Felipe​—Usa ka Madasigong Ebanghelisador

ANG Kasulatan nasudlan ug daghang asoy bahin sa mga lalaki ug babaye kansang pagtuo takos nga pagasundogon. Palandonga si Felipe, ang unang-siglong Kristohanong misyonaryo. Siya dili usa ka apostol, apan siya kusganong gigamit sa pagpakaylap sa mensahe sa Gingharian. Sa pagkatinuod, si Felipe nailhan ingong “tig-ebanghelyo.” (Buhat 21:8) Nganong nakabaton si Felipe nianang ngalana? Ug unsay atong makat-onan gikan kaniya?

Si Felipe makita sa rekord sa Bibliya human gilayon sa Pentekostes 33 K.P. Niadtong higayona ang Gregog-sinultihang mga Hudiyo nagsugod sa pagbagulbol batok sa Hebreohanog-sinultihang mga Hudiyo, nga nangangkon nga ang ilang mga babayeng balo gikalimtan sa adlaw-adlawng pag-apod-apod sa pagkaon. Aron maatiman ang butang, ang mga apostoles nagtudlo ug “pito ka napanghimatud-ang mga lalaki.” Si Felipe maoy usa niadtong napili.​—Buhat 6:1-6.

Kining pito ka lalaki “napanghimatud-an.” Ang James Moffatt nga hubad nag-ingon nga sila “maayog dungog.” Oo, sa panahon sa pagtudlo kanila, sila nailhan na ingong espirituwal nga mga lalaki nga may praktikal nga katakos sa paghunahuna. Sama usab kini niadtong nag-alagad ingong Kristohanong mga magtatan-aw karon. Kining mga tawhana wala itudlo nga dinalidali. (1 Timoteo 5:22) Sila kinahanglang “adunay maayong panghimatuod gikan sa mga tawo sa gawas,” ug angayng mahibalo ang isigka-Kristohanon nga sila makataronganon ug mabuot sa hunahuna.​—1 Timoteo 3:2, 3, 7; Filipos 4:5.

Tataw, giatimag maayo ni Felipe ang iyang asaynment sa Jerusalem. Apan, wala magdugay dihay mitunghang mapait nga paglutos nga nagpatibulaag sa mga sumusunod ni Kristo. Sama sa uban, si Felipe mihawa sa siyudad, apan ang iyang ministeryo wala pa matapos. Wala magdugay, siya puliking nagsangyaw diha sa bag-ong teritoryo​—sa Samaria.​—Buhat 8:1-5.

Nagbukas ug Bag-ong mga Teritoryo

Si Jesus nagtagna nga ang iyang mga tinun-an magwali “sa Jerusalem ug sa tibuok Judea ug Samaria ug ngadto sa kinalay-ang dapit sa yuta.” (Buhat 1:8) Pinaagi sa pagwali sa Samaria, si Felipe nakigbahin sa katumanan niadtong mga pulonga. Ang mga Hudiyo sa katibuk-an ubos ug pagtamod sa mga Samarianhon. Apan si Felipe wala maghukom daan niining mga tawhana, ug ang iyang pagkaway-pagpihig gipanalanginan. Sa pagkatinuod, daghang Samarianhon ang nabawtismohan, apil na ang kanhi nga madyikerong ginganlag Simon.​—Buhat 8:6-13.

Sa ngadtongadto, gipaadto sa manulonda ni Jehova si Felipe sa dalan sa desyerto nga nagtadlas gikan sa Jerusalem ngadto sa Gaza. Didto si Felipe nakakitag usa ka karwahe nga nagsakay ang usa ka opisyal nga Etiopianhon nga nagbasa sa makusog gikan sa tagna ni Isaias. Si Felipe midagan abay sa karwahe ug nakig-estorya. Bisan pag usa ka kinabig ang Etiopianhon nga may diyutayng kaalam sa Diyos ug sa Kasulatan, siya mapainubsanong midawat nga siya nagkinahanglag tabang aron makasabot sa iyang gibasa. Busa, iyang gidapit si Felipe sa pagsakay sa karwahe ug sa paglingkod tapad kaniya. Human nakapamatuod, sila nakadangat diha sa usa ka linaw. “Unsay nakapugong kanako nga mabawtismohan?” nangutana ang Etiopianhon. Dihadiha gibawtismohan siya ni Felipe, ug ang Etiopianhon mipadayon sa iyang panaw nga malipayon. Malagmit, kining bag-ong tinun-an nagpakaylap sa maayong balita balik sa iyang yutang-natawhan.​—Buhat 8:26-39.

