Ang mga Panalangin sa Payunir nga Ministeryo
“Ang panalangin ni Jehova—mao kana ang nagapadato, ug siya wala magdugang ug kasakit diha niana.”—PROVERBIO 10:22.
1, 2. (a) Sa unsang paagi gipahayag sa usa ka payunir ang iyang mga pagbati bahin sa bug-os-panahong ministeryo? (b) Nganong ang mga payunir anaa sa kahimtang nga makasinati sa bug-os sa mga kalipay sa paghimog tinun-an?
“ADUNA pa bay labaw nga kalipay kay sa makitang ang tawo nga imong gitun-an mahimong usa ka aktibong magdadayeg kang Jehova? Makapalipay ug makapalig-on sa pagtuo nga makita kon unsa ka gamhanan ang Pulong sa Diyos sa pagpalihok sa mga tawo sa paghimog mga kausaban sa ilang mga kinabuhi aron makapahimuot kang Jehova.” Sa ingon misulat ang usa ka payunir nga taga-Canada nga anaa sa bug-os panahong ministeryo sa kapig 32 ka tuig. Mahitungod sa iyang payunir nga ministeryo, siya miingon: “Dili ko mahanduraw ang pagbuhat ug bisan unsa. Tinong dili ko mahanduraw ang bisan unsa nga magdalag samang kalipay.”
2 Mouyon ka ba nga adunay dakong kalipay nga makigbahin sa pagtabang sa usa ka tawo nga makasubay sa dalan sa kinabuhi? Siyempre, dili lamang ang mga payunir ang makatagamtam niana nga kalipay. Ang tanang alagad ni Jehova gisugo sa “paghimog mga tinun-an sa katawhan,” ug sila naningkamot sa pagbuhat niana. (Mateo 28:19) Apan, sanglit ang mga payunir makagugol ug daghang oras diha sa ministeryo sa kanataran, sila sagad ang anaa sa kahimtang nga makasinati sa mga kalipay sa paghimog tinun-an nga mas bug-os. Apan ang pagpayunir adunay laing mga ganti usab. Pakigsulti sa mga payunir, ug sila mosulti kanimo nga ang pagpayunir maoy kahibulongang paagi sa pagsinati ‘sa panalangin ni Jehova nga nagapadato sa usa.’—Proverbio 10:22.
3. Unsay mahimong magdasig kanato samtang kita nagapadayon sa pag-alagad kang Jehova?
3 Sa dili pa dugay, ang mga payunir sa nagkalainlaing mga dapit sa kalibotan gipangutana sa paghubit sa mga panalangin nga nasinati nila diha sa bug-os-panahong ministeryo. Atong tagdon kon unsay giingon nila. Apan, ayaw kaluya kon ang imong pag-alagad limitado tungod sa dili maayong panglawas, pagkatigulang, o ubang mga sirkumstansiya. Hinumdomi, ang hinungdanong butang mao ang pag-alagad kang Jehova nga tibuok-kalag, diha sa bisan unsang kapasidad. Sa gihapon, ang pagkadungong sa mga komento sa pipila ka payunir mahimong magpauswag sa imong interes sa pagsulod niining magantihong kalihokan kon posible gayod.
Halawom nga mga Pagbati sa Katagbawan ug Kalipay
4, 5. (a) Nganong ang pagpakigbahin sa maayong balita ngadto sa uban maoy usa ka magantihong kasinatian? (b) Unsay gibati sa mga payunir mahitungod sa pagpakigbahin diha sa bug-os panahong ministeryo?
4 “Adunay labaw nga kalipay sa paghatag kay sa pagdawat,” miingon si Jesus. (Buhat 20:35) Oo, ang dili-mahakogong paghatag adunay iyang mga ganti. (Proverbio 11:25) Tinuod kini ilabina kon labot sa pagpakigbahin sa maayong balita ngadto sa uban. Sa pagkatinuod, unsa pa may mas dakong gasa nga atong ikahatag sa atong isigkatawo kay sa pagtabang kaniya nga makabaton ug kahibalo bahin sa Diyos, nga motultol ngadto sa kinabuhing walay kataposan?—Juan 17:3.
