Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Disyembre 26, 2005. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Nobyembre 7 hangtod sa Disyembre 26, 2005. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, p. 36-7.]
MGA HIYAS SA PAGPANULTI
1. Unsay atong mahimo aron sa pagseguro nga ang atong tambag gihatag “pinasukad sa gugma”? (Filem. 9) [be p. 266] Paneguroon nato nga ang atong isulti lig-ong gipasukad sa Pulong sa Diyos ug nagsumikad sa tinuod nga kabalaka alang sa atong tigpatalinghog. Ang atong sinultian kinahanglang mahigugmaon ug mataktikanhon, kay kini magbukas sa kasingkasing ug dili makapahilayo niadtong atong gipaningkamotang madasig nga molihok. Ang sinserong komendasyon alang sa maayong mga butang nga ginahimo sa atong mga igsoon diha sa pag-alagad sa Diyos motabang kanila sa pagbating gipabilhan ug busa sila mas andam nga modawat sa atong tim-os nga pangaliyupo. (1 Tes. 1:2-8; 2 Tes. 1:3-5)
2. Sa unsang mga paagi kita “makatambag pinaagi sa makapahimsog nga pagtulon-an”? (Tito 1:9) [be p. 266 par. 5–267 par. 1] Kinahanglang himoon nato ang Pulong sa Diyos nga gahom sa atong pangaliyupo, dili ang personal nga opinyon o hinimog-tawo nga mga lagda. Ang pagtala sa mga kaayohan sa pagpadapat sa tambag sa Bibliya ug sa mga sangpotanan sa dili pagsunod niana makapadani. Nga ang atong pangatarongan lig-ong gipasukad sa Kasulatan, kinahanglang ipatin-aw nato pag-ayo ang Kasulatanhong sukaranan sa kon unsay angayng buhaton ug kon unsaon pagbuhat kana.
3. Nganong hinungdanon nga himoong makapadasig ang atong mga pakigpulong, ug sa unsang paagi mahimo nato kini? [be p. 268 par. 1-3, kahon] Ang mga tawo gipit-osan pag-ayo sa kalibotan, ug daghan ang mibatig kaminghoy. Kinahanglan nga ang kongregasyon maoy usa ka dapit nga ilang kadangpan ug makapalig-on kanila. (Isa. 32:3) Busa, kita kinahanglang mosulti sa paagi nga makapadasig ug makahatag ug kusog. Ang atong tumong mao ang pagpalig-on ug pagtabang sa uban nga makabaton ug paglaom ug kusog gikan kang Jehova ug sa iyang mga tagana. (Job 16:5; Roma 15:13)
4. Sa pagsundog kang Moises, sa unsang paagi makapalig-on ang atong pagtabang sa uban sa paghinumdom sa nahimo ni Jehova alang sa iyang katawhan? (Deut. 3:28; 31:1-8) [be p. 268 par. 5–p. 269 par. 2] Ang pagtabang sa atong mga igsoon sa paghinumdom kon unsay nahimo ni Jehova sa iyang katawhan, sama sa paghinumdom niini ni Moises, makatabang kanila sa pagkabaton ug kusog ug magpahinumdom kanila sa pagkakasaligan sa mga saad ni Jehova. (Jos. 23:14) Atong mapalig-on ang uban kon atong isentro ang atong pagtagad diha sa mga kasinatian gikan sa Kasulatan nga nagpasiugda sa pagbantay ni Jehova sa iyang katawhan. (Buh. 4:1–5:42)
5. Nganong ang pagsulti nga malipayon mahitungod sa ginabuhat ni Jehova karon ug sa kon unsay iyang pagabuhaton sa umaabot makapadasig sa atong mamiminaw? [be p. 270-1] Ang pagpakitag kalipay diha sa ginabuhat ni Jehova karon mahitungod sa atong espirituwal nga mga tagana, sa maanindot nga panag-igsoonay, ug sa pagkahimong iyang mga Saksi makapukaw ug positibong mga pagbati diha sa atong mamiminaw. Sa dihang maghisgot o mag-ampo bahin sa mga saad ni Jehova sa umaabot, kita kinahanglang mosulti nga kinasingkasing, nga makapabuhi sa maong mga saad ug makapasilsil ug pagsalig diha sa katumanan niini.
