Pabilhi ang Imong Balaang Pag-alagad
ARON makab-ot ang bisan unsang hamiling tumong, kinahanglang andam kita sa paghimog mga sakripisyo. Aron mahimong doktor sa medisina gikinahanglan ang katuigan sa pagtuon ug determinasyon, maingon man ang salapi. Ang usa ka malamposong gymnast nakagugol sa kadaghanang bahin sa iyang pagkabatan-on sa paghimog nag-anam kalisod nga mga rutina diha sa walay-hunong nga pagpangagpas sa kahingpitan. Ang usa ka batid nga piyanista susamang makahinumdom sa nangaging mga tuig sa dedikadong pagbansay.
Hinunoa, adunay usa ka tumong nga nagpahinabog mga resulta nga labaw pa kay sa bisan unsang sakriprisyo nga himoon. Unsa kana? Mao kana ang pribilehiyo sa pagkahimong alagad sa Labing Hataas, si Jehova nga Diyos. Bisan unsang mga sakripisyo ang atong himoon sa panahon, sa salapi, o kusog, ang pribilehiyo sa paghatag ug balaang pag-alagad sa atong Maglalalang magdala ug mga ganti nga walay ikatandi. Ang mga pulong ni apostol Pablo maoy tinuod: “Ang diyosnong pagkamahinalaron mapuslanon sa tanang butang, kay nagahupot kini ug saad sa kinabuhi karon ug nianang sa umaabot.” (1 Timoteo 4:8) Tan-awon nato kon sa unsang paagi kana matuod.
Sa Dihang Una Kitang Nakakat-on Bahin sa Diyos
Kadaghanan sa midawat sa maayong balita ug misugod sa pagtuon sa Bibliya lagmit wala makaamgo sa gidak-on sa mga kausaban nga moresulta diha sa ilang mga kinabuhi. Una, ang bag-ong estudyante sa Bibliya mawad-an tingalig mga higala nga dili makasabot kon nganong dili na siya makig-uban kanila diha sa mga pangagpas nga iya na karong nailhan nga dili-magpasidungog sa Diyos. (1 Pedro 4:4) Ang pipila makasinati ug pagsupak sa pamilya ug lagmit maguol nga makakita niadtong ilang gimahal nga magpakita ug pagkadili-gusto, pagdumot pa gani, kang Jehova. (Mateo 10:36) Kana malisod nga sakripisyo.
Sa trabahoan o sa tunghaan, aduna usab ing pagsakripisyo. Ang bag-ong estudyante sa Bibliya sa ngadtongadto mohunong sa pag-apil sa kalibotanong mga salosalo ug ubang mga selebrasyon. Dili na siya mamati sa hugaw nga sinultihan sa iyang mga kauban sa trabaho o mga kauban sa tunghaan, ni makigbaylo siya ug hilas nga mga komedya kanila. Hinunoa, maningkamot siya sa pagtuman sa awhag nga anaa sa Efeso 5:3, 4: “Ayaw tugoti bisan na lang gani nga mahisgotan taliwala kaninyo ang pakighilawas ug ang tanang matang sa pagkadili-hinlo o pagkadalo, ingon gayod sa nahiangay sa mga balaan; ni ang makauulawng panggawi ni binuang nga sinultihan ni law-ayng pagpanistis, mga butang nga dili angay, kundili hinuon ang mga pagpasalamat.”
Ang maong mga kausaban hayan maghimo sa usa ka estudyante sa Bibliya nga lahi. Kana malisod, ilabina sa usa ka batan-on nga nagtungha pa. Samtang giatubang ang daghang selebrasyon, maingon man ang batok-Diyos nga mga pagtulon-an, sama sa ebolusyon, ug ang kanunayng pagpit-os nga monunot sa panon, ang batan-ong mga Kristohanon kinahanglang makigbisog kanunay alang sa pagtuo. Ang pagsunod sa mga dalan sa Diyos magpalahi kanila ug lagmit moresulta sa pagbiaybiay gikan sa mga kauban sa klase ug mga magtutudlo. Kini ilabinang malisod dawaton panahon sa sensitibong katuigan sa pagkatin-edyer, apan ang pag-uyon sa Diyos takos sa maong pagsakripisyo.
Mga Sakripisyo ba Gayod Kini?
Ang ubang mga butang nga sa sinugdan daw mga sakripisyo mahimong mga panalangin. Ang uban kinahanglang mohunong sa bisyo sa pagtabako. (2 Corinto 7:1) Kini mahimong usa ka pakigbisog, apan pagkadakong panalangin sa dihang ang hugaw nga bisyo sa kataposan mabuntog! Ang susama ikaingon bahin sa pagbuntog sa pagkagiyan sa ubang droga o sa alkoholikong ilimnon. Pagkalabing maayo sa kinabuhi kon wala kanang makadaot nga mga bisyo! Kinahanglang tul-iron sa uban ang ilang kaminyoon. Kadtong nagpuyopuyo kinahanglang magminyo o kaha magbulag. (Hebreohanon 13:4) Kadtong nakigpuyo sa ubay-ubayng asawa kinahanglang magbaton lamang sa asawa sa ilang pagkabatan-on. (Proverbio 5:18) Ang maong mga kausaban naglakip ug pagsakripisyo, apan kini magpahinabog kalinaw diha sa panimalay.