5 Dili ikatingala, kadtong nakigbahin diha sa bug-os-panahong ministeryo sagad mokomento bahin sa kalipay ug halawom nga pagbati sa kalamposan nga ilang nakuha gikan sa ilang ministeryo. “Nasayod ako nga walay laing buluhaton nga mohatag kanako sa katagbawan gumikan sa pagpakig-ambit sa kamatuoran ngadto sa uban,” matod sa usa ka 64-anyos nga payunir gikan sa Britanya. Usa ka babayeng balo gikan sa Zaire mipahayag kon unsay kahulogan sa pagpayunir alang kaniya: “Ang payunir nga pag-alagad maoy usa ka tinuod nga paghupay alang kanako human mamatyi sa akong minahal nga bana. Ang kanunay kong paggula sa pag-alagad aron sa pagtabang sa uban nagpamenos sa gibati kong kaguol. Nagtuo ako diha sa mga saad ni Jehova ug naghunahuna kanunay kon sa unsang paagi matabangan ko ang mga tawong akong ginatun-an sa paghimog mga kausaban sa ilang mga kinabuhi. Sa kataposan sa matag adlaw, maayo ang akong pagkatulog, ug ang akong kasingkasing tugob sa kalipay.”
6. Unsang linaing kalipay ang nasinati sa pipila ka payunir?
6 Ang pipila nga nagpayunir sulod na sa daghang dekada nakabaton ug linaing kalipay sa pag-alagad sa hilit nga mga dapit, nagtukod ug mga kongregasyon, nga sa ngadtongadto midaghan sa pagkahimong mga sirkito. Pananglitan, sa Abashiri, Hokkaido (isla sa halayong amihanan sa Hapon), may usa ka sister nga nagpayunir sulod na sa 33 ka tuig. Siya nahinumdom nga sa iyang unang sirkitong asembliya—sa tibuok Hokkaido—dihay 70 ka tumatambong lamang. Ug karon? Adunay 12 ka sirkito niana nga isla, nga may gidaghanong kapin sa 12,000 ka magmamantala. Hunahunaa ra kon unsa ka dako ang iyang kalipay inigtambong niya sa mga asembliya ug mga kombensiyon uban ang panonpanon sa kaubang mga magmamantala sa Gingharian niana nga isla!
7, 8. Unsang kalipay ang nasinati sa kadaghanan sa dugay nang mga payunir?
7 Ang ubang dugay nang mga payunir nakabaton ug kalipay sa pagkakita sa mga estudyante sa Bibliya nga nabawtismohan ug dayon nagpangab-ot alang sa mas dagkong mga pribilehiyo sa pag-alagad. Sa Hapon usa ka sister nga nakaalagad sa siyam ka nagkalainlaing payunir nga mga asaynment sukad sa 1957 nahinumdom nga nakapahimutang ug magasing Pagmata! sa usa ka dalaga nga nagtrabaho sa bangko. Sulod sa siyam ka bulan ang dalaga nabawtismohan. Sa ulahi siya naminyo, ug siya ug ang iyang bana nahimong mga espesyal payunir. Pagkadakong kalipay kadto alang sa maong payunir nga sister sa dihang, sa iyang ikatulong asaynment, ang iyang kongregasyon giduaw sa bag-ong magtatan-aw sa sirkito niini ug sa iyang asawa—ang iyang kanhing estudyante sa Bibliya!
8 Dili ikahibulong nga kadtong naghimong karera sa payunir nga ministeryo naglantaw niini ingong “usa ka hamiling pribilehiyo nga kinahanglang pabilhan,” ingon sa gipahayag sa usa ka payunir sulod na sa 22 anyos!
Pamatuod sa Pag-atiman ni Jehova
9. Ingong Dakong Magtatagana, unsay gisaad ni Jehova sa iyang mga alagad, ug unsay kahulogan niini alang kanato?
9 Si Jehova, ang Dakong Magtatagana, nagsaad sa pagtabang sa iyang mga alagad, nga mag-atiman kanila sa espirituwal ug sa materyal. Nagpamatuod si Haring David kanhi sa pag-ingon: “Nabata ako kaniadto, karon ako tigulang na, ug bisan pa wala ako makakita sa matarong nga gibiyaan sa bug-os, ni magpakilimos sa tinapay ang iyang kaliwat.” (Salmo 37:25) Siyempre, kini nga pasalig sa Diyos wala magpahigawas kanato sa obligasyon sa pagtagana sa materyal nga paagi alang sa atong mga pamilya, ni kini nagtugot kanato nga maglaom sa pagkamanggihatagon sa atong Kristohanong mga igsoon. (1 Tesalonica 4:11, 12; 1 Timoteo 5:8) Bisan pa niana, kon kita andam nga mohimog mga pagsakripisyo sa atong mga kinabuhi aron sa pag-alagad nga mas bug-os kang Jehova, siya dili gayod mobiya kanato.—Mateo 6:33.