ASAYNMENT NUM. 1
6. Unsa ang Septuagint, ug nganong interesado niini ang mga Kristohanon? [si p. 307 par. 12–p. 310 par. 14] Ang “Septuagint” mao ang unang sinulat nga hubad sa Hebreohanong Kasulatan ngadto sa Grego, nga natapos sa ikaduhang siglo W.K.P. Gatosan ka direktang mga pagkutlo ug paghisgot sa Hebreohanong Kasulatan nga makaplagan diha sa Kristohanon Gregong Kasulatan ang gipasukad sa “Septuagint.” Dugang pa, ang mga tipik sa “Septuagint” sa unang Kristohanong mga panahon adunay ngalan sa Diyos.
7. Kinsa ang mga Masorete, ug unsang hinungdanong kontribusyon ang ilang nahimo sa paghubad sa Bibliya? [si p. 310 par. 18; p. 311 par. 20-1] Ang mga Masorete maoy mainampingong mga tigkopya sa Hebreohanong Kasulatan sa mga siglo human kang Jesus. Ang panaplin nga mga nota nga ilang gilakip diha sa ilang mga kopya sa Hebreohanong Kasulatan nagpasiugda sa mga kausaban nga gihimo sa unang mga tigkopya diha sa orihinal nga teksto. Sa ikaduhang bahin sa unang milenyo K.P., ang mga Masorete naghimog sinulat nga sistema nga magsilbing giya sa pagbasa ug paglitok sa Hebreohanong mga pulong, nga gisulat nga walay mga bokales. Ang Masoretikong teksto mao ang basehanan sa daghang Hebreohanong mga Bibliya; ang mga potnot diha sa “New World Translation” makadaghang naghisgot sa Masoretikong teksto.
8. Unsay nagtagana ug sukaranang teksto sa Hebreohanong seksiyon sa New World Translation sa Iningles, ug nganong ikaingon nga kining maong hubad awtoritatibo ug kasaligan? [si p. 312 par. 28, 30] Ang “Biblia Hebraica” ni Rudolf Kittel maoy nagtagana sa sukaranang teksto. Ang usa ka bag-ong edisyon, ang “Biblia Hebraica Stuttgartensia,” gigamit sa ulahi sa pagpasignunot sa mga potnot sa “New World Translation” nga gipatik sa 1984. Ingon sa gipakita diha sa mga potnot, daghang segundaryong mga tinubdan, lakip na ang “Septuagint” ug inilang mga codex, nagpadayag nga ang “New World Translation” maoy hubad sa mga eksperto ug resulta sa mainampingong pagpanukiduki.
9. Sa unsang paagi ang unang mga Kristohanon nagpasundayag ug mainitong tinguha sa pagpatik sa Pulong sa Diyos? [si p. 315 par. 1-5] Sugod sa Pentekostes 33 K.P., ang mga Kristohanon naghatag ug bug-os nga pagpamatuod isip pagsunod sa sugo ni Jesus sa Buhat 1:8. Ilang gidala ang Kristohanong pagtulon-an ngadto sa tanang suok sa nailhang kalibotan niadtong panahona. (Col. 1:23) Samtang ang uban nadasig sa pagsulat sa “maayong balita mahitungod kang Jesu-Kristo,” ang uban nahimong mga tigkopya. (Mar. 1:1; Mat. 1:1) Ang unang mga Kristohanon naggamit ug mga codex, nga susama sa modernong libro, aron matapo ang kanonikal nga mga sinulat alang sa pagtuon, reperensiya, ug pag-apod-apod.
10. Unsay gipadayag bahin sa Bibliya sa pagtuon mahitungod sa naglungtad nga mga manuskrito ug mga teksto sa Balaang Kasulatan? [si p. 320 par. 32] Kini nagpadayag nga ang mga teksto sa Hebreohanon ug Grego nga Kasulatan, nga atong nabatonan karon, susama gayod sa orihinal nga sinulat nga inspirado sa Diyos. (2 Ped. 1:20, 21) Bisan tuod ang hanas nga mga tigkopya dili inspirado, adunay daghang ebidensiya sa pagpamatuod sa pagkatinuod sa Bibliya.
