“Mahimo Kang Usa ka Maayong Payunir!”
1. Unsay gibati sa usa ka sister bahin sa iyang pagpayunir?
1 “Walay laing buluhaton nga nakahatag kanakog dakong katagbawan o magantihon kaayo sa espirituwal.” Kanay gisulti ni Kathe B. Palm. Daghang katuigan nga siya makugihong nagpayunir sa tibuok Chile, South America. Sa paghunahuna bahin sa magantihong kinabuhi niadtong anaa sa bug-os-panahong pag-alagad, tingali may miingon kanimo: “Mahimo kang usa ka maayong payunir!”
2. Ipatin-aw kon nganong ang espirituwal nga mga kalihokan makahatag ug tinuod nga katagbawan.
2 Usa ka Matagbawong Paagi sa Pagkinabuhi: Ang atong Sulondan, si Jesus, nakakaplag ug tinuod nga kalipay sa pagbuhat sa kabubut-on sa iyang Amahan. (Juan 4:34) Busa, sinsero niyang gitudloan ang iyang mga sumusunod nga mabatonan nila ang tinuod nga katagbawan kon sila makigbahin sa mga kalihokan nga nalangkit sa pagsimba kang Jehova. Matagbawon kita kon puliki kita sa mga buluhaton nga giuyonan ni Jehova. Dugang pa, kon gamiton nato ang mas daghang panahon, kusog, ug kahinguhaan sa pagtabang sa uban, mosamot ang atong kalipay.—Buh. 20:31, 35.
3. Unsang kalipay ang atong masinati kon mogugol kitag mas daghang panahon sa pagsangyaw?
3 Kon mas daghang panahon ang atong igugol sa pagsangyaw, mas daghang kahigayonan nga kita malipay sa pagsugod ug pagdumalag mga pagtuon sa Bibliya. Bisan pag daghang tagbalay daw dili matinagdanon, atong makita nga daghan diay ang interesado sa dihang makabaton na kitag dugang eksperyensiya ug kahanas sa ministeryo. Magamit sa mga payunir ang ilang makat-onan sa Tunghaan sa Payunir nga Pag-alagad nga ilang matambongan human sa usa ka tuig nga pagpayunir. (2 Tim. 2:15) Kon kita molahutay, makatanom gayod kitag mga binhi sa kamatuoran nga mahimong mamunga sa kaulahian.—Eccl. 11:6.
4. Unsay angayng hunahunaon sa mga batan-on nga hapit nang mograduwar?
4 Mga Batan-on: Samtang nagtungha pa sa hayskul, gihunahuna na ba nimo ang imong kaugmaon? Tingali okupado kaayo karon ang imong eskedyul sa mga buluhaton sa tunghaan. Apan, unsaon nimo paggamit ang imong panahon human sa imong graduwasyon? Imbes mangab-ot ug bug-os-panahong sekular nga trabaho, nganong dili himoong tumong ang pagkahimong regular payunir? Ang mga kahanas nga imong makat-onan—pagsangyaw sa mga tawong lainlain ug kagikan, pagbuntog sa personal nga mga babag, pagdisiplina sa kaugalingon, ug ang kahanas sa pagpanudlo—mapuslanon sa tibuok nimong kinabuhi.
5. Sa unsang paagi ang mga ginikanan ug ang kongregasyon makadasig sa pagpayunir?
5 Mga ginikanan, inyo bang gitabangan ang inyong mga anak nga himoong tumong ang bug-os-panahong pag-alagad? Ang inyong mga pulong ug panig-ingnan makatabang gayod kanila sa pag-una sa intereses sa Gingharian. (Mat. 6:33) Si Ray, nga nagpayunir human mograduwar sa hayskul, miingon: “Gibati kanunay ni Mama nga ang pagpayunir moresulta sa labing matagbawong pagkinabuhi.” Ang tanan sa kongregasyon makadasig sa pagpayunir pinaagi sa ilang mga pulong ug pagpaluyo. Si Jose, nga taga-Espanya, nag-ingon: “Ang mga igsoon sa among kongregasyon nag-isip nga ang pagpayunir mao ang labing maayong karera alang sa mga batan-on. Tungod sa ilang mga komento ug pagpabili sa pagpayunir uban sa ilang mga tabang, wala ko maglisod sa pagsugod sa pagpayunir.”
