Ang mga Panalangin sa Payunir nga Ministeryo
1, 2. Unsang mga panalangin ang suod nga nalangkit sa payunir nga ministeryo, ug ngano?
1 “Nasayod ako nga walay laing buluhaton nga mohatag kanako sa katagbawan gumikan sa pagpakig-ambit sa kamatuoran ngadto sa uban,” nag-ingon ang usa ka payunir nga lalaki. Ang laing payunir nga babaye miingon: “Sa kataposan sa matag adlaw, maayo ang akong pagkatulog, ug ang akong kasingkasing tugob sa kalipay.” Kining maong mga payunir naghawas sa mga igsoong lalaki ug babaye sa tanang dapit nga nakatagamtam sa mga panalangin sa payunir nga ministeryo.—Prov. 10:22.
2 Ang pagtabang sa uban aron makabaton ug nagaluwas-kinabuhing kahibalo sa Pulong sa Diyos magdalag tinuod nga kalipay. (Buh. 20:35; 1 Tes. 2:19, 20) “Makapalipay ug makapalig-on sa pagtuo nga makita kon unsa ka gamhanan ang Pulong sa Diyos sa pagpalihok sa mga tawo sa paghimog mga kausaban sa ilang mga kinabuhi,” misulat ang usa ka dugay nang payunir nga lalaki. Oo, pinaagi sa pag-andam sa ilang kaugalingon sa pagtabang sa mga tawo ug pagdumalag mga pagtuon sa Bibliya, ang mga payunir makatagamtam ug mga panalangin nga sama niana.
3, 4. Sa unsang paagi ang pagpayunir nagtudlo sa usa sa pagsalig kang Jehova, ug sa unsang paagi kini makatabang sa usa nga motubo sa espirituwal?
3 Pagsalig Kang Jehova: Ang pagsalig sa espiritu sa Diyos sa adlaw-adlaw samtang ilang tumanon ang ilang ministeryo makatabang sa mga payunir sa pag-ugmad sa “bunga sa espiritu” ug magsilbing panalipod alang kanila. (Gal. 5:16, 22, 23) Dugang pa, sanglit gigamit nila kanunay ang Pulong sa Diyos, ang mga payunir kasagaran hanas sa paggamit sa Kasulatan sa pagdepensa sa kamatuoran ug sa pagpalig-on sa uban. (2 Tim. 2:15) Usa ka igsoong lalaki nga nakapayunir sulod na sa mga dekada miingon: “Ang pagpayunir nakatabang kanako nga makabaton ug halawom nga kahibalo sa Bibliya, usa ka kahibalo nga akong gigamit sa pagtabang sa daghang tawo nga makaila kang Jehova ug sa iyang mga katuyoan.” Pagkamagantihon!
4 Ang mga regular payunir kinahanglang mosalig usab kang Jehova sa daghang paagi. Mapalig-on ang ilang pagtuo samtang ilang makita kon sa unsang paagi siya nagapanalangin sa ilang mga paningkamot sa pagtagana sa ilang materyal nga mga panginahanglan. Usa ka 72-anyos nga lalaki nga regular payunir sulod na sa 55 ka tuig nag-ingon: “Si Jehova wala gayod magpahigawad kanako.” Dugang pa, pinaagi sa paghupot sa ilang kinabuhi nga yano, napanalipdan sa mga payunir ang ilang kaugalingon batok sa daghang kabalaka sa kinabuhi. Nakadani ba kini kanimo?—Mat. 6:22; Heb. 13:5, 6.
5. Sa unsang paagi ang pagpayunir makatabang sa usa nga masuod kang Jehova?
5 Makigsuod sa Diyos: Ang atong relasyon uban kang Jehova mao ang labing bililhong bahandi. (Sal. 63:3) Sa dihang kita bug-os nga makig-ambit diha sa ministeryo tungod sa atong gugma kang Jehova, ang maong relasyon mahimong mas masuod. (Sant. 4:8) Usa ka payunir nga lalaki sulod na sa kapin sa 18 ka tuig miingon: “Ang payunir nga pag-alagad nagtugot kanato sa ‘pagtilaw ug pagkakita nga si Jehova maayo,’ nga sa matag adlaw nagtukod ug mas nagkalig-ong relasyon uban sa atong Maglalalang.”—Sal. 34:8.
6. Unsay kinahanglang batonan sa mga payunir, ug kinsa gawas pa sa mga payunir ang makabenepisyo sa ilang kaugalingon?
6 Ang mga payunir kinahanglang anaa sa mga kahimtang nga magtugot kanila sa pagpayunir, ug kinahanglan usab silang magbaton ug lig-ong pagtuo, tinuod nga gugma sa Diyos ug sa isigkatawo, ug andam nga mohimog mga sakripisyo. (Mat. 16:24; 17:20; 22:37-39) Hinunoa, sumala sa gipamatud-an sa magilakong mga nawong sa mga payunir bisan diin, ang mga panalangin sa payunir nga ministeryo milabaw sa mga sakripisyo. (Mal. 3:10) Ang maong mga panalangin dili lamang limitado sa mga payunir, kondili ang ilang mga pamilya ug ang kongregasyon makabenepisyo usab ug dako gumikan sa maayong espiritu nga gipakita sa mga payunir.—Filip. 4:23.