Nakakat-on Ka ba Gikan sa Atong Dakong Instruktor?

“NAGTUON akog abogasiya sulod sa lima ka tuig sa usa sa labing maayong unibersidad sa Espanya,” miingon si Julio. “Apan mas labaw ang akong nakat-onan sa dihang nagsugod akog tuon sa Bibliya. Ang unibersidad nagtudlo kanako kon unsaon pagtuon; ang Bibliya nagtudlo kanako kon unsaon pagkinabuhi.”

Pinaagi sa Bibliya makahibalo kita sa mga hunahuna sa Diyos, sa iyang mga prinsipyo, ug sa iyang mga instruksiyon. Ang Kasulatan naghubit kang Jehova ingong ang “Dakong Instruktor” tungod kay siya ang labing maayong magtutudlo sa uniberso. (Isaias 30:20) Sa literal, ang Hebreohanong teksto nagtawag Kaniya ingong “mga instruktor”​—usa ka pangdaghang gamit nga nagpaila sa pagkalabing-maayo. Angay kining magpahinumdom kanato nga ang pagkatinudloan ni Jehova labi pang maayo kay sa pagtuon ilalom kang bisan kinsang ubang magtutudlo.

Praktikal nga Kaalam Gikan Kang Jehova

Nganong ang diyosnong pagpanudlo mapuslanon kaayo? Una sa tanan, tungod sa bililhong unod niini. Ang pagpanudlo ni Jehova nagahatag kanato ug “praktikal nga kaalam.” Dugang pa, ang hinatag-sa-Diyos nga kaalam “nagatipig sa kinabuhi” niadtong nagapadapat niana.​—Proverbio 3:21, 22; Ecclesiastes 7:12.

Ang nagkomposo sa Salmo 119 nakaamgo nga ang kaalam ni Jehova nanalipod kaniya sa tibuok niyang kinabuhi. Pananglitan, siya miawit: “Ang balaod sa imong baba maayo alang kanako, labi pang maayo kay sa linibo nga bulawan ug plata. Kon ang imong balaod dili pa maoy akong kalipay, nan mahanaw unta ako sa akong kasakitan. Ang imong kasugoan nakapahimo kanako nga labi pang maalamon kay sa akong mga kaaway, tungod kay kini ania kanako kanunay. Nahimo akong labi pa ka maalamon kay sa tanan ko nga mga magtutudlo, tungod kay ang imong mga pahinumdom maoy akong gipalandong.”​—Salmo 119:72, 92, 98, 99.

Dili lamang ang salmista ang usa nga unta ‘mahanaw diha sa iyang kasakitan,’ kon dili pa tungod sa kasugoan ni Jehova. Si Rosa, usa ka batan-ong babaye sa Espanya, kombinsido nga ang iyang kinabuhi naluwas tungod kay iyang gipadapat ang diyosnong mga prinsipyo. “Sa pangedarong 26, nakasulay na ako sa paghikog duha ka higayon,” nahinumdom siya.

Si Rosa nalangkit sa pagpamampam, ingon man sa pag-abuso sa alkohol ug droga. “Usa ka adlaw, sa dihang ako nagmagul-anon kaayo,” matud pa niya, “gipadayag kanako sa usa ka magtiayong Saksi kon sa unsang paagi makatabang kanato ang Bibliya sa pagsulbad sa atong mga suliran. Nagsugod ako sa pagtuon sa Pulong sa Diyos, nga akong nakaplagang makaiikag. Sulod sa usa ka bulan may kusog na ako sa paghimog mahinlo, bag-ong pagsugod sa kinabuhi. Karon nga aduna na akoy katuyoan sa kinabuhi, wala na nako kinahanglana ang pagdepende sa alkohol o sa mga droga. Ug sanglit gusto ko kaayong mahimong higala ni Jehova, determinado ako sa pagkinabuhi sumala sa iyang mga sukdanan. Kon dili pa sa praktikal nga kaalam sa Pulong sa Diyos, segurado ako nga sa pagkakaron gitubok ko na ang akong kinabuhi.”

