Ipasundayag ang Espiritu sa Payunir
1. Unsaon nimo paghubit ang espiritu sa payunir?
1 Makaalagad man sila ingong mga payunir sa pagkakaron o dili, ang tanang magmamantala sa Gingharian makapasundayag sa espiritu sa payunir. Buot gayod nilang tumanon ang sugo nga magwali ug maghimog mga tinun-an. (Mat. 28:19, 20; Buh. 18:5) Sila nahingawa sa mga tawo ug mihimog mga sakripisyo aron magmalamposon ang ilang ministeryo. (Mat. 9:36; Buh. 20:24) Ang mga alagad ni Jehova andam sa paghimo kon unsay gikinahanglan sa pagtabang sa uban nga makakat-on sa kamatuoran. (1 Cor. 9:19-23) Atong tagdon ang panig-ingnan sa usa ka tawo nga nagpakita sa maong espiritu, si Felipe nga tig-ebanghelyo.
2. Sa unsang paagi masundog sa mga ansiyano ug ministeryal nga mga alagad ang kasibot ni Felipe alang sa ministeryo?
2 Pagwali ug Pagpanudlo: Si Felipe nag-atiman ug bug-at nga mga responsabilidad sa unang-siglong kongregasyon. (Buh. 6:1-6) Bisan pa niana, sa panguna siya maoy masibotong magwawali sa maayong balita. (Buh. 8:40) Mao man usab karon, samtang nag-atiman sa mga kaakohan nga giasayn kanila, ang mga ansiyano ug ministeryal nga mga alagad makapasundayag ug espiritu sa payunir pinaagi sa madasigong pagpanguna diha sa ministeryo. Pagkamakapalagsik gayod kini sa espiritu sa kongregasyon!—Roma 12:11.
3. Sa unsang paagi atong ikapasundayag ang espiritu sa payunir sa dihang makasugamak kitag mga pagsulay?
3 Human sa kamatayon ni Esteban, ang kalit nga pag-uswag sa paglutos nakapatugaw gayod sa kinabuhi sa mga tinun-an. Apan, si Felipe nagpadayon sa pagwali, ug nakahimo siyag hinungdanong bahin sa pag-abli sa buluhaton taliwala sa mga Samarianhon. (Buh. 8:1, 4-6, 12, 14-17) Atong masundog ang iyang panig-ingnan pinaagi sa pagpadayon sa pagpaila sa maayong balita sa dihang makaagom kita ug mga pagsulay ug pinaagi sa pagwali nga walay pagpihig ngadto sa tanan nga atong mahibalag.—Juan 4:9.
4. Unsang panig-ingnan ang gihatag ni Felipe ingong magtutudlo?
4 Ang kahanas ni Felipe ingong magtutudlo sa Pulong sa Diyos makita diha sa asoy sa pagkakabig sa Etiopianhong eunuko. (Buh. 8:26-38) Ang pag-ugmad sa katakos sa paggamit sa Bibliya ug ‘pagpangatarongan pinasukad sa Kasulatan’ maoy laing paagi nga atong ikapasundayag ang espiritu sa payunir. (Buh. 17:2, 3) Sama kang Felipe, kita maningkamot sa pagpaambit sa maayong balita bisan asa makaplagan ang mga tawo ug diha sa matag haom nga okasyon.
5. Unsay makatabang sa Kristohanong mga ginikanan sa pagsilsil sa espiritu sa payunir nganha sa ilang mga anak?
5 Pamilya ug Kongregasyon: Ang tinamdan ug panig-ingnan ni Felipe sa walay duhaduha adunay positibong epekto nganha sa iyang mga anak nga babaye. (Buh. 21:9) Sa samang paagi, ang Kristohanong mga ginikanan kinsa nagsentro sa ilang kinabuhi diha sa intereses sa Gingharian magdasig sa ilang mga anak sa paghimo sa samang mga butang. Bisan tuod gikapoy tungod sa puliking semanang trabaho, ang ginikanan nga maikagong nagawali ngadto sa uban makahatag ug malungtarong epekto nganha sa kasingkasing sa usa ka anak.—Prov. 22:6.
6. Sa unsang paagi atong ikapakita ang pagpabili sa mga payunir diha sa atong kongregasyon?
6 Giabiabi ni Felipe si Pablo ug Lucas, masibotong mga Kristohanon kinsa nanikaysikay diha sa pag-alagad kang Jehova. (Buh. 21:8, 10) Sa unsang paagi atong ikapakita ang atong pagpabili ug pagpaluyo alang sa masibotong mga alagad karong adlawa? Tingali makasugyot kita nga makig-uban sa mga payunir sa pagsangyaw sa buntag o sa hapon sa adlaw diin diyutay lang ang makig-ambit diha sa ministeryo. (Filip. 2:4) Mahimo usab nato silang dapiton sa atong mga balay alang sa makapalig-ong panag-ubanay. Bisag unsay atong mga kahimtang, hinaot kitang tanan maningkamot sa pagpasundayag sa espiritu sa payunir.