Hunahunaa ang mga Ganti
Sa pagkatinuod, si bisan kinsa nga magatuman sa mga balaod ni Jehova mabenepisyohan gayod. Sa unang higayon sa iyang kinabuhi, ang estudyante sa Bibliya mosugod sa pagtawag sa iyang Maglalalang nga ginamit ang Iyang ngalan, si Jehova. (Salmo 83:18) Ang estudyante modangat sa paghigugma kang Jehova samtang siya nakakat-on bahin sa kahibulongang mga butang nga Iyang nabuhat ug pagabuhaton pa alang sa katawhan. Sa mga nasod diin kaylap ang kahadlok sa mga patay, mawala ang iyang matuotuohong kahadlok, sanglit nasayod nga ang mga patay natulog, nga naghulat sa pagkabanhaw. (Ecclesiastes 9:5, 10) Ug pagkadakong kahupayan nga makaamgo nga si Jehova dili magsakit sa mga tawo sa walay kataposan diha sa impiyerno! Oo, ang kamatuoran tinuod gayod nga nagpagawas kaniya.—Juan 8:32.
Samtang dugang ug dugang pang gipahiuyon sa estudyante ang iyang kinabuhi sa mga sukdanan ni Jehova, siya makabaton ug hinlong konsensiya ug pagtahod-sa-kaugalingon. Ang pagkakat-on sa pagkinabuhi ingong tinuod nga Kristohanon motabang kaniya nga moatiman sa iyang pamilya sa mas maayong paagi, nga magdala ug dakong katagbawan ug kangaya. Unya anaa ang pagtambong sa mga tigom sa Kingdom Hall. Pagkamakapalipayng kasinatian! Ania ang mga tawo kinsa tinuod nga nagtuman sa mainiton nga gugma nga giingon sa Bibliya nga kinahanglang magpaila sa katawhan sa Diyos. (Salmo 133:1; Juan 13:35) Ang ilang sinultihan mahinlo ug makapalig-on samtang sila nagasulti “sa halangdong mga butang sa Diyos.” (Buhat 2:11) Oo, ang pagpakig-uban “sa tibuok kapunongan sa mga igsoon” maoy tuboran sa kalipay. (1 Pedro 2:17) Ang maong maayong pakig-uban makatabang sa estudyante sa Bibliya sa ‘pagsul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.’—Efeso 4:24.
Ang Lakang sa Pagpahinungod
Samtang ang usa ka tawo mouswag sa kahibalo, siya sa ngadtongadto matukmod sa gugma kang Jehova sa pagpahinungod sa iyang kinabuhi ngadto kaniya ug sa pagsimbolo niining maong pahinungod pinaagi sa bawtismo sa tubig. (Mateo 28:19, 20) Ang tambag ni Jesus mao nga sa dili pa mohimo niining maong lakang, kuwentahon sa iyang mga tinun-an ang gasto. (Lucas 14:28) Hinumdomi, unahon sa usa ka napahinungod nga Kristohanon ang kabubut-on ni Jehova ug isalikway ang mga butang sa unod. Siya maghago aron sa pagbiya “sa mga buhat sa unod” ug sa pag-ugmad “sa bunga sa espiritu.” (Galacia 5:19-24) Ang tambag nga makita sa Roma 12:2 nagdula na karon ug mas bug-os pa nga papel diha sa iyang kinabuhi: “Hunong na sa pagpaumol sumala niining sistemaha sa mga butang, apan mag-usab pinaagi sa pagbag-o sa inyong kaisipan, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” Busa, ang dedikadong Kristohanon magkinabuhi nga may nabag-ong diwa sa katuyoan.
Apan, tagda kon unsay iyang madawat. Kon tan-awon ta, anaa na siya karon sa usa ka personal nga relasyon uban sa Maglalalang sa uniberso. Siya gipahayag nga matarong tungod kay nahimong higala sa Diyos! (Santiago 2:23) Uban sa mas lalom nga kahulogan, siya makapakigsulti sa Diyos ingong “among Amahan sa mga langit.” (Mateo 6:9) Ang laing panalangin alang sa bag-ong nagpahinungod mao ang pagkahibalo nga sa pagkatinuod ang kinabuhi aduna gayoy katuyoan ug nga siya nagakinabuhi nga kaharmoniya nianang maong katuyoan. (Ecclesiastes 12:13) Sa pagsundog sa pagpanguna ni Jesus, mapamatud-an niyang bakakon ang Yawa pinaagi sa pagpabiling matinumanon. Pagkadakong kalipay nga ipahinabo niini sa kasingkasing ni Jehova!—Proverbio 27:11.
