Makaregular Payunir Ka Ba?
1. Sama kang apostol Pablo, unsang dakong kahigayonan ang mahimo natong pahimuslan?
1 Sa dihang nabuksan kang apostol Pablo ang “usa ka dakong pultahan nga nagatultol ngadto sa kalihokan,” maikagon niyang gipahimuslan ang pagpalapad sa iyang ministeryo bisan pag daghan ang magsusupak. (1 Cor. 16:9) Karon, maikagong gipahimuslan sa mga 642,000 ka magmamantala sa Gingharian sa tibuok kalibotan ang susamang kahigayonan pinaagi sa pagregular payunir.
2. Nganong maayong susihon nato ang atong mga kahimtang matag karon ug unya?
2 Mausab ang mga Kahimtang: Bisan tuod ang presenteng mga kahimtang mahimong maglimite sa atong kalihokan, mausab ra ang mga kahimtang. Busa, maayong susihon nato matag karon ug unya ang atong tagsatagsa ka kahimtang ug dili paaboton ang labing maayong kahigayonan. (Eccl. 11:4) Ikaw ba usa ka batan-on nga bag-o rang migraduwar sa hayskul? Ikaw ba usa ka ginikanan nga may mga anak nga hapit nang moeskuyla? Hapit ka na bang moretiro sa imong trabaho? Ang maong mga kausaban maghatag kanimog libreng mga panahon ug busa makahimo ka sa pagregular payunir. Ang usa ka sister nga may mga problema sa panglawas sa miagi nakahukom sa pagpayunir sa edad nga 89. Ngano man? Kay wala na man siya maospital sa kapig usa ka tuig, gibati niya nga makapayunir na siya.
3. Unsang mga pagpasibo ang gihimo sa pipila aron makaregular payunir?
3 Sa kahimtang ni Pablo, ang una gayod niyang tuyo mao ang pagduaw sa mga igsoon sa Corinto. Apan, iyang gipasibo ang iyang mga plano alang sa maayong balita. Daghang regular payunir karon ang mihimog ubay-ubayng mga pagpasibo aron makapayunir. Gipayano sa uban ang ilang kinabuhi aron bisag partaym lang ang ilang trabaho, matagan-an ra gihapon ang ilang mga panginahanglan. Sila nagmalipayon sa ilang pribilehiyo sa pag-alagad. (1 Tim. 6:6-8) Ang pipila ka magtiayon mihimo usab ug mga kausaban aron ilang matagan-an ang ilang mga panginahanglan bisag ang bana ray nagtrabaho aron makapayunir ang asawa.
4. Unsay atong mahimo kon dili kita segurado kon ato bang makab-ot ang kinahanglanong oras?
4 Ayaw dayon paghunahuna nga dili ka makapayunir kay basig dili ka makakab-ot sa kinahanglanong oras. Kapin lag diyutay sa duha ka oras kada adlaw ang kinahanglan mong kuhaon. Kon dili ka segurado nga imong mahimo kana, sulayi una ang pag-oksilyare payunir ug usa o duha ka bulan nga ang imong tumong mao ang pagkab-ot sa 70 ka oras. Pinaagi niini mapahimuslan mo ang kalipay sa pagpayunir. (Sal. 34:8) Pakigsultihi ang mga payunir. Lagmit sila nakabuntog usab ug mga suliran nga susama sa imoha. (Prov. 15:22) Pag-ampo kang Jehova nga iya untang panalanginan ang imong mga paningkamot sa pagpalapad sa imong ministeryo.—1 Juan 5:14.
5. Nganong usa ka mapuslanong buluhaton ang pagregular payunir?
5 Usa ka Mapuslanong Buluhaton: Ang pagregular payunir magdalag daghang panalangin. Pinaagi niini imong mabatonan ang mas dakong kalipay tungod kay mas daghang panahon ang imong gigugol sa pag-alagad. (Buh. 20:35) Ang pagpayunir magpauswag sa imong katakos sa paggamit sa Pulong sa Diyos sa hustong paagi. (2 Tim. 2:15) Ikaw makabaton ug daghang kahigayonan sa pagpahimulos sa pagpaluyo ni Jehova. (Buh. 11:21; Filip. 4:11-13) Ang pagpayunir motabang usab kanimo sa pag-ugmad sa diyosnong mga hiyas, sama sa pagkamalahutayon, ug ikaw mas masuod kang Jehova. (Sant. 4:8) Busa, makaregular payunir ka ba?