawhan ni Jehova.

9. Unsang mga tagana ang gihimo aron ang mga Kristohanon sa bag-o pang gihatagan ug kagawasan nga mga nasod ‘makakaon ug mabusog’?

⁹ Ang kagutom sa espirituwal nga pagkaon diha sa Sidlakang Uropa ug Aprika gitagbaw usab. Ang mga pabrika sa Watch Tower Society sa Alemanya, Italya, ug Habagatang Aprika nagpadalag mga trak sa mga literatura, sa daghang pinulongan, ngadto sa gigutom sa espirituwal nga mga nasod. Sa miagi, daghang Saksi maghulamay sa nagamit-pag-ayong mga magasin, apan karon sila nagabaton sa dagayang espirituwal nga pagkaon. Sila nalipay sa pag-ambit sa katumanan sa tagna: “Sa pagkatinuod kamo magakaon, mangaon ug mangabusog, ug kamo kinahanglang managdayeg sa ngalan ni Jehova nga inyong Diyos, nga nakahimog kahibulongan kaninyo.”​—Joel 2:26.

Pag-atiman sa Dugang Pang Pagpalapad

10. Tungod sa daghang mitambong sa Memoryal, unsang pagdapit ang gihatag sa tanang interesado?

¹⁰ Sa pagkatinuod kahibulongan ang tibuok-kalibotang gidaghanon sa mitambong sa Memoryal sa kamatayon ni Jesus, 11,431,171, may pag-uswag nga 781,013, o 7.3 porsiento kay sa miaging tuig. Giabiabi kamo, kamong tanang bag-ohan! Pagkamaayo kon kanang tanan nga bag-ohang interesado mopahimulos sa kaayohan sa pagtuon sa Bibliya uban sa mga Saksi ni Jehova! (Tan-awa ang Isaias 48:17.) Ang Tuig sa Pag-alagad nga Taho nagpakita nga 4,278,127 sa maong mga pagtuon ang ginadumala kada bulan, usa ka maayong tubo nga 8.4 porsiento. Hinuon, daghan pa ang makapahimulos sa ilang kaugalingon niining serbisyoha. Ang mga Saksi ni Jehova malipay sa pagduaw nga regular sa mga interesado sa pagdumala sa walay-bayad nga pagtuon sa Bibliya sa balay, sa ingon matabangan sila sa pagsubay nga malig-on sa dalan sa walay kataposang kinabuhi. (Juan 3:16, 36) Nganong dili mohangyo sa maong pagtuon? Ug hinumdomi, usa ka mainitong pag-abiabi ang kanunay nagahulat kaninyo sa Kingdom Hall!​—Salmo 122:1; Roma 15:7.

11, 12. (a) Unsa ang mga suliran sa pila ka kayutaan? (b) Sa unsang paagi ang “pag-angay-angay” nagakahitabo tali sa adunahan ug kabos nga kayutaan?

¹¹ Kadtong mga kongregasyon nga may matahom nga mga Kingdom Hall dagayang gipanalanginan. Ang kahimtang lahi sa mga kayutaan diin ang matinumanong mga Saksi nag-antos sa daghang tuig nga pagdili, nga nagtigom sa tago sa ginagmayng grupo. Sa ubay-ubay nianang mga dapita, sila karon may kagawasan na apan may pipila lamang ka Kingdom Hall. Sa usa ka Aprikanhong nasod, pananglitan, ang 93 ka kongregasyon aduna lamay tulo ka Kingdom Hall. Mao nga ang mga tigom sagad himoon diha sa dako bakanteng mga lote. Ang mga tigom sa kongregasyon nga may 150 ka magmamantala mahimong tambongan nga regular ug mga 450.

