“Kahibulongan Uyamot ang Pagbuhat Kanako”

“DIIN ako gikan?” Kini maoy usa ka pangutana nga gisukna sa kadaghanang kabataan sa usa ka panahon o sa lain. Sa dihang modako na ang mga bata, ang ilang pangutana kasagaran mahimong labi pa ka tulogkaron: “Diin naggikan ang kinabuhi?” Kining pangutanaha nahisgotan sulod sa libolibong katuigan, ug di pa dugay daghang siyentipiko nag-isip sa ebolusyon ingong labing makataronganong tubag sa tanghaga sa sinugdanan sa kinabuhi. Sa yano, ang usa ka ebolusyonista mopatin-aw nga ang kinabuhi mitungha nga sulagma.

Mga 3,000 ka tuig kanhi, si Haring David misulat: “Makalilisang ug kahibulongan uyamot ang pagbuhat kanako.” (Salmo 139:14) Kon labaw pa ang atong makat-onan bahin sa kinabuhi, labi pang makita nato ang kamatuoran nianang mga pulonga. Sa pagkatinuod, ang usa ka batid sa kinaiyahan nga si Fred Hoyle misulat: “Samtang ang mga biyokemista dugang ug dugang nakakaplag mahitungod sa katingalahang pagkakomplikado sa kinabuhi, dayag nga gamay ra kaayo ang posibilidad nga kini aksidenteng mitungha mao nga imposible gayod kini nga mahitabo. Ang kinabuhi dili gayod mahitabo nga sulagmang mitungha.”

Busa unsa ang sinugdanan sa kinabuhi? Ang duha ka pang-abling mga artikulo niining magasina naghisgot nianang pangutanaha. Kon buot nimo ug dugang impormasyon, palihog pagsulat sa Watch Tower, P.O. Box 2044, 1099 Manila, o sa tukmang direksiyon nga nalista sa panid 2.