Gikinahanglan ang Dugang mga Igsoon sa Buluhatong Payunir
1 Kita giawhag ni Pablo nga “kanunay may daghang buhaton diha sa buluhaton sa Ginoo.” (1 Cor. 15:58) Alang sa daghan, nagakahulogan kinig pagsulod sa payunir nga pag-alagad. Sulod sa yugto gikan sa Septiyembre, 1995 hangtod sa Marso, 1996, kapin sa 1,200 ang nadugang sa mga ranggo sa payunir sa Pilipinas! Sa walay duhaduha daghan pa ang moaplay sa pagka-Septiyembre 1, 1996, ang sinugdanan sa bag-ong tuig sa pag-alagad!
2 Sa pagkakaron ang mas daghang nagaalagad ingong mga payunir niini nga nasod maoy mga sister. (Sal. 68:11) Pagkamalipayon sa kongregasyon kon dugang pang mga igsoong lalaki ang moapil sa mga ranggo sa bug-os panahong mga alagad! (Sal. 110:3) Masabot nga daghang igsoong lalaki ang nagaatiman sa bug-at nga mga obligasyong sekular ug sa pamilya. Ang uban usab nagahago pag-ayo sa pag-atiman sa espirituwal nga mga panginahanglan sa kongregasyon. Gidayeg nato kining mga tawhana kinsa naningkamot sa ilang kaugalingon alang sa Gingharian.—1 Tim. 4:10.
3 Bisan pa, makapayunir ba ang dugang kaninyo mga igsoong lalaki? Kon nagapayunir ang imong asawa, makaduyog ka ba kaniya? Kon miretiro ka na, dili ka ba mouyon nga wala nay mas makapatagbawng paagi sa paggamit sa imong panahon kay sa bug-os panahong ministeryo? Kon mao pay imong pagtapos sa hayskul, gihatagan na ba nimog seryoso ug mainampoong pagtagad ang pagsulod sa pribilehiyo sa payunir nga pag-alagad ingong usa ka tikanganan ngadto sa dugang pang mga pribilehiyo sama sa pag-alagad sa Bethel?—Efe. 5:15-17.
4 Usa ka igsoong lalaki mibaligya sa iyang mauswagong negosyo ug mitrabahog di-bug-os panahon aron siya makapayunir. Pinaagi sa iyang maayong pagpanguna, tulo sa iyang upat ka anak nahimong mga payunir pagkatapos gayod sa ilang pagtungha. Ang ikaupat naghinamhinam nga moduyog kanila. Kining maong igsoon ug iyang pamilya madagayaong gipanalanginan.
5 Bukas ang Dakong Pultahan: Ang payunir nga pag-alagad magabukas sa “usa ka dakong pultahan nga nagatultol ngadto sa kalihokan.” (1 Cor. 16:9) Ang mga payunir nga igsoong lalaki mahimong magamit pag-ayo sa kongregasyon. Ang masibotong kalihokan sa kanataran magadugang sa ilang espirituwal nga kalig-on ug makaamot sa ilang espirituwal nga pag-uswag. Ang payuniring magabukas sa dalan ngadto sa dugang mga pribilehiyo sa pag-alagad. Mahimong tikanganan kana alang sa pag-alagad sa Bethel. Human sa usa ka tuig nga payuniring, anaa ang panalangin sa pagtambong sa Pioneer Service School. Ang ulitawong ministeryal nga mga alagad ug mga ansiyano makapangab-ot nga makatambong sa Ministerial Training School. Oo, ang payunir nga ministeryo magbukas sa ganghaan ngadto niining mas dakong mga pribilehiyo sa pag-alagad diha sa organisasyon ni Jehova.
6 Ang mga igsoong lalaki nga makahikay sa ilang mga kalihokan aron makaambit sa regular payunir nga pag-alagad mahimong makatagamtam sa mas dakong kalipay nga nagasumikad sa napauswag nga paghatag.—Buh. 20:35.