¹² Sa Sidlakang Uropa sa subsob lisod ang pagpalit ug propiedad o ang pagtukod, apan may mga pag-uswag na karon. Ang pagpahinungod sa usa ka matahom bag-ong pasilidad sa sanga gieskedyul sa Nobyembre 28, 1992, sa Polandiya. Ubay-ubayng mga amot alang sa tibuok-kalibotang buluhaton sa mga Saksi ni Jehova gigamit sa pagtabang sa pagtukod ug mga tigomanan ug ubang mga pasilidad. Sa ingon, adunay “pag-angay-angay” ang nahitabo kay ang pagkamanggihatagon sa mga igsoon sa ilang materyal nga “sobra” nakatabang sa pagtagana sa espirituwal nga panginahanglan sa mga kongregasyon sa kabos nga kayutaan.​—2 Corinto 8:13, 14.

Usa ka Bilyong Oras!

13. Pila ka oras ang nagugol sa pagwali ug pagpanudlo sa 1992, ug kang kinsang mga paningkamot ang gibanaag niining gidaghanona?

¹³ Unsay imong himoon sa usa ka bilyong oras? Magamit sa tanan nga makabaton ug walay kataposang kinabuhi kanang daghang oras, ug ngani labaw pa, diha sa mabungahon, matagbawong pag-alagad kang Jehova. Apan handurawa ang pagdasok nianang daghang oras sa usa ka tuig! Mao kana ang nalampos sa katawhan ni Jehova sulod sa 1992. Sa pagsumada sa tanang indibiduwal nga mga taho sa tanang magmamantala sa Gingharian, nakita nato nga usa ka bag-ong kinatas-ang 1,024,910,434 ka oras ang gigugol sa labing maayong paagi nga magamit kana​—sa pagdayeg sa atong Halangdong Maglalalang, “nagapanudlo . . . sa publiko ug sa balay-balay.” (Buhat 20:20) Sa aberids, 4,289,737 ka Saksi ang nagataho kada bulan. Sila naggikan sa lainlaing kahimtang sa kinabuhi. Ang pila limitado ug panahon nga ikahatag sa buluhaton sa Gingharian. Naglakip kini sa mga ulo sa pamilya, nga kinahanglan motagana alang sa panimalay; mga tigulang; ug daghang may mga suliran sa panglawas; ingon man sa mga bata nga nagtungha pa. Bisan pa, ang taho nga gihimo sa kada usa maoy usa ka gipabilhang timaan sa gugma alang kang Jehova.​—Itandi ang Lucas 21:2-4.

14. Sa unsang paagi ang mga batan-on ‘nagahinumdom sa ilang Halangdong Maglalalang’?

¹⁴ Usa ka kaliwatan sa mga batan-on ang nagatubo sa pag-alagad kang Jehova, ug makalilipay nga kadaghanan kanila nagapadapat sa mga pulong ni Solomon diha sa Ecclesiastes 12:1: “Hinumdomi, karon, ang imong Halangdong Maglalalang sa mga adlaw sa imong pagkabatan-on.” Sila nagkugi sa ilang leksiyon sa eskuylahan, sa samang panahon ginabansay sila sa espirituwal nga mga butang sa ilang debotadong mga ginikanan. Makapalipay nga makita ang daghang tin-edyer nga mibarog sa bag-o pang mga kombensiyon, sa pagtanyag sa ilang kaugalingon alang sa bawtismo. Makapalipay usab nga masayran nga daghan, pinaagi sa pagkat-on sa pila ka panginabuhian o kahanas, nagahimog praktikal nga pangandam aron makapayunir sa dihang sila mograduwar sa tunghaan. Sa ingon, sila makaarang sa pagsuporta sa ilang kaugalingon, sama kang apostol Pablo sa matag karon ug unya sa paghimog tolda.​—Buhat 18:1-4.

15, 16. Sa unsang paagi ang mga payunir ug ubang bug-os-panahong mga alagad nakaamot sa pag-uswag sa buluhaton sa Gingharian, ug unsang panalangin ang gitagamtam sa pila kanila?