SENEMANANG PAGBASA SA BIBLIYA
11. Ang kamatuoran ba nga si David wala tugoti sa pagtukod sa templo nagpaila nga wala uyoni ni Jehova ang mga gubat nga gisangka ni David? (1 Cron. 22:6-10) Wala. Ang katuyoan sa mga gubat nga gisangka ni David mao ang pagwagtang sa pagkadaotan ug niadtong supak sa pagkasoberano ni Jehova, pagpalapad sa teritoryo sa Israel hangtod sa mga utlanan nga gilatid sa Diyos, ug pagpatunhay sa pagkamatarong ug pakigdait. Apan, tungod kay ang katuyoan sa Gingharian ni Jehova mao ang pagpatunhay sa pakigdait, ang templo kinahanglang tukoron diha sa pakigdait pinaagi sa usa ka tawo sa pakigdait, si Solomon. [1, it-2-E p. 987 par. 1]
12. Sa iyang pag-ampo sa pagpahinungod sa templo, sa unsang paagi giila ni Solomon nga si Jehova wala lamang magtagad sa mga panginahanglan sa iyang mga alagad ingong pundok kondili nahibalo usab sa partikular nga situwasyon sa matag indibiduwal nga nahadlok kaniya? (2 Cron. 6:29, 30) Giila ni Solomon kon sa unsang paagi ang matag indibiduwal nga nahadlok sa Diyos adunay iyang kaugalingong kasakit nga antoson. Sa usa ka tawo kini tingali usa ka balatian. Sa lain, kagul-anan. Ang uban tingali nasubo tungod sa kamatayon sa usa ka minahal. Ang kawalay-trabaho, kalisod sa ekonomiya, ug mga problema sa pamilya mao usay komon nga mga kasakit niining malisod nga mga panahon. [4, w97 4/15 p. 4]
13. Unsa ang “pormag-kanding nga mga demonyo” nga gihisgotan sa 2 Cronicas 11:15? Klaro kaayo sa paggamit diha niining maong konteksto nga ang Hebreohanong termino nga gihubad ug “pormagkanding nga mga demonyo” nagtumong sa mga butang nga gisimba ug gihalaran ug kini may kalabotan sa bakak nga relihiyon. Tingali alang niadtong nagsimba niana, kini gituohan ingong balhiboong mga linalang nga pormag laking-kanding. [5, it-1-E p. 966; Rbi8 ptn.]
14. Tungod kay ang pagmando ni Baasa nagsugod “sa ikatulong tuig ni Asa” ug gidangtan ug 24 lamang ka tuig, sa unsang paagi maharmonya nato ang pagtungas ni Baasa “batok sa Juda” sa “ikakatloag-unom ka tuig sa paghari ni Asa”? (1 Hari 15:33; 2 Cron. 16:1) Bisan tuod ang uban nag-isip niana ingong sayop sa tigkopya ug nagtuo nga ang gitumong mao ang ika-16 o ang ika-26 ka tuig sa pagmando ni Asa, ang paghunahuna nga sayop kana wala kinahanglana aron magkaharmonya ang mga asoy. Ang Hudiyong mga komentarista nagkutlo sa “Seder Olam,” nga nagsugyot nga ang “ikakatloag-unom ka tuig” gibanabana gikan sa paglungtad sa bulag nga gingharian sa Juda (997 W.K.P.) ug, busa, sa aktuwal motumbas sa ika-16 ka tuig ni Asa. [6, it-1-E p. 184 par. 5]
15. Sa unsang paagi ang 2 Cronicas 20:22, 23 tataw nga nag-ilustrar kon unsay hapit nang mahitabo sa kalibotan ni Satanas? Ingon sa gipaila sa Pinadayag 17:16, 17, si Jehova adunay “hunahuna” bahin sa Dakong Babilonya, nga ang Kakristiyanohan mao ang labing dakog tulubagon niana. Iyang ipahinabo ang militaryong mga nasod nga membro sa Hiniusang Kanasoran nga makabaton niining mao gihapong “hunahuna,” nga mao ang pagliso batok sa bakak nga relihiyon aron sa pagpukan ug paglaglag kaniya. Ang dakong apostata nga sistema sa Kakristiyanohan, sama sa mga Edomhanon nga gikan sa Bukid Seir, pagadugmokon. [7, w85 1/1 p. 20 par. 17]