Tino, ang kaalam gikan kang Jehova nagaluwas-ug-kinabuhi. Busa, kita makakuhag kaayohan dili lamang gikan sa bililhong unod sa diyosnong pagtudlo kondili usab gikan sa paagi nga gigamit ni Jehova sa pagtudlo sa iyang mga alagad. Sanglit kay ang Anak sa Diyos, si Jesu-Kristo, nagsugo kanato nga mahimong mga magtutudlo ug tighimog mga tinun-an, gusto natong makakat-on sa labing epektibong paagi sa pagpaambit sa instruksiyon.​—Mateo 28:19, 20.

Paggamit ni Jehova ug mga Ilustrasyon

Ang Ebanghelyo ni Marcos nag-ingon nga si Jesus “dili mosulti kanila nga walay sambingay.” (Marcos 4:34) Kining talagsaong bahin sa pagpanudlo ni Jesus dili-katingalahan. Gisundog lamang niya ang usa sa mga paagi sa pagpaabot sa matagnaong mga mensahe ni Jehova ngadto sa nasod sa Israel. Kini naundan sa daghang tin-awng mga ilustrasyon.​—Isaias 5:1-7; Jeremias 18:1-11; Ezekiel 15:2-7; Oseas 11:1-4.

Pananglitan, matikdi kon giunsa paggamit ni Jehova ang usa ka gamhanang ilustrasyon sa pagtudlo kanato nga ang mga diyosdiyos walay kapuslanan. Ang Isaias 44:14-17 nagaingon: “Adunay usa ka tawo nga ang trabaho mao ang pagpamutol ug mga sidro; ug siya nagkuha ug usa ka espesye sa kahoy, gani usa ka dakong kahoy . . . Iyang gitanom ang kahoyng laurel, ug . . . kini nahimong sugnod sa tawo alang sa pagdaob. Busa mokuha siyag bahin niini aron siya mainitan. Gani siya maghaling ug magluto ug tinapay. Siya usab maghimog usa ka diyos nga iyang yukboan. Himoon niya kini nga usa ka linilok nga larawan, ug siya mohapa sa atubangan niini. Ang katunga niini iyang isugnod sa kalayo. Sa katunga niini siya magsugba ug unod nga iyang kan-on, ug mabusog siya. . . . Apan ang sobra himoon niya nga usa ka diyos, iyang linilok nga larawan. Siya mohapa niini ug moyukbo ug mag-ampo niini ug moingon: ‘Luwasa ako, kay ikaw maoy akong diyos.’” Ang mga ilustrasyong sama niini maoy gamhanang mga galamiton sa pagtabang sa mga tawong matinud-anon ug kasingkasing sa pagsalikway sa idolatriya ug bakak nga mga doktrina.

Nagatugkad-sa-Kalag nga mga Pangutana

Ang Bibliya usab naundan ug mga pananglitan kon giunsa pagpasibo ni Jehova ang hunahuna sa pipila sa iyang mga alagad pinaagi sa makapukaw-sa-hunahuna nga mga pangutana. Ang patriarkang si Job maoy usa niini. Mapailobong gitabangan siya ni Jehova sa pagtimbangtimbang sa iyang pagkagamay may kalabotan sa Diyos. Kini gihimo pinaagi sa seryal sa mga pangutana, diin si Job wala gayoy katakos sa pagtubag.

“Diin ka man sa pagtukod ko sa kalibotan?” nangutana si Jehova kang Job. “Kinsa ba ang nagsira sa mga pultahan sa dagat? . . . Mahugtan ba nimo ang mga bugkos sa Kimah nga konstelasyon, o makabadbad ka ba sa mga pisi sa Kesil nga konstelasyon? . . . Ikaw ba adunay mga bukton nga sama nianang sa matuod nga Diyos?” Kining makapaubos nga pangutana naglakip sa hinungdanon kaayo nga pangutana: “Hukman mo ba ako [Jehova] nga daotan aron nga ikaw ang matarong?”​—Job 38:4, 8, 31; 40:8, 9.

Kining nagatugkad nga mga pangutana nakapaamgo kang Job nga siya nagsulti nga walay salabotan. Busa, iyang gibawi ang iyang gipanulti ug naghinulsol. (Job 42:6) Sama niining kasoha, ang maayong pagkapili nga mga pangutana mahimong makatabang sa pagpasibo sa dili hustong panghunahuna sa bahin sa atong mga anak o estudyante sa Bibliya.

