‘Luwasa ang Imong Kaugalingon ug Kadtong Mamati Kanimo’
“Hatagig kanunayng pagtagad ang imong kaugalingon ug ang imong pagpanudlo. . . . Pinaagi sa pagbuhat niini imong maluwas ang imong kaugalingon ug kadtong kinsa mamati kanimo.”—1 TIMOTEO 4:16.
1, 2. Unsay nagpalihok sa matuod nga mga Kristohanon sa pagpadayon sa ilang buluhaton nga makaluwas ug kinabuhi?
DIHA sa usa ka hilit nga baryo sa amihanang Thailand, usa ka magtiayon nga mga Saksi ni Jehova misulay paggamit sa ilang bag-ong nakat-onang mga katakos sa pinulongan diha sa mga sakop sa usa ka tribo sa kabungtoran. Aron makapaambit sa maayong balita sa Gingharian sa Diyos uban sa mga taga-baryo, ang magtiayon bag-o pang nagtuon sa pinulongang Lahu.
2 “Lisod ihubit ang kalipay ug katagbawan nga among gibati, sa pag-alagad uban niining makaiikag nga mga tawo,” miingon ang bana. “Among gibati gayod nga nakaapil sa katumanan sa Pinadayag 14:6, 7, sa pagwali sa maayong balita ‘ngadto sa matag nasod ug tribo ug pinulongan.’ Pipila na lamang ang mga lugar nga wala pa maabot sa maayong balita, ug segurado nga usa kini niini. Halos dili namo maato ang pagdumala sa mga pagtuon sa Bibliya.” Tin-aw, kining magtiayon naglaom sa pagluwas dili lamang sa ilang kaugalingon kondili niadto usab nga mamati kanila. Ingong mga Kristohanon, dili ba kitang tanan naglaom nga makahimog sama niini?
“Hatagig Kanunayng Pagtagad ang Imong Kaugalingon”
3. Aron makaluwas sa uban, unsa ang kinahanglan natong himoon una?
3 Gitambagan ni apostol Pablo si Timoteo, “Hatagig kanunayng pagtagad ang imong kaugalingon ug ang imong pagpanudlo,” ug kini aplikado sa tanang Kristohanon. (1 Timoteo 4:16) Sa pagkatinuod, aron matabangan ang uban nga makabaton ug kaluwasan, kinahanglang hatagan nato una ug pagtagad ang atong kaugalingon. Sa unsang paagi mahimo nato kini? Una, kita kinahanglang magbantay sa mga panahon nga atong gikinabuhian. Si Jesus mihatag ug daghag-bahin nga ilhanan aron ang iyang mga sumusunod mahibalo kon kanus-a moabot ang “katiklopan sa sistema sa mga butang.” Bisan pa, si Jesus miingon usab nga kita wala mahibalo kon kanus-a gayod moabot ang kataposan. (Mateo 24:3, 36) Unsay atong angayng pagsanong nianang kamatuorana?
4. (a) Unsang tinamdan ang angay natong sagopon maylabot sa panahong nahibilin niining sistemaha? (b) Unsang tinamdan ang angay natong likayan?
4 Ang matag usa kanato mahimong mangutana, ‘Gigamit ko ba ang bisan unsang panahong nahibilin niining sistemaha aron maluwas ko ang akong kaugalingon ug kadtong mamati kanako? O naghunahuna ba ako, “Sanglit kita wala man mahibalo kon kanus-a gayod moabot ang kataposan, dili ko magpabalaka niana”?’ Ang ulahi nga tinamdan makuyaw. Kini sukwahi gayod sa tambag ni Jesus: “Pamatud-i ang inyong kaugalingon nga andam, tungod kay sa takna nga wala ninyo hunahunaa nga kini mao, ang Anak sa tawo moabot.” (Mateo 24:44) Sa pagkatinuod dili kini panahon sa pagwala sa atong kadasig sa pag-alagad kang Jehova o sa pagdangop sa kalibotan alang sa kasegurohan o katagbawan.—Lucas 21:34-36.
