Pagsangyaw Gikan sa Balangay Ngadto sa Balangay sa Espanya

SI Jesu-Kristo mipanaw “gikan sa dakbayan ngadto sa dakbayan ug gikan sa balangay ngadto sa balangay, nga nagpanudlo ug nagpadayon sa iyang panaw ngadto sa Jerusalem.” (Lucas 13:22) Sa pagtuman sa ministeryo, si Jesus ug ang iyang mga tinun-an nagsangyaw dili lamang “gikan sa dakbayan ngadto sa dakbayan” apan usab “gikan sa balangay ngadto sa balangay.” Bisan mas sayon unta nga mga dakbayan lang ang tagdon, wala nila laktawi ang daghang balangay diha sa kabanikanhan.a

Ang mga Saksi ni Jehova sa Espanya nag-atubang sa usa ka hagit susama sa giatubang ni Jesus. Ingon ka ulahi sa 1970, dihay halapad nga wala-pa-matandog nga mga teritoryo sa kabanikanhan nga naghulat nga anihon. (Mateo 9:37, 38) Ginatos ka balangay sa kanunay-giulan nga kabukiran sa amihanan, sa umaw nga kapatagan sa tunga, ug ubay sa baybayon ang wala pa gayod maabot sa mensahe sa Gingharian.

Ang Espanyol nga mga Saksi ni Jehova determinado sa pagpaningkamot ug maayo aron madala ang maayong balita niining mga rehiyona. Apan nganong ang mga tawo niining dapita kinahanglang mohulat ug dugay kaayo aron makadungog sa mensahe sa Gingharian? Ug sa unsang paagi sila misanong?

Legal nga Pag-ila Nagdasig sa Pagsangyaw sa Kabanikanhan

Ang buluhaton sa mga Saksi ni Jehova sa Espanya nailalom sa pagdili sukad sa pagkatapos sa sibil nga gubat niadtong 1939. Sa katuigang 1950 ug 1960, ang masibotong mga Saksi nagsangyaw nga mapanagan-on diha sa mga dakbayan, diin ang ilang presensiya dili-kaayo mamatikdan. Sa dihang sa kataposan na-legal ang ilang buluhaton niadtong 1970, dihay mga 10,000 na ka magmamantala sa Gingharian sa Espanya. Halos silang tanan nagpuyo sa mga dakbayan ug dagkong mga lungsod, apan ang mga balangay sa Espanya kinahanglan usab nga makadungog sa mensahe sa Gingharian. Kinsay moatubang sa hagit?

Niadtong katuigang 1970 usa ka kampanya ang gilansad aron maabot ang tanang dapit sa peninsula sa maayong balita. Halos kada bulan gikan niadtong 1973 hangtod sa 1979, ang linaing mga pahibalo nga naglaraw sa panginahanglan sa lainlaing rehiyon sa nasod mabasa diha sa Atong Ministeryo sa Gingharian, ang binulan nga publikasyon sa pag-alagad alang sa mga kongregasyon sa mga Saksi ni Jehova. Daghang andam ug masanongong mga pamilya ang mitubag sa awhag ug miboluntaryo sa pag-alagad kon diin dako ang panginahanglan.

Kasagaran ang pananglitan ni Rosendo ug sa iyang asawa, si Luci. Sila gipadala ingong mga espesyal nga payunir (bug-os-panahong mga magmamantala sa Gingharian) ngadto sa usa ka balangay sa pangisda sa amihanan-kasadpang Espanya ug unya mihukom sa pagpabilin sa dapit sa dihang sila nanganak. “Akong dawaton nga nakaagi kami sa lisod kaayong mga panahon,” angkon ni Rosendo. “Lisod makakitag sekular nga trabaho, apan kami misalig sa tabang ni Jehova ug wala gayod magutmi o kawad-ig puloy-anan. Kadto maoy sa pagkatinuod takos niini.” Latas sa katuigan, sila nakatabang sa pagpormag upat ka kongregasyon niining dapita sa Espanya.

