Tan-awa! Usa ka Kingdom Hall sa Niue
ANG Niue maoy usa ka gamayng isla nga katakotan diha sa Habagatang Pasipiko, 2,160 kilometros sa amihan-sidlakan sa New Zealand. Sumala sa usa ka brosyur sa biyahe, ang ngalang Niue nagagikan sa duha ka pulong, Niu, nagkahulogang “lubi,” ug e, nagkahulogang “sud-onga,” o “tan-awa.” Ang brosyur nag-ingon: “Sumala pa sa sugilanon sa karaan gibungat sa unang mga nanimuyo nga Polynesian kining mga pulonga pag-abot nila sa dihang nakakita sa mga lubi nga nanubo sa yuta.”
Karon, ang mga Saksi ni Jehova sa Niue magarbohong makaingon sa mga bisita, “E! Fale he Kautu ha mautolu!” nga nagkahulogan, “Tan-awa! Ang among Kingdom Hall!” Nganong sila may ingon niana ka lalom nga mga pagbati labot niining maong tigomanan? Ang mga Saksi ni Jehova bisan asa magarbohon sa ilang mga Kingdom Hall, ilabina kon sila mismo ang nagtukod niana. Apan ang pagtukod ug Kingdom Hall sa usa ka hilit nga isla sa tunga sa halapad nga Habagatang Pasipiko maoy lahi nga butang. Siyempre, ang Niue nagkobre lamang ug 260 ka kilometros kuwadrado, ug aduna lamay 2,300 ka tawo diha sa tibuok isla.
Dihay suliran kon kinsa ang motukod sa Kingdom Hall. Ang usa ka kongregasyon sa Niue aduna lamay 32 ka Saksi. Ang tanang dagkong galamiton nga gikinahanglan, sama sa mga trak, mga buldoser, ug mga crane, gipanag-iya sa kagamhanan. Dugang pa, halos tanang hinungdanong materyales sa pagtukod—puthaw, konkretong mga bloke, pang-atop, mga materyales sa elektrikal ug tubo, gamit sa sound, ug mga lingkoranan—kinahanglang ikarga pa gikan sa New Zealand sa barko nga mobiyahe lamang kausa matag lima ka semana. Sa kataposan, ang batoon nga yuta sa isla nagpalisod sa pagtukod, ug ang tigomanan kinahanglang tukoron nga makasugakod sa mga bagyo sa tropiko. Tinuod, usa gayod ka dakong buluhaton alang sa tanan!
Hinunoa, adunay dakong kalainan dinhi. Alang sa mga Saksi ni Jehova, ang usa ka Kingdom Hall maoy sentro sa matuod nga pagsimba sa maong lugar, ug sila midangop kang Jehova nga Diyos alang sa direksiyon ug tabang. (Salmo 56:11; 127:1) Ang Kristohanong mga igsoon sa New Zealand, lakip na sa mga membro sa kongregasyon nga mga taga-Niue sa Auckland, mitabang sa gamayng grupo sa mga Saksi sa Niue, nga naghatag ug tibuok kasingkasing nga pagsuportar sa proyekto sa pagtukod.
Ang Desisyon sa Pagpadayon
Niadtong Hunyo 1994 sa dapit sa konstruksiyon sa usa ka Kingdom Hall sa Rotorua, New Zealand, may panawag alang niadtong interesado sa pagtabang sa proyekto sa Niue. Katingalahan, 200 ka Kristohanong igsoong mga lalaki ug mga babaye ang miboluntaryo. Gikan niini, 80 ka tawo ang gipili, lakip sa mga karpentero, mga obrero sa puthaw, mga tubero, mga tig-atop, mga tigpalitada, mga tig-pintal, mga elektrisyan, mga teknisyan sa gamit sa sound, mga kantero, mga tigtaod ug tisa, ug mga mamumuo.
Naghimog plano ang mga igsoon ug mipadayon, nga masaligon kang Jehova. Usa sa duha ka ansiano sa kongregasyon sa Niue, nga usa ka lokal nga negosyante, misugod sa paghimog mga kahikayan aron ikapakarga ang tanang gikinahanglang mga materyales. Nahikay ang espesyal nga prisyo sa bayranan sa ayroplano ug mga sak-anan alang sa mga trabahante gikan sa laing nasod, kinsa miboluntaryo sa pagbayad sa ilang kaugalingong gastos, ug ang mga petsa sa pagtukod gitakda. Ang proyekto pagahumanon sulod sa 20 ka adlaw, gikan sa Marso 4 hangtod sa Marso 23, 1995, sa dihang ang Kingdom Hall ipahinungod.