5. Unsang mga panig-ingnan ang gihatag sa una-Kristohanong mga saksi ni Jehova?
5 Laing paagi nga atong ikapasundayag nga atong gihatagag pagtagad ang atong kaugalingon maoy pinaagi sa matinumanong paglahutay ingong mga Kristohanon. Ang mga alagad sa Diyos sa nangaging panahon nagpadayon sa paglahutay, nagpaabot man sila ug dihadiha nga kaluwasan o wala. Human sa pagkutlo ug mga panig-ingnan sa una-Kristohanong mga saksi sama kang Abel, Enoc, Noe, Abraham, ug Sara, si Pablo miingon: “Sila wala makabaton sa katumanan sa mga saad, apan ilang nakita kini sa halayo ug nanaghangop niini ug mipahayag sa dayag nga sila mga estranyo ug temporaryong mga pumoluyo sa yuta.” Sila wala magpadala sa bisan unsang mga pangandoy nga makabaton ug haruhayng kinabuhi, ni magpadaog sila sa imoral nga mga pagpit-os sa ilang palibot, apan sila mahinamong nagpaabot sa “katumanan sa mga saad.”—Hebreohanon 11:13; 12:1.
6. Sa unsang paagi ang panglantaw sa unang-siglong mga Kristohanon bahin sa kaluwasan nakaapektar sa ilang paagi sa pagkinabuhi?
6 Ang unang-siglong mga Kristohanon naglantaw usab sa ilang kaugalingon ingong “mga langyaw” niining kalibotana. (1 Pedro 2:11) Bisan human nga maluwas sa kalaglagan sa Jerusalem sa 70 K.P., ang tinuod nga mga Kristohanon wala mohunong sa pagsangyaw o mobalik sa kalibotanong paagi sa kinabuhi. Sila nahibalo nga ang dakong kaluwasan naghulat niadtong magpabiling matinumanon. Sa pagkatinuod, ingon ka ulahi sa 98 K.P., si apostol Juan nagsulat: “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17, 28.
7. Sa unsang paagi napasundayag sa mga Saksi ni Jehova ang pagkamalahutayon sa modernong panahon?
7 Sa modernong panahon ang mga Saksi ni Jehova nagmalahutayon usab sa Kristohanong buluhaton, bisan tuod sila nakaagom ug mapintas nga paglutos. Ang ila bang pagkamalahutayon nakawang? Wala gayod, kay si Jesus nagpasalig: “Siya nga nakalahutay hangtod sa kataposan mao ang maluwas,” mahimong kataposan kaha sa daang sistema o kataposan sa presenteng kinabuhi sa usa. Diha sa pagkabanhaw, hinumdoman ug gantihan ni Jehova ang tanan niyang matinumanong mga alagad nga nangamatay.—Mateo 24:13; Hebreohanon 6:10.
8. Sa unsang paagi atong ikapasundayag nga atong gipabilhan ang pagkamalahutayon sa mga Kristohanon sa nangaging panahon?
8 Dugang pa, kita malipayon nga ang matinumanong mga Kristohanon sa nangaging panahon wala mabalaka sa ilang kaugalingong kaluwasan lamang. Siyempre kita nga nakakat-on bahin sa Gingharian sa Diyos pinaagi sa ilang mga paningkamot mapasalamaton nga sila milahutay sa pagtuman sa sugo ni Jesus: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagsunod sa tanang butang nga akong gisugo.” (Mateo 28:19, 20) Basta magpabiling bukas ang kahigayonan kanato, atong ikapasundayag ang atong pagkamapasalamaton pinaagi sa pagsangyaw ngadto sa uban nga wala pa makadungog sa maayong balita. Apan, ang pagsangyaw maoy unang lakang lamang sa paghimog mga tinun-an.