Unsay atong makat-onan gikan sa ministeryo ni Felipe may kalabotan sa mga Samarianhon ug sa Etiopianhong opisyal? Dili gayod nato hunahunaon nga ang mga tawo sa usa ka nasyonalidad, rasa, o sosyal nga pagkabutang dili interesado sa maayong balita. Hinunoa, angayng isangyaw gayod nato ang mensahe sa Gingharian ngadto sa “tanang matang sa katawhan.” (1 Corinto 9:19-23) Kon himoon nato ang atong kaugalingon nga andam pinaagi sa pagsangyaw sa tanan, si Jehova makagamit kanato sa buluhaton sa “paghimog mga tinun-an sa katawhan sa tanang kanasoran” sa dili pa moabot ang kataposan niining daotang sistema sa mga butang.​—Mateo 28:19, 20.

Dugang nga mga Pribilehiyo ni Felipe

Human sa pagwali sa Etiopianhong opisyal, si Felipe nagsangyaw sa Asdod, “ug siya milatas sa teritoryo ug padayong nagpahayag sa maayong balita sa tanang siyudad hangtod siya nakaabot sa Cesarea.” (Buhat 8:40) Sa unang siglo, kining duha ka siyudad dunay igoigong mga molupyong Hentil. Sa iyang pagpaingon sa amihanan sa Cesarea, lagmit nagsangyaw si Felipe sa iladong mga sentrong Hudiyohanon, sama sa Lida ug Jope. Tingali mao kanay hinungdan kon nganong may makit-ang mga tinun-an sa ulahi niining mga dapita.​—Buhat 9:32-43.

Ang kataposang paghisgot bahin kang Felipe nahitabo sa mga 20 ka tuig sa ulahi. Sa kataposan sa iyang ikatulong misyonaryong pagpanaw, nanaog si Pablo sa Ptolemais. “Sa pagkasunod nga adlaw,” nag-ingon ang kauban ni Pablo sa panaw nga si Lucas, “kami migikan ug nakaabot sa Cesarea, ug kami misulod sa balay ni Felipe nga tig-ebanghelyo.” Niining panahona, si Felipe adunay “upat ka anak nga babaye, mga ulay, nga nanagpropesiya.”​—Buhat 21:8, 9.

Lagmit, sa Cesarea na nanimuyo si Felipe. Apan wala mawala kaniya ang iyang espiritu sa pagkamisyonaryo, tungod kay siya gitawag ni Lucas nga “tig-ebanghelyo.” Kining ekspresyona sagad nagpaila sa usa nga mibiya sa iyang panimalay aron sa pagsangyaw sa maayong balita diha sa mga dapit nga wala kasangyawi. Ang kamatuoran nga adunay upat ka anak nga babaye si Felipe nga nanagna nagpakita nga sila nagsunod sa madasigong mga lakang sa ilang amahan.

Angayng hinumdoman sa presenteng-adlawng Kristohanong mga ginikanan nga ang ilang mga anak mao ang ilang labing hinungdanong mga tinun-an. Bisan pag moluwat kining maong mga ginikanan sa pipila ka teokratikanhong mga pribilehiyo tungod sa mga responsibilidad sa pamilya, sama kang Felipe sila makapabiling bug-os-kasingkasing nga mga alagad sa Diyos ug sulondang mga ginikanan.​—Efeso 6:4.

Ang pagduaw ni Pablo ug sa iyang mga kauban naghatag sa pamilya ni Felipe ug maayong higayon sa pagpakitag pagkamaabiabihon. Handurawa ang pagbayloayg pagdasig! Tingali niining okasyona nga natigom ni Lucas ang mga detalye sa mga kalihokan ni Felipe, nga gilakip sa ulahi sa Buhat mga kapitulo 6 ug 8.

Bug-os nga gigamit ni Jehova nga Diyos si Felipe sa pagpauswag sa intereses sa Gingharian. Ang kadasig ni Felipe nagpaarang kaniya sa pagpakaylap sa maayong balita diha sa bag-ong mga teritoryo ug sa pagpalambo sa espirituwal nga atmospera sa iyang panimalay. Gusto mo bang mabatonan ang samang mga pribilehiyo ug mga panalangin? Nan maayong imong sundogon ang mga hiyas nga gipasundayag ni Felipe nga tig-ebanghelyo.