Pag-uswag Uban sa Panalangin ni Jehova

GIPASIUGDA sa usa ka programa sa pagpahinungod sa gabii sa Septiyembre 18, 1995, nga si Jehova nga Diyos nagapanalangin gayod sa pag-uswag sa iyang mga Saksi sa lugar sa ilang punoang mga buhatan sa kalibotan sa Brooklyn, New York.

Kapin sa 6,000 ang namati sa programa sa pagpahinungod. Sila nagtigom sa Brooklyn, diin gihimo ang programa, ingon man sa ubang mga lugar, lakip na ang dakong pasilidad sa mga Saksi ni Jehova duol sa Patterson ug Wallkill, New York, ug sa ilang sanga duol sa Toronto, Canada. Sa mga lugar gawas sa Brooklyn nadungog nila ang programa pinaagi sa mga linya sa telepono.

Usa ka Makapalipay-sa-Kasingkasing nga Programa

Ang mga Bethelite, sumala sa pagtawag sa boluntaryo nga mga trabahante, nga namati sa programa naglangkob sa usa ka dakong bahin sa pamilyang Bethel sa tibuok yuta nga kapin ug 16,400 ka membro. Ang maong mga membro nag-alagad sa duolan sa usa ka gatos ka nasod, diin sila nagpatik ug literatura sa Bibliya ug nagtaganag mga serbisyo sa pagsuportar alang sa kapin sa 78,600 ka kongregasyon sa mga Saksi ni Jehova sa kalibotan.

Grabe ang kahinam sa dihang nagsugod ang programa sa 6:30 s.g. pinaagig awit, nga gisundan sa pag-ampo ni Karl Klein. Ang tsirman sa programa, si Lloyd Barry, mainitong miabiabi sa tanan pinaagi sa mubong mga komento bahin sa kahinungdanon sa okasyon. Girepaso ni Albert Schroeder ang leksiyon sa Bantayanang Torre sa semana, ug dayon si Daniel Sydlik nagpakigpulong sa temang “Ang Atong Sagradong Pag-alagad sa Bethel.” Kining unang mga nagpakigpulong sa programa tanan maoy mga membro sa Nagamandong Lawas sa mga Saksi ni Jehova.

Ang nagsunod duha ka bahin sa programa​—“Pag-atubang sa Atong Nagdakong Panginahanglag Puy-anan, 1974-1995,” ug “Talagsaong mga Bahin sa Pagbag-o sa Bethel ug Konstruksiyon sa Brooklyn”​—naghisgot sa talagsaong mga bahin sa konstruksiyon o sa pagbaton sa mga tinukod nga gipahinungod. Ang mga pakigpulong naghatag ug pagtagad sa bag-o pang natapos nga puy-anang tinukod nga gipuy-an karon sa mga usa ka libo ka Bethelite. Kining 115 metros nga gihabogong puy-anan sa 90 Sands Street nagsumpay sa pundok sa mga tinukod sa pabrika sa pag-imprinta.

Gipasiugda sa programa ang pakigpulong sa pagpahinungod ni Milton Henschel, presidente sa Watch Tower Bible and Tract Society. Iyang gipasiugda ang mga panig-ingnan sa Bibliya sa pagpahinungod sa mga tinukod nga gamiton sa pag-alagad kang Jehova. Human sa usa ka awit ang programa gitapos pinaagig pag-ampo ni Carey Barber, nga membro usab sa Nagamandong Lawas. Apan unsa ang pipila ka talagsaong mga bahin sa programa?

Ang mga Tinukod Gipahinungod

Ang magtatan-aw sa Bethel Home, si George Couch, nagbatbat nga 17 ka puy-anan ang gidugang sukad sa kataposang pagpahinungod sa puy-anan sa Bethel sa Brooklyn niadtong Mayo 2, 1969.a Kini maoy bag-ong tinukod nga mga balay o mga tinukod nga gipalit ug gibag-o. Kini nga pagpahinungod sa pagkatinuod maoy alang niining 17 ka puy-anan, sa duha ka gagmayng tinukod​—nga gipalit sa katuigang 1940 apan gibag-o ingong mga puy-anan sa Bethel​—ingon man sa pabrika ug sa mga pasilidad sa buhatan nga gitukod o gipalit sukad sa pagpahinungod sa ehekutibong mga opisina sa mga Saksi ni Jehova niadtong Marso 15, 1982.b

Ang kinadak-an sa mga tinukod nga gipahinungod mao ang usa sa 360 Furman Street. Orihinal nga gitukod niadtong 1928, gipalit kini sa mga Saksi ni Jehova sa Marso 15, 1983, ug bug-os nga gibag-o. Kini may 93,000 metro kuwadrado nga gidak-ong salog, o duolan sa 9 ka ektarya. Ang ubang mga tinukod nga gilakip sa pagpahinungod mao ang pabrika sa 175 Pearl Street ug dagkong mga garahe nga gitukod sa bag-o pang katuigan.