‘Hatagig Pagtagad ang Imong Pagpanudlo’
9. Sa unsang paagi ang positibong tinamdan makatabang kanato nga makasugod ug mga pagtuon sa Bibliya?
9 Ang atong buluhaton nag-apil dili lamang sa pagsangyaw kondili pagpanudlo usab. Gisugo kita ni Jesus sa pagtudlo sa mga tawo sa pagtuman sa tanang butang nga iyang gisugo. Tinuod, diha sa pipila ka teritoryo, pipila lamang ang daw interesadong motuon bahin kang Jehova. Apan ang pagbaton ug negatibong hunahuna sa teritoryo makababag sa atong mga paningkamot nga makasugod ug mga pagtuon sa Bibliya. Si Yvette, usa ka payunir sa teritoryo nga gitawag sa pipila nga dili-mabungahon, nakamatikod nga ang mga bisita sa maong lugar, kinsa walay negatibong tinamdan, nakasugod ug mga pagtuon sa Bibliya. Human nga naghupot siya ug mas positibong panglantaw, si Yvette usab nakakaplag ug mga tawo nga interesadong motuon sa Bibliya.
10. Unsa ang atong pangunang papel ingong mga magtutudlo sa Bibliya?
10 Ang ubang mga Kristohanon tingali magpanukong motanyag ug pagtuon sa Bibliya sa mga interesado tungod kay sila wala magtuo nga sila makadumala ug pagtuon. Tinuod, kita lainlain ug mga sukod sa katakos. Apan dili kinahanglang hanas kita kaayo aron molampos ingong mga magtutudlo sa Pulong sa Diyos. Ang putli nga mensahe sa Bibliya gamhanan, ug si Jesus miingon nga ang mga karnerohon makaila sa tingog sa matuod nga Magbalantay inigkadungog nila niana. Nan, ang atong buluhaton mao ang pagpasa lamang sa mensahe sa Maayong Magbalantay, si Jesus, nga mas tin-aw kutob sa atong mahimo.—Juan 10:4, 14.
11. Sa unsang paagi mahimong mas epektibo ka sa pagtabang sa usa ka estudyante sa Bibliya?
11 Sa unsang paagi mapasa nimo ang mensahe ni Jesus nga mas epektibo? Una, pagtuon pag dugang kon unsay giingon sa Bibliya bahin sa topiko nga pagahisgotan. Kinahanglang sabton nimo ang ulohan una pa nimo kini ikatudlo sa uban. Lain pa, paningkamot nga mahimong ugdang apan mahigalaon ang atmospera panahon sa pagtuon. Ang mga estudyante, apil ang mga bata pa kaayo, makakat-on ug maayo kon sila relaks ug ang magtutudlo magpakita kanilag pagtahod ug kalulot.—Proverbio 16:21.
12. Sa unsang paagi matino nimo nga ang estudyante nakasabot sa imong gitudlo kaniya?
12 Ingong magtutudlo, dili lamang nimo buot ipresentar ang mga kamatuoran nga tubagon sa estudyante nga sinag-ulo. Tabangi siya nga makasabot sa iyang nakat-onan. Ang edukasyon, kasinatian sa kinabuhi, ug kahibalo sa estudyante sa Bibliya makaapektar sa iyang pagsabot sa imong ginasulti. Busa, mahimong pangutan-on nimo ang imong kaugalingon, ‘Nakasabot ba siya sa kahulogan sa mga kasulatan nga gikutlo sa materyal sa pagtuon?’ Kuhaa ang iyang mga hunahuna pinaagig mga pangutana nga dili matubag sa yanong oo kon dili apan mga tubag nga nagkinahanglag pagpatin-aw. (Lucas 9:18-20) Sa laing bahin, ang ubang mga estudyante magpanuko sa pagpangutana sa magtutudlo. Sa ingon, sila tingali mouyon bisag wala gayod makasabot kon unsay gitudlo kanila. Dasiga ang estudyante sa pagpangutana ug sa pagsulti kanimo sa dihang may mga punto nga dili gayod niya masabtan.—Marcos 4:10; 9:32, 33.
13. Sa unsang paagi imong matabangan ang estudyante nga mahimong magtutudlo?
13 Ang usa ka importanteng katuyoan sa pagdumalag pagtuon sa Bibliya mao ang pagtabang sa estudyante nga mahimong magtutudlo. (Galacia 6:6) Alang niana, agig pagsubli sa inyong pagtuon, mahimong hangyoon nimo siya nga ipatin-aw kanimo ang usa ka punto sa yanong mga pulong, nga morag nagpatin-aw siya niini ngadto sa usa nga mao pay pagkadungog niini sa unang higayon. Sa ngadtongadto, sa dihang mahimo na siyang kuwalipikado sa pagpakigbahin sa ministeryo, mahimong imong dapiton siya sa pag-uban kanimo diha sa kanataran. Siya tingali mobating relaks nga ikaw ang kauban sa pag-alagad, ug ang kasinatian makatabang kaniya nga makabaton ug dugang kompiyansa hangtod nga siya andam nang mogawas sa ministeryo sa iyang kaugalingon.
