Mga Payunir Nagahatag ug Nagadawat ug mga Panalangin
“ANG pagpayunir mas bililhon pa kay sa usa ka malamposong sekular nga karera. Wala nay mas makapatagbaw pa kay sa pagtabang sa mga tawo nga mahibalo bahin kang Jehova ug sa iyang kamatuoran.” Matud pa sa usa ka Kristohanong babaye kinsa mipili sa pagpayunir—bug-os panahong pagsangyaw sa Gingharian—ingon nga iyang karera. Unsa ka daghan sa ubang mga karera ang makahatag sa maong kalipay?
Ang pagpayunir maoy usa ka hamili nga tumong ug usa ka bililhong pribilehiyo. Sa unsang paagi ang usa ka indibiduwal makapili sa ingon niini nga kinabuhi? Unsay gikinahanglan aron makapabilin ug dugay kaayo sa pagpayunir aron makaani sa mga panalangin nga ginatanyag niini?
Duha ka butang ang hinungdanon. Una, ang maayong mga sirkumstansiya. Daghan ang nagkinabuhi sa mga sirkumstansiya nga sa tin-aw dili gayod makahimo sa pagpayunir. Ug ikaduha, ang hustong espirituwal nga kuwalipikasyon o tinamdan. Siyempre, kon ang presenteng mga kahimtang motugot sa usa ka tawo sa pagpayunir o dili, ang tanan makapaningkamot sa pag-ugmad sa hamtong Kristohanong mga hiyas.
Kon Nganong ang Pipila Nagpayunir
Unsa ang mga kuwalipikasyon sa malamposong pagpayunir? Buweno, ang mga katakos sa pagsangyaw hinungdanon. Ang mga payunir kinahanglang mahibalo kon unsaon sa pagtanyag sa maayong balita ngadto sa mga dili-kaila, maghimog mga pagbalik duaw diha sa mga tawong interesado, ug magdumalag mga pagtuon sa Bibliya sa balay. Ang kakulang niini nga mga katakos makawala sa kadasig sa usa ka payunir. Bisan pa, ang ubang mga butang usab hinungdanon.
Pananglitan, ang tanang butang nga pagabuhaton sa atong pagsimba may kalabotan sa atong relasyon kang Jehova ug sa iyang organisasyon. Kini naglakip sa pagpayunir. Usa ka batan-ong payunir nga ginganlag Rado miingon: “Alang sa usa ka batan-on, walay laing butang nga mas maayo kay sa paghinumdom kang Jehova ug sa paglakaw diha sa dalan sa kamatuoran.” Oo, ang pagpayunir maoy usa ka maayong paagi alang sa mga batan-on sa pagpasundayag sa ilang gugma alang kang Jehova ug kasuod ngadto kaniya.—Ecclesiastes 12:1.
Ang kahibalo ug pagsabot usab kinahanglanon. (Filipos 1:9-11) Sa pagkamatuod, kini mao ang sugnod nga nagahupot sa atong espirituwal nga makina nga nagaandar kanunay. Ang regular personal nga pagtuon hinungdanon aron dili maluya sa espirituwal, makawala sa atong kadasig ug pagtuo. Siyempre, ang kahibalo nga atong gipasulod dili lamang magaapektar sa atong panghunahuna kondili usab sa atong kasingkasing. (Proverbio 2:2) Busa, dugang pa sa atong personal nga pagtuon, nagkinahanglan kita ug panahon sa pag-ampo ug pagpamalandong aron ang kahibalo nga atong makuha magtandog sa kasingkasing. Unya, kon motugot ang atong mga sirkumstansiya, kita buot nga magpayunir.—Itandi ang Esdras 7:10.
Ang pagsulod sa payunir nga pag-alagad nagkinahanglan usab ug espiritu sa pagsakripisyo-sa-kaugalingon. Ang usa ka batan-on nga ginganlag Ron nakahimo na sa tanan niyang mga plano sa pagpayunir. Naghulat na lamang siya sa hustong mga sirkumstansiya aron siya makasugod. Sa espesipiko, nangita siyag trabaho nga makahimo kaniya sa pagpayunir ug sa samang panahon makapahimulos sa pipila sa mas maayong mga butang sa kinabuhi. Sa dihang iyang gihisgotan kini ngadto sa usa ka hamtong nga igsoong babaye, nahaigking siya sa iyang tubag. Siya miingon: “Si Jehova mopanalangin sa binuhatan, dili sa mga saad.” Ang batan-ong lalaki nakakitag trabaho nga mas gamay ug suweldo nga makahatag ug panahon sa pagpayunir. Ang pagpadapat sa Mateo 6:25-34 motabang sa usa ka tawo nga makapaigo sa mas diyutayng kita.