‘Pangitaa Kadtong mga Takos’

Giingnan ni Jesus ang iyang mga tinun-an nga “pangitaon” ang mga takos sa matag dakbayan o balangay. (Mateo 10:11) Sa kabanikanhang mga dapit sa Espanya, ang pagpangita nagkinahanglag kakugi ug kamamugnaon, ingon sa nadiskobrehan ni Ángel, usa ka igsoong lalaki gikan sa Alcoy (Alicante). Bag-o lang gayod siya nakahuman sa pagduaw sa pila ka balay sa balangay sa Masías sa dihang nakadungog siya sa tugaok sa sunoy. Sa iyang hunahuna siya nakaingon, “Kon may sunoy, seguradong may balay​—usa ka balay nga wala namo hikit-i.” Human sa pagsuhid sa palibot, si Ángel nakakitag agianan nga mitultol ngadto sa tagaytay sa bakilid ug sa kataposan ngadto sa nag-inusarang balay.

Niini nga umahan nagpuyo si José ug Dolores, unodnong magsoon nga nagpangedaron nag kapin sa 60 ka tuig. Naminaw sila pag-ayo ug dihadiha midawat sa gitanyag nga pagtuon sa Bibliya. Ugaling, dili sayon ang pagdumalag pagtuon uban niining mapaubsanong mga indibiduwal, sanglit sila dili man makasulat ni makabasa, ug ang tanan kinahanglang hubaron gikan sa Kinatsila ngadto sa Valenciano nga pinulongan, ang nasabtan lamang nila nga pinulongan. Dugang pa, sila miatubang ug dakong pagsupak gikan sa ilang mga silingan. Bisan pa niining mga babaga, si José ug Dolores miuswag sa kamatuoran, bisan tuod ang pagtambong sa mga tigom nagkahulogan sa hataas nga panaw latas sa kabukiran. Ngadtongadto, mikuwalipikar sila alang sa bawtismo, ug silang duha nagpadayon sa pag-alagad nga matinumanon kang Jehova.

Si Rosendo ug Luci, nga gihisgotan ug sayo, nahinumdom kon sa unsang paagi ang usa ka paralisado sa nag-inusarang balay duol sa Moaña, amihanan-kasadpang Espanya, midawat sa kamatuoran. Ang iyang ngalan maoy María. Sa dihang una siyang nakigsulti sa mga Saksi, dili siya makabasa ni makasulat ug naghigda sa daghang tuig tungod kay napolyo sa bata pa. Ang iyang balay mga duha ka kilometros gikan sa kinaduolang kalsada. Bisan pa niana, siya ikag mga motuon sa Bibliya, ug ang iyang determinasyon sa pag-alagad kang Jehova sa wala madugay nadayag. Si María nakakat-on sa pagbasa ug sa pagsulat ug nagsugod sa pagtambong sa mga tigom, tungod sa matinuorong mga paningkamot sa kongregasyon. Ang igsoong mga lalaki mosakwat kaniya ug 200 metros gikan sa iyang balay ngadto sa libaongon nga dalan diin palingkuron nila siya ug hinayhinay ngadto sa kotse. Bisan pa sa unang pagsupak sa iyang pamilya, siya miuswag ngadto sa punto sa pagpabawtismo. Tungod sa pagsalig nga nahatag sa iyang espirituwal nga pag-uswag, siya karon nakakat-on sa pagmaneho sa gipasibo ug linain nga kotse ug nakahuman sa kurso sa paninugdang edukasyon. “Ang pagkaarang sa pagtabang sa mga tawo sama kang María naghimo sa bisan unsang sakripisyo nga takos,” saysay ni Rosendo.

Mga Magbabasa sa Bibliya Misanong Dayon

Niadtong katuigang 1970 sa unang higayon ang Bibliya nabatonan sa tanan sa Espanya. Daghang Espanyol mipalit ug kopya, ug ang pipila misugod sa pagbasa sa Kasulatan. Si Pilar, nga taga-Medina del Campo (Valladolid), nagbasa na sa Bibliya sa dihang unang miabot sa iyang lungsod ang mga Saksi ni Jehova niadtong 1973. Ingong usa ka Katoliko, siya matahapon sa pagdawat sa literatura gikan sa mga Saksi, apan gusto niyang masabtan ang Bibliya. Sa ulahi, miuyon siya sa panaghisgot kada semana aron matubag ang iyang mga pangutana sa Bibliya.

