Mga Pag-ampo Diha sa Bibliya Takos sa Mas Maayong Pagsusi
USA ka mabalak-ong babaye, usa ka hari, ug Anak sa Diyos mismo ang militok sa mga pag-ampo nga maoy atong susihon ug maayo karon. Ang matag pag-ampo naaghat sa lainlaing mga kahimtang. Apan, ang maong mga kahimtang mahimong makaapektar kanato karon. Unsay atong makat-onan gikan niining mga pananglitan?
‘Tan-awa ang Kasakit sa Imong Ulipon nga Babaye’
Nakigbisog ka ba sa walay kataposang suliran? O ikaw ba nabug-atan sa kabalaka? Nan ang imong kahimtang sama niadtong kang Ana sa wala pa siya manganak sa iyang panganay, si Samuel. Siya walay anak ug gibiaybiay sa laing babaye. Sa pagkamatuod, si Ana nasakit gayod ug nabalaka sa iyang kahimtang nga dili siya makakaon. (1 Samuel 1:2-8, 15, 16) Nangayo siyag tabang kang Jehova ug mitanyag sa mosunod nga pangaliyupo:
“Oh Jehova sa mga panon, kon motan-aw ka gayod sa kasakit sa imong ulipong babaye ug mahinumdom kanako, ug dili gayod nimo kalimtan ang imong ulipong babaye ug hatagan gayod nimo ang imong ulipong babaye ug usa ka anak nga lalaki, ihatag ko siya kang Jehova sa tanang adlaw sa iyang kinabuhi, ug walay labaha nga modapat sa iyang ulo.”—1 Samuel 1:11.
Matikdi nga si Ana wala maghisgot ug bisan unsang butang. Iyang gisangpit si Jehova pinaagi sa usa ka espisipikong hangyo (alang sa usa ka anak nga lalaki) ug giubanan kinig hugot nga desisyon (sa paghatag kaniya diha sa pag-alagad sa Diyos). Unsay gipadayag niini kanato?
Sa dihang mahiagom sa kalisod, magmaespisipiko sa imong mga pag-ampo. Bisan unsa pay imong suliran—suliran man kini sa imong panimalay, kamingaw, o dili maayong panglawas—iampo kini kang Jehova. Ipadayag kaniya ang eksaktong kahimtang sa imong kalisod ug ang imong gibati. “Matag gabii akong itugyan ang tanan nakong suliran kang Jehova,” matud sa usa ka balo nga ginganlag Louise. “Usahay daghan ang suliran, apan tin-aw nakong gibungat ang usag usa niini.”
Ang pagpakigsulti kang Jehova sa espisipikong paagi modala ug mga kaayohan. Ang paghimo niana motabang kanato sa pagbaton ug tin-aw nga pagsabot sa atong suliran, nga mopatim-aw nga dili diay kini kaayo dako. Ang pag-ampo sa espisipikong paagi makahupay sa atong kabalaka. Bisan sa wala pa matubag ang iyang pag-ampo, si Ana mibating gipasaligan, ug “dili na masulub-on ang iyang panagway.” (1 Samuel 1:18) Dugang pa, ang pagkahimong espisipiko mohimo kanatong alisto sa pagbantay sa tubag sa atong pag-ampo. “Kon maayo kaayong pagkapamulong ang akong mga pag-ampo,” matud ni Bernhard, usa ka Kristohanon sa Alemanya, “mas tin-aw ang mga tubag.”
“Ako Usa Lamang ka Gamayng Bata”
Hinunoa, tingalig lahi ang bation sa usa ka tawo kon makadawat siyag asaynment diin sa iyang pagtuo dili siya takos. Ikaw ba madaog usahay sa responsibilidad nga gihatag kanimo ni Jehova? O ang pipila ka tawo naglantaw kanimo nga dili takos sa imong asaynment? Ang batan-ong si Solomon nahiagom sa maong kahimtang sa dihang siya gidihogan ingong hari sa Israel. Ang pipila ka prominenteng mga tawo mas gusto nga laing tawo ang mohari. (1 Hari 1:5-7, 41-46; 2:13-22) Sayo sa iyang paghari, mihangyo si Solomon diha sa pag-ampo:
“Jehova nga akong Diyos, ikaw mismo ang naghimo sa imong alagad nga hari . . . ako usa lamang ka gamayng bata. Dili ako mahibalo kon unsaon paggula ug pagsulod. . . . Hatagi ang imong ulipon ug usa ka masinugtanong kasingkasing sa paghukom sa imong katawhan, sa pag-ila sa maayo ug sa daotan.”—1 Hari 3:7-9.