10, 11. Gikan sa kasinatian, unsay nahibaloan sa daghang payunir bahin sa katakos ni Jehova sa pagtagana?
10 Ang mga payunir sa tibuok yuta nahibalo gikan sa kasinatian nga si Jehova motagana alang niadtong nagtugyan sa ilang kaugalingon sa iyang pag-atiman. Palandonga ang kahimtang sa usa ka payunir nga magtiayon nga mibalhin sa usa ka gamayng lungsod diin dihay mas dako nga panginahanglan sa mga magsasangyaw sa Gingharian. Human sa pipila ka bulan, nihit ang sekular nga trabaho, ug nahurot na ang ilang mga natigom. Unya nakadawat silag bayranan sa seguro sa kotse nga $81. “Dili gayod kami makabayad niini,” matod sa brader. “Kami mainitong nag-ampo nianang gabhiona.” Sa sunod adlaw, nakadawat sila ug kard gikan sa pamilya nga naglisod usab sa panalapi. Ang pamilya giulian sa gobyerno ug bayad sa buhis, ang kard nagbatbat, ug sanglit kini maoy sobra sa ilang gilaoman, buot nilang ipakig-ambit ang pipila niini uban sa payunir nga magtiayon. Gisukip mao ang tseke nga $81! “Dili gayod nako makalimtan ang maong adlaw—nanglimbawot ang balhibo sa akong tangkugo!” matod sa brader nga payunir. “Gipabilhan gayod namo ang pagkamanggihatagon niini nga pamilya.” Si Jehova nagpabili usab sa maong kalulot, nga maoy sagad sa mahinatagong espiritu nga gidasig niya sa iyang mga alagad.—Proverbio 19:17; Hebreohanon 13:16.
11 Daghang payunir ang makaasoy sa susamang mga kasinatian. Pangutan-a sila, ug sila mosugid kanimo nga wala gayod sila “biyai sa bug-os.” Sa pagpalandong sa kapig 55 ka tuig diha sa bug-os-panahong ministeryo, ang usa ka 72-anyos nga payunir miingon, “si Jehova wala gayod magpahigawad kanako.”—Hebreohanon 13:5, 6.
“Usa ka Ekselenteng Paagi nga Masuod Kang Jehova”
12. Nganong ang buluhaton sa pagmantala sa maayong balita usa ka talagsaong pribilehiyo?
12 Nga si Jehova naghangyo gani kanato sa pagmantala sa maayong balita sa iyang Gingharian nagpaarang kanato sa usa ka pribilehiyo. Siya nag-isip kanato—bisag kita dili-hingpit nga mga tawo—ingong iyang “isigkamagbubuhat” niining nagaluwas-kinabuhi nga buluhaton. (1 Corinto 3:9; 1 Timoteo 4:16) Samtang kita nagasangyaw sa uban bahin sa Gingharian sa Diyos, samtang kita nagamantala sa kataposan sa pagkadaotan, samtang kita nagapatin-aw sa mga tawo sa iyang kahibulongang gugma sa pagtagana sa lukat, samtang kita nagabukas sa iyang buhing Pulong ug nagatudlo sa bililhong mga kaundan niini ngadto sa matinud-anon ug kasingkasing nga mga tawo, kita sa kinaiyanhon mapasuod sa atong Maglalalang, si Jehova.—Salmo 145:11; Juan 3:16; Hebreohanon 4:12.
