‘Mahinungdanon ba Ako sa Diyos?’

“MAHINUNGDANON ba Ako? May Pagtagad ba ang Diyos?” Kana ang mabasang titulo sa usa ka artikulong mipatim-aw sa Christianity Today. “Ang kinadak-an sa akong karera isip magsusulat nasentro sa suliran sa kagul-anan,” matod ni Philip Yancey, ang awtor sa artikulo. “Balikbalikan ko ang mao rang mga pangutana, nga samag nagkubilkubil sa daang samad nga wala pa kaayo maalim. Makadawat akog kasayoran gikan sa mga magbabasa sa akong mga libro, ug ang makapasubo nilang mga estorya nagpamatuod sa akong mga pagduda.”

Tingalig nahibulong ka usab bahin sa kaikag sa Diyos sa imong kinabuhi. Oh, tingali nasayod ka sa Juan 3:16, nga nag-ingong “gihigugma pag-ayo sa Diyos ang kalibotan nga iyang gihatag ang iyang bugtong nga Anak.” O tingali nakabasa ka sa Mateo 20:28, nga nag-ingong si Jesus mianhi “sa paghatag sa iyang kalag ingong usa ka lukat ilis sa daghan.” Bisan pa niana mahimong mangutana ka, ‘Himatikdan ba ako sa Diyos? May pagtagad ba siya kanako ingong usa ka indibiduwal?’ Adunay maayong katarongan sa pagtuo nga siya may pagtagad, sumala sa ato unyang makita.