Ang mapainubsanong pagkamainandamon sa pagsunod sa maayong mga sugyot makatabang ug dako sa atong pagsulod sa payunir nga pag-alagad. Sa bata pa siya ingong usa ka Kristohanon, si Hanna nakaugmad ug usa ka tinguha sa pagpayunir. Apan wala siya magpayunir samtang nagaatiman ug pamilya, ug sa ulahi siya nalangkit sa usa ka karera sa negosyo. Namati sa maayong tambag gikan sa alistong mga ansiano, iyang gibiyaan ang iyang maayong sekular nga karera ug misulod sa payunir nga pag-alagad. Si Hanna karon nakasinatig dakong kalipay sa pag-agak sa uban ngadto sa pagpahinungod ug sa pagtabang sa mga dili-aktibo.
Ang pagkamapasalamaton alang sa nahimo sa kamatuoran diha sa kinabuhi sa usa mahimong usa ka panukmod usab sa pagpayunir. Tagda ang kaso sa usa ka naguol kaayo nga babaye kansang kaminyoon hapit nang mabungkag. Kini nga kahimtang kalit nga nausab sa dihang siya nakakat-on sa kamatuoran sa Pulong sa Diyos ug ginapadapat kini. Nalipay sa nahimo sa kamatuoran diha sa iyang kinabuhi, siya mihukom nga ang labing maayong paagi nga ikapakita niya ang apresasyon mao ang pagpayunir ug tabangan ang uban. Kini ang iyang gihimo, ug siya karon nagatagamtam sa mga panalangin sa daghang pagtuon sa Bibliya ug sa usa ka malipayong kinabuhing panimalaynon.
Ang Uban Makatabang
Ang mga payunir sagad makapatunghag laing mga payunir. Si Rado, nga gihisgotan sa sinugdanan, sayis anyos pa sa dihang gitun-an sa Bibliya sa duha ka payunir ang iyang mga ginikanan. Sa bata pa kaayo, siya regular nga mokuyog niining bug-os panahong mga magwawali diha sa ministeryo sa kanataran. Si Rado mismo nahimong usa ka regular payunir sa panuigong 17. Ang laing batan-on, si Arno, gimatuto diha sa usa ka Kristohanong panimalay apan naluya sa espirituwal. Sa ulahi, siya misugod sa pagpasig-uli sa iyang espirituwal nga kalig-on, ug siya karon miingon: “Nakadawat akog daghang pagdasig gikan sa mga payunir. Ako nakig-uban kanila ilabina panahon sa tingbakasyon sa eskuylahan ug usahay nakatahog 60 ka oras sa usa ka bulan sa pag-alagad sa kanataran. Human niadto, ang lakang ngadto sa regular payunir nga pag-alagad [nga nagkinahanglag 90 ka oras sa usa ka bulan] dili na kaayo lisod.” Ang pagpamalandong sa tambag diha sa 1 Corinto 7:29-31 nga dili magpahimulos sa kalibotan sa bug-os nakatabang gayod sa maong mga batan-on.
Ang espiritu sa pagpayunir makagamot dayon diha sa usa ka panimalay diin ang espirituwal nga mga intereses maoy unang dapit ug ang mga ginikanan nagdasig sa ilang mga anak sa pagsulod sa bug-os panahong ministeryo. Si Philo, nga nagdako niining matanga sa panimalay, miingon: “Daghan ang nagtambag kanako sa pagpadayon sa akong edukasyon, sa pagpaningkamot alang sa sekular nga kaugmaon. Apan ang akong mga ginikanan nagtabang kanako sa paghimog mas maalamong pagpili. Ila akong giingnan nga kon buot ko gayod nga maseguro ang akong kaugmaon, ang akong unang hatagag pagtagad angay mao ang pag-ugmad ug usa ka relasyon uban kang Jehova.”
Usa ka batan-ong babaye nga ginganlag Thamar nagpasidungog usab sa iyang payunir nga pag-alagad ngadto sa panig-ingnan ug mga paningkamot sa iyang mga ginikanan. Siya miingon: “Dili nako matino kon kanus-a ko naugmad ang espirituwal nga panghunahuna sa kinabuhi, apan ako nahibalo nga ako wala ipanganak nga aduna niana. Ang batasan sa akong mga ginikanan sa regular nga paggawas sa pag-alagad sa kanataran ug sa pagtambong sa mga tigom, ingon man ang ilang halalom nga gugma sa kamatuoran, nakatabang ug dako kanako sa pag-ugmad sa akong espirituwal nga panglantaw.”
Pagpabilin sa Imong Desisyon
Human nga ang usa ka tawo mosulod sa payunir nga pag-alagad, ang paglahutay diha niana magpaarang kaniya sa pag-ani sa bug-os nga kaayohan nianang maalamong desisyon. Ang daghang praktikal nga tambag mahimong ikahatag alang niana. Pananglitan, ang mga payunir makakat-on ug maayo kon unsaon sa pag-eskedyul sa ilang panahon sa paghimo niana nga mabungahon kutob sa mahimo. Bisan pa, ang labing hinungdanong butang nagpabilin sa relasyon sa indibiduwal uban kang Jehova ug sa Iyang organisasyon.