Tabangi ang Estudyante nga Mahimong Higala ni Jehova
14. Unsa ang imong pangunang tumong ingong magtutudlo, ug unsay makaamot sa kalamposan sa pagkab-ot niini?
14 Ang pangunang tumong sa matag Kristohanong magtutudlo mao ang pagtabang sa estudyante nga mahimong higala ni Jehova. Imong mahimo kini dili lamang pinaagi sa imong mga pulong kondili sa imong panig-ingnan usab. Ang pagtudlo pinaagig sulondan dunay gamhanang epekto sa mga kasingkasing sa mga estudyante. Ang mga lihok mas epektibo kay sa mga pulong, ilabina kon bahin sa pagpatisok sa moral nga mga hiyas ug pagpukaw ug kadasig diha sa estudyante. Kon makita niya nga ang imong mga pulong ug mga lihok nagagikan sa maayong relasyon kang Jehova, siya mas mapukaw sa pag-ugmad ug ingon niana nga relasyon sa iyang kaugalingon.
15. (a) Nganong hinungdanong maugmad sa estudyante ang hustong motibo sa pag-alagad kang Jehova? (b) Sa unsang paagi ikaw makatabang sa estudyante sa pagpadayon sa pag-uswag sa espirituwal?
15 Buot mo nga ang estudyante moalagad kang Jehova dili lamang tungod kay siya dili gustong malaglag sa Armagedon kondili tungod kay siya nahigugma kaniya. Pinaagi sa pagtabang kaniya nga makaugmad ug ingon niana nga putli nga motibo, ikaw nagatukod ug dili-masunog nga mga materyales nga makalahutay sa mga pagsulay sa iyang pagtuo. (1 Corinto 3:10-15) Ang sayop nga motibo, sama sa dili maayong tinguha nga sundogon ka o si bisan kinsa nga tawo, dili makahatag kaniya ug kalig-on sa pagsukol sa dili-Kristohanong mga impluwensiya ni kaisog sa paghimo kon unsay husto. Hinumdomi, ikaw dili mahimong iyang magtutudlo hangtod sa hangtod. Samtang may higayon ka pa, ikaw makadasig kaniya nga magpasuod pa kang Jehova pinaagi sa pagbasa sa Pulong sa Diyos matag adlaw ug pagpamalandong niana. Niining paagiha siya magpadayon sa pagkat-on sa “sumbanan sa makapahimsog nga mga pulong” sa Bibliya ug sa mga publikasyon nga gipasukad sa Bibliya bisag dugay nang nahuman ang pagtuon mo kaniya.—2 Timoteo 1:13.
16. Unsaon nimo pagtudlo sa estudyante sa pag-ampo nga kinasingkasing?
16 Ikaw makatabang usab sa estudyante nga mas masuod pa kang Jehova pinaagi sa pagtudlo kaniya sa pag-ampo nga kinasingkasing. Unsaon nimo kini paghimo? Tingali imong hisgotan kaniya ang sulondang pag-ampo ni Jesus, maingon man ang daghang tim-os nga mga pag-ampo nga natala diha sa Bibliya, sama nianang sa mga salmo. (Salmo 17, 86, 143; Mateo 6:9, 10) Dugang pa, sa dihang ang imong estudyante makadungog nimo nga mag-ampo sa pagsugod ug pagtapos sa pagtuon, iyang mamatikdan ang imong mga pagbati ngadto kang Jehova. Sa ingon, ang imong mga pag-ampo angayng magpabanaag kanunay sa pagkamatinuoron ug pagkamadayganon, maingon man sa espirituwal ug emosyonal nga pagkatimbang.