Kon Nganong Gikinahanglan ang Dugang Puy-anan

Niadtong 1969, sa dihang gipahinungod ang kataposang puy-anan sa Bethel sa Brooklyn, dihay kinatas-ang gidaghanon nga 1,336,112 ka Saksi nga nagsangyaw sa maayong balita bahin sa Gingharian sa Diyos sa tibuok yuta. Apan sa 1995 dihay 5,199,895 nga nagabuhat niana, kapin sa tulo-ug-tunga ka pilo nga gidaghanon! Busa, aron katagan-an ang nagdakong panginahanglan sa mga literatura sa Bibliya, ang pamilyang Bethel sa Brooklyn midaghan gikan sa 1,042 ka regular nga mga membro niadtong 1969 ngadto sa kapin sa 3,360, nga nagpuyo karon sa 22 ka puy-anan!

Gihisgotan ni George Couch kon sa unsang paagi ang panginahanglan sa dugang puy-anan natagan-an gikan sa 1974 ngadto sa 1995. Sayo sa katuigang 1970, ubay-ubayng andana sa duol nga Towers Hotel ang gipaabangan sa mga Saksi ni Jehova aron pasak-an sa nagdakong pamilyang Bethel. Sa Disyembre 1973, si Nathan Knorr, presidente niadto sa Watch Tower Society, misulat sa Bethel Office ug sa nagdumala sa Towers, nga nag-ingon nga ang Sosyedad nagplano nga ‘mohawa sa Towers Hotel sa Oktubre 1, 1974.’

Si Brader Couch nag-ingon nga siya nakurat tungod kay walay lugar nga kasak-an sa mga Bethelite nga nagpuyo sa Towers. Nakurat usab ang nagdumala sa Towers, sanglit nag-agad sila sa kuwarta nga abang sa Sosyedad aron sila makapadayon. Ang resulta mao nga ang nagdumala sa Towers nag-awhag sa mga Saksi ni Jehova sa pagpalit sa hotel. “Kamo nagkadaghan sukad miabot kami sa kasilinganan,” matod nila, “ug gikinahanglan ninyo ang tinukod.”

“Puno kini sa nangabang,” mao ang tubag sa mga hawas sa Sosyedad. “Kon kini among paliton, papuy-an namo kini sa among mga tawo.”

“Bakantehon namo ang tinukod alang kaninyo,” misaad ang nagdumala sa Towers. Aw, wala magdugay human niadto gipalit sa mga Saksi ni Jehova ang tinukod nga Towers sa angayng prisyo. “Nganong misulat si Brader Knorr niadtong sulata?” gisukna ni Couch ang iyang naghinamhinam nga mga tumatambong. “Lagmit siya wala mahibalo mismo, apan mao kana ang hinungdan nga napalit ang Towers Hotel sa Watch Tower Society.”

Ang mamumulong nagbatbat usab kon sa unsang paagi gipalit sa mga Saksi ni Jehova ang 97 Columbia Heights, ang lugar niadto sa iladong Margaret Hotel, tabok lang sa kalye gikan sa orihinal nga Bethel Home. Ang lugar maayo, sanglit dali kining ikonektar sa pundok sa mga tinukod sa Bethel pinaagig tunel sa ilalom sa dalan. Niadtong Pebrero 1980, sa dihang ang tinukod gikamulo pa ug ayo, kini nasunog. Unya, tungod kay ang tag-iya naglisod sa pagtukod ug bag-ong tinukod sa maong lugar, gibaligya niya ang yuta sa mga Saksi ni Jehova.

Si Brader Couch nag-ingon: “Sa pagkatinuod ang matag usa niini nga mga tinukod adunay makaiikag nga sugilanon nga nagpunting sa usa ka butang​—nga si Jehova nga Diyos mao ang usa nga nagtudlo sa makitang organisasyon aron mapalit kanang partikular nga tinukod.”

Ang Sugilanon Luyo sa 90 Sands

Ang labing bag-o ug ang labing dakong puy-anan mao ang 90 Sands Street. Sa dihang ang propiedad gipalit sa mga Saksi ni Jehova niadtong Disyembre 1986, kini ang gitarokan sa dakong pabrika sa 160 Jay Street.c Ang pabrika giguba, ug niadtong Agosto 30, 1990, ang pamilyang Bethel gisultihan nga gihatag na ang permiso sa 30-ka-andanang puy-anang pasilidad sa maong lugar.