Nalangkit niini mao ang usa ka mainampoong tinamdan. “Sa dihang nakadangat ako sa kamatuoran, gusto ko kaayong magpayunir,” miingon si Cor. Apan, giingnan siya sa iyang amahan nga kinahanglang taposon una niya ang usa ka kurso diha sa Agricultural University. Human niadto, si Cor misugod sa pagpayunir. Sa ulahi siya nagminyo, ug ang iyang asawa miduyog kaniya sa payunir nga buluhaton. Sa dihang siya namabdos, giatubang niya ang posibilidad sa paghunong sa payunir nga buluhaton. “Miampo ako kanunay kang Jehova ug gibutang diha sa iyang atubangan ang tinguha sa akong kasingkasing sa pagpadayon sa pagpayunir,” miingon si Cor. Sa kataposan nakakita si Cor ug matang sa trabaho nga nagpaarang kaniya sa pagpayunir samtang nagaatiman ug pamilya.
Ang pagkakontento sa materyal nga mga panginahanglan maoy laing butang nga kasagarang makatabang sa usa ka tawo sa pagpabilin diha sa payunir nga pag-alagad. Si apostol Pablo misulat: “Himoa nga ang inyong paagi sa kinabuhi mahigawas sa pagkamahigugmaon sa salapi, samtang kamo magmakontento sa presenteng mga butang nga nabatonan. Kay siya miingon: ‘Dili ko gayod kamo pagahikabsan ni kamo pagabiyaan.’” (Hebreohanon 13:5) Ang pagkakontento sa presenteng mga butang nga nabatonan nakatabang kang Harry ug Irene sa pagpadayon sa pagpayunir. Si Irene, kinsa buta, usa ka payunir sa walo na ka tuig. “Wala gayod namo isipa ang among kahimtang sa panalapi ingong usa ka problema,” matud niya. “Nag-amping lang kami sa dili pagkuhag wala kinahanglanang pinansiyal nga mga palas-anon. Kanunay namong giihap ang bili. Ang among kinabuhi simple kanunay, apan makapahimuot kaayo, ug kini puno sa dagayang mga panalangin.”
Daghang Kalipay ug mga Panalangin
Sa pagtan-aw ug balik sa kapig siyam ka tuig sa pagpayunir, si Thamar miingon: “Ikaw masuod kaayo kang Jehova, sama nga iya mismong gikuptan ang imong kamot.” (Salmo 73:23) May pipila ka pagsulay usab nga mosantop sa hunahuna. “Ang kaugalingon ko nga mga kahuyangan duyog niadtong sa uban nagsamok kanunay kanako,” midugang si Thamar. “Dugang pa, ginatan-aw nako ang mga igsoong lalaki ug babaye nga mipili sa mas mabungahong paagi sa kinabuhi, ug ang ilang napili daw maanindot samtang ako atua sa gawas naglakaw gikan sa ganghaan ngadto sa ganghaan diha sa ulan ug katugnaw. Apan sa kahiladman sa akong kasingkasing, dili ko gayod ikabaylo ang akong dapit. Unsa pa gawas sa pagpayunir ang makahatag sa maong kalipay, sa maong espirituwal nga katagbawan, ug sa maong mga panalangin?” Pabilhan ba nimog dako ang sama nga kalipay ug mga panalangin?
Sanglit ang mga payunir nagagugol ug dakong panahon diha sa Kristohanong ministeryo, sila anaa sa kahimtang sa pagtabang sa daghang indibiduwal nga makabaton ug kahibalo sa kamatuoran sa Bibliya. Si Harry ug Irene, nga gihisgotan ganiha, miingon: “Adunay daghang pribilehiyo ang mabatonan sa organisasyon ni Jehova, apan ang pagtabang sa usa ka bag-ong interesado nga mouswag ngadto sa punto nga mahimong usa ka alagad ni Jehova mao ang labing dako sa tanan.”
Maayong pagkapahayag sa laing payunir ang mga butang sa dihang siya miingon: “Ang mga pulong sa Proverbio 10:22 nakitang tinuod sa akong bahin: ‘Ang panalangin ni Jehova—mao ang makapadato, ug wala siyay gidugang nga kasakit niana.’ Sa makadaghan, kining tekstoha natuman kanako sulod sa katuigang ako nag-alagad kang Jehova.”
Mga ginikanan, ginasilsil ba ninyo ang tinguha sa pagpayunir diha sa inyong mga anak? Mga payunir, naningkamot ba kamo nga mapukaw kining tinguhaa diha sa uban? Mga ansiano, gipaluyohan ba ninyo ang mga payunir sa inyong kongregasyon ug nagatabang sa pagtukod sa espiritu sa pagpayunir diha sa uban? Hinaot nga dugang ug dugang katawhan ni Jehova ang matandog sa pagpangab-ot alang sa maong dagayang mga panalangin samtang sila makigbahin sa payunir nga pag-alagad.