Pinaagi sa paggamit ug maayo sa literatura nga gipatik sa Watch Tower Society, ang payunir nga igsoong babaye nga miduaw kang Pilar nakaarang sa pagtubag sa daghan niyang pangutana. Kay nadani sa iyang mga nakat-onan, si Pilar human sa pipila ka semana miuyon sa pagtuon sa Bibliya nga gigamit ang librong Ang Kamatuoran nga Motultol sa Kinabuhing Dayon. Sa wala pa niya mahuman ang pagtuon sa librong Kamatuoran, nahuman niyag basa ang tibuok Bibliya ug nakombinsir nga iyang nakaplagan ang kamatuoran. Siya nahimong unang Saksi sa Medina del Campo, nga karon may nindot nga Kingdom Hall ug usa ka kongregasyon sa 63 ka magmamantala.

Ang mga Saksing Espanyol nakakaplag lang gihapon ug mga tawo nga “mahunahunaon sa ilang espirituwal nga panginahanglan” ug kinsa sa regular nagabasa sa Bibliya sa paningkamot nga makasabot sa kabubut-on sa Diyos. (Mateo 5:3) Si Pepi, kanhi usa ka Katoliko nga kas-a nagtudlo ug katekismo sa parokya sa Zumaia (amihanang Espanya), nagsangyaw sa sikbit nga balangay sa dihang iyang nahibalag ang kura paroko.

“Pepi, giusikan mo ang imong panahon,” sulti sa pari kaniya. “Niining balangay sa Itziar, may duha ra ka tawo​—usa ka minyong magtiayon​—nga hilig sa espirituwalidad. Ang uban mosimba lang kay maoy naandan.”

“Aw,” tubag ni Pepi, “kon may duha ra ka tawo nga hilig sa espirituwalidad, mahimo silang mga Saksi ni Jehova.”

Si Pepi mipadayon sa iyang balay-balay nga buluhaton kauban sa ubang mga Saksi hangtod nakobrehan ang balangay. Ug ingon sa mahimong damhon sa usa, sa nag-inusarang balay, nakaplagan sa mga igsoon ang magtiayon nga nahisgotan sa pari. Sila nagbasa sa Bibliya apan wala makasabot niana. Sila maikagong midawat sa pagtuon sa Bibliya, tulin nga miuswag, ug nabawtismohan niadtong Abril 1991.

Ang pila ka matinuoron ug kasingkasing nga mga tawo nakakat-on sa kamatuoran sa yanong pagbasa nga nagkinaugalingon sa pinasukad-sa-Bibliyang literatura nga gipatik sa Watch Tower Society. Pananglitan, ang mga Saksi sa Almadén (Ciudad Real) nagsangyaw sa gamayng lungsod sa Ciruelas (Badajoz) sa dihang ilang nakaplagan ang usa ka babaye nga naminawg maayo sa ilang mensahe. Tungod sa iyang dayag nga interes, ilang gitanyagan siya ug pagtuon sa Bibliya sa balay. Hinuon, siya mibalibad nga nag-ingon nga usa ka edarang lalaki ang nagdumala nag pagtuon sa Bibliya kaniya. Pipila ka tawo sa dapit naghisgot usab sa samang butang. Kay napukaw ang ilang kamausisaon, ang mga igsoon nangutana mahitungod sa edarang lalaki. Ilang nakuha ang iyang adres ug giduaw siya.

Sa ilang kakurat ilang nadiskobrehan nga sa Madrid kining lalakiha, nga ginganlag Felipe, nakabaton ug librong Ikaw Mabuhing Walay Kataposan sa Paraiso sa Yuta. Human mabasa kana sa bug-os, iyang nasabtan nga iyang responsabilidad ang pagpakig-ambit sa maayong balita uban sa iyang mga silingan. Busa, siya migamit sa libro aron sa pagtudlo kanila sa Bibliya. Ang mga igsoon mihimog kahikayan sa pagdumalag pagtuon uban kaniya. Usa ka babaye nga iyang gidumalahan sa pagtuon sa Bibliya midawat usab sa pagtuon. Bisan tuod 80 ka tuig ang edad ug dili na maayo ang panglawas, maayo ang pag-uswag ni Felipe diha sa kamatuoran.

