Nahinumdom Ka Ba?

Gihatagan mo bag mainampingong pagpamalandong ang bag-ong mga isyu sa Ang Bantayanang Torre? Kon mao, maikag ka sa paghinumdom sa mosunod:

▫ Unsa ang dakong kalainan tali sa tawo ug sa mga mananap?

Ang dakong kalainan nahasentro diha sa gambalay, katakos, ug mga obra sa utok. Diha sa mga mananap halos tanang obra sa utok naprograma diha sa gitawag nga kinaiyanhong kaalam. Dili ingon niini ang mga tawo. Gihatagan sa Diyos ang mga tawo ug katakos sa libreng kabubut-on. (Proverbio 30:24-28)​—4/15, panid 5.

▫ Unsang bahin ang gidula sa pag-awit diha sa pagsimba sa templo sa mga Israelinhon?

Ang musika, ilabina ang mga mag-aawit, nagbaton ug usa ka hinungdanong bahin diha sa pagsimba, dili gayod hinuon aron magsilsil sa mas bug-at nga mga butang sa Kasugoan, kondili aron itagana ang tukmang espiritu alang sa pagsimba. Miabag kini sa mga Israelinhon sa pagsimba kang Jehova sa madasigong paagi. (1 Cronicas 23:4, 5; 25:7)​—5/1, mga panid 10, 11.

▫ Unsang matanga sa pagtagad ang gikinahanglan sa mga bata sukad sa pagkamasuso?

Kinahanglang kanunayng hatagan sa mga ginikanan ug bug-os nga pagtagad ang bag-ong nahimugso. Si Pablo misulat: “Sukad pa sa pagkamasuso ikaw nahibalo na sa balaang mga sinulat, nga nakahimo kanimong maalamon alang sa kaluwasan.” (2 Timoteo 3:15) Busa ang pagtagad sa ginikanan nga nadawat ni Timoteo, bisan sukad pa sa pagkamasuso, maoy usa usab ka matang sa espirituwal nga pag-atiman.​—5/15, panid 11.

▫ Unsa ang upat ka linya sa ebidensiya nga nagpamatuod nga ang Bibliya naundan sa mensahe sa Diyos alang sa tanang katawhan?

(1) Pagkamabatonan. Ang Bibliya mabatonan sa mga 98 porsiento sa populasyon sa kalibotan. (2) Makasaysayanhon. Ang Bibliya naundan sa mga kamatuoran sa kasaysayan, inay kay sa dili kapamatud-ang mga sugilambong. (3) Praktikal. Ang mga sugo ug mga prinsipyo niini nagpasiugda sa usa ka paagi sa kinabuhi nga mohatag kaayohan alang niadtong kinsa mosunod niini. (4) Tagna. Kini maoy usa ka basahon nga nagaasoy sa detalye kon unsay mahitabo sa umaabot.​—6/1, mga panid 8, 9.

▫ Unsang responsabilidad ang nagauban sa pagkahibalo sa matuod nga relihiyon?

Sa dihang mailhan nato ang matuod nga relihiyon, kinahanglang tukoron nato ang atong mga kinabuhi palibot niana. Kini maoy paagi sa kinabuhi. (Salmo 119:105; Isaias 2:3)​—6/1, panid 13.

▫ Nganong ang personal nga pagtuon sa Bibliya hinungdanon kaayo?

Gikinahanglan sa tanang mga alagad sa Diyos nga mabag-o ang ilang kalipay ug kalig-on sa adlaw-adlaw pinaagi sa pagkakaplag ug bag-o o mas lalom nga mga bahin sa kamatuoran sa Pulong sa Diyos. Niining paagiha mahuptan nila ang ilang kaugalingon nga madasigon sa espirituwal.​—6/15, panid 8.

▫ Unsay kahulogan sa pulong “sala” ingon sa paggamit sa Bibliya?

Sa ilang berbong mga porma, ang Hebreohanon ug Gregong mga pulong sagad gigamit sa Bibliya aron ipaila ang “sala” nga nagkahulogang “pakyas,” sa diwa nga misipyat o napakyas sa pag-abot sa tumong, marka, o target. Ang unang tawhanong paris nakabsan sa himaya sa Diyos, napakyas sa katuyoan sa pagkalalang kanila diha sa dagway sa Diyos. Sa laing pagkasulti, sila nakasala. (Genesis 2:17; 3:6)​—6/15, panid 12.

▫ Nganong dili gayod maalamon nga basahon ang literatura sa mga apostata?

Ang pipila ka basahon sa mga apostata nagapresentar ug mga kabakakan pinaagig “ulog-ulog nga sinultihan” ug “mini nga mga pulong.” (Roma 16:17, 18; 2 Pedro 2:3) Ang tanang apostatang mga sinulat yanong nagasaway ug nagadaot. Walay bisan unsa nga makapalig-on.​—7/1, panid 12.

▫ Ang Gresya ba mao ang gigikanan sa demokrasya?

Sa karaang Gresya, ang demokrasya gibatasan lamang sa pipila ka siyudad-estado, ug bisan diha niana ang mga lalaki lamang ang makabotar. Kini nagpasabot nga upat ka bahin sa lima sa populasyon ang wala mahilakip. Kadto dili gayod popular nga soberanya o demokrasya!​—7/1, panid 16.

▫ Unsay mopahinabo sa Kristohanong kaminyoon nga molambo?

Sa dihang tahoron sa bana ug asawa ang hunahuna sa Diyos bahin sa kaminyoon ug maningkamot sa pagkinabuhi sumala sa mga prinsipyo sa iyang Pulong. (Efeso 5:21-33)​—7/15, panid 10.

▫ Sa unsang paagi ang inyong pagtuon sa pamilya mahimong makalingaw?

Paningkamoting ang tanang kabataan malangkit. Magmapositibo ug makapalig-on, mainitong maghatag ug komendasyon sa inyong mga anak tungod sa ilang pagpakigbahin. Dili lamang kobrehan ang materyal kondili maningkamot nga maabot ang mga kasingkasing sa inyong mga anak.​—7/15, panid 18.

▫ Unsay gipasabot sa ekspresyon: “Sa diha nga sila magaingon: ‘Kalinaw ug kasegurohan!’” (1 Tesalonica 5:3)

Matikdi nga ang Bibliya wala mag-ingon nga ang mga nasod makakab-ot ug “kalinaw ug kasegurohan.” Dayag nga sila magsultihanay mahitungod niini sa talagsaong paagi, nga magapahayag sa pagkamalaomon ug pagtuo nga wala batia sa nangagi. Ang purohan nga makab-ot ang kalinaw ug kasegurohan mopatim-aw nga mas duol na kay sukad masukad.​—8/1, panid 6.

▫ Nganli ang tulo ka paagi nga si Jehova nagapasundayag sa pagkamakataronganon.

Gipasundayag ni Jehova ang iyang pagkaandam sa pagpasaylo. (Salmo 86:5) Andam siya sa pag-usab sa iyang gihunahunang buhaton inigtungha sa bag-ong mga kahimtang. (Tan-awa ang Jonas, kapitulo 3.) Usab, gipakita ni Jehova ang iyang kaugalingon nga makataronganon sa pagpasundayag ug awtoridad. (1 Hari 22:19-22)​—8/1, mga panid 12-14.