13. Unsay gisulti sa pipila bahin sa epekto sa ilang payunir nga ministeryo diha sa ilang relasyon kang Jehova?
13 Ang mga payunir makagugol ug dakong panahon kada bulan sa pagkakat-on ug pagtudlo bahin kang Jehova. Unsay ilang pagbati sa epekto niini diha sa ilang relasyon sa Diyos? “Ang pagpayunir maoy usa ka ekselenteng paagi nga masuod kang Jehova,” mitubag ang usa ka ansiyano sa Pransiya nga usa ka payunir sulod na sa kapin sa napulo ka tuig. Laing payunir nianang nasora, nga migugol ug 18 ka tuig diha sa bug-os-panahong ministeryo, miingon: “Ang payunir nga pag-alagad nagtugot kanato sa ‘pagtilaw ug pagkakita nga si Jehova maayo,’ nga sa matag adlaw nagtukod ug mas nagkalig-ong relasyon uban sa atong Maglalalang.” (Salmo 34:8) Usa ka sister sa Britanya nga usa ka payunir sulod na sa 30 ka tuig mibati sa ingon. “Ang paghangyo sa balaang espiritu ni Jehova nga mogiya sa akong ministeryo nagpasuod kanako ngadto kaniya,” miingon siya. “Gibati ko gayod nga ang espiritu ni Jehova sa daghang okasyon nagtultol kanako ngadto sa partikular nga balay sa hustong panahon.”—Itandi ang Buhat 16:6-10.
14. Sa unsang paagi ang mga payunir makabaton ug kaayohan gikan sa paggamit sa Bibliya ug pinasukad-sa-Bibliyang mga publikasyon sa pagtudlo sa uban matag adlaw?
14 Daghang payunir nakakaplag nga ang paggamit sa Bibliya ug pinasukad-sa-Bibliyang mga publikasyon matag adlaw sa pagpatin-aw ug pagtudlo sa mga kamatuoran sa Kasulatan nagtabang kanila nga mouswag sa kahibalo sa Pulong sa Diyos. Usa ka 85-anyos nga igsoong lalaki sa Espanya nga nagpayunir sulod na sa 31 ka tuig misaysay: “Ang pagpayunir nakatabang kanako nga makabaton ug halawom nga kahibalo sa Bibliya, usa ka kahibalo nga akong gigamit sa pagtabang sa daghang tawo nga makaila kang Jehova ug sa iyang mga katuyoan.” Usa ka sister gikan sa Britanya nga nagpayunir sulod na sa 23 ka tuig miingon: “Ang bug-os-panahong ministeryo nakatabang kanako sa pag-ugmad ug kinasingkasing nga kaikag alang sa espirituwal nga pagkaon.” Ang pagpatin-aw sa uban sa “katarongan sa paglaom nga anaa kaninyo” makapalig-on sa imong mga pagtuo labot sa mga pagtulon-an nga imong gipabilhan. (1 Pedro 3:15) Nag-ingon ang usa ka payunir nga taga-Australia: “Ang pagpayunir nagpalambo sa akong pagtuo samtang gipahayag ko ang akong kaugalingon ngadto sa uban.”
15. Unsay andam buhaton sa daghan aron makasulod sa payunir nga ministeryo ug magpabilin diha niana, ug ngano?
15 Tin-aw, kining payunir nga mga ministro nakombinsir nga napili nila ang matang sa pag-alagad nga magdalag di-maihap nga mga panalangin gikan kang Jehova. Dili ikahibulong nga daghan ang andam nga mohimog mga pagpasibo sa ilang mga kinabuhi, bisan ang pagsakripisyo sa sekular nga karera ug materyal nga mga bahandi, aron makasulod sa payunir nga ministeryo ug magpabilin diha niana!—Proverbio 28:20.
Nangandoy ba ang Imong Kasingkasing sa Pagbuhat ug Labaw Pa?
16, 17. (a) Kon ikaw naghunahuna kon posible ba alang kanimo ang pagpayunir, unsay mahimo nimong buhaton? (b) Unsay gibati sa pipila sa dihang dili makahimo sa pagpayunir?
16 Human palandonga ang gisulti sa mga payunir bahin sa mga panalangin sa payunir nga ministeryo, tingali ikaw naghunahuna kon ang pagpayunir praktikal ba alang kanimo. Kon mao, nganong dili makigsulti sa usa ka payunir nga nagmalamposon sa bug-os-panahong ministeryo? Tingalig imong makaplagan usab nga makatabang ang pagpakigsulti sa usa sa mga ansiyano sa kongregasyon, usa nga nahibalo bahin kanimo—sa imong kahimtang sa panglawas, sa imong mga limitasyon, ug sa imong mga kaakohan sa pamilya. (Proverbio 15:22) Ang realistikanhong mga komento sa uban mahimong motabang kanimo sa pagtimbangtimbang ug maayo kon ang pagpayunir posible ba alang kanimo. (Itandi ang Lucas 14:28.) Kon makahimo ka sa pagpayunir, dako gayod ang imong mga panalangin.—Malaquias 3:10.