¹⁵ Pagkadako sa naamot sa mga payunir ug ubang bug-os-panahong mga alagad sa pag-uswag sa buluhaton sa Gingharian! Ang mga ranggo sa payunir misulbong ngadto sa usa ka kinatas-ang 931,521 sa miaging tuig. Samtang kini sila nagawali kada adlaw sa balay balay ug nagadumalag mga pagtuon sa Bibliya diha sa mga balay sa katawhan, sila nahimong epektibo kaayo sa pagpatin-aw sa mga Kasulatan. Dugang pa, daghan ang nahimong kuwalipikado sa pag-eskuyla sa duha-ka-semana nga Pioneer Service School, nga nagatabang kanila sa pag-ugmad sa mas dakong katakos ug sa kalipay sa paghimo sa buluhaton sa Diyos.

¹⁶ Ang kada usa niining matinumanong mga payunir mouyon sa mga pulong sa Isaias 50:4: “Ang Soberano Ginoong Jehova mismo nagahatag kanako sa dila sa mga tinudloan, aron mahibalo ako sa pagtubag sa usa nga gikapoyan.” Daghang indibiduwal karong adlawa ang gikapoyan na sa dunot nga kalibotan sa ilang palibot apan nakakaplag ug kahupayan sa mga pulong nga gipanulti sa atong matinumanong mga payunir.​—Itandi ang Proverbio 15:23; Ezekiel 9:4.

Usa ka Dakong Programa sa Pagpanukod

17. Dugang sa espirituwal nga pagpanukod, unsang materyal nga pagpanukod ang nasaksihan niining ulahing katuigan?

¹⁷ Ang pag-uswag sa espirituwal sa tibuok kalibotan sa mga Saksi ni Jehova nanginahanglan usab ug pag-uswag sa materyal. Ang pagpalapad sa mga pasilidad sa imprintahan, mga opisina, ug mga puy-anang Bethel ug pagpanukod ug mga Kingdom Hall ug mga Assembly Hall kinahanglanon. Busa ang mga Saksi ni Jehova kinahanglang mahimong mga magtutukod sa pisikal nga paagi. Ang susamang pagpanukod nahitabo sa adlaw ni Haring Solomon. Si Solomon mitukod sa templo alang sa pagsimba kang Jehova sumala sa “arkitektural nga plano . . . nga iyang nadawat pinaagi sa pagdasig,” nga gihatag ni Jehova sa iyang amahan, si Haring David. (1 Cronicas 28:11, 12) Sa ingon, si Solomon wala lamang magpalig-on sa iyang mga mamiminaw pinaagi sa hamiling mga pulong sa kaalam kondili nagdumala usab sa pagtukod sa matahom nga tinukod nga sukad wala mahimo sa sekular nga kalibotan.​—1 Hari 6:1; 9:15, 17-19.

18, 19. (a) Unsang tuling nagauswag nga mga proyekto sa pagpanukod ang ginahimo sa organisasyon ni Jehova? (b) Sa unsang paagi napadayag ang espiritu ni Jehova sa materyal ug sa espirituwal nga pagpanukod?

¹⁸ Karong adlawa, ang mga Saksi ni Jehova wala magtukod pinaagi sa dinasig sa Diyos nga arkitektural nga mga plano, apan sila sa tinuod may espiritu sa Diyos. Ingon sa mga adlaw sa Israel, kini nagpalihok kanila sa pagtukod sa usa ka paagi nga nakapahingangha sa katawhan sa kalibotan. (Zacarias 4:6) Ang panahon sa pagtukod mubo na. Ang mga Kingdom Hall ug ubang mga tinukod kinahanglanon dayon. Sa pila ka nasod ang daling-pagkatukod nga mga Kingdom Hall kasagaran na. Sa miaging 10 ka tuig, pananglitan, ang Canada nagtaho nga nakatukod ug 306 ka tigomanan, ang kada usa niini nahuman nga wala abtig duha ka adlaw. Tungod sa tulin nga pag-uswag sa buluhaton ni Jehova sa tibuok kalibotan, 43 ka bag-ong tinukod sa sanga o pagpalapad sa sanga sa presente ginatukod o ginaplano. Dugang pa, usa ka 30-andana nga residensiyal nga tinukod, nga kapuy-an sa mga usa ka libong boluntaryo sa Bethel, hapit nang matapos sa Brooklyn. Sa New York State usab, sa Patterson, ang pagtukod sa sentro sa edukasyon sa Bibliya, ang kinadak-ang proyekto sa Watch Tower Society sukad, abanse kaayo sa eskedyul.