Pagkugi sa Pagluwas sa Imong mga Anak
17. Sa unsang paagi ang mga ginikanan makatabang sa ilang mga anak sa pagpabilin diha sa dalan sa kaluwasan?
17 Apil niadtong gusto natong maluwas, siyempre, mao ang mga sakop sa atong pamilya. Daghan kaayong mga anak sa Kristohanong mga ginikanan maoy mga matinuoron ug “lig-on diha sa pagtuo.” Apan, tingali diha sa uban ang kamatuoran wala gayod makagamot sa ilang mga kasingkasing. (1 Pedro 5:9; Efeso 3:17; Colosas 2:7) Daghan niining mga batan-ona mibiya sa Kristohanong dalan sa dihang sila magkahamtong na o mosulod sa pagkahamtong. Kon ikaw usa ka ginikanan, unsay imong himoon aron ang posibilidad nga moresulta ug sama niini dili mahitabo? Una, pagkugi nga makapatunghag maayong atmospera sa pamilya. Matukod sa maayong pamilyahanong kinabuhi ang pundasyon alang sa maayong panglantaw maylabot sa awtoridad, pagpabili sa hustong mga prinsipyo, ug malipayong relasyon sa uban. (Hebreohanon 12:9) Sa ingon, ang suod nga mga bugkos sulod sa pamilya mahimong binhianan diin ang pagpakighigala sa bata kang Jehova makatubo. (Salmo 22:10) Ang lig-ong mga pamilya magtinabangay sa paghimo sa mga butang ingong pundok—bisan pag kinahanglang isakripisyo sa mga ginikanan ang panahon nga magamit sa materyal nga kauswagan. Niining paagiha ikaw makatudlo sa imong mga anak pinaagig panig-ingnan sa paghimog hustong mga desisyon sa kinabuhi. Mga ginikanan, ang gikinahanglan gayod sa inyong mga anak gikan kaninyo mao, dili ang personal nga mga bentaha, kondili kamo—inyong panahon, kusog, ug gugma. Inyo bang gihatagan niining mga butanga ang inyong mga anak?
18. Unsang matanga sa mga pangutana nga kinahanglang tabangan sa mga ginikanan ang ilang mga anak sa pagsulbad?
18 Dili gayod angay hunahunaon sa Kristohanong mga ginikanan nga ang ilang mga anak awtomatikong mahimong mga Kristohanon usab. Si Daniel, nga usa ka ansiyano ug amahan sa lima ka anak, miingon: “Ang mga ginikanan kinahanglang mogahin ug panahon sa pagtabang sa pagwagtang sa mga pagduhaduha nga dili-kapugngang makuha sa ilang mga anak diha sa tunghaan ug sa ubang mga dapit. Kinahanglang mapailobon nilang tabangan ang ilang mga anak nga makakita sa mga tubag sa mga pangutana sama sa: ‘Kita nagkinabuhi na ba gayod sa panahon sa kataposan? Tinuod ba nga duna lamay usa ka matuod nga relihiyon? Nganong ang morag buotan nga kauban sa tunghaan dili maayong ikauban? Sayop ba gayod nga makigsekso una pa ang kasal?’” Mga ginikanan, makasalig kamo nga panalanginan ni Jehova ang inyong mga paningkamot, kay siya usab interesado sa kaayohan sa inyong mga anak.
19. Nganong labing maayo nga ang mga ginikanan mismo ang magtuon sa ilang mga anak?
19 Ang ubang mga ginikanan tingali mobati nga kulang sa katakos kon bahin sa pagtuon sa ilang kaugalingong mga anak. Apan, dili angay nga mobati kamo niini, kay walay lain ang mas makasarang sa pagtudlo sa inyong mga anak kondili kamo. (Efeso 6:4) Ang pagtuon sa inyong kaugalingong mga anak magtugot kaninyo sa pagkahibalo mismo kon unsay anaa sa ilang mga kasingkasing ug mga hunahuna. Ang ila bang mga pulong kinasingkasing o wala sa buot? Sila nagtuo ba gayod kon unsay ilang natun-an? Si Jehova tinuod ba gayod kanila? Inyong makita ang mga tubag niini ug ubang hinungdanong mga pangutana kon kamo mismo ang magtuon sa inyong mga anak.—2 Timoteo 1:5.