Pagtukod ug Pagsalig

Komosta kon kinahanglan natong tabangan ang usa kinsa mibati nga dili-takos o dili-makaarang? Makatabang niining bahina mao ang pag-estoryahay tali ni Jehova ug sa iyang manalagnang si Moises. Sa dihang gitudlo sa Diyos si Moises aron mahimo niyang tigpamaba sa atubangan ni Paraon ug sa mga Israelinhon, mibati ang manalagna nga dili makahimo sa pagdumala sa buluhaton. “Ako dili maayong mosulti ug mahinayng mamulong,” matud niya. Apan, ang Diyos mitubag: “Kinsa bay naghatag sa baba sa tawo? . . . Dili ba ako, si Jehova? Busa, karon lakaw, kay tabangan ko ikaw sa pagsulti ug tudloan ko ikaw kon unsay imong isulti.”​—Exodo 4:10-12.

Gitudlo ni Jehova ang igsoon ni Moises nga si Aaron ingong iyang tigpamaba, ug sila mipadayon sa pagtuman sa ilang buluhaton sa Ehipto. (Exodo 4:14-16) Daghang mga Saksi ni Jehova ang mibati nga kulang ug katakos sama sa gibati ni Moises sa dihang nagsugod sa pagministeryo sa balay-ug-balay o sa pagsangyaw sa kadalanan. Sama sa kahimtang ni Moises, ang atong kasayoran nga kita gipaluyohan ni Jehova ug nga kita giubanan sa usa ka eksperyensiyadong ministro makahimo kanato sa pagbuntog sa atong pagpanuko. Sama nga naugmad ni Moises ang pagsalig hangtod sa punto nga makahimog gamhanang mga pakigpulong nga makaplagan sa tibuok nga basahon sa Bibliya nga Deuteronomio, uban sa tabang ni Jehova kita usab makaugmad ug katakos sa pagpanulti.

Usa ka Praktikal nga Leksiyon

Ang sinserong tinguha sa pagtabang sa uban hinungdanon usab. Kanang hiyasa ang kulang ni manalagnang Jonas. Gisugo ni Jehova si Jonas sa pagpasidaan sa mga tawo sa Ninive bahin sa umaabot nga kalaglagan sa siyudad. Kahibulongan, ang mga taga-Ninive naghinulsol. (Jonas 3:5) Ingong sangpotanan, gilangan ni Jehova ang kalamidad. Hinunoa, inay malipay sa kalamposan sa iyang kampanya sa pagwali, si Jonas nasuko nga ang iyang panagna dili matuman. Sa unsang paagi siya gitabangan ni Jehova nga makabaton ug hustong panglantaw?

Si Jehova migamit ug usa ka tabayag sa pagtudlo kang Jonas sa bili sa pagpakitag pagtagad sa uban. Ang tanom milagrosong mitubo sa usa ka gabii ug nakahatag ug maayong landong alang kang Jonas, kinsa nagtukod ug balongbalong sa ngilit sa Ninive. Si Jonas “nalipay kaayo” tungod niining ubos nga tanom. Apan niadtong tungora gipahinabo ni Jehova ang usa ka ulod sa pagdaot sa tanom mao nga kini nalaya. Kay naladlad sa adlaw ug sa init nga hangin, si Jonas nasuko ug miingon: “Mas maayo pang mamatay ako kay sa mabuhi ako.” (Jonas 4:5-8) Unsay leksiyon niining tanan?

Si Jehova nagsulti kang Jonas ug miingon: “Ikaw, sa imong bahin, nahangawa sa tabayag, nga ikaw wala maghago ni nagpatubo niini, nga miturok lamang sa usa ka gabii ug namatay sa usa ka gabii. Ug, sa akong bahin, dili ba diay ako maluoy sa Ninive nga usa ka dakong siyudad, diin adunay kapin sa usa ka gatos ug kaluhaan ka libo ka tawo nga dili makaila sa ilang tuong kamot gikan sa ilang wala, gawas pa sa daghang kahayopan?”​—Jonas 4:9-11.