17 Apan, komosta ang bahin sa daghang matinumanong mga magmamantala sa Gingharian nga wala sa kahimtang nga makapayunir, bisag sila dugay nang nangandoy nga makahimog dako diha sa ministeryo? Palandonga, pananglitan, ang pagbati sa usa ka Kristohanong sister nga nanglimbasog sa pagpadako sa iyang upat ka anak nga nag-inusara. “Ako nasubo,” matod niya, “sanglit regular payunir ako niadto, apan karon, tungod sa akong mga sirkumstansiya, dili ako makagula sa pag-alagad sa kanataran ingon sa akong mabuhat niadto.” Kini nga sister nagpangga pag-ayo sa iyang mga anak ug buot nga magtagana alang kanila. Sa samang panahon, siya nangandoy sa pagbuhat ug labaw pa diha sa buluhatong pagsangyaw. “Gimahal ko ang ministeryo,” miingon siya. Ang susamang pagbati maoy gibati sa ubang debotadong mga Kristohanon kansang gugma sa Diyos nagpalihok kanila nga buot moalagad kang Jehova ‘uban sa tibuok nilang kasingkasing.’—Salmo 86:12.
18. (a) Unsay ginalaoman ni Jehova gikan kanato? (b) Nganong kita dili angayng mawad-ag kadasig kon ang mga sirkumstansiya maglimite kon unsay arang natong mahimo?
18 Hinumdomi nga ang gilaoman ni Jehova gikan kanato mao ang tibuok-kasingkasing nga pag-alagad. Kon unsay gidaghanon niini mahimong magkalahi gayod sa matag kalag. Ang pipila makahimo sa pagpasibo sa ilang mga kalihokan aron makaalagad ingong mga regular payunir. Daghang uban ang nagpatala ingong oksilyare payunir sa popanahon kaha o sa makanunayon, nga migugol ug 60 oras kada bulan diha sa ministeryo. Apan, ang kinabag-an sa katawhan ni Jehova nagdeboto sa ilang kaugalingon sa buluhatong pagsangyaw ug pagpanudlo nga tibuok-kalag ingong mga magmamantala sa kongregasyon. Busa kon tinuod ka gayong gilimitahan sa dili maayong panglawas, pagkatigulang, mga kaakohan sa pamilya, o sa ubang mga sirkumstansiya, ayaw pagkaluya. Basta ginahatag mo ang imong kinamaayohan, ang imong pag-alagad maoy bililhon sa mga mata sa Diyos, sama sa pag-alagad niadtong kinsa anaa sa bug-os-panahong ministeryo!
Ang Tanan Makapasundayag sa Espiritu sa Payunir
19. Unsa ang espiritu sa payunir?
19 Bisag dili ka makapatala ingong usa ka payunir, ikaw makapasundayag sa espiritu sa payunir. Unsa ang espiritu sa payunir? Ang Agosto 1988 nga isyu sa Atong Ministeryo sa Gingharian nag-ingon: “Mahimong hubiton kana ingong pagbaton ug positibong tinamdan maylabot sa sugo sa pagwali ug paghimog mga tinun-an, nga bug-os masingkamoton sa pagpakitag gugma ug kabalaka sa katawhan, nagasakripisyo-sa-kaugalingon, adunay kalipay sa suod nga pagsunod sa Agalon, ug pagbaton ug kangaya diha sa espirituwal, dili sa materyal, nga mga butang.” Unsaon nimo pagpasundayag sa espiritu sa payunir?
20. Sa unsang paagi ikapasundayag sa mga ginikanan ang espiritu sa payunir?
20 Kon ikaw usa ka ginikanan nga may batan-ong mga anak, ikaw sa kinasingkasing makarekomendar ngadto kanila sa karera ingong mga payunir. Ang imong positibong tinamdan sa ministeryo magpatisok diha kanila sa panginahanglan nga himoon ang pag-alagad kang Jehova nga labing hinungdanong butang sa ilang mga kinabuhi. Ikaw tingali makadapit sa mga payunir ug nagapanawng mga magtatan-aw ug ilang mga asawa sa imong balay aron ang imong mga anak makabenepisyo gikan sa mga panig-ingnan niadtong kinsa nakakaplag ug kalipay diha sa bug-os-panahong ministeryo. (Itandi ang Hebreohanon 13:7.) Bisan diha sa nabahin sa relihiyong mga panimalay, ang magtutuong mga ginikanan, pinaagi sa pulong ug panig-ingnan, makatabang sa ilang mga anak sa paghimo sa bug-os-panahong ministeryo nga tumong sa kinabuhi.—2 Timoteo 1:5; 3:15.