20. Sa unsang paagi mahimo sa mga ginikanan ang pagtuon sa pamilya nga makalingaw ug mapuslanon?
20 Sa unsang paagi mapadayon ninyo ang inyong programa sa pagtuon sa pamilya sa dihang masugdan na ninyo kini? Si Joseph, nga usa ka ansiyano ug amahan sa batan-ong lalaki ug babaye, miingon: “Sama sa tanang pagtuon sa Bibliya, ang pagtuon sa pamilya angay nga makalingaw, usa ka panahon nga kahinaman sa tanan. Aron mahimo kana diha sa among pamilya, dili kinahanglang estrikto kami kon bahin sa oras. Ang among pagtuon mahimong moabot ug usa ka oras, apan kon usahay diyes minutos lamang ang among ikagahin, magtuon gihapon kami. Usa ka butang nga naghimo sa among pagtuon nga kahinangpan pag-ayo sa semana alang sa mga bata mao nga dramahon namo ang mga esena gikan sa Akong Basahon sa mga Estorya sa Bibliya.a Ang lalom nga pagkatisok ug pagsabot nga moresulta mas importante kay sa kon pila ka mga parapo ang among mahisgotan.”
21. Kanus-a mahimong tudloan sa mga ginikanan ang ilang mga anak?
21 Siyempre, ang pagtudlo sa inyong mga anak dili kutob lamang sa pormal nga mga panahon sa pagtuon. (Deuteronomio 6:5-7) Ang Saksi sa Thailand nga gihisgotan sa sinugdan nag-ingon: “Tin-aw pa kaayo nakong mahinumdoman nga dad-on ako ni Papa sa buluhatong pagsangyaw, nga magsakay sa among mga bisikleta, ngadto sa lagyong mga lugar sa teritoryo sa among kongregasyon. Tino, ang maayong panig-ingnan sa among mga ginikanan ug ang ilang pagtudlo kanamo ilalom sa tanang kahimtang maoy nakatabang kanamo sa paghukom sa pagsulod sa bug-os-panahong ministeryo. Ug ang mga leksiyon epektibo gihapon. Ako nag-alagad gihapon sa lagyong mga lugar sa kanataran!”
22. Unsay mosangpot sa imong ‘paghatag ug pagtagad sa imong kaugalingon ug sa imong pagpanudlo’?
22 Sa dili madugay, sa husto gayong panahon, si Jesus moabot sa pagpahamtang sa paghukom sa Diyos niini nga sistema. Kanang dakong hitabo mahimo unya nga unibersohanong kasaysayan, apan ang matinumanong mga alagad ni Jehova magpadayon sa pag-alagad kaniya nga nagapaabot ug walay kataposang kaluwasan. Naglaom ka ba nga mahimong usa kanila, uban sa imong mga anak ug mga estudyante sa Bibliya? Nan hinumdomi: “Hatagig kanunayng pagtagad ang imong kaugalingon ug ang imong pagpanudlo. Pabilin niining mga butanga, kay pinaagi sa pagbuhat niini imong maluwas ang imong kaugalingon ug kadtong kinsa mamati kanimo.”—1 Timoteo 4:16.
[Footnote]
a Gipatik sa Watchtower Bible and Tract Society of New York, Inc.
Makapatin-aw Ka Ba?
• Unsa ang angay natong tinamdan, sanglit wala man gayod kita mahibalo sa eksaktong panahon sa paghukom sa Diyos?
• Sa unsang mga paagi nga kita ‘makahatag ug pagtagad sa atong pagpanudlo’?
• Sa unsang paagi makatabang ka sa estudyante nga mahimong higala ni Jehova?
• Nganong importante nga gahinan gayod ug panahon sa mga ginikanan ang pagtudlo sa ilang mga anak?
[Hulagway sa panid 15]
Ang pagkakat-on mouswag pinaagi sa ugdang apan mahigalaon nga atmospera
[Hulagway sa panid 18]
Ang pagdrama sa mga estorya sa Bibliya, sama sa paghukom ni Solomon sa duha ka babayeng bigaon, maghimo sa mga pagtuon sa pamilya nga makalingaw