¹⁹ Kining mga proyektoha nagapadayon uban ang pagkapulido ug kalidad sa trabaho nga nakapahingangha sa hanas nga mga kompaniya sa konstruksyon sa kalibotan. Ngano man? Tungod sa tagsaong kontribusyon nga nahatag sa dedikadong mga Saksi ni Jehova. Ang iyang espiritu mitukmod kanila dili lamang sa paghatag ug materyal nga tabang apan usab sa paghatag nga kinasingkasing sa ilang panahon ug kusog. Ang mga dapit sa pagpanukod gihugopan sa bansay-pag-ayo, debotadong mga magbubuhat. Walay mga welga sa mamumuo, ug walay nagbinagdoy sa trabaho. Ang espiritu ni Jehova naghatag kadasig, ingon nga kana midasig sa mga magtutukod sa tabernakulo sa panahon ni Moises ug niadtong mitukod sa templo sa mga adlaw ni Solomon. Ang espirituwalidad mao ang tagsaong hiyas nga gikinahanglan niining mga magbubuhata.​—Itandi ang Exodo 35:30-35; 36:1-3; 39:42, 43; 1 Hari 6:11-14.

20. (a) Kutob sa unsang gisangkaron nga ang maayong balita igawali? (b) Unsang makalilipay nga paglaom ang nagahulat sa katawhan ni Jehova?

²⁰ Gipadayon ni Solomon ang iyang programa sa pagpanukod tapos mahuman ang templo. (2 Cronicas 8:1-6) Kon unsang gisangkaron magauswag pa ang pagpamatuod karon​—nga sa samang panahon magkinahanglan ug mga pagpanukod sa mga tigomanan ug ubang mga pasilidad—​wala kita masayod. Kami, hinuon, nasayod nga sa dihang kining maayong balita sa Gingharian nawali na kutob sa gisangkaron nga gisugo ni Jehova, nan ang kataposan, ang “dakong kasakitan,” moabot. (Mateo 24:14, 21) Sa usa ka kalibotan nga dili na pagadaoton sa hakog nga mga tawo, ang kahikayan ni Jehova labot sa “bag-ong mga langit ug bag-ong yuta” modala unya ug dili-ikabatbat nga mga panalangin sa katawhan. Busa hinaot nga kita ‘managlipay ug managmaya sa walay kataposan tungod sa gihimo sa Diyos,’ nga nagahatag sa tanang pagdayeg ngadto sa atong Halangdong Maglalalang!​—Isaias 65:17-19, 21, 25.

[Footnote]

Makasaysay Ka Ba?

◻ Unsay atong mga katarongan sa pagkalipay sa atong Halangdong Maglalalang?

◻ Unsang mga pag-uswag ang gitaho sa 1992 nga tuig sa pag-alagad?

◻ Sa mga nasod diin ang pagwali gidili kaniadto, unsang dagayang mga panalangin ang gitaho?

◻ Sa unsang paagi ang mga batan-on ug mga payunir nakaamot sa pag-uswag sa organisasyon ni Jehova?

◻ Sa unsang paagi napuliki ang katawhan ni Jehova diha sa materyal ingon man sa espirituwal nga mga buluhatong pagpanukod?

[Kahon sa panid 17]

Sa miaging tuig kapin sa usa ka bilyong oras ang nagugol diha sa pagwali ug pagpanudlo nga buluhaton

[Chart sa panid 12-15]

1992 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang tomo)

[Hulagway sa panid 10]

Ang gatos-gatos ka libong kandidato sa bawtismo sa miaging tuig nagapamatuod sa pagpanalangin ni Jehova sa pagwali ug pagpanudlo nga buluhaton

[Hulagway sa panid 16]

Daghang batan-on ang ‘nahinumdom sa ilang Halangdong Maglalalang’