Mga Pangutana Gikan sa mga Magbabasa
Usahay madunggan namo ang mga igsoon nga maghisgot o mag-ampo nga moabot ang Gingharian sa Diyos dinhi sa yuta. Husto ba kini nga pahayag?
Sa tukmang pagkasulti, dili kini Kasulatanhong paagi sa pagpahayag niana. Ang Gingharian sa Diyos maoy langitnon. Busa, si apostol Pablo nakasulat: “Ang Ginoo magpahigawas kanako gikan sa tanang buhat nga tuman-kadaotan ug magluwas kanako alang sa iyang langitnong gingharian. Ngadto kaniya ang himaya hangtod sa kahangtoran. Amen.”—2 Timoteo 4:18; Mateo 13:44; 1 Corinto 15:50.
Ang Gingharian natukod sa langit niadtong 1914, ug dili gayod kini ibalhin ngadto sa napasig-uling yutan-ong Paraiso o bisan diin. Si Jesu-Kristo mao ang Hari sa Gingharian. Ingong Hari, si Jesus adunay awtoridad ibabaw sa mga manulonda. Busa, ang iyang tukmang dapit sa pagmando maoy diha sa tuong kamot sa Diyos sa mga langit. Ang dinihogang mga Kristohanon moduyog kaniya ingong mga hari ug mga saserdote sa langit.—Efeso 1:19-21; Pinadayag 5:9, 10; 20:6.
Nan, nagpasabot ba kini nga dili na nato ipahayag sa Diyos ang mga pangamuyo nga makaplagan sa bahin sa Pag-ampo sa Ginoo nga nag-ingon: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta”? (Mateo 6:10) Sa kaatbang, ang maong pag-ampo maoy tukma ug tugob gihapon sa kahulogan.
Ang Gingharian sa Diyos molihok pa sa usa ka mahukmanong paagi bahin niining yutaa, ug mao kini ang anaa sa atong hunahuna sa dihang mag-ampo kita ug maggamit sa mga pahayag nga susama sa mga pamulong sa Pag-ampo sa Ginoo. Pananglitan, ang Daniel 2:44 nagtagna nga ang Gingharian “moanhi” aron sa paglaglag sa tanang nasod ug mopuli sa pagmando niining yutaa. Ang Pinadayag 21:2 naghisgot sa Bag-ong Jerusalem nga manaog gikan sa langit. Ang bag-ong Jerusalem nalangkoban sa 144,000 ka dinihogang mga Kristohanon nga mahimong pangasaw-onon ni Kristo. Sila usab maoy kaubang mga manununod ni Jesus sa Gingharian. Busa ang Pinadayag 21:2 nagbatbat sa ilang pagliso sa pagtagad sa yuta, nga mosangpot sa dagkong mga panalangin alang sa matinumanong katawhan.—Pinadayag 21:3, 4.
Hangtod nga kini ug ang ubang kahibulongang mga tagna matuman, padayong tukma ang pag-ampo kang Jehova nga Diyos sumala sa mga pulong ni Jesus, “Paanhia ang imong gingharian.” Apan angay natong hinumdoman nga ang Gingharian dili moanhi sa planetang Yuta sa literal nga diwa. Ang Ginghariang kagamhanan nahimutang sa langit, dili sa yuta.
[Picture Credit Line sa panid 31]
Yuta: Binase sa letrato sa NASA