Mga Pagpihig Nabuntog

Ang mga teritoryo sa kabanikanhan nagpahinabo ug talagsaong mga suliran. Ang relihiyosong mga tradisyon ug mga patuotuo kasagarang nakakupot ug lig-on sa maong mga dapit, ug daghang tawo nga nagpuyo sa mga kabanikanhan may dulot nga katahap sa usa ka “bag-ong relihiyon.” Ang pila ka taga-balangay maoy ilabinang sensitibo mahitungod sa kon unsay mahimong isipon sa mga silingan ug mga paryente kon sila mobalhin sa ilang relihiyon. Apan ang gahom sa Pulong sa Diyos makabuntog sa maong mga suliran ug makapausab sa kinabuhi sa tawo. Mao kini ang nahitabo diha sa balangay sa pangisda sa Cangas de Morrazo sa amihanan-kasadpang Espanya.

Si Roberto, lumad niining balangaya, nagmarinero sa pangedarong 14 tungod kay nangandoy siyag kagawasan. Ang iyang kinabuhi ingong usa ka komersiyal nga marinero nagdala kaniya ngadto sa pundok sa ubang mga marinero nga palainom ug nag-droga aron pagpalabay sa mingawng mga takna sa lawod. Sa wala madugay, si Roberto usab nahimong palainom ug nagiyan sa droga.

Sa lakat sa panahon si Roberto mipauli apan dili makabiya ug dili gustong hunongon ang iyang dili maayong bisyo. Aron masuportahan ang iyang pagkagiyan sa droga, nahimo siyang kawatan ug nabilanggo sa unom ka lainlaing okasyon. Sa dihang siya 18 anyos, iyang gihurot ang halos makapatay nga sambog sa bino ug mga tranquilizer. Giluwas sa mga doktor ang iyang kinabuhi, apan dili na niya magamit ang iyang mga bukton ug mga bitiis. Migawas siya sa ospital nga paralisado ang duha ka kamot ug duha ka tiil. Bisan ang pagpuyo sa wheelchair wala makapahunong sa iyang bisyo sa droga. Siya nawad-ag paglaom sa relihiyon, ug ang mga droga daw mao lamang ang nakahatag ug kahulogan sa kinabuhi​—hangtod tulo ka tuig sa ulahi sa dihang siya giduaw sa mga Saksi ni Jehova.

Ang pagkat-on mahitungod sa nangatumang mga tagna sa Bibliya nakatabang kang Roberto sa pagbuntog sa iyang pagkadili-motuo. Ang mainitong pag-abiabi nga iyang nadawat sa Kingdom Hall nakakombinsir kaniya nga ang matuod nga relihiyon makahimo sa pagkinabuhi nga mas makahuloganon. Sulod sa siyam ka bulan, nabuntog ni Roberto ang iyang pagkagiyan sa droga ug nabawtismohan. Bisan pa sa grabe niyang pagkabaldado sa pisikal, siya nag-alagad ingong payunir sulod sa walo ka tuig. Siya usab nahimong ansiano sa kongregasyon sulod sa miaging duha ka tuig. Si Francisco, usa sa iyang kanhing kauban, nakadayeg kaayo sa mga kausaban sa kinabuhi ni Roberto nga siya usab nahimong Saksi ug karon usa na ka ministeryal nga alagad. Ang talagsaong kausaban niining daw wala nay pagkaayong giyanon nga nakatabang sa mga tawo sa maong lokalidad sa pag-apresyar nga mas maayo sa kinaiya sa atong buluhaton. Usa ka babaye nagdala pa gani sa iyang ulitawohay nga anak nga naggiyan sa droga nganha sa Kingdom Hall sa pagpamasin nga matambalan siya sa mga Saksi.

Pagsusi sa Bibliya Alang sa Kamatuoran

Sa katibuk-an, ang mga taga-baryo may dakong apresasyon alang sa kamatuoran nga kini subsob nagpakaulaw sa mga maalamon sa kalibotan. (1 Corinto 1:26, 27) Si Adelina, usa ka manggiulawon edarang babaye, maoy usa niining mga mapabilhon. Siya kanhi sinsero gayod sa iyang Katolikong pagtuo. Kada buntag sa walay pakyas moluhod siya sa pag-ampo, nga mangadyi ug ubay-ubayng Amahan Namo ug Maghimaya ka Maria. Iyang ipahinungod ang iyang mga pag-ampo sa lainlaing “santos” kada adlaw sa semana​—aron maseguro nga labing menos ang pila sa iyang mga pag-ampo pagadunggon.

