Usa ka Malamposong Kampanya sa Pagsangyaw sa Gresya
DUGAY nang giatubang sa mga Saksi ni Jehova ang pagsupak sa Gresya. Ang pipila ka polis, korte, ug mga opisyal sa kagamhanan naglutos sa mga Saksi, kasagaran tungod sa pagpit-os gikan sa mga klero sa Gregong Ortodokso. Usahay ang katarongan mao ang balaod sa Gresya nga batok sa pagpangabig, sa ubang panahon kini mao ang gipasukad sa Bibliya nga dili pag-apil sa gubat o pagdawat ug mga pag-abunog dugo sa mga Saksi.—Isaias 2:2-5; Buhat 15:28, 29.
Sa pagpaningkamot nga mapalambo ang mas maayong pagsinabtanay taliwala sa matinud-anog kasingkasing nga mga awtoridad sa Gresya, ang mga 200 ka Saksi nga giila sa gobyerno sa Gresya ingong relihiyosong mga ministro, ingon man ang pipila ka abogadong mga Saksi, sa dili pa dugay mihimog tibuok-nasod nga kampanya. Gitanyag nila ang usa ka espesyal nga gidesinyong brosyur, nga nag-ulohang Jehovah’s Witnesses in Greece, ingon man ang librong Mga Saksi ni Jehova—Mga Magmamantala sa Gingharian sa Diyos. Gitagana usab nila ang usa ka bangan sa mga dokumento nga nagpasundayag nga walay legal nga basehanan ang paglutos sa mga Saksi ni Jehova. Giduaw sa mga Saksi ang mga hepe sa kapolisan, mga mayor, mga piskal, ug ubang mga opisyal.
Ang sanong? Gatosan ka maayong mga kasinatian. Tagda ang pipila ka pananglitan.
Ang hepe sa usa ka estasyon sa kapolisan sa West Macedonia miabiabi sa mga igsoon ug miingon: “Nahibalo ako kaninyo sa dugay nang panahon, . . . ug nakadayeg ako sa inyong kahusay. . . . Supak ako sa balaod sa pagpangabig, ug kon ako may awtoridad pa, wad-on nako kini.”
Ang mga hepe sa nagkalainlaing mga estasyon sa kapolisan sa daghang siyudad mihimog mga komento sama niini: “Gidayeg ko kamo sa inyong gihimong pag-alagad sa katilingban.” “Ang inyong komunidad wala gayod makahatag ug mga suliran alang sa mga polis; ginahimo ninyo ang usa ka pangkatilingbang buluhaton.” “Kami wala gayoy problema kaninyo. Gitahod namo kamo ug midayeg kaninyo.”
Sa Piraeus gisultihan sa usa ka hataas nga opisyal sa detektib sa kapolisan ang mga igsoon, nga may mga luha ang iyang mga mata, nga siya nahibalo sa pag-ampo diha sa ngalan ni Jehova nga Diyos pinaagi ni Jesu-Kristo. Dugang pa niyang gisorprisa ang mga Saksi sa dihang iyang gisultihan sila nga siya nasayod nga sila naglaom ug pipila ka paglutos sa dili pa ang Armageddon, ug siya naglaom nga ang Diyos mogamit kaniya sa pagtabang kanila nianang panahona! Gidawat niya ang pagdapit sa mga igsoon sa dugang nga mga panaghisgot.
Misanong ang mga Opisyal sa Kagamhanan
Usa ka mayor sa Thessaly miingon bahin sa librong Mga Magmamantala: “Kini angayng may dapit diha sa librariya sa munisipyo—usa ka prominenteng dapit!” Gikuha dayon niya ang mga libro sa estante ug gibutang ang librong Mga Magmamantala didto aron makita ang hapin niini.
Sa amihanang Gresya usa ka mayor mainitong miabiabi sa pagduaw sa mga igsoon ug miingon: “Kamo ang kinamaayohang mga tawo nga buot nako sa akong munisipyo.” Usa ka buotang mayor sa amihanang Euboea miingon sa mga igsoon: “Ako opisyal sa kasundalohan kanhi. Apan kamo—gidayeg ko kamo pag-ayo.” Siya maikagong miuyon sa mga punto nga gitanyag sa mga Saksi. Sa dihang gipakita nila ang listahan sa mga libro nga gipatik sa Watch Tower Society, siya miingon: “Kon ako mosaad sa pagbasa sa tanan niini, ihatag ba ninyo kini kanako?” Sila mitubag: “Aw siyempre—kini imoha na!” Siya nalipay ug halos dili niya buot nga mobiya ang mga igsoon.