Siyempre, samtang ang usa ka Kristohanon molahutay diha sa dalan sa pagkamatarong, adunay dugang mga sakripisyo nga pagahimoon. Nagkinahanglag panahon sa pag-apil sa usa ka makahuloganong personal ug kongregasyonal nga pagtuon sa Pulong sa Diyos. (Salmo 1:1-3; Hebreohanon 10:25) Ang panahon alang sa pagsangyaw sa kanataran kinahanglang paliton gikan sa ubang mga kalihokan. (Efeso 5:16) Ang panahon ug panglimbasog gikinahanglan usab aron sa pagtambong sa mga tigom sa mga Saksi ni Jehova ug sa pagbiyahe ngadto sa ilang mga asembliya ug mga kombensiyon. Nagkinahanglan tingali ug pagsakripisyo sa kaugalingon ang pag-ambit sa mga galastohan sa Kingdom Hall ug sa tibuok-kalibotang pagsangyawng buluhaton. Apan, sumala sa ikapamatuod sa minilyong Kristohanon, ang tibuok-kasingkasing nga pagpakig-ambit sa maong mga butang magpahinabog kalipay. Si Jesus miingon: “Adunay labaw nga kalipay sa paghatag kay sa pagdawat.”—Buhat 20:35.
Ang mga ganti sa pagpaluyo sa buluhaton ni Jehova molabaw pa kay sa mga sakripisyo. Samtang kita mouswag sa pagkahamtong, ang atong ministeryo mahimong labi pang mabungahon ug mangayaon. Sa pagkatinuod, walay makapahinabog ingon ka dakong katagbawan sa pagtudlo sa usa ka tawo bahin sa kamatuoran sa Bibliya ug sa pagkakita nianang tawhana nga mosimba kang Jehova. Ug kon ang bag-ong magsisimba maoy usa ka membro sa pamilya, tingali usa ka anak nga namatuto “diha sa disiplina ug mapasiboong pagdumala-sa-kaisipan ni Jehova,” kana magpahinabog linaing kalipay. (Efeso 6:4) Makita nato ang dagayang mga panalangin sa Diyos diha sa atong mga paningkamot nga mahimong iyang “kaubang mga magbubuhat.”—1 Corinto 3:9.
Ubang mga Ganti sa Matinumanong Pag-alagad
Sa pagkatinuod, aduna kitay mga suliran samtang kining sistemaha sa mga butang magalungtad pa. Lagmit, ang mga suliran mahimong magakagrabe pa samtang nagakamubo ang panahon sa Yawa. Tingali kinahanglan kitang mag-antos sa mga paglutos o moagwanta sa tentasyon. Apan ang kahibalo nga ang Diyos nagauban kanato makapahupay kanato ug magahatag kanato ug kusog sa pag-agwanta. (1 Corinto 10:13; 2 Timoteo 3:12) Ang pipila ka kaubang mga Kristohanon nakaagwanta ug katuigan sa maharasong pagtratar, apan sila milahutay tungod sa ilang gugma sa Diyos. Kadtong malamposong miagwanta sa mga pagsulay sa lainlaing matang mibati sama sa mga apostol sa dihang gibunalan sila ug unya gibuhian. Ang Buhat 5:41 miasoy: “Busa, kini sila milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod ug alang sa iyang ngalan.”
Ang ganti sa pag-agwanta molabaw pa sa mga sakripisyo bisan karon. Apan hinumdomi, ang diyosnong pagkamahinalaron “nagahupot ug saad” dili lamang “sa kinabuhi karon” kondili usab “nianang sa umaabot.” (1 Timoteo 4:8) Pagkanindot sa mga palaabuton sa usa nga molahutay! Kon ikaw matinumanon, ikaw molabang buhi sa dakong kasakitan nga nagtimaan sa kataposan niining sistema sa mga butang. O kon ikaw mamatay una pa nianang halandumong hitabo, ikaw mabanhaw ngadto sa bag-ong kalibotan nga mosunod. (Daniel 12:1; Juan 11:23-25) Hunahunaa ang pagbati sa pagkamalipayon nga imo unyang mabatonan sa dihang ikaw makaingon: “Uban sa tabang ni Jehova, ako nagmatinumanon ug nakadawat sa akong ganti!” Pagkakulbahinam ang pagpanunod ug usa ka bahin nianang yutaa, nga “mapuno gayod sa kahibalo kang Jehova ingon sa mga tubig nga nagatabon sa dagat.”—Isaias 11:9.
Oo, nagkinahanglag sakripisyo sa pag-alagad sa Diyos. Apan kon itandi sa mga ganti, diyutay ra kaayo ang sakripisyo. (Filipos 3:7, 8) Tungod sa tanang gibuhat sa Diyos alang sa iyang mga alagad karon ug pagabuhaton sa umaabot, atong sublion ang mga pulong sa salmista: “Unsa man ang akong igabayad kang Jehova tungod sa tanan niyang mga kaayohan kanako?”—Salmo 116:12.