Pagkagamhanang praktikal nga leksiyon! Si Jonas mas interesado sa tabayag kay sa libolibong tawo. Bisan tuod ang kahangawa alang sa tanang kalalangan sa Diyos dalayegon, ang pagtabang sa pagluwas sa mga kinabuhi sa mga tawo mao ang atong labing hinungdanong buluhaton.

Pagtudlo nga Mapailobon

Sama sa nakita ni Jonas, dili kanunay masayon ang pagtuman sa atong ministeryo. (2 Timoteo 4:5) Hinuon, ang usa ka mapailobong tinamdan ngadto sa uban makatabang.

Unsay imong reaksiyon kon ang usa sa imong mga estudyante sa Bibliya mahinay o daw dili-makataronganon? Ang atong Dakong Instruktor nagtudlo kanato kon unsaon pag-atubang sa maong suliran. Nagpakita siyag talagsaong pailob sa dihang si Abraham nagsigeg pangutana kaniya labot sa umaabot nga paghukom sa Sodoma ug Gomorra. “Pagalaglagon mo ba gayod ang mga matarong uban sa mga daotan?” nangutana si Abraham. “Pananglit kon adunay kalim-an ka tawo nga mga matarong sa sulod sa siyudad,” mihangyo si Abraham. “Imo ba gayod silang laglagon ug dili mo luwason ang dapit tungod sa kalim-an ka tawong matarong nga anaa sulod niini?” Ang tubag ni Jehova nakatukmod kang Abraham sa pagpadayon ug hangyo hangtod ang gidaghanon mikunhod sa napulo. Si Jehova nahibalo nga ang pamilya lamang ni Lot ang takos nga magpabiling buhi, ug may gitaganang paagi alang niana. Apan mapailobong gitugotan sa Diyos si Abraham sa pagpadayon sa pagpangutana kaniya hangtod nga iyang nasabtan ang gidak-on sa kaluoy ni Jehova.​—Genesis 18:20-32.

Gikonsiderar ni Jehova ang limitadong pagsabot ni Abraham ug ang iyang mga pagbati sa kabalaka. Kon masabtan usab nato ang mga limitasyon sa atong estudyante, makatabang kini kanato sa pagpakita ug pailob samtang siya naningkamot sa pagsabot sa partikular nga doktrina o sa pagbuntog sa dukot nga batasan.

Padayon sa Pagkat-on Gikan Kang Jehova

Sa walay duhaduha si Jehova nga Diyos mao ang Dakong Instruktor. Pinaagi sa mga ilustrasyon, mga pangutana, ug praktikal nga mga leksiyon, siya mapailobong nagahatag ug salabotan. Kon atong sundogon ang iyang mga paagi sa pagtudlo, kita mismo mahimong labi pang maayong mga magtutudlo.

Sanglit dili angay kalimtan niadtong nagatudlo sa uban ang pagtudlo sa ilang kaugalingon, kita kinahanglang magpadayon ingong “tinudloan ni Jehova.” (Isaias 54:13) Si Isaias nagsulat: “Ang imong mga mata mahimong mga mata nga makakita sa imong Dakong Instruktor. Ug ang imong mga dalunggan makadungog sa tingog sa imong luyo nga mag-ingon: ‘Mao kini ang dalan. Lakaw niana, kamong katawhan,’ sa inyong pagliko sa tuo o sa inyong pagliko sa wala.” (Isaias 30:20, 21) Pinaagi sa padayong paglakaw diha sa dalan ni Jehova ug sa pagtabang sa uban sa paghimo niana, atong mabatonan ang talagsaong pribilehiyo sa pagkat-on gikan sa atong Dakong Instruktor sa walay kataposan.

[Hulagway sa panid 28]

Gipangutana ni Jehova si Job: “Ikaw bay nagmando nga maglupad ang agila paitaas ug magtukod sa iyang salag sa itaas?”

[Hulagway sa panid 28]

Pinaagi sa usa ka tabayag, gitudloan ni Jehova si Jonas sa pagkahimong mas magmabalak-on sa mga tawo