Gisentro ni Solomon ang iyang pag-ampo sa iyang relasyon uban kang Jehova, sa pribilehiyo nga gihatag kaniya, ug sa iyang katakos sa pagdumala sa asaynment. Sa samang paagi, sa dihang hatagan kita ug responsibilidad diin gibati nato nga dili na maabot sa atong katakos, kinahanglang mangamuyo kita sa Diyos nga sangkapan kita sa paghimo niana. Tagda ang mosunod nga mga eksperyensiya:
“Sa dihang gihangyo sa pag-atiman sa mas dakong responsibilidad sa sangang buhatan sa Watch Tower Society,” misaysay si Eugene, “gibati ko nga dili gayod ako takos. Daghan pang uban ang mas kuwalipikado ug mas eksperyensiyado. Wala kaayo ako makatulog sa misunod nga duha ka gabii, nga gigugol halos ang tanang panahon diha sa pag-ampo, nga nakahatag kanakog kalig-on ug sa gikinahanglang pasalig.”
Si Roy gihangyo sa pagdiskurso sa paglubong human sa kalit ug makalilisang nga kamatayon sa usa ka batan-ong higala nga inila kaayo. Seguradong gatosan ang motambong. Unsay gihimo ni Roy? “Talagsa ra akong moampo ug ingon ka hugot alang sa kalig-on ug alang sa katakos sa pagkaplag ug haom nga mga pulong aron ikapahayag ang makapalig-ong mga hunahuna ug aron makahatag ug kahupayan.”
Samtang ‘gipadali sa Maglalalang ang mga butang’ ug samtang ang iyang organisasyon nagauswag, ang kinaiyanhong sangpotanan mao nga mas daghan sa iyang mga alagad ang pagasaligan ug responsibilidad. (Isaias 60:22) Kon ikaw hangyoon sa pagdawat ug dugang bahin, magmasaligon nga si Jehova makahulip sa bisan unsang kakulangan sa eksperyensiya, pagbansay, o abilidad sa imong bahin. Duola ang Diyos diha sa pag-ampo sama sa paagi nga gihimo ni Solomon, ug Siya magasangkap kanimo sa pagdumala sa asaynment.
“Aron Sila Mahiusa”
Ang ikatulong kahimtang nga mobangon karon mao ang pagkagikinahanglan nga mohawas sa grupo diha sa pag-ampo. Sa dihang hangyoon sa pag-ampo alang sa uban, unsay angay natong iampo? Tagda ang pag-ampo ni Jesus nga natala sa Juan kapitulo 17. Iya kining giampo sa presensiya sa iyang mga tinun-an sa iyang kataposang gabii ingong usa ka tawo. Unsay iyang gihangyo sa iyang langitnong Amahan?
Gipasiugda ni Jesus ang komong mga tumong ug ang giambitang paglaom niadtong presente. Iyang gihisgotan ang paghimaya sa ngalan ni Jehova nga Diyos ug ang pagmantala sa Gingharian. Gipasiugda ni Jesus ang bili sa personal nga relasyon uban sa Amahan ug sa Anak, binase sa kahibalo sa Kasulatan. Iyang gihisgotan ang pagkadili-bahin sa kalibotan, nga maoy moandam sa iyang mga sumusunod alang sa pagsupak. Gihangyo usab ni Kristo ang iyang Amahan sa pagpanalipod sa mga tinun-an ug sa paghiusa kanila sa matuod nga pagsimba.
Oo, gipasiugda ni Jesus ang panaghiusa. (Juan 17:20, 21) Mas sayo niadtong gabhiona, ang mga tinun-an nalangkit sa pipila ka binata nga lantugi. (Lucas 22:24-27) Hinunoa, diha sa pag-ampo si Kristo wala mangita ug pagsaway kondili paghiusa. Sa samang paagi, ang mga pag-ampo sa pamilya ug sa kongregasyon kinahanglang magpasiugdag gugma ug mohangyo nga mawagtang ang mga away tali sa mga indibiduwal. Kadtong gihawasan angay makabig sa panaghiusa.—Salmo 133:1-3.
Kining maong panaghiusa gipakita sa dihang kadtong naminaw moingon, “Amen,” o “Hinaot unta,” sa pagtiklop. Aron kini mahimong posible, kinahanglang sila makasabot ug mouyon sa tanang butang nga gibungat. Busa, dili haom nga hisgotan sa pag-ampo ang usa ka ulohan nga wala mahibaloi sa pipila nga presente. Pananglitan, ang ansiano nga maoy mohawas sa kongregasyon diha sa pag-ampo mahimong mohangyo sa panalangin ni Jehova alang sa espirituwal nga igsoong lalaki o babaye nga grabeng nasakit. Apan kasagaran mas maayo kon kini himoon lamang nila kon ang kadaghanan niadtong presente nakaila sa tawo ug nakadungog bahin sa iyang pagkasakit.
