Karon Na ang Panahon sa Pagsangyaw!
1. Nganong karon na ang panahon sa pagsangyaw?
1 “Kahadloki ninyo ang Diyos ug ihatag kaniya ang himaya.” Pinaagi sa pagtultol sa manulonda, kining mensahea gimantala “ngadto sa matag nasod ug tribo ug pinulongan ug katawhan.” Ngano? ‘Kay ang takna sa paghukom sa Diyos miabot na.’ Karon, kita nagkinabuhi sa maong “takna sa paghukom,” nga matapos inigkalaglag sa presenteng sistema sa mga butang. Hinungdanon nga ang katawhan ‘mosimba sa Usa nga maoy naghimo sa langit ug sa yuta ug sa dagat ug sa mga tuboran sa mga tubig.’ Walay laing buluhaton nga ginabuhat karon ang ikatandi sa pagkahinungdanon o pagkadinalian sama sa pagmantala sa “walay kataposang maayong balita.” Oo, karon na ang panahon sa pagsangyaw!—Pin. 14:6, 7.
2. Sa unsang paagi gipasundayag sa mga alagad ni Jehova nga ilang nasabtan ang pagkadinalian sa panahon nga atong gikinabuhian?
2 Sulod sa miaging napulo ka tuig, ang mga alagad ni Jehova naggugol ug duolan sa 12 ka bilyong oras sa buluhatong pagsangyaw sa Gingharian ug paghimog tinun-an. Daghan ang nagpasibo sa ilang pagkinabuhi aron makapakigbahin sa mas bug-os pa sa espirituwal nga pagpangani. (Mat. 9:37, 38) Pananglitan, niadtong 2004, dunay aberids nga kapin sa 850,000 ka magmamantala nga nag-alagad ingong mga payunir matag bulan. Alang sa mga regular payunir, sila kinahanglang mogugol ug aberids nga 70 ka oras matag bulan sa buluhatong pagsangyaw. Para sa mga oksilyare payunir, ang kinahanglanon maoy 50 ka oras.
3. Unsang mga pagpasibo ang subsob nga ginahimo sa mga magmamantala aron makapayunir?
3 Kon Unsay Gikinahanglan Aron Makapayunir: Kay nahibalo nga “ang panahong nabilin mubo na,” ang mga payunir naningkamot sa paghupot sa ilang kinabuhi nga yano. (1 Cor. 7:29, 31) Nangita silag mga paagi sa pagpakunhod sa ilang mga galastohan aron makagahin lang sila ug diyutayng oras sa sekular nga trabaho. Pananglitan, ang pipila namalhin ngadto sa mas gagmayng mga balay. Gidispatsar sa uban ang wala-kinahanglanang mga kabtangan. (Mat. 6:19-21) Kanunay usab nilang menosan ang personal nga mga kalihokan. Kining tanan ginahimo nga ang tumong mao ang paggahin ug dugang panahon ug pagtagad sa ministeryo. (Efe. 5:15, 16) Uban sa pagkamalahutayon, nagasakripisyo-sa-kaugalingon nga espiritu, ug mainampoong pagsalig kang Jehova, daghang magmamantala ang nakaarang sa paghimog praktikal nga eskedyul nga magtugot kanila sa pagpayunir.
4. Unsang praktikal nga mga lakang ang makatabang kanimo aron makapayunir?
4 Makapayunir ka ba? Nganong dili pangutan-on ang malamposong mga payunir kon giunsa nila paghimo kana? Pakig-uban kanila sa ministeryo sa kanataran, ug imong masinati ang ilang kalipay. Tun-i ang mga artikulo bahin sa pagpayunir nga migula sa atong mga publikasyon. Paghimog makab-ot nga mga tumong nga magsilbing tikanganan aron makapayunir. Kon dunay mga babag nga sa pagkakaron nagpugong kanimo sa pagpayunir, iampo kini kang Jehova, ug hangyoa siya sa pagtabang kanimo sa pagsulbad niini.—Prov. 16:3.
5. Sa unsang paagi ang pagpayunir makatabang kanato sa pagpauswag sa atong mga kahanas sa ministeryo?
5 Mga Panalangin ug mga Kalipay: Ang pagpayunir makapauswag sa atong kahanas sa paggamit sa Pulong sa Diyos, nga sa baylo mas makapalipay kanato. “Mapuslanon gayod ang paggamit sa Pulong sa Diyos sa hustong paagi,” matod pa sa usa ka batan-ong payunir nga sister. “Kon payunir ka, kanunay kang mogamit ug Bibliya. Karon kon mamalaybalay ko, makahunahuna dayon kog mga teksto nga haom sa matag tagbalay.”—2 Tim. 2:15.
6. Unsang pagbansay ang ikahatag sa pagpayunir?
6 Ang pagpayunir magtudlo usab kanato ug daghang mapuslanong mga kahanas nga makapauswag sa atong kinabuhi. Kini makatabang sa mga batan-on kon unsaon pagbahinbahin sa ilang panahon sa maalamong paagi, kon unsaon pagdumala sa mga galastohan, ug kon unsaon pagpakiglabot sa mga tawo. Daghan ang nakapauswag sa ilang espirituwal nga panglantaw sa kinabuhi tungod sa pagpayunir. (Efe. 4:13) Dugang pa, ang mga payunir subsob adunay talagsaong pribilehiyo nga makasinati sa tabang ug panalangin ni Jehova.—Buh. 11:21; Filip. 4:11-13.
7. Sa unsang paagi ang pagpayunir makatabang kanato nga mas masuod kang Jehova?
7 Lagmit ang usa sa kinadak-ang panalangin sa pagpayunir mao nga kini motabang kanato nga mas masuod kang Jehova. Kini makapalig-on kanato latas sa mga pagsulay. Usa ka sister nga sulod sa usa ka yugto nag-antos ug grabeng kalisdanan miingon: “Ang suod nga relasyon nga akong naugmad uban kang Jehova pinaagi sa pagpayunir mao ang nakatabang kanako sa paglahutay.” Siya midugang: “Nalipay gayod ako nga akong gigugol ang akong kinabuhi sa pag-alagad kang Jehova sa bug-os panahon. Kini nakapaarang kanako sa paggamit sa akong kinabuhi diha sa mga paagi nga abi nakog dili nako mahimo.” (Buh. 20:35) Hinaot masinatian usab nato ang dagayang mga panalangin samtang buhaton nato ang kutob sa atong maarangan diha sa labing hinungdanong buluhaton nga pagsangyaw.—Prov. 10:22.