“Mao pay akong pagkatarantar sukad sa akong kinabuhi sa dihang akong nakita ang lugar,” matod sa direktor sa proyekto, nga gikan sa New Zealand nga miuna ug usa ka semana aron mahikay ang mga butang. “Pulos bato ang yuta. Duha ka semana ang magugol sa pagkalot lamang sa pundasyon.” Apan nasayop siya sa iyang pagtamod sa katakos sa lokal nga mga Saksi, miadmiter siya sa ulahi. “Ang mga igsoong taga-Niue pamilyar sa mga bato,” matod pa niya. “Nasayod sila kon asa ig-on ang bato aron dagkong mga tipak ang masip-ak.” Ang mga pundasyon nahuman sa duha ka adlaw!
Pagka-Marso 4 ang unang ayroplano nga puno sa mga Saksi gikan sa New Zealand nangabot, ug ang pagsemento gihimo. Samtang ang sunodsunod nga mga grupo sa mga trabahante nangabot, lainlaing hugna sa proyekto ang nahuman. Ang mga adlaw sa pagtrabaho gisugdan sa alas 7:00 s.b. pinaagi sa usa ka mubo nga paghisgot sa adlaw-adlawng teksto sa Bibliya. Ang pipila ka igsoon mitrabahog 12-oras nga mga adlaw sa temperaturang 36 grado Celsius. Sa kataposan, pagka-Marso 23, ang lagwerta natamnan na ug mga tanom. Usa ka maanindot nga karatula nga gama sa kahoyng mangga nagpaila sa tinukod ingong “Kingdom Hall sa mga Saksi ni Jehova.”
Espiritu sa Pagtinabangay ug Pagkamaabiabihon
Usa ka importanteng butang nga nakaamot sa kalamposan sa proyekto mao ang kooperasyon sa katawhan sa Niue. Ang lokal nga mga taga-balangay, nga nadala sa espiritu sa okasyon, midonar ug pagkaon ug salapi. Gilantaw sa kadaghanan ang pagtukod sa tigomanan ingong ilang proyekto. Ang mga opisyales sa kagamhanan ug mga negosyante naghatag ug mga serbisyo nga labaw sa gidahom. Ang gikinahanglang gamit gipahulam, ingon man sa pabrika nga nagagamag mga bahin sa balay nga gama sa kahoy. Giusab pa gani sa kompaniya sa barko ang rota niini aron mapaneguro nga ang gikinahanglang materyales moabot sa hustong panahon.
Gipabilhan gayod sa mga bisita ang kuging trabaho ug kamaabiabihon sa mga Saksi nga taga-Niue, nga nagpaambit sa ilang mga balay ug mga kabtangan. “Ang lokal nga igsoong mga babaye maayo kaayo,” matod sa usa ka trabahante sa konstruksiyon. Dugang pa sa init nga pagkaon sa paniudto matag adlaw, ang igsoong mga babaye nagdalit ug linuto nga pamahaw matag buntag sa alas 6:30. Ang pipila mimata sa alas 4:30 s.b. aron andamon ang pagkaon. Matod sa usa ka trabahante sa konstruksiyon: “Nagtuo ako nga mas maayo ang among pagkinabuhi dinhi sa Niue kay sa among pagkinabuhi didto sa among kaugalingong mga balay.”
Pagka-Marso 10 ang Niue Star nagtaho mahitungod sa okasyon sa pangunang panid nga estorya sa ulohang “Ang Unang Kingdom Hall sa Niue” ug usa ka hulagway sa mga taga-New Zealand ug mga taga-Niue nga nagtrabaho diha sa dapit. Giasoy niini nga ang tigomanan maoy 280 metros kuwadradong gidak-on ug makapalingkod ug 70 ngadto 100 ka tawo. Ang artikulo midugang: “Ang buluhaton sa pagkatinuod mahuman sa duha [ka semana], apan niining kasoha kini ipalugway pa. Niining tungora, duha lamang ka adlaw gikan sa pagsugod sa trabaho, ang pundasyon, mga gambalay, mga katsaw ug atop nataod na, nga una sa eskedyul.”
Usa ka lokal nga negosyante mipahayag ug panghinaot nga ang tanan sa Isla sa Niue motan-aw sa proyekto ug mokat-on ug leksiyon gikan niana. Siya miingon nga siya naglaom nga kini nagpakita sa tanan kon unsa ang mahimo sa gugma ug pagtinabangay.
Ang panon sa 204 mitambong sa dedikasyon. Ang makapatandog gayod nga eksperyensiya alang sa tanan nga mitambong mao ang espesyal nga presentasyon diin gipasundayag pinaagig awit ug sayaw sa mga igsoong lalaki, babaye, ug mga bata nga taga-Niue ang pagtukod sa Kingdom Hall. Mga ekspresyon sa pasalamat gihimo ngadto sa tem sa konstruksiyon ug kang Jehova, kansang espiritu nagpalihok sa mga kaisipan, mga kasingkasing, ug mga kamot aron matapos ang buluhaton.—Isaias 40:28-31.