Sa kasikbit nga lungsod sa Attica, usa ka mayor malipayong midawat sa literatura nga gitanyag sa mga igsoon ug naghangyo kanila nga magpadayon sa pagdala kaniya sa mga publikasyon sa Sosyedad. Samtang sila talilakaw na, siya miingon kanila: “Ang mga tawo nahigawad pag-ayo sa mga politiko ug nangita sa tinuod nga kamatuoran sa laing dapit. Segurado ako nga sukad karon kamo magmapuliki kaayo tungod kay nabatonan ninyo ang kamatuoran.”
Misanong ang mga Piskal
Ang mga igsoon nga miduaw sa deputadong piskal sa amihanang Gresya nahinumdom: “Nakadayeg siya sa among mga publikasyon ug sa presentasyon, ingon man sa among gihimong mga paningkamot aron mapaneguro nga ang among mga tawo dili kay walay mahimo sa dihang moatubang sa seryosong isyu bahin sa pag-abunog dugo. Sa kataposan gipasalamatan niya kami ug mainitong mihatag ug komendasyon kanamo sa paghimog unang lakang sa pagduaw ug pagpahibalo kaniya. Sa ulahi, among nahibaloan nga sa miaging upat ka tuig iyang gipatawag ang mga polis ug nagsugo sa pagdakop sa duha ka igsoon nga nakigbahin sa pag-alagad sa kanataran.”
Duha ka abogadong Saksi nga miduaw sa mga buhatan sa piskal sa Atenas ang nahingangha nga makita ang usa ka ilado ug gitahod pag-ayong edarang piskal nga miduol kanila. Gidala niya sila sa kilid ug gisultihan sila nga ang balaod batok sa pagpangabig walay basehanan ug nagpahinabog kalibog sa sistema sa korte sa Gresya. Gipasalamatan niya sila uban ang mainitong paglamano.
Sa amihanang Gresya, usa ka piskal ang mahigalaon kaayo ug midawat ug literatura. Samtang iyang gipakli ang mga panid sa librong Mga Pangutanang Gisukna sa mga Batan-on—Mga Tubag nga Mosaler, siya nahingangha nga makita ang nagkalainlaing mga kapitulo sa kaundan. Siya miingon: “Ang gipresentar niining libroha, wala nako makita sa tanang simbahan sa Gregong Ortodokso.”
Usa ka piskal sa Boeotia miadmiter nga siya, sa miagi, mipakanaog ug mga mando sa mga pag-abunog dugo sa mga Saksi nga batok sa ilang kabubut-on. Apan human sa pagpatin-aw sa mga igsoon uban kaniya niining bahina, siya miingon: “Dili na gayod ako magpakanaog sa maong mando sa umaabot!” Siya mihukom nga ang lokal nga Hospital Liaison Committee sa mga Saksi ni Jehova ang konsultahon aron nga ang tanang kapilian sa dugo masulayan. Siya malipayong midawat sa librong Gisukna sa mga Batan-on.
Misanong ang mga Tagdumala sa Librariya
Ang materyal gitanyag usab sa daghang tagdumala sa librariya. Sa usa ka librariya sa Atenas, usa ka matinahorong tagdumala sa librariya midawat ug literatura ug mikomento: “Maayo kaayo nga kamo nagdala kanamo sa inyong mga basahon tungod kay kadaghanan sa mga basahon nga ania sa among librariya maoy batok kaninyo. . . . Usa ka pari nasuko pag-ayo nga makita ang inyong mga basahon sa librariya. . . . Walay sapayan niana. Ang tanang hunahuna angayng madungog.”
Usa ka opisyal nga diha sa usa ka librariya sa munisipyo sa Crete, nga nakaila sa mga Saksi ni Jehova sa usa ka kampo militar, miingon sa mga igsoon nga siya nakadayeg sa mga Saksi sa dili pagpakigbahin sa gubat. Siya nangutana kanunay sa iyang kaugalingon, ‘Nganong paantoson pa man kining mga tawhana?’ Midawat siyag literatura gikan sa mga igsoon ug miingon sa ilang bag-ong kampanya: “Nahimo ninyo ang maayo kaayong buhat ug angay unta nga gihimo ninyo kini sa mga tuig pang miagi. . . . Sa Gresya adunay daghang pagpihig.” Siya mihangyo sa mga igsoon nga duawon siya pag-usab sa dili madugay.
Sa panahon niining linaing kampanya, ang mga igsoon nakapahimutang ug kapin sa 1,000 ka Mga Magmamantala nga libro, 1,600 ka brosyur nga Jehovah’s Witnesses in Greece, ingon man sa gatosan ka libro ug mga magasin. Labi pang maayo, ilang gikaestorya nga nawong-sa-nawong ang gatosan ka mga opisyal sa Gresya. Ginalaoman karon sa matinumanong mga alagad ni Jehova sa Gresya ug sa tibuok nga yuta nga ang matinud-anog kasingkasing nga mga awtoridad sa Gresya mohimog mas timbang nga panglantaw bahin sa mga Saksi ni Jehova.