6. Unsay atong buhaton kon karon wala kitay tinguha sa pagpayunir?
6 Pagbuntog sa mga Babag: Apan unsa man kon moingon ka, ‘Wala koy tinguha nga magpayunir.’ Kon mao kanay imong gibati, iampo kana kang Jehova ug sultihi siya, ‘Wala ko mahibalo kon ang pagpayunir alang ba kanako, apan buot kong buhaton kon unsay makapahimuot kanimo.’ (Sal. 62:8; Prov. 23:26) Dayon pangayog giya sa iyang Pulong ug sa iyang organisasyon. Daghang regular payunir ang nagsugod ingong mga oksilyare payunir, ug tungod sa kalipay nga ilang nasinati, ilang gihimong karera ang bug-os-panahong pag-alagad.—Sal. 34:8.
7. Sa unsang paagi atong mabuntog ang pagduhaduha nga makab-ot ang gikinahanglang 70 ka oras matag bulan?
7 Komosta kon dili ka segurado nga imong makab-ot ang gikinahanglang 70 ka oras matag bulan? Nganong dili makigsulti sa mga payunir nga sama nimog kahimtang? (Prov. 15:22) Dayon paghimog lainlaing posibleng mga eskedyul. Madiskobrehan nimo nga sayon ra diay ang pagpalit ug panahon alang sa ministeryo gikan sa dili-kinahanglang mga kalihokan.—Efe. 5:15, 16.
8. Nganong angayng timbangtimbangon matag karon ug unya ang atong kahimtang?
8 Susiha Pag-usab ang Imong Kahimtang: Ang personal nga kahimtang sagad nagakausab. Maayong timbangtimbangon matag karon ug unya ang imong kahimtang. Pananglitan, hapit ka na bang moretiro sa trabaho? Si Randy, kinsa sayong miretiro, miingon: “Tungod sa maong desisyon, ako nakasugod sa pagpayunir kauban sa akong asawa, ug nakahigayon mi sa pag-alagad sa dapit diin mas dako ang panginahanglan. Daghang panalangin ang akong nadawat tungod sa akong desisyon, apan ang labing dakong panalangin mao ang maayong tanlag.”
9. Unsay angayng susihon sa mga magtiayon?
9 Human masusi sa pipila ka magtiayon ang ilang kahimtang, ilang nasayran nga sila dili kinahanglang manarbaho sa bug-os panahon. Tinuod, kinahanglan tingali nga payanohon sa pamilya ang ilang pagkinabuhi, apan takos kini sa ilang pagsakripisyo. Si John, kansang asawa bag-o lang miresayn sa iyang bug-os-panahong trabaho aron makapalapad sa iyang ministeryo, miasoy: “Mas malipayon ko karon nga ang akong asawa puliki sa pag-alagad kang Jehova sa matag adlaw.”
10. Unsay makatukmod sa mga Kristohanon nga magpayunir?
10 Usa ka Pasundayag sa Gugma ug Pagtuo: Ang labing hinungdanong buluhaton nga gipabuhat ni Jehova kanato mao ang pagsangyaw. Duol nang laglagon kining daang sistema, ug kadto lamang nagtawag sa ngalan ni Jehova ang maluwas. (Roma 10:13) Kon kita nahigugma gayod kang Jehova ug nag-apresyar sa iyang gihimo alang kanato, kita madasig sa pagtuman sa gisugo sa iyang Anak nga magmasiboton sa pagsangyaw. (Mat. 28:19, 20; 1 Juan 5:3) Gawas pa, ang pagtuo nga kita nagkinabuhi na gayod sa kataposang mga adlaw magtukmod kanato sa pagsangyaw kutob sa atong maarangan samtang may panahon pa, imbes pahimuslan sa bug-os ang kalibotan.—1 Cor. 7:29-31.
11. Unsay angay natong pag-isip kon may moingon kanato nga kita mahimong maayong payunir?
11 Ang pagregular payunir dili lamang paggugol ug daghang oras sa pagsangyaw; kini maoy pagpahayag sa atong debosyon sa Diyos. Busa kon may moingon kanimo nga mahimo kang usa ka maayong payunir, isipa kana nga kadungganan. Pamalandonga ug iampo nga makaduyog ka niadtong mga nakigbahin niining makapatagbawng matang sa pag-alagad.
[Blurb sa panid 4]
Mga ginikanan, inyo bang gitabangan ang inyong mga anak nga himoong tumong ang bug-os-panahong pag-alagad?
[Blurb sa panid 5]
Ang labing hinungdanong buluhaton nga gipabuhat ni Jehova kanato mao ang pagsangyaw.