Makaapil ba Ikaw Pag-usab sa mga Ranggo sa Payunir?
1 Sa miaging lima ka tuig, linibo sa regular nga mga payunir ang nakakaplag nga kinahanglang mobiya sa mga ranggo sa payunir. Usa ba ikaw kanila? Kon ang kahimsog, mga suliran sa panalapi, o mga obligasyon sa pamilya mao ang nakapahunong kanimo, nausab na ba ang imong mga kahimtang? Mahimo ba nimo ang pipila ka pagpasibo aron makapayunir pag-usab? Nagahunahuna ka ba sa pag-aplay pag-usab?
2 Ingon sa imong nasayran, ang maayong kahikayan gikinahanglan kon buot mong molampos ingong usa ka payunir. Samtang wala kaayoy panahon alang sa lulinghayaw, ang mubong mga panahon sa paglingawlingaw nga imong gitagamtam maoy sagad matagbawon. (Prov. 19:17; Buh. 20:35) Pinaagig pagpabiling puliki sa pag-alagad, ikaw napanalipdan gikan sa pag-una-sa-kaugalingon nga paagi sa kinabuhi sa kalibotan. Si Jehova nagsaad nga himoon ka niyang dato sa espirituwal kon imong ibutang pag-una ang intereses sa Gingharian. Segurado gayod nga ikaw makasinatig tiunay nga kalipay ug katagbawan pinaagig bug-os-kasingkasing nga pag-alagad kang Jehova.—Prov. 10:22; Col. 3:23, 24.
3 Ang bug-os panahon bang ministeryo usa ka pribilehiyo nga bukas lamang ngadto sa pipila ka espesyal nga tawo? Dili—kana mabatonan sa tanan. Tungod sa atong panumpa sa dedikasyon, ang matag Kristohanon angayng magahatag ug ugdang nga pagpamalandong sa bug-os panahong pag-alagad gawas kon ang mga kahimtang magpa-imposible niana.—Mar. 12:30.
4 Kon ang imong kahimsog ug Kasulatanhong mga kaakohan dili magtugot kanimo sa pagpayunir karon, maseguro mo nga si Jehova nahibalo ug makasabot. Siya magaganti bisan unsa man ang imong maarangan sa pagbuhat. (1 Cor. 4:2; 2 Cor. 8:12) Kon, ugaling, maorag posible na karon alang kanimo sa pagpayunir pag-usab, nganong dili moduol sa nagadumalang magtatan-aw ug mangayog usa ka aplikasyon?
5 Makatabang ba ang Imong Pamilya? Hayan mibiya ka sa pagpayunir tungod kay gikinahanglan nimong atimanon ang mga obligasyon sa pamilya. Posible kaha nga ang ubang mga membro sa pamilya anaa na karon sa posisyon nga makaabag nga magpaarang nimo sa pagsulod pag-usab sa payunir nga buluhaton?
6 Ang maayong kooperasyon ug diyutayng dugang paningkamot sa bahin sa ubang mga membro sa pamilya hayan magpaposible niini. Ang panabang mahimong pinaagig pag-abag sa mga galastohon o transportasyon, maingon man sa regular nga mga kahikayan sa duyog nga pagbuhat diha sa pagsangyaw. Kon ang mga kahimtang dili magtugot kanimo sa pagbaton niining maong pribilehiyo pag-usab, tingali ang maong tabang ikahatag sa laing membro sa pamilya nga makahimo niana.
7 Nganong dili hisgotan kining butanga ingong usa ka pamilya? Ang mga sangpotanan hayan maayo kon inyong himoon kana ingong hiniusang proyekto sa pamilya. Kon ang laing payunir ikadugang sa listahan, ang tibuok panimalay tukmang mobati nga sila nagapakigbahin. Kanang maong mahinatagong espiritu magpasuod pa sa pamilya sa tingob sa espirituwal nga paagi.—Luc. 6:38; Filip. 2:2-4.