Sa dihang si Adelina misugod sa pagtuon sa Bibliya, iyang gitumong ang samang relihiyosong kasibot sa iyang bag-ong kaplag nga pagtuo. Bisan ang iyang kamanggiulawon wala makapugong kaniya, bisan tuod sa unang higayon nga siya ug ang iyang bana miadto sa Kingdom Hall, giabtan silag napulo ka minutos aron makaipon ug igong kaisog sa pagsulod. Hinuon, sa dihang didto na sa sulod naminaw siyag maayo. Sa usa ka higayon, siya nakakat-on mahitungod sa Usa ka Libo ka Tuig nga Pagmando ni Kristo. Kining ulohana nakapadani kaniya, ug sa dihang mipauli na siya sa balay, gusto niyang makabasa ug dugang pa mahitungod niana diha sa iyang Bibliya. Apan siya ni iyang bana wala makahibalo kon asa mabasa kanang impormasyona, bisan tuod sila naghunahuna nga kana nahisgotan sa usa ka dapit diha sa basahon sa Pinadayag. Busa gisugdan ni Adelina pagbasa ang Pinadayag nianang gabhiona ug nagpadayon sa pagbasa hangtod sa kataposan nakaabot siya sa kapitulo 20 sa banagbanag na sa kabuntagon.

Sa laing okasyon, nakat-onan ni Adelina nga haom alang sa bana ang pag-ampo alang sa iyang asawa. Bisan tuod nga andam siyang moampo, ang iyang bana wala masayod kon unsay isulti sa pag-ampo. Nianang gabhiona, nakahukom si Adelina sa pagpangita sa mga instruksiyon diha sa Bibliya. Sa alas-dos sa buntag, iyang gipukaw ang iyang bana aron sultihan nga iyang nakaplagan ang Mateo kapitulo 6, nga detalyadong naghisgot mahitungod sa pag-ampo. Human mabasa ang mga instruksiyon ni Jesus, sa kataposan ang iyang bana miampo alang kanilang duha. Karon si Adelina ug ang iyang bana maoy mga Saksi ni Jehova.

Usa ka Maayong Ani

Human sa hapit 25 ka tuig nga pagsangyaw sa kabanikanhan sa masibotong mga alagad ni Jehova, ang tanang dapit sa Espanya nakadungog sa maayong balita. Ingon sa nahitabo sa Asia Minor niadtong unang siglo, ‘ang pulong ni Jehova gidala sa tibuok nasod.’ (Buhat 13:49) Ingong sangpotanan, linibo ka taga-balangay ang misanong nga mauyonon.

Sa Espanya ug bisan diing dapit, ang mabug-osong pagsangyaw sa kabanikanhang dapit nagkinahanglag pailob ug pagsakripisyo sa kaugalingon. Apan sanglit ang kabubut-on sa Diyos mao nga ‘ang tanang matang sa tawo mamaluwas,’ ang mga Saksi ni Jehova malipayon sa pagpangita niadtong mga mapabilhon. (1 Timoteo 2:4) Ug ingon sa gipakita sa gihisgotang mga kasinatian, si Jehova sa madagayaon nagganti sa mga paningkamot nga gihimo sa pagsangyaw gikan sa balangay ngadto sa balangay sa Espanya.

[Footnote]

[Mapa sa panid 23]

(Alang sa aktuwal nga pagkahan-ay, tan-awa ang publikasyon)

PRANSIYA

PORTUGAL

ESPANYA

BALEARIC ISLANDS

CANARY ISLANDS

[Picture Credit Line sa panid 24]

Vilac, Lérida

[Picture Credit Line sa panid 24]

Puebla de Sanabria, Zamora

[Picture Credit Line sa panid 25]

Casarabonela, Málaga

[Picture Credit Line sa panid 25]

Sinués, Huesca

[Picture Credit Line sa panid 26]

Lekeitio, Vizcaya