Sa interbiyo nga gidumala ni Theodore Jaracz nga membro sa Nagamandong Lawas, ang magtatan-aw sa pabrika sa Brooklyn sa Sosyedad, si Max Larson, nagbatbat kon sa unsang paagi gihatag ang permiso sa pagtukod sa puy-anan sa 90 Sands Street. Ang nahitabo balik sa 1965, nagpatin-aw si Brader Larson, hinungdanon kaayo.

Balik niadto ang Sosyedad buot nga magtukod ug napulo-ka-andana nga pabrika diha sa bloke nga kasikbit sa ubang pabrika niini, apan ang pagsona sa maong bloke nagtugot lamang ug duha-ka-andana nga konstruksiyon. Miuyon ang usa ka arkitekto sa pag-andam ug mga plano sa pagtukod alang sa bag-ong giplanong pabrika, apan siya miingon: “Dili ko lisodlisoron ang akong kaugalingon pinaagi sa pagpresentar niini ngadto sa hunta.” Siya kombinsido nga dili bag-ohon sa Board of Standards and Appeals ang ilang mga regulasyon sa pagsona sa bloke. Sa dihang ang mga plano sa pagtukod giaprobahan, siya nakaingon: “Sa unsang paagi nakakuha kamo niana!”

Ang katarongan, nagpadayon si Larson, mao nga sa dihang gisona pag-usab kana nga bloke alang sa among napulo-ka-andanang pabrika, ang duol nga mga bloke gisona usab, lakip ang usa ka tinukod sa 160 Jay Street. Ug, sa katingalahan, ang pagsona-pag-usab nagtugot alang sa usa ka hotel. Apan, miingon si Larson, kadto maoy butang nga walay usa ang nakamatikod​—labing menos hangtod sa mga 25 ka tuig sa ulahi, human nga kami misugod sa pagpangitag lugar nga pagatukoran ug bag-ong puy-anang Bethel. Dayon ang regulasyon sa pagsona nadiskobrehan pag-usab!

Gipatin-aw ni Brader Larson ang nahitabo: “Sa dihang giandam namo ang mga plano sa among 30-ka-andanang puy-anan ug gidala kini sa departamento sa pagtukod, kami gisultihan: ‘Dili kamo makatukod ug puy-anan didto. Pulos kadto mga pabrika, ug sila dili mag-usab sa pagsona alang kaninyo.’

“‘Dili na kinahanglang usbon nila kana,’ gipahibalo namo ang mga opisyal. ‘Gisona na kini alang sa usa ka hotel.’ Sa dihang ilang gitan-aw ang mga rekord, halos dili sila makatuo! Aw, kana ang hinungdan nga nabatonan namo ang 30-ka-andanang tinukod,” mihinapos si Larson.

Dayag ang Panalangin ni Jehova

Usa ka salmista sa Bibliya misulat: “Gawas nga si Jehova ang magatukod sa balay, kawang lamang ang kahago niadtong mga nagatukod niini.” (Salmo 127:1) Tin-aw, ang panalangin ni Jehova anaa sa kalihokan sa pagtukod sa mga Saksi ni Jehova sa pagpauswag sa tibuok yutang buluhaton sa pagsangyaw ug pagpanudlo nga gisugo ni Jesus nga pagabuhaton sa iyang mga sumusunod.​—Mateo 24:14; 28:19, 20.

Kadtong nakapribilehiyo sa pagkadungog sa programa sa Septiyembre 18, 1995, nalipay sa ebidensiya sa maong panalangin diha sa pag-uswag sa punoang mga buhatan sa kalibotan sa mga alagad ni Jehova. Ang katawhan ni Jehova magmasaligon sa iyang mapinadayonong panalangin samtang sila nagapadayon sa pagbuhat sa iyang gisugo.

[Mga footnote]

[Hulagway sa panid 23]

90 Sands St. • 1995

[Hulagway sa panid 24, 25]

Pila sa dugang mga puy-anan nga gipahinungod

97 Columbia Hts. • 1986

Bossert Hotel, 98 Montague St. • 1983

34 Orange St. • 1945

Standish Hotel, 169 Columbia Hts. • 1981

67 Livingston St. • 1989

108 Joralemon St. • 1988

Towers Hotel, 79-99 Willow St. • 1975

[Hulagway sa panid 26]

175 Pearl St. • 1983

69 Adams St. • 1991

360 Furman St. • 1983