21. (a) Sa unsang paagi kitang tanan makapaluyo niadtong nagapayunir? (b) Unsay mahimo sa mga ansiyano sa pagdasig sa mga payunir?
21 Sa kongregasyon, kitang tanan makahatag ug kinasingkasing nga pagpaluyo niadtong kinsa makaarang sa pagpayunir. Pananglitan, makahimo ka bag linaing mga paningkamot nga makauban ang mga payunir diha sa ministeryo, ilabina sa mga panahon sa dihang ang payunir tingali walay kauban? Ikaw makakaplag gayod nga adunay “pagdinasigay.” (Roma 1:11, 12) Kon ikaw usa ka ansiyano, ikaw dakog mahimo sa pagdasig sa mga payunir. Sa dihang magtigom ang lawas sa mga ansiyano, sila angayng magatagad nga regular sa mga panginahanglan sa mga payunir. Sa dihang ang payunir nawad-ag kadasig o nakasinatig pipila ka mga kalisod, ayaw pagdalidali sa pagrekomendar nga siya mohunong na lamang sa pagpayunir. Bisan tuod ang paghimo sa maong rekomendasyon gikinahanglan tingali sa pipila ka mga kahimtang, ayaw kalimti nga ang pagpayunir maoy usa ka bililhong pribilehiyo nga mahimong gipabilhan pag-ayo sa usa ka bug-os-panahong alagad. Ang diyutayng pagdasig ug pipila ka mapuslanong tambag o tabang tingali mao lamang ang gikinahanglan. Ang sangang buhatan sa Espanya misulat: “Sa dihang ang mga ansiyano magdasig sa pagpayunir, magpaluyo sa mga payunir diha sa ministeryo sa kanataran, ug magduaw nga regular kanila isip magbalantay, ang mga payunir makabatog dugang kalipay, mobating mapuslanon, ug buot magpadayon bisan sa mga kababagan nga mahimong motungha.”
22. Niining makuyaw nga yugto sa tawhanong kasaysayan, kita angayng magmadeterminado sa pagbuhat sa unsa?
22 Kita nagkinabuhi sa makuyaw nga yugto sa tawhanong kasaysayan. Si Jehova naghatag kanato ug buluhatong nagaluwas-kinabuhi nga tumanon. (Roma 10:13, 14) Kon kita makigbahin man niini nga buluhaton sa bug-os panahon ingong mga payunir o dili, atong ipakita ang espiritu sa payunir. Batonan nato ang pagbati sa pagkadinalian ug usa ka espiritu sa pagsakripisyo-sa-kaugalingon. Magmadeterminado kita sa paghatag kon unsa ang ginapangayo ni Jehova kanato—ang tibuok-kalag nga pag-alagad. Ug atong hinumdoman nga kon ihatag nato ang tanan kutob sa atong ikahatag, kon kaha kini kaamgid sa gagmayng mga sensilyo sa babayeng balo o sa mahalong lana ni Maria, ang atong pag-alagad maoy tibuok-kalag, ug si Jehova nagpabili sa atong tibuok-kalag nga pag-alagad!
Nahinumdom Ka Ba?
◻ Nganong ang bug-os-panahong ministeryo magdalag pagbati sa katagbawan ug kalipay?
◻ Gikan sa kasinatian, unsay nahibaloan sa daghang payunir bahin sa katakos ni Jehova sa pag-atiman sa iyang mga alagad?
◻ Ang mga payunir mibati nga ang ilang ministeryo adunay unsang mga epekto sa ilang relasyon kang Jehova?
◻ Sa unsang paagi ikapasundayag mo ang espiritu sa payunir?
[Hulagway sa panid 23]
Ang mga payunir makabaton ug dakong kalipay gikan sa paghimog tinun-an
[Hulagway sa panid 23]
Ang imong mga anak makabatog kaayohan gikan sa pagpakig-uban sa bug-os panahong mga magmamantala sa Gingharian
[Hulagway sa panid 23]
Ang mga ansiyano makadasig sa mga payunir diha sa ministeryo sa kanataran