Matikdi usab, nga wala usa-usaha ni Jesus ang personal nga mga panginahanglan sa matag membro sa grupo. Ang paghimo sa ingon mahimong maglangkit sa paghisgot sa personal nga mga butang nga nahibaloan lamang sa pila ka indibiduwal. Ang personal nga mga kabalaka maoy haom nga ulohan alang sa pribadong pag-ampo, nga mahimong ingon ka dugay ug ka personal sumala sa imong gusto.
Sa unsang paagi angayng iandam sa usa ka tawo ang iyang kaugalingon sa paghawas sa usa ka dakong panagtigom sa mga magsisimba diha sa pag-ampo? Usa ka eksperyensiyadong Kristohanon miingon: “Hunahunaon na nako daan kon unsay akong pasalamatan, kon unsay mga hangyo sa mga igsoon, ug kon unsang mga pangaliyupo ang mahimo nakong hisgotan alang kanila. Akong ihan-ayg maayo ang akong mga ideya, lakip na ang mga ekspresyon sa pagdayeg, diha sa akong hunahuna. Una ibungat ang publikong pag-ampo, moampo ako ug hilom, nga mangayog tabang sa paghawas sa mga igsoon sa maligdong nga paagi.”
Bisan unsay imong mga kahimtang, malagmit makakita kag pag-ampo diha sa Bibliya nga gibungat sa usa ka tawo nga sama kanimog kahimtang. Ang nagkalainlaing mga pag-ampo diha sa Kasulatan maoy ebidensiya sa mahigugmaong-kalulot sa Diyos. Ang pagbasa niining mga pag-ampoa ug pagpamalandong niini makatabang kanimo sa pagpalambo sa imong mga pag-ampo.
[Kahon sa panid 5]
TALAGSAONG MGA PAG-AMPO DIHA SA BIBLIYA
Ang mga alagad ni Jehova miampo ubos sa daghang kahimtang. Malangkit mo ba ang usa o kapin pa sa mosunod nga mga kahimtang?
Nagkinahanglan ka bag giya gikan sa Diyos, sama kang Eliezer?—Genesis 24:12-14.
Nameligro ka ba, sama kang Jacob?—Genesis 32:9-12.
Buot mo bang mas masinati pa ang Diyos, sama kang Moises?—Exodo 33:12-17.
Ikaw ba nag-atubang sa mga kaaway, sama kang Elias?—1 Hari 18:36, 37.
Nalisdan ka ba sa pagsangyaw, sama kang Jeremias?—Jeremias 20:7-12.
Kinahanglan ba nimong itug-an ang imong mga sala ug mangayog pasaylo, sama sa gihimo ni Daniel?—Daniel 9:3-19.
Ginaatubang mo ba ang paglutos, sama sa mga tinun-an ni Jesus?—Buhat 4:24-31.
Tan-awa usab ang Mateo 6:9-13; Juan 17:1-26; Filipos 4:6, 7; Santiago 5:16.
[Kahon sa panid 6]
KON UNSAY ANGAY IAMPO SA DIHANG NAKIGBISOG SA USA KA DUKOT NGA BATASAN
Ikaw ba nakigbisog batok sa nagbalikbalik nga kahuyangan? Sa unsang paagi mapuslanon ang mga pag-ampo nga natala sa Bibliya? Pagtuon gikan kang David, kinsa miampo sa lainlaing panahon maylabot sa iyang kaugalingong mga kahuyangan.
Si David miawit: “Susiha ako, Oh Diyos, ug hibaloi ang akong kasingkasing. Sulayi ako, ug hibaloi ang akong nasamok nga mga hunahuna.” (Salmo 139:23) Nangandoy si David nga susihon ni Jehova nga Diyos ang dili hustong mga tinguha, mga pagbati, o mga motibo. Sa laing pagkasulti, nangayo si David ug tabang ni Jehova sa paglikay sa sala.
Apan nadaog si David sa iyang mga kahuyangan, ug nakasala siya ug dako. Dinhi sa makausa pa, natabangan siya sa pag-ampo—niadtong tungora aron mapasig-uli ang iyang relasyon uban sa Diyos. Sumala sa Salmo 51:2, si David nangilaba: “Hugasi ako pag-ayo gikan sa akong kalapasan, ug hinloi ako gikan sa akong kasal-anan.”
Kita usab mapaubsanong makaampo sa tabang ni Jehova aron masumpo ang sayop nga mga kiling. Kini magpalig-on kanato aron mabuntog ang midukot nga kahuyangan ug makatabang kanato nga malikayan ang sala. Kon mahulog pag-usab, kinahanglang duolon nato si Jehova pag-usab pinaagig mga hangyo nga iya kitang tabangan aron makapadayon sa pagpakigbisog.
[Hulagway sa panid 7]
Ang mga pag-ampo nga ibungat alang sa usa ka grupo kinahanglang magpasiugda sa Kasulatanhong mga paglaom ug komong espirituwal nga mga tumong