Regular Payunir Ka ba Kaniadto?
1. Unsang pribilehiyo ang nasinatian sa daghan, apan unsay kinahanglang himoon sa uban?
1 Sa miaging mga tuig, linibo ang nakapribilehiyo sa “pagpanudlo ug sa pagpahayag sa maayong balita” ingong bug-os panahong mga ministro. (Buh. 5:42) Apan ang pipila kinahanglang moundang tungod sa lainlaing rason. Kon regular payunir ka kaniadto, imo bang nasusi ang imong presenteng kahimtang aron masuta kon ikaw makapayunir na usab?
2. Nganong angayng susihon sa kanhing mga payunir ang ilang presenteng kahimtang?
2 Nausab nga mga Kahimtang: Tingali wala na ang hinungdan sa imong pag-undang sa pagpayunir. Pananglitan, kon ikaw miundang tungod kay dili nimo makab-ot ang 90 oras kada bulan, makabalik ka na ba karon sanglit 70 oras na lang ang kab-otonon? Mas menos na ba ang imong trabaho o mga responsabilidad sa pamilya kon itandi sa panahon nga ikaw miundang? Usa ka sister nga miundang tungod sa dili maayong panglawas ang nakabalik sa pagpayunir sa edad nga 89. Wala na siya maospital sa kapin nag tuig ug iyang gibati nga makapayunir na pag-usab!
3. Sa unsang paagi ang mga membro sa pamilya magtinabangay aron usa kanila ang makapayunir?
3 Tingali dili ka payunir kaniadto, apan usa ka membro sa inyong pamilya ang miundang sa pagpayunir aron atimanon ang laing membro sa pamilya, sama sa tigulang nga ginikanan. (1 Tim. 5:4, 8) Kon mao, ikaw ba o ang uban sa pamilya makahatag ug dugang tabang? Nganong dili kini hisgotan ingong pamilya? (Prov. 15:22) Kon ang mga membro sa pamilya magtinabangay aron usa kanila ang makapayunir, ang tanan mobati nga sila nakatampo.
4. Komosta kon dili ka makabalik sa pagpayunir sa pagkakaron?
4 Ayaw kaluya kon ang imong presenteng kahimtang dili magtugot kanimo sa pagpayunir pag-usab. Ang imong pagkaandam makapalipay kang Jehova. (2 Cor. 8:12) Gamita ang imong mga nakat-onan sa pagpayunir kaniadto sa imong pag-alagad karon. Iampo ang imong tinguha, ug magmaalisto sa kahigayonan nga ipasibo ang imong kahimtang. (1 Juan 5:14) Tingali sa ngadtongadto si Jehova magbukas kanimo sa ‘usa ka dakong pultahan sa kalihokan’ aron matagamtam mo pag-usab ang kalipay sa pagregular payunir!—1 Cor. 16:9.